Lintlha Tsa Sehlooho Tsa Selemo se Fetileng
LITLALEHO tse hlahang lefatšeng ka bophara li bontša hore Lipaki Tsa Jehova li ’nile tsa e-ba maphathaphathe haholo mosebetsing oa ho bolela litaba tse molemo tsa ’Muso “lefatšeng lohle leo ho ahiloeng ho lona hore e be bopaki ho lichaba tsohle.” (Mat. 24:14) Kaha li ile tsa mamella ’me tsa etsa mosebetsi oa tsona li momahane e bile e le ka ho rata, ‘lentsoe la Jehova le utloahetse, ’me tumelo ea tsona ho Molimo e hasane sebakeng se seng le se seng.’—1 Bathes. 1:8.
BA THABELA BORAPELI BA LELAPA BO BA MATLAFATSANG
Ka la 1 January, 2009, Lipaki Tsa Jehova li ile tsa etsa phetoho e khōlō libokeng tsa tsona tsa beke le beke. Seboka sa Thuto ea Buka ea Phutheho se ile sa rehoa Thuto ea Bibele ea Phutheho ’me ha hlophisoa hore se tšoaroe ka letsatsi le le leng le Sekolo sa Tšebeletso sa Puso ea Molimo le Seboka sa Tšebeletso. E mong le e mong o ile a khothalletsoa hore a tšoare Borapeli ba Lelapa mantsiboeeng ao pele a neng a ea Thutong ea Buka ea Phutheho ka oona.
Bahlanka ba Jehova ba ikutloa joang ka phetoho ee e entsoeng ka lerato? Ba bangata ba ikutloa joaloka monna enoa ea ileng a re: “Ke leboha haholo. Ha ke tsebe hore na nka re’ng ha ke hlalosa hore na ’na le mofumahali oa ka re ruile molemo o moholo hakae mantsiboeeng a Borapeli ba Lelapa. Bo entse hore re rate Jehova haholo re be re momahane. Ruri Ntate oa rōna ea leholimong o re lokiselitse ntho e babatsehang le e re tsoelang molemo!”
Malapa a etsa’ng e le hore a rue molemo o moholo nakong ee ea bohlokoa eo a seng a e-na le eona? ’Mè e mong o re: “Mantsiboeeng a mang re hlahloba leqephe la 31 la Tsoha! hammoho, ha a mang re shebella video ea mokhatlo. Bana ba rōna ba iketsetsa lipatlisiso, ho phaella moo, ba thabela ho ithuta ebile ba rata Borapeli ba Lelapa. Re ba kōpa hore ba qete khoeli ba ntse ba batlisisa ka motho ea itseng ea boletsoeng ka Bibeleng ebe ka mor’a moo ba re fa puo ka seo ba se fumaneng. Le rōna batsoali ba bona re etsa joalo. Puo ea pele ea mora oa rōna ea lilemo li leshome e ne e bua ka Noe ’me e le monate haholo! O ile a ba a re bolella hore na lintlha tsa eona li re ama joang kajeno. O ile a phetha ka hore a ntše areka e nyenyane ea Noe eo a iketselitseng eona. Bekeng e hlahlamang morali oa rōna o ne a e-na le puo e amanang le maeto a boromuoa a moapostola Pauluse. Kaofela ha rōna re ile ra mo opela liatla ha puo ea hae e fela, ka mor’a moo o ile a fetela karolong e reng, Na U sa Hopola? ’me a re botsa lipotso. Re ne re hloletsoe!” Lelapa lena le lumela hore ruri Borapeli ba Lelapa ke tlhohonolofatso e tsoang ho Jehova. ’Mè o tsoela pele o re: “’Na le monna oa ka re bile mathateng a mangata selemong se fetileng, ’me ka sebele sena ke sona se ileng sa re thusa ho mamella.”
Morali e mong oabo rōna o re: “Kea leboha hore ebe ho entsoe tokisetso ena e entseng hore ke boele ke be le kamano e matla le Molimo! Ha bana ba rōna ba se ba phuruselitse, ’na le monna oa ka re ile ra khaotsa ho ithuta kamehla re le lelapa. Hona joale lintho li khutletse malulong. Hangata re qeta lihora tse peli re ntse re ithuta, ’me nako ena e fela ka potlako!”
E se eka ha matšoenyeho a maholo a ntse a atamela, Borapeli ba Lelapa bo ka u thusa hore u ithute Lentsoe la Molimo haholo ’me u be le kamano e matla le eena e le hore u ka hanyetsa Diabolose. Sebelisa nako ena ea bohlokoa hamolemo ka hore u ‘atamele ho Molimo, ’me o tla atamela ho uena.’—Jak. 4:7, 8.
LETŠOLO LA HO BATLA LITHUTO TSA BIBELE
Ho tloha ka January 2009, liphutheho li ile tsa khothalletsoa ho khetha Moqebelo kapa Sontaha se le seng ka khoeli e le hore li batle lithuto tsa Bibele. See se ile sa fella ka eng? Bahoeletsi ba bangata ba hloletsoe ebile ba thabile. Ba hloletsoe hobane ba ne ba sa lebella hore sena se tla ba bonolo hakaalo ’me ba thabile hobane batho ba sa tšoaneng ba lumela ho ithuta ka buka ea Ha e le Hantle ke Eng Seo Bibele e se Rutang? Balebeli ba tsamaeang ba re bahoeletsi ba chesehela mosebetsi ona, ’me liphello tseo o bileng le tsona qalong li bontša hore o tla beha litholoana. Ka mohlala, likhoeling tse hlano tse qalang, bahoeletsi ba Italy ba ile ba qala lithuto tsa Bibele tse fetang 8 000.
Bahoeletsi bao ho seng mohla ba kileng ba khanna lithuto, ba se ba etsa maeto a ho boela ’me ba qala lithuto. Carolina oa Peru o itse: “Pele ho mona ke ne ke se na thuto ea Bibele, empa ha re khothalletsoa hore ho be le letsatsi le le leng khoeling leo ka lona re batlang lithuto, ke ile ka bona ho le molemo hore ke ikitlaeletse ho qala thuto ea Bibele. Ke ile ka khona ho bontša beng ba matlo hore ho ithuta Bibele ho bonolo ebile ha ho nke nako e telele. Ke ile ka sebelisa likeletso tseo re li filoeng ’me Jehova a nthusa hore mosebetsi oa ka o behe litholoana tse molemo; hona joale ke khanna lithuto tsa Bibele tse peli.”
