Pono Ea Bibele

Na Bibele ha e Khothalletse Thuto?

“Ke sethoto feela se khesang thuto.”—Publilius Syrus, ho Moral Sayings, lekholong la pele la lilemo B.C.E.

BIBELE e re khothalletsa ho “boloka bohlale le kutloisiso.” (Liproverbia 3:21) Jehova, Molimo oa tsebo, o batla hore barapeli ba hae e be batho ba rutehileng. (1 Samuele 2:3; Liproverbia 1:5, 22) Leha ho le joalo, lipolelo tse ling ka Bibeleng li ka ’na tsa hlahisa lipotso. Ka mohlala, ha a bua ka lipakane tseo a neng a li hahamaletse, ho akarelletsa le thuto ea hae e phahameng, moapostola Pauluse o ile a ngola: “Ke nka tsohle e le litšila tse se nang thuso.” (Bafilippi 3:3-8, Today’s English Version) Lengolong le leng le bululetsoeng, o ile a re: “Bohlale ba lefatše lena ke booatla ho Molimo.”—1 Bakorinthe 3:19.

Kahoo, na Bibele ha e khothalletse thuto? Mokreste o lokela ho hahamalla thuto ea lefatše ho isa bohōleng bofe? Na thuto e tlaase-tlaase e hlokoang ke molao e lekane, kapa na ho loketse ho hahamalla thuto e eketsehileng?

Thuto Lekholong la Pele la Lilemo

Ho Bakreste ba lekholong la pele la lilemo, ho ne ho e-na le motsoako oa maemo a sa tšoaneng a thuto. Banna ba bang ba hlaheletseng ba ne ba talima moapostola Petrose le moapostola Johanne ba Galilea e le “batho ba sa rutehang le ba tloaelehileng.” (Liketso 4:5, 6, 13) Na see se ne se bolela hore banna bao ba babeli ba ne ba sa tsebe ho bala le ho ngola kapa ba sa kena sekolo? Che. Ho ne ho mpa ho bolela hore thuto ea bona e ne e sa tsoe likolong tsa Seheberu tsa thuto e phahameng, Jerusalema. Mangolo a banna bana ba babeli ba loanetseng Bokreste ka sebete hamorao a ile a paka ’nete ea hore e ne e le batho ba rutehileng, ba bohlale, ba khonang ho hlalosa lithuto tsa Mangolo ka mokhoa o hlakileng. Thuto ea bona e ne e akarelelitse thuto e sebetsang ho hlokomeleng litlhoko tsa nama tsa malapa a bona. E ne e le basebetsi-’moho ho seo ka ho totobetseng e neng e le khoebo e nang le phaello ea ho tšoasa litlhapi.—Mareka 1:16-21; Luka 5:7, 10.

Ka ho fapaneng, Luka, morutuoa ea ileng a ngola e ’ngoe ea Likosepele hammoho le buka ea Liketso, o ne a ithutetse thuto e phahameng haholo. E ne e le ngaka. (Bakolose 4:14) Tsebo ea hae ea bongaka e bōpa boikutlo bo ikhethang mangolong a hae a bululetsoeng.—Bona Luka 4:38; 5:12; Liketso 28:8.

Pele e e-ba Mokreste, moapostola Pauluse o ne a rutiloe molao oa Sejuda, tlas’a botsamaisi ba setsebi se seng se bohlale ka ho fetisisa sa mehleng eo, Gamaliele. (Liketso 22:3) Thuto ea Pauluse e ka ’na ea bapisoa le thuto ea kajeno ea univesithi. Ho feta moo, sechabeng sa Bajuda ho ne ho nkoa e le tlotla hore bacha ba ithute mosebetsi o itseng oa matsoho, esita le haeba ba ne ba tla hahamalla thuto e phahameng lilemong tse latelang. Ka ho totobetseng Pauluse o ile a koetlisetsoa ho ba moetsi oa litente esale mohlankana. Tsebo e joalo e ile ea mo nolofalletsa ho itjara tšebeletsong ea hae ea nako e tletseng.

