Qetello ea Ntoa

KE KHALE batho hohle ba labalabela lefatše le se nang ntoa. Ke tabatabelo e ntseng e e-s’o phethahale. Joalokaha re bone sehloohong se fetileng, ba bangata ba lumela hore khotso ea lefatše lohle e ka tlisoa feela ke puso ea lefatše, puso e tla emela batho bohle ba lefatše ka ho hloka leeme. Leha ho le joalo, ba bangata baa hlokomela hore ha ho mohla babusi ba batho ba tla ithaopela ho tela bobusi ba bona ho bo fa puso e emelang motho e mong le e mong lefatšeng. Na see se bolela hore puso ea lefatše e ke ke ea e-ba teng?

Ho ka ’na ha bonahala joalo. Empa, boprofeta ba Bibele bo bontša hore puso e tla busa holim’a lefatše lohle e haufi le ho tlisa khotso lefatšeng. Sena se ke ke sa etsahala ka lebaka la lipuisano tsa batho kapa litumellano tsa machaba. Moprofeta Daniele o ile a bululeloa ho ngola: “Molimo oa leholimo o tla hloma ’muso o ke keng oa senyeha ka ho sa eeng kae.” (Mongolo o tšekaletseng ke oa rōna.)—Daniele 2:44.

Ke oona ’Muso oo Jesu a ileng a bolella balateli ba hae hore ba o rapelle thapelong e tsejoang ke ba limilione e le Thapelo ea Morena, kapa ea Ntat’a Rōna. Mohlomong u tloaelane le thapelo eo, e fumanoang ka Bibeleng ho Matheu 6:9, 10. Karolo e ’ngoe ea eona e etsa boipiletso bona ho Molimo: “’Muso oa hao a o tle. Thato ea hao a e etsahale, joaloka leholimong, hape le lefatšeng.” Molimo o tla araba thapelo eo. Haufinyane ’Muso oo o tla ‘tla’ ho tla phethahatsa thato ea Molimo ka lefatše. Thato ea Molimo e akarelletsa ho fetola lefatše paradeise e nang le khotso.

Maikutlo a Sebele ka Khotso ea Lefatše Lohle

Na ho na le lebaka leha e le lefe la ho lumela hore ’Muso oa Molimo o tla etsa ho molemo ho feta hoo mebuso ea batho e ho entseng? Nahana ka litšobotsi tse robeli tsa ’Muso oa Molimo tse tla tiisa hore khotso e ba teng ka ho sa feleng bakeng sa bohle ba tlas’a puso ea oona.

1. ’Muso oo o tla ba le moeta-pele oa oona ea khethiloeng ke Molimo e leng Jesu Kreste ea tlotlisitsoeng, “Morena oa khotso.” (Esaia 9:6) Ha a sa le lefatšeng, Jesu o ile a bontša hore bahlanka ba hae ha ba itlhomelle ntoa ea nama. O ile a re ho Petrose: “Khutlisetsa sabole ea hao sebakeng sa eona, kaha bohle ba nkang sabole ba tla timela ka sabole.”—Matheu 26:52.

2. Ka sebele ’Muso oo e tla ba puso ea lefatše. Mabapi le matla a ho laela a filoeng Jesu, Daniele o ile a bolela esale pele: “A neoa ’muso, le hlompho, le borena, hore ba mefuta eohle, le ba lichaba tsohle, le ba lipuo tsohle, ba tle ba mo sebeletse.”—Daniele 7:14.

3. ’Muso oo o tla emela batho bohle. Jesu o tla ba le babusi-’moho le eena ba tsoang “molokong o mong le o mong le lelemeng le leng le le leng le sehlopheng se seng le se seng sa batho le sechabeng se seng le se seng,” ’me ba tla “busa e le marena holim’a lefatše.”—Tšenolo 5:9, 10.

4. ’Muso oa Molimo o tla felisa mebuso eohle ea batho, e khahlanong le bobusi ba oona. “’Muso . . . o tla robaka o felise mebuso eo [ea batho] kaofela, empa oona o tla ba teng ka ho sa feleng.”—Daniele 2:44.