Morali’abo rōna Satya oa pula-maliboho oa Brithani o ne a tšaba ho batla thuto ea Bibele leetong la pele. Empa letsatsing le khethetsoeng ho batla lithuto, o ile a ikemisetsa hore a ke ke a khutlela hae a sa leka ho e batla. O ile a thaba ha mosali e mong a lumela ho ithuta le eena hang-hang. Ho bile bonolo ho feta kamoo Satya a neng a nahana kateng!
Mor’abo rōna e monyenyane ea bitsoang Luca oa Palermo, Sicily, o ne a tlisetsa mosali e mong oa mohlolohali limakasine kamehla. Mosali enoa o ne a tšaba ho lumella mang kapa mang ho kena ka tlung ea hae. Mantsiboeeng a Moqebelo oo ka oona ho neng ho batloa lithuto tsa Bibele, Luca o ile a ea ho mohlolohali enoa a se a phetlile buka ea Seo Bibele e se Rutang, ’me a mo balla karolo e itseng ea eona. O ile a e rata ’me a qeta nako e itseng a buisana le Luca. Luca o ile a mo bolella hore likarabo tsa lipotso tsa hae li bukeng eo—hammoho le ea potso e reng na o tla ke a boele a bone monna oa hae. Luca o ile a phetla leqephe la 72, le bontšang hore na ke bo-mang ba tla tsoha bafung. Tšepo ena e thehiloeng Bibeleng e ile ea ama mosali enoa, ’me a lumela ho ithuta Bibele. Hona joale o ithuta kamehla ’me o lumella Lipaki ho kena ka tlung ea hae a sa tšabe letho.
Molebeli e mong oa potoloho oa Peru, o ile a ngola tlaleho e reng: “Ho tloha qalong, mokhoa ona oa ho batla lithuto tsa Bibele, o ile oa thusa liphutheho tse ngata hore li be le lithuto tse eketsehileng. Bahoeletsi ba phutheho e ’ngoe ea Chiclayo ba ile ba tlaleha lithuto tse ncha tse 25 ka khoeli e le ’ngoe, ’me ba Chepén ba qala lithuto tse 24.”
Bahoeletsi ba banyenyane le bona ba qala lithuto tsa Bibele. Giovanna oa São Paulo, Brazil ea lilemo li 11, o re: “Mantsiboeeng a Moqebelo o mong ke ne ke tsamaea le ’mè oa ka re batla lithuto tsa Bibele ka ntlo le ntlo, re sebelisa buka ea Seo Bibele e se Rutang. Ntlong ea pele, ke ile ka botsa rakhoebo ea tsebahalang hore na o lumela hore Bibele e bululetsoe ke Molimo. O ile a re ho joalo. Eaba ke mo balla 2 Timothea 3:16. A re o hloletsoe ha a bona ngoanana e monyenyane a mo bolella litaba tse monate hakaalo, ’me a nka buka.
“Ke ile ka khutlela ho eena ke tsamaea le ntate-moholo oa ka, hobane baa tsebana. O ile a re re kene, ’me ka kōpa hore a khethe sehlooho seo a se ratang haholo bukeng ea Seo Bibele e se Rutang. A khetha khaolo ea 11 e reng, ‘Ke Hobane’ng ha Molimo a Lumeletse Bohloko?’ Ka mor’a hore re bale lirapa tse peli tse qalang, eena le mosali oa hae ba ile ba botsa lipotso tse ngata. Ba ne ba thabile haholo ha ba bona hore likarabo tsa bona tsohle li hlaha ka Bibeleng, ’me ba lumela ho ithuta kamehla. Ke ne ke thabile haholo hore ebe ke ile ka qala thuto ntlong ea pele!”
Ka sebele hase bohle ba tla lumela ho ithuta Bibele, ’me hase hore e mong le e mong eo re qalang ho ithuta Bibele le eena o tla tsoela pele. Empa kaha re basebetsi-’moho le Molimo, re batla ho ithuta Bibele le batho ba bangata kamoo re ka khonang, kaha rea tseba hore Jehova o hulela batho ba kang linku ka mokhatlong oa hae pele tsamaiso ea Satane e felisoa.—Joh. 6:44; 1 Bakor. 3:9.
THEKNOLOJI E “POTLAKISA” MOSEBETSI
Batho ba Jehova ba thabela hore ebe boprofeta bona bo hlollang boa phethahala: “E monyenyane o tla fetoha ba sekete, ’me ea fokolang e be sechaba se matla. ’Na, Jehova, ke tla ho potlakisa ka nako ea teng.” (Esa. 60:22) Ha ho pelaelo hore Jehova o tsoela pele ho sebelisa theknoloji ho potlakisa mosebetsi oa bahlanka ba hae nakong ena eo ho etsahalang lintho tse thahasellisang. Ke ka lebaka leo Sehlopha se Busang se ileng sa re barab’abo rōna ba qape lenaneo la k’homphieutha le etsang hore mosebetsi o be bonolo makaleng ’ohle lefatšeng ka bophara.
Barab’abo rōna ba qapileng lenaneo lena ba tsoang lekaleng la Afrika Boroa, ba se ba le Ntlo-khōlō ea Lefatše e Brooklyn, New York, moo ba ntseng ba le ntlafatsa. Makala a ka bang 20 a thusa makala a mang a haufi le ’ona hore a rue molemo lenaneong lena la bohlokoa.
Melemo ea lenaneo lee ke efe? Kaha makala ’ohle a sebelisa lenaneo le le leng, a khona ho bona se etsahalang makaleng a mang. Ka mohlala, makala ’ohle a hatisang lingoliloeng lefatšeng ka bophara a ka tseba hore na makala a mang a na le lingoliloeng life. Haeba lekala le leng le e-na le sengoliloeng se itseng se sengata haholo, lekala le leng le ka se kōpa ho e-na le ho se hatisa. Kaha lenaneo lena le sebetsa tjena ebile barab’abo rōna ba ka khona ho hakanya hore na ho tla hlokahala lingoliloeng tse kae nakong e tlang ba itšetlehile ka liodara tse fetileng tse tsoang tšimong, sena se entse hore ho se ke ha e-ba le lingoliloeng tse ngata haholo makaleng ’ohle.
Lenaneo lena le thusa basebeletsi ba Bethele hore ba etse mosebetsi o tsoileng matsoho ha ba sebetsana le liodara tsa libuka le limakasine, ha ba bokella litlaleho tsa selemo tsa tšebeletso ea tšimo, ha ba hlophisa likopano tse khōlō le tse nyenyane le ha ba fa balebeli ba tsamaeang le bo-pula-maliboho ba khethehileng likabelo. Le boetse le thusa ba rekang thepa, ba hlokomelang liak’haonte le ba balang thepa e teng setokong, ’me sena se entse hore re se ke ra reka lenaneo le tšoanang le lena le theko e boima.
