Linaleli li U Tšoaretse Molaetsa!
JOALOKAHA ho bontšitsoe lihloohong tse fetileng, ho sa tsotellehe khanya eo linaleli li e bontšang, motho o ne a reretsoe ho li talima e le seo li felang li le sona—lintho tse sa pheleng tse behiloeng maholimong ke ’Mōpi bakeng sa morero oa hae. Li ne li sa lokela ho rapeloa. E le karolo ea bohlokoa ea pōpo ea Jehova e tlas’a melao ea hae, linaleli li ne li lokela ho “bolela khanya ea Molimo” ’me ka nako e tšoanang ho sebeletsa e le mohloli oa khanya ho motho ha a phetha morero oa ’Mōpi bakeng sa hae.—Pesaleme ea 19:1; Deuteronoma 4:19.
Ka Bibeleng re bala sena: “Ho se ke ha fumanoa ha eno . . . mophofi ea phofang, kapa selaoli se laolang, kapa senohe, kapa moloi, le moupelli, leha e le ea botsang balimo, le ngaka e reng ea profeta, leha e le ea botsang bafu; hobane bohle ba etsang litaba tseo ba manyala ho Jehova.” (Deuteronoma 18:10-12) Esaia o ile a re: “A [baeletsi ba hao] ba ke ba eme, ba u pholose, bona ba tsebang leholimo, ba lekolang linaleli . . . Bona, ba joale ka lirite.”—Esaia 47:13, 14.
Seo Re ka Ithutang Sona ho Linaleli
Leha ho le joalo, linaleli tse sa pheleng li ka re bolella ho hong haeba re ikemiselitse ho mamela. Edwin Way Teale o ile a ngola: “Linaleli li bua ka ho se be bohlokoa ha motho ha a bapisoa le nako e telele e sa feleng.” E, ha re hlokomela hore bongata ba linaleli tseo re li bonang ka leihlo feela bosiu bo hlakileng li ile tsa bonoa ke baholo-holo ba rōna lilemo tse makholo tse fetileng, na seo ha se re kokobetse? Na ha re be le tšabo bakeng sa E Moholo ea li bōpileng “tšimolohong” ’me hamorao a bōpa moloko oa batho? Morena Davida oa Iseraele o ile a ngola ka tlhompho: “Ha ke boha leholimo la hao, mosebetsi oa menoana ea hao, khoeli le linaleli tseo u li bōpileng, ke re: Na motho ke’ng, ha u tla mo hopola? le mor’a motho ke’ng, ha u tla mo hlokomela?” Maholimo a lokela ho re kokobetsa le ho etsa hore re ipotse seo re se etsang ka bophelo ba rōna.—Genese 1:1; Pesaleme ea 8:3, 4.
Ka lekhetlo le leng Davida o ile a rapela: “U nthute ho etsa ho ratoang ke uena, hobane u Molimo oa ka.” (Pesaleme ea 143:10) Tlaleho ea bophelo ba Davida e bontša hore thapelo ea hae e ile ea arabeloa. O ile a ithuta ho etsa thato ea Molimo joalokaha e boletsoe Molaong oa Hae. O ile a boela a ithuta morero oa ’Mōpi bakeng sa moloko oa batho, ’me o ile a ngola ka oona. “Ho se ho se hokae, ’me molotsana o tla ba sieo . . . empa ba bonolo ba tla rua lefatše, ba iketle khotsong e kholo. . . . Sesefa bobe, u etse botle, ke moo u tla lula u iketlile ka ho sa eeng kae. . . . Ba lokileng ba tla ja lefa la lefatše, ’me ba tla hlola ho lona ka ho sa feleng.” Ho tseba morero oo ho ile ha tlisa boikarabello: “Sesefa bobe, u etse botle.”—Pesaleme ea 37:10, 11, 27-29.
Linaleli li tšoaretse moloko oohle oa batho oona molaetsa oo. Ka ntle le ho li rapela kapa ho li “botsa,” re ka bona lerato la ’Mōpi, bohlale, le matla tse bonahatsoang ke tsona. Thuto ea bolepi ba linaleli, ho fapana le bonohe ba linaleli, e lokela ho kenya tšabo lipelong tsa rōna. Empa ho feta moo, na ha e kenye ka ho rōna takatso ea ho ithuta ho eketsehileng ka Molimo? O fane ka Lentsoe la hae, Bibele, bakeng sa morero oona oo. Haeba u fumane molaetsa ona ho linaleli, u ka ithuta seo Jehova a se boloketseng moloko oa batho, hape habohlokoa ka ho fetisisa, kamoo u ka bang le karolo litlhohonolofatsong tseo a ba lokiselitseng tsona. Haeba u e-na le lipotso ka Molimo le morero oa bophelo, lokoloha ho bua le Lipaki tsa Jehova sebakeng sa heno, kapa ngolla atereseng e haufi-ufi e bontšitsoeng leqepheng la 5.
[Setšoantšo se leqepheng la 8]
Linaleli li ka re ruta boikokobetso