Na U Tla Ela Litemoso Tsa Koluoa e Haufi Hloko?
LIKOLUOA tse ling tsa hlaho li baka tšitiso bophelong ba batho; tse ling tšenyo e khōlō bophelong le thepeng. Hangata, likoluoa tse joalo li ama feela karolo e nyenyane ea lefatše le baahi ba eona ka nako eo. Leha ho le joalo, moloko oa hona joale o talimane le koluoa ea lefatše ka bophara e tla ama batho bohle.
Che, ha se ntoa ea nuclear mahareng a linaha tse matla tsa lefatše, leha eo e ne e tla ba koluoa e tšabehang. Ho e-na le hoo, re bua ka morero oa Molimo oa ho felisa bobe holim’a lefatše.
Boholo ba koluoa ena bo boletsoe ke Jesu boprofeteng ba hae ka ho fela ha tsamaiso ea lintho: “Hobane mohlang oo, mahlomola a tla ba maholo, ha e sa le le tšimolohong ea lefatše, ho fihlela joale, tsietsi e kalo ha e-so ho ka e-ba teng, ’me ha e ka ke ea boela ea e-ba teng le ka mohla o le mong. Le hojane matsatsi ao a se ke a khutšofatsoa palo, ho no ho ke ke ha phonyoha motho.”—Mattheu 24:3, 21, 22.
Ba Pholositse Bophelo ba Bona
Jesu o bapisitse koluoa ena ea lefatše ka bophara le koluoa ea lefatše la pele, Moroallo oa mehleng ea Noe, o itse: “Joalokaha ho bile mehleng ea Noe, le ho ba teng ha Mor’a motho ho tla ba joalo.” (Mattheu 24:37, NW) Bibele e tlaleha hore matsatsi pele ho Moroallo ‘bolotsana ba batho bo ne bo le boholo lefatšeng le hoba ’mōpo ’ohle oa lipelo tsa bona o ne o le mobe ka matsatsi ’ohle.’ Jehova a re: “Ke tla timetsa lefatšeng batho bao ke ba bōpileng.”—Genese 6:5-8.
Ha e le ka Noe, rea bala ho Ba-Heberu 11:7 hore: “Ka tumelo, Noe, e itse hoba a tsebisoe ke Molimo tse e-song ho bonahale, o kile a tšaba Molimo, ’me a haha areka ho pholosa ba ntlo ea hae.” Noe, mosali oa hae, le bara ba hae le basali ba bona, bohle ba bolokoa ba phela Moroallong.
Leha ho le joalo, batho bohle nakong eo ba ile ba hlokomoloha temoso e fanoeng. Ho latela mantsoe a Jesu, batho ba pele ho matsatsi a Moroallo ba ne ba “e-ja, ba e-noa, ba nyala, ba nyalisa, ha ba ha fihla letsatsi leo Noe a keneng arekeng ka lona; ha ba ka ba lemoha, ha ba ha fihla moroallo.”—Mattheu 24:38, 39
Mehleng ea Lota, Molimo oa ikemisetsa ho timetsa baahi ba Sodoma le Gomorra ka lebaka la boitšoaro ba bona bo bobe. Leha ho le joalo, ba ’na ba ‘ja le ho noa, ba reka le ho rekisa, ba lema le ho haha’ joaloka hoja ho ne ho se letho le tla etsahala. Le hoja Lota a lemositse bao e neng e tla ba bakhoenyana ba hae ka kotsi, empa ‘mahlong a bona ha e-ba joale ka hojane oa soasoa.’ Empa Molimo oa nesa mollo le sebabole, ’me ba timetsoa kaofela. Lota le barali ba hae ba ela temoso e fanoeng hloko ’me ba pholosa bophelo ba bona.—Luka 17:28, 29; Genese 19:12-17, 24.
Temoso ea Mehleng ea Jesu
Mehleng ea Jesu, Bajode ba ile ba latola Lentsoe la Molimo ’me ba amohela lineano tsa bona, ba latola Mora oa Molimo e le Kreste, kapa Messia. Molimo oa ikemisetsa ho lihela kahlolo ea oona holim’a bona le motse oa bona o motle, Jerusalema, ka makhotla a Roma. Jesu a lemosa ka sena ’me a tsebisa barutuoa ba hae kamoo ba ka phonyohang timetso eo kateng. O itse:
“Etlare ha le bona manyala a bofeliso, a boletsoeng ke moprofeta Daniele, a eme nģalong e halalelang, . . . ba leng Judea ba balehele lithabeng.” ’Me: “Ha le bona Jerusalema e teetsoe hare ka makhotla a lira, le tsebe hoba tšenyeho ea eona e atametse. Mohlang oo, ba leng Jerusalema ba balehele lithabeng; ba har’a Jerusalema ba tsoe; ba leng naheng ba se ke ba kena teng. Hobane matsatsi ao ke a tefetso, hore tsohle tse ngoliloeng li tle li phethahale.” (Mattheu 24:15, 16; Luka 21:20-22) E ne e tla ba nako ea ho nka bohato bo potlakileng, motho o ne a ke ke a senya nako a bokella matlotlo a hae a bonahalang. Jesu o itse: “Ea leng holim’a ntlo a se ke a theohela ho nka ntho tlung ea hae; le ea leng masimong, a se ke a khutlela hae ho nka kobo ea hae.”—Mattheu 24:17, 18.