LESELI LE KHANYA INTHANETENG
Joalokaha leseli le khanya khocheletsaneng moo ho leng lefifi, le batho ba Molimo ba ‘khantša leseli la bona’ likarolong tsohle tsa lefatše. (Mat. 5:16) Ntho e re thusang haholo hore re khantše leseli lena likarolong tse hōle ka ho fetisisa tsa lefatše ke Web site ea rōna ea www.watchtower.org. E na le limakasine, lipampitšana, le libukana ka lipuo tse ka bang 383, hammoho le Bibele e feletseng ea Phetolelo ea Lefatše le Lecha ea Mangolo a Halalelang ka lipuo tse 11. Ka kakaretso e na le lihlooho tse fetang 700. Beke le beke barab’abo rōna ba kenya lihlooho tse ncha tse tšohlang lintho tseo batho ba ka ratang ho li tseba. Melemo ea hore ebe ho na le lingoliloeng tsa lipuo tse ngata hakaale tseo motho a ka iphumanelang tsona Inthaneteng ke efe?
Pat, oa Florida, U.S.A., o rata Web site ena hobane e mo thusa hore a fumane lingoliloeng tsa lipuo tsa linaha tse ling ka potlako. O re: “Ka mor’a hore re tsamaise pampitšana ea Na U ka Thabela ho Tseba ’Nete? ke ile ka hatisa pampitšana ena ka lipuo tse buuoang ke batho ba ileng ba e nka ka Senyesemane le hoja ba bua puo e ’ngoe.” Seo se ile sa hlahisa litholoana life?
Pat o ile a hatisa pampitšana ea Sethai eaba o e isetsa mosali ea nang le lephephe leo a rekisetsang ho lona ’marakeng. Mosali eo o ne a thabile ’me a hloletsoe hore ebe Pat o ile a nka nako e khutšoanyane hakaalo hore a mo fumanele pampitšana ea Sethai. Mosali enoa hammoho le batho ba bang ba neng ba reka lephepheng la hae ba ne ba batla ho tseba lebitso la Web site ea rōna e le hore ba ka ipulela eona. E mong oa basali bao o ile a re Pat a mo etele lapeng e le hore ba ka tsoela pele ka moqoqo. Ho na le batho ba bangata bao joaloka Pat, ba ruang molemo ka ho hatisa maqephe a seng makae a lipuo tse ling Inthaneteng ebe ba a fa batho ba thahasellang ba merabe e meng.
Selemong se fetileng, batho ba fetang limilione tse 24 ba lulang lik’honthinenteng tsohle ba ile ba bula Web site ea rōna. Ho tloha ka 2007, batho ba ileng ba e bula ba eketsehile ka liphesente tse 33. Batho lefatšeng lohle, ho akarelletsa le ba lihlekehlekeng tse hōle, ba ile ba kōpa hore ho be le motho ea ba etelang kapa ea ba khannelang thuto ea lehae ea Bibele. Ho tloha ka 2007 litlankane tse rometsoeng ka Inthanete li eketsehile ka liphesente tse ka bang 55. Ka sebele leseli le khanya likarolong tse hōle ka ho fetisisa tsa lefatše, ’me sena sohle se tlotlisa Ntate oa rōna ea maholimong.—Mat. 5:16.
Ka ntle ho Web site ea www.watchtower.org, ho boetse ho na le www.jw.org moo ho nang le likhatiso tse itseng tse sebelisoang haholo tse mameloang. Molemo oa Web site ee ke ofe?
Ba bangata ba ikutloa joaloka Trisha, oa Missouri, U.S.A., ea ileng a re, “Letsatsi la Labone ke la bohlokoa ka ho fetisisa ho ’na.” Hobane’ng? Hobane ka Labone o atisa ho bula www.jw.org ebe o kopitsa likhatiso tse ncha tse mameloang tsa Molula-Qhooa le Tsoha! Ho na le bara le barali babo rōna ba likete lefatšeng lohle, bao joaloka Trisha ba atisang ho bula Web site ena e nang le matletsetletse a lijo tsa moea. Ba kopitsa limakasine tse mameloang, Bibele, litšoantšiso, libuka, libukana le lipampitšana ka lipuo tse 27. Ho boetse ho na le mefuta e ’meli e atileng ea livideo tsa Puo ea Matsoho ea Amerika.
Ke bo-mang ba bulang Web site ee e le hore ba kopitse lingoliloeng tsa rōna? Boholo ba bona ke bara le barali babo rōna, empa ho boetse ho na le batho ba e bulang bao e seng Lipaki ba linaheng tse fetang 200, ho akarelletsa le linaha tse ’maloa tseo ho tsona mosebetsi oa rōna o thibetsoeng. Ho na le batho ba atisang ho e bula libakeng tse kang Papua New Guinea, St. Helena, esita le Antarctica. Likhatiso tsee tse mameloang li tsoela bara le barali babo rōna molemo joang? Ka mohlala, thepa e lieha ho fihla French Polynesia, e leng se etsang hore hangata limakasine tsa rōna li fihle nako ea hore li baloe e se e fetile. Kaha bahoeletsi ba lihlekehlekeng tsena tse hōle ka ho fetisisa ba na le Inthanete, ba ka mamela likhatiso tsa morao-rao hang feela ha li kena Inthaneteng.
Deborah, oa Illinois, U.S.A., o kula haholo hoo a sitoang ho ea libokeng ’me ha a khone ho hopola seo a se balileng. Hona joale o kopitsa likhatiso Inthaneteng ebe oa li mamela. O re, “Ke se ke khona ho hopola lintho tseo ke li utloileng, ’me ke li bolella ba bang ka sebete.”
Motseng o mong o monyenyane Texas, U.S.A., ho na le lelapa le khannelang motho ea tsoang Siberia thuto ea Bibele, ’me le thabela ho mo kopiletsa limakasine tse mameloang tsa Serussia. Mor’abo rōna oa California, U.S.A., o rata ho matha lihoreng tsa hoseng a mametse limakasine tseo a li nkileng Inthaneteng.