5. Batho ba lefatše ba tla laoloa ke molao oa machaba. Esaia o ile a profeta ka nako eo, ha a re: “Molao o tla tsoa Sione, lentsoe la Jehova le tsoe Jerusalema. Jehova o tla ahlolela lichaba, a laee mefuta e mengata.”—Esaia 2:3, 4.

6. Bafo ba ’Muso ba tla ithuta litsela tsa khotso. Esaia o ile a tsoela pele: “’Me ba tla tea liphehla tsa bona tsa ntoa mehoma, le marumo a bona ba a tee lisekele; sechaba se seng ha se sa tla hlola se futuhela sechaba se seng ka lerumo, ha ba sa tla hlola ba ithuta ho loana.”—Esaia 2:4.

7. Ba ratang pefo ba tla felisoa. “Jehova o lekola ea lokileng; moea oa hae o hloile ea khopo le ea ratang sehlōhō. O nesetsa bakhopo mashala le mollo le sebabole; moea o chesang ke sona senoelo seo ba se abetsoeng.”—Pesaleme ea 11:5, 6.

8. Libetsa li tla felisoa. “Tloong, le bohe liketso tsa Jehova, kamoo a sentseng lefatše kateng. O felisitse lintoa le ho isa pheletsong ea lefatše, o robile liqha, a robakanya marumo, a chesa makoloi a ntoa mollong.”—Pesaleme ea 46:8, 9.

Ho ba le Tumelo Litšepisong Tsa Molimo—Joang Hona Hobane’ng?

Bibele e fana ka makolopetso a mang a eketsehileng ka ’Muso oa Molimo. Ka mohlala, e bontša hore na ke bo-mang ba tla kopanela le Jesu Kreste ho tsamaiseng litaba tsa lefatše. Hape e bolela kamoo ba khethoang kateng le litšoaneleho tseo ba lokelang ho li finyella. Bibele e boetse e bolela kamoo ’Muso o tlang ho sebelisa matlotlo a lefatše kateng ho hlahisetsa batho bohle ba lefatše nala le nyakallo, ho felisa mohono le meharo eo hangata e ’nileng ea lebisa ntoeng.

Na boprofeta bo joalo bo ka lumeloa? Jehova ka boeena o ile a re: “Lentsoe la ka le tsoang molomong oa ka . . . le ke ke la khutlela ho ’na le le feela, empa le tla sebetsa se ratoang ke ’na, le phethe seo ke le rometseng sona.” (Esaia 55:11) Ana hase mantsoe feela a re tiisetsang hore Molimo o phethahatsa litšepiso tsa hae. Jehova ke Ea Matla ’Ohle, kahoo o na le matla a ho tlisa khotso lefatšeng lohle. Ha ho letho leo a sa le utloisiseng; ka hona, o na le bohlale ba ho etsa hore khotso e lule e le teng. (Esaia 40:13, 14) Ho feta moo, Jehova ka boeena ke mothofatso oa lerato, kahoo ha ho le ea mong bokahohleng ea nang le tabatabelo e matla ho feta ea hae ea ho tlisa khotso lefatšeng.—1 Johanne 4:8.

Ha e le hantle, ho hloka tumelo ho lumela litšepisong tsa Molimo. Tumelo e thehiloe tsebong ’me e hlaoleloa ka ho ithuta Lentsoe la Molimo, Bibele. (Bafilippi 1:9, 10) Ha re ntse re ithuta botho ba Molimo le merero ea hae, ’nete ea ’Muso oa Molimo ea totobala. E, ntoa e tla felisoa ka ho feletseng, eseng ka boiteko ba batho, empa ka puso e khanyang ea lefatše e tšehelitsoeng ke Molimo, ’Muso oa Molimo.

[Litšoantšo tse leqepheng la 16, 17]

Tlas’a ’Muso oa Molimo, bafo ba oona ba tla ithuta khotso, ’me libetsa li tla felisoa