Pono ea Bibele

Na Lefatše e Tla ba Paradeise?

LITŠŌMO tse buang ka nako ea khotso, eo motho a neng a se na sebe, a e-na le kamano e ntle le Molimo, a sa kule ebile a sa shoe li fumanoa lichabeng tse ngata, tse akhang Baegepeta, batho ba Mexico, ba Peru le ba Tibet. Litšōmo tsena li boetse li bolela hore na motho o ile a oela joang sebeng.

Le hoja litšōmo tsena li fetotsoe ka tsela e itseng ebile li ekelitsoe, li na le lintho tse ngata tseo li tšoanang ka tsona hoo e ke keng eaba ho itletse ka tšohanyetso feela hore li tšoane. Sena se entse hore batho ba bangata ba fihlele qeto ea hore lipale tsena li thehiloe ho se hlileng sa etsahala historing. Ka sebele, lipale tsena li tšoana ka tsela e ikhethang le se boletsoeng likhaolong tse qalang tsa buka ea Bibele ea Genese. Leha ho le joalo, Bibele ha e bue ka tsela e sa hlakang empa e fana ka boitsebiso bo qaqileng ba se ileng sa etsahala historing.—2 Timothea 3:16.

Tšimoloho e Phethahetseng

Buka ea Genese e re bolella hore ha Molimo a ne a bōpa batho ba pele—e leng Adama le Eva—o ile a ba beha serapeng se noselitsoeng hantle se neng se bitsoa Serapa sa Edene. Ba ne ba phethahetse ’meleng ba bile ba e-na le monyetla oa ho phela ka ho sa feleng. Ha ba etsa sebe, ba ne ba tla otloa ka lefu. (Genese 2:8-17; Baroma 5:12) Adama le Eva ba ne ba lokela ho ‘ata ba ngatafale ba tlale lefatše ’me ba le buse.’ (Genese 1:28) Phello e ne e tla ba hore lefatše e be paradeise e tletseng ka batho ba phethahetseng ba thabelang ho ikokobelletsa Molimo, eo e leng ’Musi oa bona.

Ka masoabi, Adama le Eva ha baa ka ba mamela Molimo, ka tsela eo ba lahleheloa ke monyetla oa ho phethahatsa morero oa ’Mōpi oa bona le oa ho phela ka ho sa feleng. Leha ho le joalo, Jehova Molimo o tla phethahatsa morero oa hae ka lefatše. O itse: “Lentsoe la ka le tsoang molomong oa ka . . . le ke ke la khutlela ho ’na le se na litholoana, empa . . . ka sebele le tla atleha.” (Esaia 55:11) Ha e le hantle, e ’ngoe ea litaba tse ka sehloohong tseo Bibele e buang ka tsona ke morero oa Jehova oa hore lefatše e be lehae la paradeise la batho ba bonahatsang litšobotsi tsa hae.—Baroma 8:19-21.

“U Tla ba le ’na Paradeiseng”

Hang ka mor’a hore Adama le Eva ba etse sebe, Molimo o ile a tšepisa ho hlahisa “peō,” kapa ngoana, eo qetellong a neng a tla timetsa “noha ea pele,” e leng Satane Diabolose, ’me a qhaqhe mesebetsi ea hae e khopo. (Genese 3:15; Tšenolo 12:9; 1 Johanne 3:8) Jesu Kreste o ile a ipaka e le eena karolo e ka sehloohong ea “peō” eo. (Bagalata 3:16) Ho feta moo, Molimo o ile a mo beha hore e be Morena oa ’Muso oa leholimo, kapa puso e neng e tla busa lefatše.—Daniele 7:13, 14; Tšenolo 11:15.

Kreste o tla phethahatsa ka botlalo seo Adama a hlōlehileng ho se phetha. Ha e le hantle, Bibele e bitsa Jesu “Adama oa ho qetela.” (1 Bakorinthe 15:45) Ho feta moo, thapelong ea hae ea mohlala Jesu o ile a amahanya bokamoso ba lefatše le ’Muso oa Molimo ha a re: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.”—Matheu 6:10.