Motseng o monyenyane oa New Zealand leboea, ho na le lelapa leo beke e ’ngoe le e ’ngoe le kopitsang lingoliloeng tse baloang libokeng—lihlooho tse ithutoang tsa Molula-Qhooa, khaolo e ithutoang bukeng ea “Le Ipoloke Leratong la Molimo” le ea Ithute ho Mosuoe e Moholo, hammoho le likhaolo tsa Bibele tse baloang bekeng eo. Le qeta beke eohle le mamela lihlooho tsena. Monna o re, “Hona joale ha re sa bua haholo ka mathata a mosebetsi empa moqoqo oa rōna ke oa lintho tsa moea.” Ke sona seo malapa a mangata a se etsang lefatšeng ka bophara.
Beke e ’ngoe le e ’ngoe ho na le batho ba likete-kete ba kopitsang likhaolo tsa Bibele tse baloang bekeng eo—haholo-holo ka Labobeli. Moqebelo o mong le o mong le Sontaha, ho na le batho ba bangata ba kopitsang lihlooho tsa Molula-Qhooa tse ithutoang bekeng eo. Ho phaella moo, baholo ba ka ikopiletsa liforomo tsa mokhatlo le lipuo Inthaneteng ebe baa li hatisa. Lintho tsena kaofela li thusa mokhatlo hore o baballe nako le chelete hape li fokotsa mosebetsi.
“HO TLA LE HLAHELA HORE E BE BOPAKI”
Le hoja Lipaki Tsa Jehova li batla ho phela “bophelo bo khutsitseng le bo thōtseng ka boinehelo bo feletseng ba bomolimo,” ha li makale ha li hlorisoa. (1 Tim. 2:1, 2) Jesu Kreste o ile a lemosa barutuoa ba hae hore ba tla hlouoa ha a re: “Batho ba tla le tšoara ba le hlorise, ba nehelane ka lōna lisynagogeng le lichankaneng, le ntse le hulanyetsoa ka pel’a marena le babusisi ka lebaka la lebitso la ka.” Empa Jesu o ile a bontša hore ho tla hlaha liphello tse sa lebelloang ke lira tsa borapeli bo hloekileng. O ile a profeta sena: “Ho tla le hlahela hore e be bopaki.”—Luka 21:12, 13, 17.
Boprofeta bona ba Jesu boa phethahala hobane Lipaki Tsa Jehova li tšoaroa hampe libakeng tse sa tšoaneng. Hore ebe li hlōtse linyeoe linaheng tse ngata ho li thusitse hore li sireletse litokelo tsa tsona tsa molao, tse akarelletsang ea ho bolela ka ntlo le ntlo le ho tšoara liboka ka bolokolohi. Le hoja ho sa ntse ho e-na le litšitiso, re hlōtse linyeoe tse ngata selemong sena, e leng se bontšang hore mesebetsi ea rōna ke ea bolumeli.
Austria
Ka mor’a lilemo tse 30 barab’abo rōna ba ntse ba leka hore mokhatlo oa bona oa bolumeli o amoheloe ka molao, ka May 2009 Lekala la ’Muso oa Austria la Thuto, Bonono le Setso le ile la lumela hore Lipaki Tsa Jehova ke mokhatlo oa bolumeli o boemong bo phahameng ka ho fetisisa. Hona joale Austria Lipaki ke bolumeli ba bo14 bo boemong bona. Ka mor’a hore Lekhotla la Europe la Litokelo Tsa Botho (ECHR) le lihe kahlolo e li emelang ka July 2008, le ile la liha likahlolo tse ling tse tharo tse emelang barab’abo rōna ba Austria, e leng se ileng sa bontša ntle ho tikatiko hore ’muso o amohetse bolumeli ba Lipaki Tsa Jehova.
Afrika Boroa
Ka 2005, baemeli ba Watch Tower Bible and Tract Society of South Africa le ba Sehlopha sa Bahlanka ba Tšebeletsong e Khethehileng ea Nako e Tletseng Lefatšeng ka Bophara ba Lipaki Tsa Jehova ba sebeletsang Bethele ea Afrika Boroa ba ile ba qosa Lefapha la Tsa Mesebetsi la Afrika Boroa, ’me nyeoe eo ea isoa Lekhotleng la Tsa Mesebetsi. Ba ne ba batla hore lekhotla le bolele hore basebeletsi ba Bethele ha ba oele tlas’a melao ea basebetsi ea Afrika Boroa. Ka March 2009, Lekhotla la Tsa Mesebetsi le ile la liha kahlolo e tiisang hore barab’abo rōna ba Bethele ha ba oele tlas’a melao ea basebetsi ebile mosebetsi oo ba o etsang ke oa bolumeli.
Uganda
Ka 2007, Lefapha la Uganda la Lekhetho (URA) le ile la etsa qeto ea hore litho tsa Sehlopha sa Bahlanka ba Tšebeletsong e Khethehileng ea Nako e Tletseng Lefatšeng ka Bophara ba Lipaki Tsa Jehova ba sebeletsang Bethele ea Uganda ke basebetsi ho ea ka Molao oa Uganda oa Lekhetho. Baemeli ba Mokhatlo oa Liithuti Tsa Bibele Tsa Machaba (IBSA) ba ile ba qosa URA Lekhotleng le Phahameng la Uganda le Kampala. Ka June 2009, Lekhotla le Phahameng le ile la liha kahlolo e emelang IBSA, la bolela hore basebeletsi ba Bethele e Uganda hase bahiruoa. Ntlha eo lekhotla lena le ileng la e ela hloko ka ho khetheha ke hore basebeletsi ba Bethele ba “fuoa litsiane tse lekanang ho sa tsotellehe mesebetsi eo ba e etsang.” Lekhotla le ile la bolela hore basebeletsi ba Bethele ke litho tsa mokhatlo oa bolumeli ’me ba fuoa lijo, bolulo le litsiane tse itekanetseng e le hore ba iphumanele lintho tse hlokahalang ha ba ntse ba etsa mesebetsi e thusang sechaba le ea bolumeli Uganda.
Armenia
Ba boholong ba tsoela pele ho koalla barab’abo rōna ba lilemong tsa ho ea sesoleng hobane ba hana tšebeletso ea sesole ka lebaka la letsoalo. Ka August 2009, ho ne ho e-na le barab’abo rōna ba 74 ba kentsoeng chankaneng. Kaha makhotla ’ohle a metse a ne a se a lihile kahlolo e khahlanong le barab’abo rōna, ba ile ba ngolla Lekhotla la Europe la Litokelo Tsa Botho mangolo a mane a boipiletso. Ho feta moo, ’muso o tsoela pele ho lefisa barab’abo rōna Lekhetho le boima la Thepa ha ba fumana lingoliloeng tsa bolumeli tse tsoang linaheng tse ling. Ebang barab’abo rōna ba tla imolloa moroalo ona kapa che, re kholisehile hore ba tla ’ne ba feptjoe moeeng.—Esa. 65:13.
