Esaia 42:8—“Ke ’na Morena”

“Ke ’na Jehova. Leo ke lona lebitso la ka. Nke ke ka fa e mong tlhompho ea ka kapa ka fa litšoantšo tse betliloeng thoriso ea ka.”—Esaia 42:8, Bibele Phetolelo ea Lefatše le Lecha.

“Ke ’na Morena, lena ke lona lebitso la ka. Nke ke be ka neha e mong tlotla ea ka kapa melimo ea bohata tlotliso ea ka.”—Esaia 42:8, Bibele Phetolelo e Ncha.

Tlhaloso ea Esaia 42:8

Molimo o re bolella lebitso la hae ’me o boetse o re ha a arolelane thoriso le tlhompho le litšoantšo.

Molimo o iphile lebitso leo hangata le fetoleloang e le “Jehova” ka Sesotho.a (Exoda 3:14, 15) Le hoja lebitso lena le hlaha ka makhetlo a ka bang 7 000 Testamenteng ea Khale (Mangolong a Seheberu le Searame), le nketsoe sebaka ke tlotla “Morena” (e qaloa ka tlhaku e kholo). Mohlala ke Pesaleme ea 110:1, e leng boprofeta bo buang ka Jehova le Jesu. Bibele Phetolelo e Ncha e re: “Morena [Jehova] o itse ho Morena [Jesu] oa ka.” (Liketso 2:34-36) Bibele Phetolelo ea Lefatše le Lecha e hlakisa phapang ea “Marena” ao a mabeli ka hore e kenye lebitso la Molimo sebakeng se loketseng. E re: “Jehova o itse ho Moren’a ka: ‘Lula ka letsohong la ka le letona ho fihlela ke beha lira tsa hao tlas’a maoto a hao.’”

Litsebi tse ngata li lumela hore lebitso la Molimo le bolela hore “O Etsa Hore ho be.” Ke Molimo oa ’nete feela ea tšoaneloang ke lebitso lena, hobane o khona ho etsa hore popo ea hae e tsoele pele ho etsa hore thato ea hae le morero oa hae li phethahale.

Joaloka ’Mopi oa rona le Molimo a le mong oa ’nete, Jehova o tšoaneloa ke hore re inehele ho eena feela. Ha ho motho kapa ntho leha e le efe e tšoaneloang ke boinehelo ba rona esita le litšoantšo.—Exoda 20:2-6; 34:14; 1 Johanne 5:21.

Tlaleho ea Esaia 42:8

Litemaneng tse qalang tsa Esaia khaolo ea 42, Jehova o ile a bolela esale pele ka mesebetsi ea “mokhethoa” oa hae. Molimo o ile a bontša hore mohlanka oa hae “o tla tlisetsa lichaba toka.” (Esaia 42:1) Malebana le tšepiso eo, Molimo o ile a re: “Joale ke bolela lintho tse ncha. Pele li hlaha, ke le bolella ka tsona.” (Esaia 42:9) Boprofeta bo buang ka “mokhethoa” bo ile ba phethahala lilemo hamorao ha Mesia, kapa Kreste, a fihla ’me a phetha tšebeletso ea hae e lefatšeng.—Matheu 3:16, 17; 12:15-21.

Esaia 42:8 Liphetolelong Tse Ling

“Ke ’na Jehova. Ke lona lebitso la ka; ’me nke ke ka fa e mong khanya ea ka, kapa ka fa litšoantšo tse betliloeng thoriso ea ka.”—Phetolelo ea Lefatše le Lecha ea Mangolo a Halalelang.

“Ke ’na Jehova, ke lona lebitso la ka. Nke ke ka nea e mong khanya ea ka, nke ke ka nea litšoantšo thoko e ntšoanelang.”—Bibele ea Sesotho.