Pono ea Bibele

Na Bophelo ba Hao bo Reriloe Esale Pele?

Hoseng ho hong banna ba babeli ba ne ba tsamaea ka koloi ba ea mosebetsing, eaba ba etsa qeto ea ho nka tsela e khaoletsang e tsoang ka seterata seo e mong oa bona a kileng a lula ho sona. Ha ba le tseleng ba ile ba bona ho foqoha malakabe lifensetereng tsa ntlo e ’ngoe. Ba ile ba emisa teraka ea bona eaba ba sebelisa lere eo ba neng ba e-na le eona terakeng moo ho pholosa ’mè e mong le bana ba bahlano. Ha e tlaleha ka ketsahalo eo, koranta e ’ngoe e ile ea re: “Mohlomong ena e ne e le ntho e reriloeng esale pele.”

BATHO ba bangata ba lumela hore ntho e ’ngoe le e ’ngoe e ba etsahallang, ebang ke ntho e ntle kapa e mpe, e ne e se e ntse e reriloe ke matla a mang a ba phahametseng. Mohlala, Raliphetoho oa lekholong la bo16 la lilemo John Calvin o ile a ngola sena: “Ha re hlalosa ho reroa ha lintho esale pele re re ke morero oa ka ho sa feleng oa Molimo, oo ka oona a entseng qeto ea hore na ke sefe seo a batlang ho se etsa ka motho e mong le e mong. Ha aa ba bōpela hore ba hlaheloe ke maemo a tšoanang kaofela ha bona, empa o rerela ba bang hore ba phele ka ho sa feleng ba bang hore ba timetsoe ka ho sa feleng.”

Na Molimo o hlile o rera esale pele hore na liketso tsa rōna e tla ba life le hore na qetello ea rōna e tla ba efe? Bibele e ruta eng?

Taba ea Hore Lintho li Reriloe Esale Pele ha e Utloahale

Ba bang ba lumelang hore lintho li reriloe esale pele ba beha mabaka ka tsela ena: Molimo o tseba tsohle. O tseba ntho e ’ngoe le e ’ngoe, esita le lintho tseo e leng hona li tla etsahala. O tseba seo motho e mong le e mong a tlang ho se etsa bophelong, ’me o tseba hantle hore na motho e mong le e mong o tla shoa neng le hore na o tla shoa a bolaoa ke eng. Kahoo, ba nahana hore ha nako e fihla ea hore motho a etse qeto, o tlameha ho etsa qeto ka tsela eo Molimo a neng a se a ntse a bone hore lintho li tla etsahala ka eona le ka tsela eo a neng a se a ntse a e rerile, ho seng joalo e ne e tla ba Molimo ha a tsebe lintho tsohle. Na u utloa mabaka aa a utloahala? Hlokomela hore na monahano oo o ne o tla bolela’ng.

Haeba ho e-na le matla a seng a ntse a rerile bokamoso ba hao, ho ne ho ke ke ha thusa letho hore u leke ho itlhokomela. Hore na u khetha ho tsuba kapa che ho ne ho ke ke ha etsa phapang ea letho bophelong ba hao kapa ba bana ba hao. Hore na u fasa lebanta la pholoso ha u le ka koloing ho ne ho ke ke ha u sireletsa. Empa ona ke monahano o fosahetseng. Lipalo-palo li bontša hore batho ba nkang mehato ea ho ipaballa ha ba shoe ka bongata. Empa ho se tsotelle ho ka baka tlokotsi.

Nahana ka lebaka le leng. Haeba Molimo a ne a khetha ho tseba ntho e ’ngoe le e ’ngoe pele e etsahala, le pele a bōpa Adama le Eva o ne a tla be a se a ntse a tseba hore ba ne ba sa tl’o mo mamela. Empa ha Molimo a ne a bolella Adama hore a se ke a ja tsa “sefate sa tsebo ea botle le bobe” hobane o ne a tla shoa, na Molimo o ne a se a ntse a tseba hore Adama o tla ja tsa sefate seo? (Genese 2:16, 17) Ha Molimo a ne a re ho banyalani ba pele: “Atang le ngatafale le tlale lefatše ’me le le buse, ’me le laole litlhapi tsa leoatle le libōpuoa tse fofang tsa maholimo le sebōpuoa se seng le se seng se phelang se hahabang lefatšeng,” na o ne a se a ntse a tseba hore ba ke ke ba ba le monyetla oo o babatsehang oa ho phela paradeiseng? Ho hlakile hore ha ho joalo.—Genese 1:28.

