Lithapelo—Li Lokela ho Pheta-phetoa Kapa ho Etsoa ka Mokhoa oa Tlhaho?

SEFOFANE se seholo sa jet se ne se feta ka lebelo le leholo se le bophahamong ba limithara tse 12 500. Ka tlas’a sona ho ne ho na le metsi a batang a Pacific. Ka tšohanyetso, enjine e ’ngoe e ile ea khaotsa ho sebetsa. Joale, tse ling tse tharo li ile tsa felloa ke matla. Nakong ea metsotso e ’meli sefofane sena se ile sa theoha ka tšohanyetso ka lik’hilomithara tse leshome! Empa jet ena ha e le bophahamong ba limithara tse 2 700 e ile ea fumana matla hape ’me ea fihla San Francisco e sireletsehile. Moeti e mong o ile a feheloa: “Ke ile ka rapela ka tieo ho feta nakong leha e le efe ea bophelo ba ka.”

Linakong tsa koluoa, kotsi kapa masoabi a maholo, batho ba bangata, esita le bao e seng balumeli, ba retelehela ho Ea Matla ’Ohle bakeng sa thuso. Ka ho fapaneng, bao e leng litho tsa bolumeli ba pheta-pheta lithapelo tse ngotsoeng likerekeng le litempeleng kapa malapeng. Ka thuso ea lirosari, batho ba bangata ba pheta-pheta Thapelo ea Morena le Ahe Maria. Ba bang ba sebelisa libuka tsa thapelo. Batho ba limillione ba Bochabela ba bilikisa mabili a ngotsoeng lithapelo ka hare e le mokhoa oa ho pheta-pheta lithapelo.

Na u kile ua ipotsa, ‘Re lokela ho rapela joang? Na lithapelo li lokela ho pheta-phetoa kapa ho etsoa ka mokhoa oa tlhaho?’

Seo Thapelo e Leng Sona

Hakanya hore ntate oa hao eo u mo ratang haholo, ea lulang naheng e ’ngoe, o ile a u khothalletsa hore u mo letsetse thelefono neng le neng ha u rata—mahala. Na u ne u ke ke ua mo letsetsa khafetsa? Na u ne u ke ke ua thabela ho boloka, esita le ho matlafatsa, tlamahano ea lōna ea bohlokoa? Na u ne u ke ke ua buisana le eena ka matšoenyeho a hao le ho leboha ka ho tebileng bakeng sa thuso leha e le efe le khothatso tseo a u fileng tsona bophelong bohle ba hao? Kamano ena ea botho e ne e tla ba letlotlo le leholo ho uena, na ha ho joalo?

Ha u letsa, u ka ’na ua bua ka lintho tse ling khafetsa, empa u ne u ke ke ua li bala bukeng kapa ua li pheta-pheta ka mantsoe a tšoanang, na u ne u ka etsa joalo? Kahoo le thapelo ea Mokreste ha ea tšoanela ho ba joalo. Ha e le hantle, Kreste Jesu o ile a bolela hore lithapelo ha lia lokela ho ba joalo.

Ke’ng Seo Kreste Jesu a Ileng a se Bua?

“Ha le rapela, le se ke la pheta-pheta lintho li le ling, joalokaha batho ba lichaba ba etsa, hobane ba nahana hore ba tla utluoa ka baka la ho sebelisa mantsoe a mangata.”a (Mattheu 6:7, NW) Liphetolelo tse ling li beha taba ena ka tsela ena: “Lithapelong tsa lōna, le se ke la ’na la bebera joaloka bahetene.” (The New English Bible) “Ha le rapela le se ke la phaella lipolelo tse sa reng letho joalokaha Balichaba ba etsa.”—Revised Standard Version.

Batho ba bang ha ba tsebe phapang pakeng tsa ho bua mantsoe a mangata haholo le ho sekamela bolumeling, ho bua ha phollatsi le boinehelo, ho pheta-pheta taba le bolelele ba eona le ho tiiseha ka karabelo. Leha ho le joalo, Molimo ha o lekanyetse bohlokoa ba thapelo ka bolelele ba eona. Ho totobetse hore Jesu o ne a sa rate hore balateli ba hae ba sebelise mantsoe a tšoanang kapa ho pheta lithapelo ka hlooho. Kahoo, na lirosari, libuka tsa lithapelo, kapa mabili a thapelo ke lintho tsa bohlokoa ba nako e telele?

Ka mor’a hore a bue mantsoe a ka holimo, Jesu o ile a tsoela pele ho ruta barutuoa ba hae thapelo ea mohlala—e tsebahalang haholo e le Thapelo ea Morena. (Mattheu 6:9-13) Empa na o ne a rerile hore ba ’ne ba pheta-phete mantsoe ’ona ao? Che. Ha e le hantle, ha a bua ka eona hape nako e fetang selemo hamorao, Jesu haa ka a sebelisa mantsoe a tšoanang hantle. (Luka 11:2-4) Na ho na le tlaleho leha e le efe e bontšang hore Bakreste ba pele ba ile ba etsa seo kapa ea hore ba ile ba pheta-pheta lithapelo tse itseng tse ngotsoeng? Che.

