1926—Lilemo Tse Lekholo Tse Fetileng

Selemong sa 1926, Jehova o ile a sebelisa Kreste e leng hlooho ea phutheho, ho etsa hore ho hlake hore mosebetsi oa boboleli ke oona o tlamehang ho tla pele bophelong ba Mokreste. E le ho thusa ka mosebetsi oa boboleli, “mohlanka ea tšepahalang le ea bohlale” o ile a lokisetsa bahlanka ba Molimo lingoloa tse ncha, a etsa liphetoho libokeng a ba a fana ka kutloisiso e ntlafalitsoeng ea boikarabelo ba Mokreste. (Mat. 24:45) Kreste o ile a etsa bonnete ba hore bahlanka ba Molimo ba ba le mehaho e mecha le thepa eo ba e hlokang e le hore ba etse mosebetsi oa boboleli.

SENGOLOA SE SECHA LE LIPHETOHO LIBOKENG

Ka April, The Golden Age (eo hona joale e bitsoang Tsoha!) e ile ea re ho tl’o lokolloa buka e ncha e nang le sehlooho se reng Deliverance. Buka ena e ne e tl’o nkela buka e ka sehloohong e neng e sebelisoa mosebetsing oa tšimo e bitsoang Studies in the Scriptures. E le hore ho tle ho be le libuka tse lekaneng, bara ba bo rona ba Bethele ba ile ba reka mochine o mocha o hatisang o neng o khona ho hatisa libuka tse 22 ka motsotso. Liithuti Tsa Bibele li ile tsa khona ho fa motho e mong le e mong eo li neng li mo pakela buka ena e ncha.

Ka lilemo tse ngata, Liithuti Tsa Bibele li ne li ithuta libuka tsa Studies in the Scriptures libokeng. Empa ho tloha ka May, li ile tsa ithuta lihlooho tsa Molula-Qhooa. Liphello e ile ea e-ba life?

Phutheho e ’ngoe e ile ea ngolla Mor’abo rona Rutherford lengolo, ea re: “Ka Lisontaha re ithuta lihlooho tseo re li abetsoeng ke Mokhatlo. Re ananela haholo hore ebe re khona ho fumana leseli le lecha hang feela ha le fumaneha.”

“Leseli le lecha” kapa kutloisiso e ntlafalitsoeng, e ile ea thusa Liithuti Tsa Bibele hore li phathahane ka mosebetsi oa boboleli. Ka mohlala, sehlooho se seng se ile sa hlalosa hore ho ntlafatsa botho ba rona, ho ba mosa le ho ba batho ba buisang batho hantle, ha se tsona lintho tsa bohlokoa ka ho fetisisa ho Mokreste oa ’nete. Sehlooho seo se ile sa hlalosa hore Jehova o laetse Bakreste hore e be lipaki tsa hae. Kahoo, kaha Bakreste ba rata Jehova, e mong le e mong o lokela hore a mamele litaelo tsa hae le hore a be malala-a-laotsoe ho bolela.

Sehlooho se seng se reng, “Sacrifice and Service,” se ile sa hatisa taba ea hore Bakreste ba ’nete ba bontša hore ba rata Jehova ka hore ba mo sebeletse ka botšepehi. Sehlooho seo, se ile sa khothalletsa Liithuti Tsa Bibele tsohle hore li etse mosebetsi oa Morena ka mafolofolo ’ohle, ka tieo le ka cheseho le hore li bolelle batho ba bangata ka hohle kamoo ho ka khonehang.—Esa. 43:​10, 12; Mat. 24:14.

Liphetoho tsena li ile tsa etsoa hang-hang liphuthehong. Libeke tse seng kae hamorao, Molula-Qhooa (oa Senyesemane) oa July 15, 1926, o ne o e-na le lengolo le reng: “Lihlooho tsena tse sa tsoa lokolloa, li re tšelisitse tsa ba tsa re khothatsa haholo. Ha re sa bala Melula-Qhooa feela, empa re se re ithuta eona.” Le ile la boela la re, “motho e mong le e mong o batla ho fana ka karabo libokeng ’me phutheho e rua molemo haholo.”

