Pono ea Bibele

Na Testamente ea Khale e Siiloe ke Nako?

■ “Testamente ea Khale e ruta lehloeo le boiphetetso, leihlo ka leihlo le leino ka leino.’ Tseo tsohle li nketsoe sebaka ke Testamente e Ncha, e rutang lerato le ho tšoarelana.”

■ “Testamente ea Khale ha ea tšoanela Bakreste ba kajeno, kahoo ha ho hlokahale hore e baloe!”

NA U kile ua iphumana u bua mantsoe a kaholimo kapa u utloile motho e mong a a bua? Na Testamente ea Khale (Mangolo a Seheberu) e shoele, e siiloe ke nako, ’me e nketsoe sebaka ke Testamente e Ncha (Mangolo a Bakreste a Segerike)? Bibele ka boeona e re’ng?

Ho thahasellisang, Testamente e Ncha e bontša hore selekane sa Molao, tumellano e entsoeng mahareng a Molimo le Iseraele ea boholo-holo, ha e sa sebetsa kahoo ha e sa tlama Bakreste. (Ba-Efese 2:15; Ba-Heberu 8:13) Selekane sena sa molao se ne se kopanyelletsa Testamente ea Khale. Empa ho na le ho hongata Testamenteng ea Khale ho feta selekane sa Molao!

Ho na le litšobotsi tse tharo tse etsang Testamente ea Khale e be ea bohlokoa ho uena. Ke life? (1) Bopaki ba histori, (2) puo ea lithothokiso tse hahang, le (3) boprofeta bo matlafatsang tumelo, boo e leng ba bohlokoahali ho Bakreste ba mehla ea joale. Nahana hore sena se joalo joang.

Histori ea Bibele

Libuka tsa pele tse 17 tsa Testamente ea Khale, Genese ho ea ho Esthere, li akaretsa tlaleho ea histori ea tšebelisano ea Molimo le motho ho tloha ha a bōptjoa ho fihlela lekholong la bohlano la lilemo B.C.E. Empa sena hase histori feela e shoeleng! Joaleka ha moapostola oa Mokreste Pauluse a ngotse: “Efela taba tseo tsohle [tse ngotsoeng Testamenteng ea Khale] li ne li ba hlahele e be litemoso, ’me li ngoliloe hore [Bakreste] re ithute ka tsona, rōna ba hlahetsoeng ke mehla ea bofelo.”—1 Ba-Korinthe 10:11.

Ke hobane’ng ha Pauluse a ile a talima histori ena e loketse Bakreste ho sa tsotellehe makholo a lilemo a fetileng? Hobane joaloka ha botho ba batho bo sa fetoha lilemong tse ngata, Molimo ka booona ha o a fetoha. (Malakia 3:6) Morutuoa oa Mokreste Jakobo o itse ka Jehova Molimo: ‘Eo ho eena ho seng tikatiko, leha e le seriti sa ho fetoha.’ (Jak. 1:17) Moriti o etsoang ke letsatsi oa fetoha ho tloha hoseng ho fihlela ha letsatsi le likela. Empa Jehova ha a fetohe; botho ba hae ha bo fetohe.

Kahoo, re ka ithuta ho hongata historing ea tšebelisano ea Jehova le bapatriareka, le Baiseraele Leoatleng le Lefubelu le lehoatateng, esita le batho ba bang ba bangata. Ka mohlala, joaloka ha Molimo o ile oa khopeha ha Baiseraele ba ne ba etsa borapeli ba litšoantšo kapa ba etsa bohlola, kahoo ha o thabe ha Bakreste ba ameha boitšoarong bo joalo. (1 Bakorinthe 10:1-12) Esita le Molao oa selekane, le hoja o sa tlame Bakreste, o fana ka temoho ea bohlokoa ea ho bona botho ba Jehova le melao-metheo ea hae.

Thothokiso ea Bibele le Boprofeta

Libuka tse hlano tse hlahlamang, ho tloha ho Jobo ho ea ho Sefela sa Lifela, ke libuka tsa bokheleke. Empa libuka tsena li molemo ho feta libuka feela, hobane melaetsa ea tsona ke e matlafatsang moeeng ’me hangata e itšetlehile liketsahalong tsa histori. Ke mang eo maikutlo a hae a sa sisinngoeng ke Lipesaleme? ’Me ke mang ea ke keng a bona keletso e sebetsang ea botšepehi, mōna, le litaba tse ling tsa likamano tsa batho bukeng ea Liproverbia? (Liproverbia 11:1; 14:30) Ntle ho pelaelo, libuka tsena li molemo kajeno joaloka ha li ne li ngoloa ka lekhetlo la pele.

Libuka tsa ho qetela tse 17 tsa Testamente ea Khale, Esaia ho ea ho Malakia, ke libuka tsa boprofeta. Li na le melaetsa ea baprofeta ba boholo-holo ba Baheberu ’me li fana ka litlhaloso tse hlakileng tsa ho tla ha Messia lefatšeng ka makholo a lilemo e sa le pele. Tlaleho ea Molaetsa Testamenteng e Ncha e bontša ho phethahala ha boprofeta bona bo bongata, esita le lintlha tsohle tse qaqileng. Ho nahana ka ho nepahala ha boprofeta bona ho matlafatsa tumelo ea rōna ho Jesu joaloka e mong ea rometsoeng ke Molimo ho pholosa batho!

Na ea Itoantša?

Empa, na phapang mahareng a Testamente ea Khale le Testamente e Ncha e ka lumellangoa? Ka mohlala: Ntate a ka ’na a laea bara ba hae ba babeli ka ho fapaneng hobane ngoana ka mong o na le botho bo fapaneng. Ka ho tšoanang, matla a keletso ea Jehova Testamenteng ea Khale ho Baiseraele, sechaba sa batho ba inehetseng ho eena ka tlhaho, a ne a tla fapana le a keletso e fumanoang Testamenteng e Ncha ho phutheho ea Bokreste, sehlopha sa batho se inehetseng ho eena ka boikhethelo.

Kahoo, tlhahlobo e bontša hore likarolo tse peli ha li itoantše, empa lia tlatsana. Likarolo tsena tse peli lia hlokahala hore ‘motho oa Molimo a phethehe.’—2 Timothea 3:16, 17.

Ka mohlala, na Testamente ea Khale ha e khothaletse boiphetetso ha Testamente e Ncha e bo nyatsa? Che! Ka bobeli li khothalletsa ho rata sera sa hao, ’me li bontša hore phetetso ke ea Molimo. (Bapisa Deuteronoma 32:35, 41 le Liproverbia 25:21, 22 le Ba-Roma 12:17-21.) Ha Testamente ea Khale e bua ka leihlo ka leihlo, leino ka leino’ ha e bue ka boiphetetso, empa ho e-na le hoo ke ho lefa moputso o loketseng joaloka ha molao oa lekhotla o laetse.—Exoda 21:1, 22-25.

Che, Testamente ea Khale ha ea siuoa ke nako kapa ho itoantša. Bibele e bontša hore ke e phelang le e tšoanetseng Bakreste kajeno joale ka Testamente e Ncha. Hopola mantsoe a Jesu: “Motho a ke ke a phela ke bohobe feela, empa o tla phela le ke lipolelo tsohle tse tsoang molomong oa Molimo.” Empa seo hase kopanyelletse Mangolo a Bakreste a Segerike feela empa le Mangolo a Seheberu.—Mattheu 4:4; bapisa Deuteronoma 8:3.