Azerbaijan
Hanyane ka hanyane ’muso o ntse o sitisa barab’abo rōna ho rapela ka bolokolohi. Ho ntse ho e-ba thata le ho feta hore ba fumane lingoliloeng le hore ba tšoare liboka. Ke ’nete hore ba amoheloa ka molao Baku, e leng motse-moholo oa naha ena, empa kaha ha baa ngolisoa metseng e meng hangata mapolesa a inkela molao matsohong ka hore a ba hlasele ha ba bokane malapeng a bona ebe ka mor’a moo ba qeta nako e telele ba tšoeroe. A etsa sena le hoja ho ea ka molao ho sa hlokahale hore batho ba bolumeli ba ingolise pele ba bokana malapeng a bona. Ka la 9 April, 2009, barab’abo rōna ba ile ba kōpa hore ’muso oa Azerbaijan o ba ngolise ka molao naheng eohle. Re tšepa hore mathata a bona a tla fokotseha ha ba se ba ngolisitsoe ka molao.
Egepeta
Ka lilemo tse tharo tse fetileng barab’abo rōna ba Egepeta, Belgium, Italy le United States ba ’nile ba kopana le ba boholong Egepeta ba kōpa hore mosebetsi oa rōna o lumelloe ka molao. Ka lebaka leo, ba boholong ba lokolotse barab’abo rōna ba Egepeta hore ba tšoare liboka malapeng e le lihlopha tsa batho ba 30. Leha ho le joalo, ba bang ba boholong ba tsoela pele ho tšoara barab’abo rōna hampe. Ba Lefapha la Tšireletso ea Naha ba lula ba behile barab’abo rōna leihlo ’me ka linako tse ling ba ba hloma lipotso ebile ba sokela litho tsa phutheho. Ntle le ho kopana le ba boholong ka ho toba, barab’abo rōna ba ntse ba e-ea makhotleng e le hore a ba thuse hore mosebetsi oa rōna o lumelloe ka molao.
Eritrea
Ka la 28 June, 2009, litokelo tsa mantlha tsa botho li ile tsa hatakeloa ka ho feletseng ha ba boholong ba tšoara litho tse 23 tsa phutheho e ’ngoe. Li ne li akha baralib’abo rōna ba hōlileng le bana ba bararo ba pakeng tsa lilemo tse peli ho ea ho tse ’nè. Le hoja baralib’abo rōna ba hōlileng ba se ba lokolotsoe, bana bona ba ntse ba le chankaneng le bo-’mè ba bona; haesale bo-ntate ba bona ba koalloa khale. Kahoo, hona joale ho na le malapa ao litho tsohle tsa ’ona li leng chankaneng. Ka hona, bara le barali babo rōna ba chankaneng ba se ba le 64, ’me ba akarelletsa barab’abo rōna ba bararo bao esaleng ba koalloa ka 1994 ka lebaka la ho se kene sesoleng le hoja ba sa bolelloa hore na ba tlōtse melao efe.
India
E se e le lilemo tse ’maloa joale Lipaki Tsa Jehova li hlaseloa ke mokhopi ha li le tšebeletsong ea tšimo. Hape li ’nile tsa rohakoa le ho khakhathoa, tsa bolelloa hore li tla kenngoa teronkong, ’me libuka tsa tsona li chesoe. Hangata ka mor’a hore barab’abo rōna ba khakhathoe, baa tšoaroa ebe ba qosoa ka hore ba tlōtse molao. Mokhopi o halefileng o susumetsa ba boholong hore ba tšoare barab’abo rōna hampe ka ho ba etselletsa ka hore ba tlōtse melao ea naha.
Ka mohlala, ka December 2008, Lipaki Tsa Jehova tse tharo tsa Kundapura, e Karnataka, (’mè, morali oa hae, le setloholo sa hae se lilemo li leshome), li ile tsa khutlela ho mosali e mong oa Motseng oa Koni eo pejana a neng a ile a bontša hore o rata ho ithuta Bibele. Hamorao, Lipaki tsena tse tharo li ile tsa hlaseloa ke banna ba bahlano kapa ba tšeletseng ’me ba li qobella ho ea sepoleseng. Ke moo ho ileng ha fihla mokhopi, ’me mapolesa a qosa barali bana babo rōna ka hore ba kene moo ba sa lokelang ho kena teng, ba qabanya batho ba mefuta e sa tšoaneng ba bile ba rohaka malumeli a mang. Qetellong Lipaki tsena li ile tsa lokolloa. Ho ntse ho etsoa matsapa a hore molao o thusetse bara le barali babo rōna ba tobaneng le maemo a mofuta ona.
Moldova
Barab’abo rōna ba Transnistria, e leng sebaka seo linaha tse ling li nkang hore se ntse se oela tlas’a Moldova, ba sa ntse ba chesehela mesebetsi e amanang le ’Muso le hoja ho se ho fetile lilemo tse 12 ba ntse ba sokeloa ka hore mosebetsi oa bona o tla thibeloa kapa liphutheho tsa bona li koaloe. Ke ’nete hore ba na le mathata a mangata, empa Jehova o ba hlohonolofalitse ’me ho ka boleloa hore ba atlehile ho isa bohōleng bo itseng ho emela mesebetsi e amanang le ’Muso makhotleng. Ho na le mehlala e meraro ea sena: Moruti oa Moorthodox ea ileng a rohaka baralib’abo rōna ba babeli a ba a ba otla ha ba ntse ba bolela litaba tse molemo motseng oa Ordăşei, o ile a nkoa a le molato ’me a lefisoa, lekhotla la motse oa Tiraspol le ile la emela barab’abo rōna kahlolong e mabapi le ho ngolisa phutheho ea rōna sebakeng seo, ’me Bahlahlobi ba Lekhetho ba Motseng oa Rîbniţa ba ile ba ahloloa hobane ba inketse molao matsohong ka ho lefisa baithaopi lekhetho ha ba tliselitsoe lijo kahong ea Holo ea ’Muso.