LIKOPANO TSA SETEKERE LI KHOTHALLETSA HO BOLELA LITABA TSE MONATE

Mafelong a May, boholo ba Liithuti Tsa Bibele bo ile ba ea kopanong e London, Engelane. Ho ile ha e-ba le seteraeke sa basebetsi Brithani ’me se ile sa etsa hore ho be thata hore re hire likhoebo tse hatisang, kahoo bara ba bo rona ba Bethele e Brooklyn ba ile ba sebetsa ka mor’a lihora tsa mosebetsi e le hore ba ka etsa libukana tse eketsehileng tse 117 000 bakeng sa kopano, tse nang le sehlooho se reng The Standard for the People.

Ka Moqebelo oa la 29 May, bara ba bo rona ba ile ba sebelisa libukana tseo. Lenaneo la kopanong letsatsing leo le ile la fana ka khothalletso, la re: “Seithuti se seng le se seng sa Bibele se memeloa hore se pake ka Jesu le ka ’Muso. E-eang Phaleising ea Alexandra e sa le hoseng ’me le itlalehe ho bara ba bo rona ba Lefapha la Tšebeletso.”

Ho ile ha tsamaisoa libukana tse ka holimo ho 100 000. Molula-Qhooa (oa Senyesemane) oa July 15, 1926, o ile oa re: “Bara le barali ba bo rona ba ne ba thabile hona hoo. Ba ne ba utloa hore ba entse sohle seo ba ka se khonang hore ba mamele taelo ea Jehova ea hore e be lipaki tsa hae.”

Letsatsing le hlahlamang, holong ea Royal Albert, Mor’abo rona Rutherford o ile a fana ka puo e neng e bua ka hore na ho tla etsahala’ng ka mebuso ea lefatše. Ka mor’a metsotso e seng mekae mamati a butsoe, batho ba 13 000 ba ile ba tlatsa holo tsoete! Kahoo, batho ba neng ba sa khone ho kena ka holong, ba ile ba mamela lenaneo ka lipikara ba le ka ntle.

Puong ea hae, Mor’abo rona Rutherford o ile a hlalosa hore mebuso ea lefatše e ne e hloleha hobane e ne e sa amohele Jehova le ’Muso oa hae. Mor’abo rona Rutherford o ile a boela a nyatsa mokhatlo oa Selekane sa Lichaba a ba a re o ke ke oa hlola o e-ba teng.

BARA BA BO RONA BA BOLELA LITABA TSE MONATE INDIA

Ha Mor’abo rona Rutherford a ntse a le kopanong London, o ile a kopana le Mor’abo rona Edwin Skinner, eo e neng e le morekisi oa libuka tsa bolumeli (hona joale o bitsoa pula-maliboho) ea tsoang Sheffield, Engelane. Ka mor’a kopano, Mor’abo rona Rutherford o ile a kopa Mor’abo rona Edwin hore a tl’o mo bona London.

Mor’abo rona Skinner o ile a re: “Ke ile ka hla ka nahana hore Mor’abo rona Rutherford o tl’o nkopa hore ke ee naheng e ’ngoe. Letsatsing le hlahlamang ke ile ka ea ho eena London . . . , ke se ke ntse ke itjoetsitse hore ha a ka re ke e’o sebeletsa naheng e ’ngoe, ke tla lumela hang-hang. Ekare ke ne ke tseba. Mor’abo rona Rutherford o ile a mpotsa a re ‘U ikutloa joang ka ho ea India?’ Ke ile ka mo araba ka re: ‘Neng?’”

Libeke tse tharo ka mor’a moo, ka July, Mor’abo rona Edwin le ’moleli e mong ea chesehang e leng Mor’abo rona George Wright, ba ile ba ea India ka sekepe. Mor’abo rona Skinner o ile a sebeletsa e le mohlanka oa lekala, ’me a hlokomela mosebetsi o etsoang Afghanistan, Burma (Myanmar), Ceylon (Sri Lanka), India le Persia (Iran). Mor’abo rona Skinner o ile a sebeletsa India ka lilemo tse 64 ho fihlela a qeta tšebeletso ea hae mona lefatšeng ka 1990.

BALEBELI BA TSAMAEANG BA ETELLA PELE MOSEBETSI OA BOBOLELI

Ho tloha ka 1894, mokhatlo o ile oa qala ho romela balebeli ba tsamaeang e le hore ba ka kopana le lihlopha tsa Liithuti Tsa Bibele. Ka July 1926, mosebetsi oa baemeli bana o ile oa fetoha. Liketelo tsa bona li ne li nka letsatsi le le leng empa li ile tsa eketsoa hore li nke matsatsi a mabeli, ’me ba ne ba lokela ho etsa lihora tse lekholo ka khoeli.