Na sena se bolela hore re ke ke re bua ka ntlha e le ’ngoe kapa ra kōpa ntho e le ’ngoe ka makhetlo a mangata? Ha ho joalo, hobane Jesu o ile a boela a re: “Le ’ne le kōpe, ’me le tla fuoa; le ’ne le batle, ’me le tla fumana.” (Mattheu 7:7, NW) Hangata hoa hlokahala bakeng sa rōna hore re etse likōpo tse tšoanang ka makhetlo a mangata. Kahoo Jehova o bona hore na re tiile hakae likōpong tsa rōna le hore boikutlo ba rōna bo tebile hakae ka taba eo.

Ka mohlala, lekholong la bohlano la lilemo B.C.E., ho ne ho e-na le monna ea chesehang ea bitsoang Nehemia eo e neng e le setho sa sechaba sa Bajode ea neng a le kholehong Babylona. E ne e le moqhatsetsi lelapeng la borena la morena oa Persia. Ha a ne a bolelloa hore batho ba habo, eleng baahi ba Judea, ba ne ba phela ka thata, o ile a rapela “motšehare le bosiu” e le hore ba ka thusoa. (Nehemia 1:6) Lithapelo tsa hae li ile tsa utluoa hamolemo. Jehova o ile a susumetsa ’musi oa Persia ea mohau hore a lumelle Nehemia hore a nke leeto le eang Jerusalema ho lokisa litaba. Sena o ile a se etsa, molemong oa thabo ea banab’abo le ho boloka tumelo ea bona.—Nehemia 1:3–2:8.

Kamoo Lithapelo tse Tsoang Pelong li Thusang ka Teng

Le hoja e le Matla a Phahameng Haholo bokahohleng bohle, Jehova o mema “bana” ba hae hore ba mo atamele ka pelo eohle. Morutuoa oa Jesu Jakobo o re: “Atamelang Molimo, ’me o tla le atamela.” (Jakobo 4:8) Empa joang? Re lokela ho rapela ka lebitso la Jesu. (Johanne 14:6, 14) Ho feta moo, Joalokaha Pauluse a bontšitse: “Tumelo ha e le sieo, ha ho kamoo Molimo o ka khahlisoang; ea atamelang Molimo e ka khona a lumele hobane o teng, le hoba ke oona moputsi oa ba o batlang.”—Ba-Heberu 11:6.

Batho ba nang le mathata, esita le ba entseng liphoso tse tebileng, ba ka kōpa thuso le tšoarelo. Jesu o ile a etsa papiso ea sena ka pale ea moeta-pele oa bolumeli eo, ha a rapela, a ileng a leboha Molimo hobane a halalela ho feta batho ba bang; empa molekhetho (ea nyatsehang le ea talingoang e le ea etsang liphoso tse tebileng mehleng eo) ka bonolo o ile a re: “Molimo, nkhauhele, ’na ke leng moetsalibe.” Ho totobetse hore thapelo eo e bonolo e tsoang pelong e ne e sa tsoe bukeng. ’Me Jesu o ile a nyatsa moikaketsi enoa oa bolumeli empa a re ka e mong: “Ea ikokobetsang o tla hōlisoa.”—Luka 18:10-14.

Maemo a lefatše a tšosang a etsa hore batho ba bangata ba tšoenyehe le ho utloisoa bohloko ke ho tepella maikutlo. Bakreste ba ka ba ba tšoenyeha ka boemo ba bona ka pel’a Molimo. Empa ho retelehela ho Jehova bakeng sa thuso ka mehla, khafetsa, ka mokhoa oa tlhaho ho ka tlisa melemo e ke keng ea lekanngoa. Pauluse o ile a ngola: “Le se ke la belaella letho; empa nthong tsohle seo le se batlang, le ke le se tsebise Molimo ka thapelo le ka kōpo e nang le teboho. ’Me khotso ea Molimo, e fetisang kutloisiso eohle, e tla boloka lipelo tsa lōna le mehopolo ea lōna ho Jesu Kreste.”—Ba-Filippi 4:6, 7.

Kōpo e bolela ho qela ka tieo, ho kōpa thuso ho Molimo, ho tšollela lipelo tsa rōna ho oona joaloka ngoana ho motsoali ea lerato le ea utloisisang haholo. Lithapelo tse joalo ha li tsoe libukeng, leha e le hore e ka ba tse pheta-phetoang. Li tsoa lipelong tse batlang thuso le tse nang le tumelo ea ’nete ho Jehova, eo e leng “Moutloi oa thapelo.”—Pesaleme ea 65:2, NW.

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 20]

Drawings of Albrecht Dürer/Dover Publications, Inc.