Selemong sa 66 C.E., Jerusalema ea teeloa hare ke makhotla a Roma tlas’a Cestius Gallus, phethahatsong ea boprofeta ba Jesu. Baroma ba heletsa lerako la tempele ’me ba ema tulong e halalelang ea Bajode, hoo e ne e le manyala ho Bajode. Letšoao la temoso le ne le le pel’a mahlo a bona empa ho ne ho se monyetla oa ho baleha. Joale, ho sa lebelloa, Cestius Gallus a chechisa mabotho a hae. Bakreste ba qala ho balehela lithabeng. Leha ho le joalo, ba bangata ha ba ka ba tsoa motseng, ’me Bajode ba bang ba ’na ba kena motseng ho tla etsa mekete ea bona ea bolumeli.
Ka 70 C.E., ha motse o tletse matšoele-tšoele a ba tlileng moketeng oa Paseka, mabotho a Roma tlas’a Molaoli Tite a khutla a befile haholo ’me a teela Jerusalema hare. Nakong eo lerako la heletsoa, tempele le motse ’ohle tsa timetsoa ’me ho ea ka rahistori Josephus, ha bolaoa ba 1 100 000, baphonyohi ba 97 000 ba isoa botlamuoeng Egepeta le linaheng tse ling. Ona e bile moputso oa ba ileng ba hlokomoloha temoso ea Jesu. Ba balehileng joalokaha Jesu a boletse, ba boloka bophelo ba bona.
Ela Temoso Hloko Hona Joale
Boprofeta ba Jesu, joalokaha bo tlalehiloe ho Mattheu 24, Mareka 13 le Luka 21, bo ne bo lokela ho phethahala haholoanyane. Hopola, Jesu o ne a arabela potso ea baapostola ba hae mabapi le pontšo ea ho ba teng ha hae, eo Bibele e e amahanyang le bofelo ba tsamaiso eohle ea lintho. (Daniele 2:44; Mattheu 24:3, 21, NW) Jesu o bontšitse hore ho khutla ha hae kapa ho ba teng ha hae, ho sa bonahaleng, ho tla tšoauoa ka pontšo e tla kopanyeletsa lintoa, tlala, litšisinyeho tsa lefatše, mafu a akaretsang, keketseho ea tlōlō ea molao, ho hlōrisoa ha barutuoa ba hae, tsieleho ea lichaba, batho ba neela moea ke tšabo le ke tebello ea tse tla hlaha lefatšeng.—Mattheu 24:7, 8, 12; Luka 21:10, 11, 25, 26.
Ke mang ea ka latolang hore moloko o phetseng ho tloha ka Ntoa ea I ea Lefatše o bone keketseho ea masisa-pelo ana kaofela? Ho nolofaletsa batho ho utloisisa tlhaloso ea lintho tsena, Jesu a profeta sena: “’Me litaba tsena tse molemo tsa ’muso li tla boleloa lefatšeng lohle le ahiloeng e be bopaki ho lichaba tsohle; ’me e tla ba hona bofelo bo hlahang.” (Mattheu 24:14, NW) Ka cheseho Lipaki tsa Jehova li bolela molaetsa ’ona oa ’Muso linaheng tse fetang 200 ka lipuo tse fapaneng tse 200, li lemosa batho ka kahlolo ea Molimo e tla lihuoa haufinyana. Ho ba neng ba tla bona qalo ea mahlomola a simolotseng ka Ntoa ea I ea Lefatše, Jesu o itse: “Moloko ’ona o ke ke oa feta, tseo tsohle li e-so ho etsahale.”—Mattheu 24:34.
Tsela ea ho ela temoso ea Jesu hloko, ha se ho balehela lithabeng tsa sebele kapa ho leka ho balehela karolong e ’ngoe ea lefatše, empa ke ho retelehela ho Molimo oa ’nete, Jehova, le ho ithuta ka tokisetso ea hae ea ho pholosa bophelo. U ka etsa sena ka ho batla ba bolelang temoso ena, Lipaki tsa Jehova, u ba lumelle ho ithuta Bibele le uena, le ho kopanela le bona.
Haeba ho ela litemoso hloko ho ne ho le bohlokoa bakeng sa Majapane a likete tse leshome hore a pholose bophelo ba oona timetsong ea ho phatloha ha thaba mollo, ho bohlokoa haholo hakaakang ho nka bohato hona joale ho fumana tšireletso ea Jehova timetsong ea lefatše lohle mehleng ena ea bofelo!
[Setšoantšo se leqepheng la 10]
Ka ho ela litemoso hloko, Lota le barali ba hae ba phonyohile timetso