Leha ho le joalo, Pauluse o ile a hlokomela hore ha e bapisoa le tsebo e bohlokoa ka ho fetisisa ea Molimo, thuto ea lefatše—le hoja e hlokahala—ke ea bohlokoa bo lekanyelitsoeng. Tumellanong le seo, Bibele e hatisa bohlokoa ba ho ba le tsebo ka Molimo le Kreste. Bakreste kajeno ba etsa hantle ho latela pono ena e utloahalang mabapi le thuto ea lefatše.—Liproverbia 2:1-5; Johanne 17:3; Bakolose 2:3.

Ho Sekaseka Taba ka Hloko

Bakreste ba bang ba fumane hore ho hahamalla thuto e eketsehileng, ebang ke ea lithuto tsa hlooho kapa tsa mosebetsi oa matsoho, ho ba thusitse ho hlokomela litlhoko tsa malapa a bona tsa nama. Ho hlokomela ba lelapa la motho ho loketse, kaha ho ‘lokisetsa hore ho be le lintho tse hlokahalang bakeng sa litho tsa lelapa la motho’ ke tlamo e halalelang. (1 Timothea 5:8) Ho fumana tsebo e hlokahalang bakeng sa ho etsa sena ke taba ea ho ba le bohlale bo sebetsang.

Leha ho le joalo, ba nahanang hore ho hlokahala hore ba be le thuto e fetang ea motheo ho finyella sepheo sena ba lokela ho sekaseka melemo le mathata a hona. Melemo e ka ’nang ea e-ba teng e akarelletsa ho itlhomella bakeng sa ho fumana mosebetsi o ka nolofalletsang motho ho iphelisa le ho phelisa lelapa ka ho loketseng ha a ntse a hahamalla ka mafolofolo tšebeletso ea Bokreste. Ho phaella moo, a ka ’na a khona ho thusa ba bang ka lintho tse bonahalang, a “ba le ho hong hoo a ho abelang ea hlokang.”—Baefese 4:28.

Mathata a mang a ka ’nang a e-ba teng ke afe? A ka ’na a akarelletsa ho pepesehela lithuto tse fokolisang tumelo ho Molimo le Bibeleng. Pauluse o ile a eletsa Bakreste ho ela hloko “seo ka bohata se bitsoang ‘tsebo’” le “filosofi le thetso ea lefeela ho ea ka neano ea batho.” (1 Timothea 6:20, 21; Bakolose 2:8) Ho ke keng ha latoloa ke hore ho pepesehela mefuta e meng ea thuto ho ka ba kotsi tumelong ea Mokreste. Ba nahanang ka ho ntšetsa pele koetliso kapa lithuto tsa bona ba lokela ho ela hloko likotsi tsa tšusumetso e joalo e lematsang.

Moshe, ea neng a ile a “rupeloa ka bohlale bohle ba Baegepeta,” o ile a boloka tumelo ea hae e le matla le hoja a ne a fumana thuto eo ntle ho pelaelo e neng e akarelletsa borapeli ba melimo e mengata le lithuto tse hlomphollang Molimo. (Liketso 7:22) Ka ho tšoanang, kajeno Bakreste ba hlokolosi hore ba se inehelle ho hlōloa ke tšusumetso e sa hloekang tikolohong leha e le efe eo ba iphumanang ba le ho eona.

Kotsi e ’ngoe e ka ’nang ea e-ba teng ka ho hahamalla thuto e eketsehileng ke hore tsebo ea hohomosa, kapa e hlahisa boikhantšo. (1 Bakorinthe 8:1) Ba bangata ba batla ho fumana tsebo ka thuto ka mabaka a boithati, esita le ba nang le sepheo se setle sa ho hahamalla tsebo e ka ’na ea ba tlisetsa boikutlo ba ho phahamela ba bang le ho ipona ba le bohlokoa. Maikutlo a joalo ha a khahlise Molimo.—Liproverbia 8:13.