Haeba motho a nahanisisa taba ena ka botlalo, taba ea hore Molimo o tseba liqeto tsohle tseo e leng hona li tla etsoa e ne e tla bolela hore ke eena ea ikarabellang bakeng sa lintho tsohle tse etsahalang—ho akarelletsa lintoa, ho hloka toka le mahlomola a teng. Na eo ke ntho e ka etsahalang? Re fumana karabo e hlakileng mantsoeng a Molimo ha a itlhalosa.

‘U Lokela ho Khetha’

Mangolo a bolela hore “Molimo ke lerato” le hore “o rata toka.” Kamehla o ’nile a khothatsa batho ba hae ka ho re: “Hloeang se sebe, le rate se molemo.” (1 Johanne 4:8; Pesaleme ea 37:28; Amose 5:15) Ka makhetlo a mangata o ’nile a khothalletsa batho ba hae ba tšepahalang hore ba khethe tsela e nepahetseng. Ho tea mohlala, ha Jehova a ne a hlaba selekane le sechaba sa Iseraele ea boholo-holo a sebelisa Moshe, o ile a re ho bona: “Kajeno ke nka maholimo le lefatše e le lipaki khahlanong le lōna, hore ke behile bophelo le lefu ka pel’a lōna, tlhohonolofatso le thohako; le khethe bophelo e le hore le tsoele pele le phela, lōna le bana ba lōna.” (Deuteronoma 30:19) Na Molimo o ile a rera esale pele seo batho bao ba neng ba tla se khetha? Ho hlakile hore ha aa ka a etsa joalo.

Joshua eo e neng e le moeta-pele oa batho ba Molimo mehleng ea boholo-holo, o ile a khothatsa banna ba habo tjena: “Le ikhethele kajeno eo le tla mo sebeletsa . . . Ha e le ’na le ba ntlo ea ka, re tla sebeletsa Jehova.” (Joshua 24:15) Ka tsela e tšoanang, moprofeta oa Molimo Jeremia o ile a re: “Ka kōpo, mamela lentsoe la Jehova ho seo ke u bolellang sona, ’me lintho li tla u tsamaela hantle, ’me moea oa hao o tla ’ne o phele.” (Jeremia 38:20) Na Molimo ea lokileng le ea lerato o ne a ka khothalletsa batho ho etsa se nepahetseng ka sepheo sa hore ba tle ba fumane moputso haeba a ne a tseba hore ho se ho ntse ho reriloe hore ba tla hlōleha? Che. Khothatso e joalo e ne e tla be e le ea boikaketsi.

Ka lebaka leo, ha lintho tse ntle kapa tse mpe li etsahala bophelong ba hao, hase hobane hoo ho ne ho se ho ntse ho reriloe esale pele. Hangata ‘liketsahalo tse sa lebelloang’ li bakoa ke liqeto tse entsoeng ke batho ba bang—ebang ke liqeto tse bohlale kapa tse booatla. (Moeklesia 9:11) Bokamoso ba hao ha boa reroa esale pele ’me bokamoso ba hao ba ka ho sa feleng bo tla itšetleha ka hore na u etsa liqeto tsa mofuta ofe.

U NAHANA JOANG?

◼ Na Molimo o ile a rera esale pele hore Adama le Eva ba ne ba tla etsa sebe?—Genese 1:28; 2:16, 17.

◼ Ke litšobotsi life tsa Molimo tse etsang hore a se ke a rera lintho esale pele?—Pesaleme ea 37:28; 1 Johanne 4:8.

◼ U na le boikarabelo bofe?—Joshua 24:15.

Ntlha e Qolotsoeng e leqepheng la 13]

Lipalo-palo li bontša hore batho ba elang lintho hloko ha ba shoe ka bongata