Thuto ea 5

Morero oa Molimo ke Ofe ka Lefatše?

Ke hobane’ng ha Jehova a ile a bōpa lefatše? (1, 2)

Ke hobane’ng ha lefatše e se paradeise hona joale? (3)

Ho tla etsahala eng ka batho ba khopo? (4)

Nakong e tlang, Jesu o tla etsetsa batho ba kulang eng? ba tsofetseng? bafu? (5, 6)

Hore u kopanele litlhohonolofatsong tsa nakong e tlang, ho hlokahala hore u etse eng? (7)

1. Jehova o ile a bōpa lefatše lena e le hore batho ba ne ba ka thabela ho phela ho lona ka ho sa feleng. O ne a batla hore kamehla lefatše le ahuoe ke batho ba lokileng, ba thabileng. (Pesaleme ea 115:16; Esaia 45:18) Lefatše le ke ke la hlola le felisoa; le tla lula le le teng ka ho sa feleng.—Pesaleme ea 104:5; Moeklesia 1:4.

2. Pele Molimo a etsa motho, O ile a khetha karolo e nyenyane ea lefatše ’me a e etsa paradeise e ntle. O ile a e bitsa serapa sa Edene. Ke hona mona moo a ileng a beha monna oa pele le mosali, Adama le Eva. Molimo o ne a ba reretse hore ba be le bana ’me ba tlale lefatšeng lohle. Butle-butle ba ne ba tla etsa hore lefatše lohle e be paradeise.—Genese 1:28; 2:8, 15.

3. Adama le Eva ba ile ba etsa sebe ka hore ka boomo ba tlōle molao oa Molimo. Kahoo Jehova o ile a ba lelekela ka ntle ho serapa sa Edene. Paradeise e ile ea lahleha. (Genese 3:1-6, 23) Empa Jehova ha aa lebala morero oa hae ka lefatše lena. O tšepisa ho le etsa paradeise, moo batho ba tla phela ka ho sa feleng. O tla etsa see joang?—Pesaleme ea 37:29.

4. Pele lefatše lena le ka fetoha paradeise, batho ba khopo ba tlameha ho tlosoa. (Pesaleme ea 37:38) Sena se tla etsahala ka Armagedone, e leng ntoa ea Molimo ea ho felisa bokhopo. Ho latelang, Satane o tla koalloa teronkong ka lilemo tse 1 000. Sena se bolela hore ha ho batho ba khopo ba tla beng ba setse ho silafatsa lefatše. Ho tla pholoha batho ba Molimo feela.—Tšenolo 16:14, 16; 20:1-3.

5. Joale Jesu Kreste o tla busa e le Morena lefatšeng lena ka lilemo tse 1 000. (Tšenolo 20:6) Butle-butle o tla tlosa sebe likelellong le ’meleng ea rōna. Re tla ba batho ba phethahetseng hantle feela joalokaha Adama le Eva ba ne ba le joalo pele ba etsa sebe. Joale ha ho sa tla ba le ho kula, botsofali le lefu. Batho ba kulang ba tla folisoa, ’me batho ba tsofetseng ba tla ba bacha hape.—Jobo 33:25; Esaia 33:24; Tšenolo 21:3, 4.

6. Nakong ea Puso ea Jesu ea Lilemo tse Sekete, batho ba tšepahalang ba tla sebeletsa ho fetola lefatše lohle paradeise. (Luka 23:43) Hape, batho ba limilione ba shoeleng ba tla tsosetsoa bophelong ba botho lefatšeng. (Liketso 24:15) Haeba ba etsa seo Molimo a se hlokang ho bona, ba tla tsoela pele ba phela lefatšeng ka ho sa feleng. Ha ba sa etse joalo, ba tla timetsoa ka ho sa feleng.—Johanne 5:28, 29; Tšenolo 20:11-15.

7. Kahoo morero oa pele oa Molimo ka lefatše o tla atleha. Na u tla rata ho kopanela litlhohonolofatsong tsee tsa nakong e tlang? Haeba ho joalo, ho hlokahala hore u tsoele pele ho ithuta ka Jehova le ho mamela lintho tseo a li hlokang. Ho ea libokeng Holong ea ’Muso ea Lipaki tsa Jehova ea sebakeng sa heno ho tla u thusa ho etsa joalo.—Esaia 11:9; Baheberu 10:24, 25.

[Setšoantšo se leqepheng la 10]

Paradeise e lahlehileng

[Litšoantšo tse leqepheng la 11]

Ka mor’a Armagedone, lefatše le tla fetoloa paradeise