Ha Jesu a ne a le lefatšeng, kaha e ne e tla ba Morena oa lefatše nakong e tlang, ka nepo o ne a ka re ho moetsi oa bobe ea bakileng ea neng a khokhothetsoe haufi le eena: “U tla ba le ’na Paradeiseng.” (Luka 23:43) Paradeise eo Jesu a neng a bua ka eona e ne e tla ba lefatšeng, joalokaha Molimo a ne a rerile tšimolohong. Bibele e tšehetsa taba ena ka botlalo. Nahana ka mangolo a latelang.

“Ba lokileng ba tla rua lefatše, ba tla lula ho lona ka ho sa feleng.” (Pesaleme ea 37:29) “Ho tla ba le lijo-thollo tse ngata lefatšeng; ho tla ba le nala holim’a litlhōrō tsa lithaba.” (Pesaleme ea 72:16) “Ba lokileng ke bona ba tla lula lefatšeng, ’me ba sa tšoauoeng phoso ke bona ba tla sala ho lona.” (Liproverbia 2:21) “[Ba sa tšoauoeng phoso ba] ke ke [ba] ntša kotsi leha e le efe kapa [ba] baka tšenyo leha e le efe thabeng eohle ea ka e halalelang; hobane ka sebele lefatše le tla tlala tsebo ea Jehova joalokaha metsi a koahetse leoatle.”—Esaia 11:9.

Tumellanong le mantsoe ao, Thutong ea hae ea Thabeng e tsebahalang Jesu o ile a re: “Ho thaba ba maikutlo a bonolo, kaha ba tla rua lefatše.” (Matheu 5:5) Hamorao moapostola Johanne o ile a ngola: “Tente ea Molimo e ho moloko oa batho . . . O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.” (Tšenolo 21:3, 4) Ka ho hlakileng, litemana tsena tsa Bibele ha li bue ka “paradeise” ea leholimong, empa li bua ka ea sebele mona lefatšeng.

Se Boletsoeng ke Litsebi Tsa Bibele

Litsebi tse ngata tsa Bibele li lumela hore lefatše e tla ba paradeise ’Musong oa Kreste. Joseph A. Seiss, eo e leng setsebi sa thuto ea bolumeli o itse: “Pusong ea Mesia, qetellong, lefatše lohle le tla ba . . . kamoo . . . le ka beng le bile kateng haeba Adama a ne a sa ka a etsa sebe.” Tlhalosong ea hae e bitsoang The New Testament for English Readers, Henry Alford o ngotse: “’Muso oa Molimo . . . o tla tsoela pele ho sebetsa ho fihlela o hlile o busa lefatše lena, ’me bafo ba oona ba tla ja lefa la lefatše . . . , leo qetellong le tla be le tsosolositsoe le bile le hlohonolofalitsoe ka ho sa feleng.”—Mongolo o tšekaletseng ke oa hae.

Ka ho tšoanang, Isaac Newton, e leng rasaense ea tsebahalang eo e neng e bile e le seithuti se hloahloa sa Bibele, o ngotse: “Batho ba tla tsoela pele ba lula lefatšeng ka mor’a letsatsi la kahlolo, eseng feela ka lilemo tse 1 000, empa ka ho sa feleng.”

Kaha lefatše le tla busoa ka ho toba ke Jesu Kreste, bokhopo bo ke ke ba hlola bo e-ba teng. (Esaia 11:1-5, 9) Ka sebele lefatše e tla ba paradeise ka litsela tsohle, e be tlotla e sa feleng ho ’Mōpi oa lona.

NA U KILE UA IPOTSA?

◼ Morero oa Molimo oa tšimolohong e ne e le ofe ka batho le ka lefatše?—Genese 1:28.

◼ ’Muso oa Molimo o tla finyella eng?—Matheu 6:10.

◼ Ke hobane’ng ha bokhopo bo ke ke ba hlola bo e-ba teng?—Esaia 11:1-5, 9.

[Ntlha e qolotsoeng leqepheng la 11]

“Ho thaba ba maikutlo a bonolo, kaha ba tla rua lefatše.”—Matheu 5:5