Na u ne u Tseba?

Balebeli ba Moemphera ba ne ba apara joang?

BALEBELI ba Moemphera e ne e le sehlopha se ikhethang sa masole a neng a lebela moemphera oa Roma ho tloha qalong ea puso ea Sesare Augustase ka 27 B.C.E. Lebotho lena le ne le sireletsa moemphera le ba lelapa la hae.

Balebeli ba babeli ba Moemphera ba apere liaparo tsa ka hare ’me ba hakile lisabole mathekeng. E mong o eme ka pele, ha e mong a eme ka morao a apere seaparo sa ka ntle. — E mong oa Balebeli ba Moemphera o apere seaparo sa ka hare

Ha Molebeli oa Moemphera a le Roma, o ne a atisa ho ikaparela feela liaparo tse tloaelehileng. Liaparo tseo li ne li akarelletsa seaparo sa ka hare le sa ka ntle, ’me li lumella motho ho tsamaea ka bolokolohi. E ka ’na eaba molebeli o ne a apara seaparo se neng se thatela ’mele ’me se pota lehetleng ha a ne a lebetse moemphera motseng oa Roma, kaha bo-ntate ba ne ba se apara ha ba ea liketsahalong tse hlomphehang.

Balebeli ba Moemphera ba ne ba bonahala ka libetsa. Brill’s New Pauly: Encyclopaedia of the Ancient World e re: “Ha masole ana a le Roma, a ne a apara joaloka batho ba bang ’me a nka libetsa tsa ’ona le lithebe.” Libetsa tsena tse neng li lula ka mahlakoreng, e ne e le sabole le thipa. Sebetsa se seng le se seng se ne se e-na le lebanta la sona, se seng se le ka lehlakoreng le letona ha se seng se le ka lehlakoreng le letšehali.

Balebeli ba babeli ba Moemphera ba apere liaparo tse neng li thatela ’mele ’me li pota lehetleng ha ba felehetsa mohlanka oa ’muso. — Molebeli oa Moemphera o ne a apara seaparo se neng se thatela ’mele ’me se pota lehetleng ha a ne a ea liketsahalong tse hlomphehang, joaloka ho lebela bahlanka ba ’muso

Ho ka etsahala hore e be ba bang ba Balebeli ba Moemphera ke bona ba neng ba lebela moapostola Pauluse ka lilemo tse peli tseo a li qetileng Roma a emetse ho hlaha ka pel’a lekhotla. Ka nako eo, Pauluse o ne a tšoeroe ntlong ea hae eo a e hirileng, ’me batho ba ne ba khona ho mo etela. O ile a pakela baeti ba hae a sebelisa Mangolo ho hlalosa hore Jesu e ne e le Mesia le hore ’Muso oa Molimo o tla rarolla mathata a batho.—Lik. 28:16, 23, 30, 31.

Pauluse o ile a re: “Balebeli bohle ba Moemphera . . . baa tseba hore ke teronkong hobane ke le molateli oa Kreste.” (Bafil. 1:12, 13) Polelo ena ea hlolla hobane Balebeli ba Moemphera e ne e le sehlopha sa masole a likete. Jehova o ile a bula tsela ea hore moapostola Pauluse a fane ka bopaki ha a tšoeroe, ’me o ile a sebelisa monyetla ona ho phatlalatsa litaba tse monate.