Kazakhstan
Ofisi ea Mochochisi-kakaretso e Rephabliking ea Kazakhstan e ile ea qala mohoanto o ileng oa fella ka hore lekhotla le lihe kahlolo e emelang barab’abo rōna. Pejana ho moo, lekhotla la Kyzylorda, la Shymkent le la Saryagash a ne a ile a thibela mosebetsi oa rōna ka likhoeli tse tšeletseng. Empa kahlolo e ileng ea lihuoa ka November 2008 e ile ea thusa barab’abo rōna hore ba boele ba be le tokoloho ea borapeli Lebatooeng la Kyzylorda, Shymkent, le lebatooeng lohle le ka boroa Kazakhstan. Ho feta moo, ka December 2008, lekhotla la motse oa Atyraū le ile la liha kahlolo e reng Lipaki Tsa Jehova li na le tokelo ea ho ngolisoa ka molao motseng oo ka mor’a lilemo tse supileng ’muso oa moo o ntse o hana ho li ngolisa.
Russia
Selemong se fetileng sa tšebeletso, mochochisi le batho ba bang ba bangata ba boholong Naheng ena, bao morero oa bona e leng ho inkela molao matsohong ka hore ba koale mosebetsi oa rōna oa bolumeli ba ’nile ba phenya-phenya Setsi sa rōna sa Tsamaiso sebakeng sena. Bara le barali babo rōna ba ile ba tšoaroa hampe ’me ba makholo ba phenya-phenngoa ntle ho mabaka. Ka nako e ’ngoe ha morali’abo rōna oa moimana a le sebokeng, mapolesa a ile a ba hlasela eaba oa senyeheloa. Ho ne ho e-na le moshanyana ea lilemo li 15 hona sebokeng seo eo mapolesa a ileng a mo tšoara ntle ho mabaka. Bachochisi ba batla ho koala liphutheho tsa rōna tse ’maloa le ho thibela lingoliloeng tsa rōna tsa bolumeli ba sebelisa Molao oa ho Thibela Mekhatlo ea Majela-thōko. Liqoso tsena tse se nang motheo tsa hore re majela-thōko li entse hore ba boholong ba kena-kenane le tokoloho ea rōna ea borapeli, ba be ba tšoare barab’abo rōna ntle ho mabaka, ba ba leleke, ’me ha liakhente tse ’nè tsa Lipaki Tsa Jehova tse tsoang linaheng tse ling li tlil’o ba buella liqosong tsena tsa bohata, ba li hanele ho kena ka har’a naha. E mong oa bara bana babo rōna o ile a koalloa seleng ea Moscow ka lihora tse 23.
Ba Lefapha la Tšireletso ea Naha ba ile ba sitisa barab’abo rōna ka makhetlo a ’maloa ha ba hirile libaka tseo ho ka tšoareloang liboka ho tsona le likopano, ka lebaka leo, ba neng ba lumetse ho re hirisetsa libaka tseo ba ile ba koeneha. Ba boholong ba ile ba thibela barab’abo rōna ho haha Liholo Tsa ’Muso. Mathata a mang ao Lipaki li fetang ho ’ona ke hore mapolesa a tlōla molao ka ho li khakhatha ha li tšoeroe ka liqoso tsa bohata tsa hore ke linokoane.
Korea Boroa
Ka la 16 June, 2008, ’muso oa Korea Boroa o ile oa ikoahlaela phatlalatso eo o ileng oa e etsa ka la 7 May, 2008, ea hore o file batho ba hanang tšebeletso ea sesole ka lebaka la letsoalo monyetla oa ho etsa mosebetsi oa ’muso o sa amaneng le sesole. O ile oa re “taba ea ho hana tšebeletso ea sesole ka lebaka la letsoalo e hloka ho fuputsoa sechabeng ’me ho bonoe hore na se lumellana le eona.” Ho fihlela kajeno, Lekhotla la Naha la Korea ha le e-s’o hlahlobe molao oa ho fa batho mosebetsi oa ’muso o sa amaneng le sesole ha ba hana tšebeletso ea sesole ka lebaka la letsoalo. Barab’abo rōna ba emetse qeto ea Komiti ea Litokelo Tsa Botho ea Machaba a Kopaneng, eo ka makhetlo a mabeli e ileng ea liha kahlolo e ba emelang. Ka January 2009, Moifo oa Mopresidente oa Korea o Fuputsang Mafu a Belaetsang Sesoleng o ile oa hlokomela hore ’muso oa Korea o nkha lefotha lefung le sehlōhō la Lipaki Tsa Jehova tse hlano tse ileng tsa qobelloa hore li kene sesoleng ho tloha lilemong tsa bo-1970 ho fihlela bohareng ba lilemo tsa bo-1980. Ena ke qeto ea pele e khōlō eo moifo oo o ileng oa e etsa ha o ne o bolela hore Naha ea ikarabella lefung la batho ba bolailoeng ka sehlōhō sesoleng.
Tajikistan
Ka 2007, Mokhatlo oa Bolumeli oa Lipaki Tsa Jehova Tajikistan o ile oa thibeloa, ’me bahlanka ba ’muso ba sebetsanang le lekhetho la thepa e kenang le e tsoang ka har’a naha ba nka lingoliloeng tsa rōna tse tsoang Jeremane ka mahahapa. Barab’abo rōna ba ile ba etsa boipiletso lekhotleng la sesole, leha ho le joalo, ba hlōloa ke nyeoe ka September 2008. Ba ile ba etsa boipiletso bo bong Lekhotleng le Phahameng la ba Boholong Sesoleng, empa le mona ba hlōloa ke nyeoe. Likahlolo tsena li tiisa qeto ea hore re thibetsoe le hore lingoliloeng tsa rōna li ka nkoa ka mahahapa. Ho ntse ho lekoa ka matla hore barab’abo rōna ba imolloe.
Turkey
Barab’abo rōna ba tobane le mathata a amanang le tšebeletso ea sesole. E mong o ile a kenngoa teronkong ka lilemo tse peli hobane a hana hehehe! ho kena sesoleng. Ba bangata ba lilemong tsa ho kena sesoleng ba ntse ba sokeloa ka hore ba tla lefisoa, ba kenngoe chankaneng ba be ba lelekoe mesebetsing. Ka March 2009, barab’abo rōna ba ile ba tsebisoa hore Komiti ea Litokelo Tsa Botho ea Machaba a Kopaneng e qalile ho hlahloba linyeoe tse peli tse ileng tsa hlahleloa lebitsong la Lipaki.
Ho feta moo, ka May 2009, Lekhotla la Europe la Litokelo Tsa Botho le ile la etsa qeto ea ho sebetsa mangolo a mararo a boipiletso ka nako e le ’ngoe e le hore le qale ho batlisisa hore na litokelo tsa botho tsa barab’abo rōna ba tšeletseng ha lia hatakeloa—ba bane ba se ba qetile nako e itseng chankaneng. Bahlanka ba Jehova ba leboha hore ebe mekhatlo ena e ’meli ea molao e ile ea bontša hore e amehile ka bona ’me ba na le tšepo ea hore ho tla re khoe! haufinyane.