Mor’abo rona George Draper, e leng molebeli ea tsamaeang, o ile a ngolla Watchtower lengolo a hlalosa hore bara ba bo rona kaofela ho akarelletsa le balebeli ba tsamaeang, ba ne ba hloka hore ba be malala-a-laotsoe hore ba bolelle batho litaba tse monate. (Esa. 56:10) Ba ne ba ka ba malala-a-laotsoe ka hore ba ithute Molula-Qhooa. Mor’abo rona Draper o qetile tšebeletso ea hae ea lefatšeng ka 1938.

KOPANO EA SETEREKE NEW YORK CITY

Kopano ea ho qetela e kholo selemong seo e ile ea tšoaroa ka la 14-18 October 1926, New York City. Likoranta tsa New York City li ile tsa lumela ho bapatsa sehlooho sa puo ea Mor’abo rona Rutherford se neng se re “Earth’s Greatest Conflict Near.” Leha ho le joalo, likoranta tse ’maloa tse kholo li ile tsa hana ho bapatsa kopano ka motsotso oa ho qetela.

Bara ba bo rona ba ile ba etsa qeto ea ho bolella batho hore na likoranta li entse’ng. Ka Labohlano la la 15 October, Mor’abo rona R. J. Martin o ile a lokolla pampitšana e nang le sehlooho se reng Against the People, e etselitsoeng ho pepesa lintho tse mpe tseo bo-ralikoranta ba li entseng le ho bapatsa puo ea Mor’abo rona Rutherford. Mor’abo rona Martin o ile a re: “Re se re qalile ho ikhatisetsa ’me bara ba bo rona ba Bethele ba tla sebetsa ka thata ho hatisa lipampitšana ho fihlela ba entse likopi tse 1 250 000 tsa molaetsa ona o eang ho batho o hlahang pampitšaneng ena.” Re tl’o kopa bara le barali ba bo rona kopanong ena hore ba tsoe ba e’o fa batho lipampitšana tsena. Ha kopano e fela, bara ba bo rona ba ile ba qalella ho tsamaisa lipampitšana. Mantsiboeeng ao ba ne ba tsamaisitse lipampitšana tse 300 000.

Ka Moqebelo le Sontaha, ho ile ha tsamaisoa lipampitšana tse ka bang milione. Ho ekelletsa moo, bara bana ba bo rona ba chesehang ba ile ba tsamaisa libuka tsa Deliverance tse 3 783 le libukana tsa The Standard for the People tse 35 140.

Ka Sontaha sa la 17 October, ka hora ea boraro thapama, batho ba ka bang 12 000 ba ile ba mamela puo ea Mor’abo rona Rutherford. Ka mor’a puo eo, batho ba neng ba e-na le thahasello ba ile ba kopa ho fuoa lintlha tse eketsehileng. Ho ile ha tsamaisoa libuka tse fetang likete tse robong, ho ne ho e-s’o ka ho tsamaisoa libuka tse ngata hakaalo kopanong pele ho moo.

MOHAHO O MOCHA O 117 ADAMS STREET

Batho ba bangata ba ne ba batla lingoloa tsa rona. Kahoo, bara ba bo rona ba Brooklyn ba ile ba hlokomela hore ho hlokahala ho be le sebaka se seholoanyane sa ho hatisa. Ka lilemo tse ngata, ba ne ba hirile mohaho o 18 Concord Street, empa mohaho ona o ne o sa re thuse ho hatisa lingoloa tse eketsehileng. Bara ba bo rona ba ile ba reka setša Adams Street, se seng hole haholo le mohaho oo ho neng ho hatisoa ho oona. Ba ile ba qala ho haha mohaho o nang le mekato e robeli, ’me mohaho ona o ne o le moholo ho lekana mosebetsi oa ho hatisoa o neng o tla etsoa.

Mohaho ona o neng o le 117 Adams Street, o ne o tla sebelisoa ka selemo sa 1927, ’me o ne o tla thusa bara ba bo rona hore ba itokisetse keketseho e neng e tla latela. Ho tloha ka 1927, batho ba bangata ba ile ba qala ho ikamahanya le Liithuti Tsa Bibele. Mokhatlo o ile oa tsoela pele ho ntlafala hoo ka 1931, Liithuti Tsa Bibele li ileng tsa bitsoa Lipaki Tsa Jehova.