Nahana ka Bafarisi. Litho tsa sehlotšoana sena se hlaheletseng sa bolumeli li ne li ikhohomosa ka tsebo e ngata ea libuka eo li neng li e-na le eona ’me li nahana hore li lokile. Li ne li nepisisa litemana tsa libukahali tsa lineano tsa boruti, ’me li ne li shebela fatše batho feela tjee, ba neng ba sa ruteha, li ba talima e le lithoto, ba nyatsehang, esita le ba malimabe. (Johanne 7:49) Ho feta moo, ba ne ba rata chelete. (Luka 16:14) Mohlala oa bona o bontša hore haeba thuto e hahamalloa ka sepheo se fosahetseng, e ka etsa hore motho a ikhohomose kapa ea mo etsa ea ratang chelete. Ka hona, ha Mokreste a khetha thuto ea sekolo ea mofuta o itseng le ho e hahamalla, e tla ba hantle hore a ipotse, ‘Sepheo sa ka ke sefe?’

Ke Taba ea Boikhethelo

Joalokaha e ne e le ’nete lekholong la pele la lilemo, ho na le limelo tsa mefuta e sa tšoaneng tsa thuto har’a Bakreste kajeno. Tlas’a tataiso ea batsoali ba bona, bacha ba qetang lithuto tsa bona tsa sekolo tse hlokoang ke molao ba ka ’na ba khetha ho hahamalla thuto ea lefatše e eketsehileng. Ka ho tšoanang, batho ba baholo ba thahasellang ho ntlafatsa mekhoa ea ho hlokomela malapa a bona ba ka ’na ba talima thuto e joalo e eketsehileng ea sekolo e le tsela e molemo ea ho finyella pakane eo.a Litšobotsi tse ling tsa thuto ea sekolo e tloaelehileng li hatisa bohlokoa ba ho ntlafatsa matla a akaretsang a kelello ho e-na le a tsebo ea mosebetsi o itseng ka ho khetheha kapa a tsebo ea mosebetsi oa matsoho. Kahoo, motho a ka ’na a fumana hore esita le ka mor’a ho qeta nako e ngata a batla thuto e joalo, o ntse a se na tsebo e ka mo fumantšang mosebetsi. Ka lebaka lena, ba bang ba khetha ho hahamalla thuto ea likolong tsa mesebetsi ea matsoho kapa tse rutang mesebetsi e etsoang, ka sepheo sa ho ba ba loketseng haholoanyane ho tlatsa likheo tse ka bang teng tsa mesebetsi.

Leha ho le joalo, liqeto tse joalo ke tsa botho. Bakreste ha baa lokela ho nyatsa kapa ho ahlola ba bang tabeng ena. Jakobo o ile a ngola: “U mang hore u be ea ahlolang moahelani oa hao?” (Jakobo 4:12) Haeba Mokreste a nahana ho hahamalla thuto e eketsehileng ea sekolo, e ka ba hantle hore a hlahlobe sepheo sa hae ho tiisa hore boithati le lerato la lintho tse bonahalang hase tsona tse mo susumetsang.

Ho hlakile hore Bibele e khothalletsa ho ba le pono e leka-lekaneng ka thuto. Batsoali ba Bakreste ba ananela bohlokoa bo fetisisang ba thuto ea moea e thehiloeng Lentsoeng le bululetsoeng la Molimo ’me ba fa bana ba bona keletso e leka-lekaneng mabapi le thuto e tlatselletsang. (2 Timothea 3:16) Ka ho talima bophelo kamoo bo leng kateng, ba hlokomela bohlokoa ba thuto ea lefatše ho fumantšeng bana ba bona ba seng ba hōlile tsebo e hlokahalang bakeng sa ho iphelisa le ho phelisa malapa a bona a ka moso. Ka hona, Mokreste e mong le e mong ha a etsa qeto ea ho hahamalla thuto e tlatselletsang le bohōle boo a tla ea ho bona ka eona, a ka etsa qeto ea botho e utloahalang a itšetlehile ka boinehelo ba hae ho Jehova Molimo, “bo molemo bakeng sa lintho tsohle, kaha bo e-na le tšepiso ea bophelo ba hona joale le ea bo tlang ho tla.”—1 Timothea 4:8.

[Mongolo o botlaaseng ba leqephe]

[Ntlha e Qolotsoeng e leqepheng la 27]

“Boloka bohlale le kutloisiso.”—Liproverbia 3:21

[Ntlha e Qolotsoeng e leqepheng la 28]

Ha a hlahloba taba ea hore na o batla thuto e eketsehileng ea sekolo kapa che, e tla ba hantle hore Mokreste a ipotse, ‘Sepheo sa ka ke sefe?’