Uzbekistan
Ho ntse ho e-ba thata hore barapeli ba Jehova ba ipiletse molaong Uzbekistan, ’me ’Muso o ntse o hlohlelletsa batho hore ba hlorise barab’abo rōna. Ntate e mong ea nang le bara ba babeli o ile a lokolloa teronkong ka la 14 May, 2009, ka mor’a ho hoehla lilemo tse peli ka lebaka la ho ruta batho Bibele. Ka le hlahlamang, o ile a lelekeloa naheng ea habo ea Tajikistan. Barab’abo rōna ba bang ba bararo ba ntse ba le chankaneng ka lebaka la ho hlophisa seo ho thoeng ke “mesebetsi ea bolumeli e seng molaong.” Liakhente tsa bara bana babo rōna ba bararo li ntse li itokisetsa ho boela li ipiletsa Lekhotleng le Phahameng la Uzbekistan. Barab’abo rōna ba Uzbekistan le ba tsoang linaheng tse ling ba ’nile ba tšoara liboka tse ngata le Komiti ea Uzbekistan ea Litaba Tsa Bolumeli le baemeli ba eona e le hore ba ka rarolla litaba tsena.
LEKHOTLA LA EUROPE LA LITOKELO TSA BOTHO
Lipaki Tsa Jehova tsa Armenia, Austria, Azerbaijan, Cyprase, Fora, Georgia, Russia, Serbia le Turkey li kentse mangolo a boipiletso a 22 Lekhotleng la Europe la Litokelo Tsa Botho (ECHR) le Strasbourg, Fora. Mangolo ana a bontša kamoo ho hataketsoeng litokelo tsa mantlha tsa botho tse fuoang baahi bohle ba lulang linaheng tse oelang tlas’a Tumellano ea Linaha Tsa Europe ea Litokelo Tsa Botho. A robong a bua ka tokelo ea ho hana ho etsa tšebeletso ea sesole, a supileng a bua ka ho hlorisoa le ho khetholloa ka lebaka la bolumeli, a mane a bua ka ho hlakoloa libukeng kapa ho thibeloa ha mokhatlo oa molao o sebelisoang ke Lipaki Tsa Jehova ha li hlophisa mosebetsi oa tsona, ’me a mabeli ke a ho ipelaetsa hobane ’muso o kena-kenana le tokelo ea tsona ea ho tšoara liboka tsa bolumeli ka bolokolohi.
Ka la 17 June, 2008, Lekhotla la ECHR le ile la hlahloba boipiletso boo Association Les Témoins de Jéhovah (ATJ) e ileng ea bo etsa khahlanong le ’muso oa Fora. ATJ e ile ea etsa boipiletso bona hobane ka leeme e lefisoa lekhetho la liphesente tse 60 la menehelo eohle ea bolumeli eo e e fumaneng ho tloha ka 1993 ho ea ho 1996. Lekhotla lena le ile la botsa lipotso tse ling le batla ho tseba hore na ebe ho tlōtsoe Molao oa 9 oa Lekhotla la Europe o amanang le tokoloho ea bolumeli. Lipaki Tsa Jehova tsa Fora le tsa linaheng tse ling tse oelang tlas’a Lekhotla la Europe li batla ho bona hore na ECHR e tla sebetsa nyeoe ena kapa che.
Le hoja Satane a leka ho sitisa borapeli ba ’nete ka ho “rera khathatso ka molao-taelo,” bahlanka ba Jehova ba lula ba ‘tiile tumelong, ba tseba hore litlhokofatso tse tšoanang li ntse li etsahalla mokhatlo oohle oa barab’abo bona lefatšeng.’ E se eka barapeli bohle ba ’nete ba ka lula ba tiile khahlanong le Satane, ’me ba lahlela matšoenyeho ’ohle a bona ho Molimo oa mosa oohle o sa tšoanelang ba tseba hore oa ba tsotella, le hore o tla ba tiisa a be a ba matlafatse.—Pes. 94:20; 1 Pet. 5:7-11.
‘BA TŠOANELEHANG HO RUTA BA BANG’
Haesale phutheho ea Bokreste e tsebahala ka ho koetlisa litho tsa eona. Moapostola Pauluse o ile a re ho Timothea: “Lintho tsena u li behe ho banna ba tšepahalang, bao, le bona, e tla ba ba tšoanelehang ka ho lekaneng ho ruta ba bang.” (2 Tim. 2:2) Le kajeno, mokhatlong oa Jehova ho ’nile ha e-ba le mananeo a ’maloa a ho koetlisa batho. Ka mohlala, ho tloha ka 2008, baholo ba 6 528 ba libakeng tse oelang lekaleng la United States—tse akhang Alaska, Bermuda, le Lihlekehleke tsa Turks le Caicos—ba bile lihlopheng tse 70 tsa Sekolo sa Baholo ba Phutheho se neng se tšoaretsoe Setsing sa Thupelo sa Watchtower se Patterson, New York.
Thupelo ena e matla e nkang beke e ama likarolo tse sa tšoaneng tsa bophelo ba baholo ’me e ba thusa hore ba etelle pele mosebetsing oa ho bolela litaba tse molemo le ho ba mesuoe e atlehang ka phuthehong. (2 Tim. 4:5; 1 Pet. 5:2, 3) E boetse e ba khothalletsa hore ba sebetse ka thata e le hore bona le ba malapa a bona ba lule ba e-na le kamano e matla le Molimo, e boetse e ba koetlisetsa ho ‘tšoara lentsoe la ’nete ka nepo’ ha ba thusa batho ba bang. (2 Tim. 2:15) Baholo ba bangata ba ileng ba ea sekolong sena baa leboha, empa utloa hore na bana ba ’maloa ba re’ng.
“Barupeli ba rōna ba ile ba re behela mohlala oa boikokobetso oa kamoo re lokelang ho tšoara barab’abo rōna kateng phuthehong. Ruri ke leboha Sehlopha se Busang. Thupelo ena ke tsela e ’ngoe e ikhethang ka ho fetisisa eo nkileng ka tlotloa ka eona lilemong tsena tseo ke li qetileng ke le ka phuthehong.”
“Jehova Molimo oa rōna oa tseba hore na re hloka eng le hore na o lokela ho re fa eona neng. Tumelo ea ka e matlafetse, ebile ke ikutloa ke le mafolofolo. Thupelo ena e nthusitse hore ke utloisise hantle seo Jehova a se etsang ka karolo e bonahalang ea mokhatlo oa hae le hore na o hlokomela batho bohle ba hae joang.”
“Ke qala ho bona ntho e tjena. Ha ke ntse ke ithuta sekolong sena, ke ile ka lemoha hore ho na le lintho tse ngata tseo ke sa li tsebeng. Joale kea utloisisa hore na ke hobane’ng ha ke lokela ho ithuta le ho sebelisa sohle seo ke ithutileng sona.”
“Thupelo ena e nthusitse hore ke be le kelello ea Kreste ha ke hlokomela lelapa la ka le phutheho. (1 Bakor. 2:16) E nthusitse hore ke itlhahlobe hore na ke motho oa mofuta ofe.”
“Leha motho a ne a ka re ke ee univesithing bekeng ena eo ke e qetileng ke e-na le barupeli ba sebelisoang ke Jehova, ke ne ke tla hana.”
“Thupelo ena e ntlhasimolotse ’me e nthuisitse molemo! E ntsositse molota hore ke phethe tšebeletso ea Jehova, ke itele, ’me ke khatholle bara le barali babo rōna. (Esa. 32:2) Ke leboha Jehova!”
“Thupelo ena e re thusitse hore re bone hore Jehova oa re rata. Ho bile joalokaha eka o re etsetsa leeto la bolisa.”
“Ke leboha Jehova ha e le mona a mphile tlotla ea hore ke ithute ho phetha mosebetsi oa ka ka tsela e tla mo tlotlisa.”
Ka nako e loketseng Sehlopha se Busang se tla re tsebisa hore na ho entsoe litokisetso life tsa hore baholo ba libakeng tse ling ba fumane thupelo ena e nakong.
E BA THABO FEELA HA MAKALA A NEHELOA
Ka la 24 January, 2009, Samuel Herd e leng setho sa Sehlopha se Busang e ne e le sebui sa moeti ha ho neheloa lekala le lecha la Tanzania, Afrika Bochabela. Lilemong tse 25 tse fetileng, lekala lena le ile la qala ho sebeletsa likamoreng tse tharo tse hahiloeng ka setene, tseo Lipaki tsohle tsa Tanzania li neng li re ke House Number 46, Magomeni Quarters. Boholo ba baeti ba thabileng ba 779 ba tsoang linaheng tse 22 ba ne ba sekisitse meokho ha ba nahana ka tsela eo mosebetsi o ileng oa tsoela pele ka eona esale ho tlosoa thibelo ka 1987. Mor’abo rōna e mong eo e leng khale a li bona o itse: “Ke Jehova feela ea neng a ka etsa ntho ea mofuta ona naheng ena.” Hona joale mosebetsi oa ho bolela litaba tse molemo o hatetse pele ’me bahoeletsi ba fetang 14 000 ba thabile, ba leboha Jehova ’me ba tlotlisa lebitso la hae.—Pes. 92:1, 4.
Ka Moqebelo oa la 2 May, 2009, bara le barali babo rōna ba ka bang 600 ba tsoang linaheng tse 31 ba ile ba mamela puo ea Theodore Jaracz oa Sehlopha se Busang ha a nehela mohaho o ekelitsoeng ofising ea lekala ea Netherlands. Ho atolositsoe mohaho oa bolulo oo esaleng o hahoa ka 1983, ’me mehaho eo pele e neng e sebelisetsoa ho hatisa limakasine e entsoe liofisi le sebaka se sebelisoang ke Lefapha la Khatiso ea Livideo ea Lebatooa (RAVC) ha le rekota livideo. Lefapha la RAVC le rekota boitsebiso bo tla hatisoa ka li-CD le li-DVD ka lipuo tse 24, tseo boholo ba tsona li buuoang Europe. Ho phaella moo, RAVC e thusa khatisong ea li-video ka lipuo tsa matsoho tse 20. Mosebetsi ona o akarelletsa ho lokisetsa hore ho hatisoe li-CD tsa Europe, Afrika le Oceania, le li-DVD tse eang lefatšeng lohle. Lekala la Netherlands le boetse le rekela makala a mang likarolong tse ling tsa lefatše thepa le be le e romele, ’me mehaho e nchafalitsoeng e le thusa hore le phethe mesebetsi ena.
“LE IPOLOKE LERATONG LA MOLIMO”
Ka sebele, re na le mabaka a mangata a ho thaba. Re hlohonolofalitsoe hakaakang hore ebe re phela linakong tsena tse thabisang! Ke ’nete hore boprofeta bo bontša hore “matsatsing a ho qetela ho tla ba le linako tse mahlonoko tseo ho leng thata ho sebetsana le tsona.” (2 Tim. 3:1) Empa kaha topollo e atametse, ke habohlokoa hore e mong le e mong oa rōna a ikemisetse ho ela hloko keletso ena e matla ea Juda: “Lōna, baratuoa, ka ho ikaha tumelong ea lōna e halalelang ka ho fetisisa, le ho rapela ka moea o halalelang, le ipoloke leratong la Molimo, ha le ntse le letetse mohau oa Morena oa rōna Jesu Kreste ka tebello ea bophelo bo sa feleng.”—Juda 20, 21.
[Krafo e leqepheng la 13]
(Ha u batla ho bona boitsebiso bo hlophisitsoeng hantle, sheba sengoliloeng)
BATHO BAO LETSATSI LE LETSATSI BA BULANG www.watchtower.org
70,000
50,000
30,000
10,000
1999 2001 2003 2005 2007 2009
[’Mapa o leqepheng la 21]
(Ha u batla ho bona boitsebiso bo hlophisitsoeng hantle, sheba sengoliloeng)
Libaka Tseo Morao Tjena ho Bileng le Linyeoe Tsa Bohlokoa
AUSTRIA
EGYPT
ERITREA
UGANDA
AFRIKA BOROA
ARMENIA
MOLDOVA
TURKEY
AZERBAIJAN
RUSSIA
KAZAKHSTAN
UZBEKISTAN
TAJIKISTAN
INDIA
KOREA BOROA
[Setšoantšo se leqepheng la 11]
Esita le bahoeletsi ba banyenyane ba thabela ho batla lithuto tsa Bibele
[Litšoantšo tse leqepheng la 27]
Sekolo sa Baholo ba Phutheho se ba hlomella hore ba phethe boikarabelo ba bona ka phuthehong
[Litšoantšo tse leqepheng la 28]
Mor’abo rōna Jaracz o fana ka puo ea nehelo lekaleng la Netherlands
[Litšoantšo tse leqepheng la 29]
Mor’abo rōna Herd o fana ka puo ea nehelo lekaleng la Tanzania