Bacha Baa Botsa

Nka Hlalosa Pono ea Bibele Joang ka Bosodoma?

Batho ba neng ba tlile moketeng oa likhau ba ile ba hlaba litlatse ha basali ba babeli ba tummeng lifiliming ba lumelisana ka ho sunana ka tsela ea baratani! Bashebelli ba ile ba makala ba ntan’o hlaba litlatse. Basodoma ba re seo ke tlhōlo. Batho ba bang ba re seo ke tsela feela ea ho ipitsetsa mahlo. Ho sa tsotellehe hore na boemo ke bofe, matsatsi ka mor’a moo, video ea basali bao ba sunanang e tla bapaloa khafetsa khasong ea litaba tsa thelevishene—’me e hohele batho ba limilione hore ba e shebe Inthaneteng.

JOALOKAHA ho boletsoe ka holimo, ha motho ea tummeng a fana ka maikutlo kapa a bolela phatlalatsa hore ke mosodoma kapa o kopantse bosodoma le ho rata batho ba bong bo fapaneng le ba hae, seo se etsa hore ba mecha ea litaba ba bue haholo ka taba eo. Batho ba bang ba babatsa batho ba joalo ka hore ba sebete; ha ba bang bona ba ba nyatsa ka hore boitšoaro ba bona bo hlephile. Ho boetse ho na le ba bang ba bangata ba talimang bosodoma e le mokhoa o mong feela oa ho phela. Daniel ea lilemo li 21 o re: “Ha ke ne ke le sekolong, esita le bana bao e seng basodoma ba ne ba nka hore motho oa khetholla ebile o ahlola ba bang haeba a sa amohele bosodoma.”a

Tsela eo batho ba ikutloang ka eona ka bosodoma e fapana ho ea ka moloko le ho ea ka libaka. Empa Bakreste ha ba ‘isoe koana le koana ke moea o mong le o mong oa thuto.’ (Baefese 4:14) Ho e-na le hoo, ba khomarela seo Bibele e se rutang.

Bibele e re’ng ka bosodoma? Hona haeba u phela ka melao ea Bibele ea boitšoaro, u ka re’ng ho batho ba reng u na le khethollo, u ahlola ba bang, kapa u hloile basodoma? Nahana ka lipotso tse latelang le tsela eo u ka ’nang ua li araba ka eona.

Bibele e re’ng ka bosodoma? Bibele e hlakisa hore Molimo o ne a reretse hore e be monna le mosali feela ba kopanelang liphate le hona tokisetsong ea lenyalo. (Genese 1:27, 28; Levitike 18:22; Liproverbia 5:18, 19) Ha Bibele e nyatsa bohlola e bua ka ho kopanela liphate ho etsoang ke basodoma hammoho le banna le basali.b—Bagalata 5:19-21.

Haeba e mong a u botsa: “U nahana’ng ka basodoma?”

U ka ’na ua re: “Ha kea hloea basodoma, empa ha ke lumellane le boitšoaro ba bona.”

✔ Hopola: Haeba u tataisoa ke melao ea Bibele ea boitšoaro, eo ke tsela eo u khethileng ho phela ka eona, ’me ke tokelo ea hao. (Joshua 24:15) U se ke ua hlajoa ke lihlong ka tsela eo u ikutloang ka eona.—Pesaleme ea 119:46.

Na Bakreste ha baa lokela ho hlompha batho bohle, ho sa natsoe hore na ke basodoma kapa che? E, ba lokela ho ba hlompha. Bibele e re: “Hlomphang batho ba mefuta eohle” kapa joalokaha Bibele ea Sesotho e bolela, “Hlomphang batho bohle.” (1 Petrose 2:17) Kahoo Bakreste ha baa hloea basodoma. Ba mosa ho batho bohle, ho akarelletsa basodoma.—Matheu 7:12.

Haeba e mong a u botsa: “Na tsela ee eo u ikutloang ka eona ha e khothalletse hore basodoma ba khetholloe?”

U ka ’na ua re: “Che. Ke hloile boitšoaro ba basodoma, eseng batho.”

✔ U ka phaella ka ho re: “Ka mohlala, ke boetse ke khethile hore ke se ke ka tsuba. Ha e le hantle, le khopolo feela ea ho tsuba kea e nyonya. Empa ha re re ua tsuba ’me u ikutloa ka tsela e fapaneng. Ke ne nke ke ka u khetholla ka lebaka la tsela eo u ikutloang ka eona, feela joalokaha ke kholisehile hore le uena u ne u ke ke ua nkhetholla ka lebaka la tsela eo ke ikutloang ka eona—na ha ho joalo? Hoa tšoana le tabeng ea maikutlo a rōna a fapaneng ka bosodoma.”

Na Jesu ha aa ka a ruta hore re lokela ho amohelana? Haeba ho joalo, na Bakreste ha baa lokela ho amohela basodoma? Jesu ha aa ka a khothalletsa balateli ba hae hore ba amohele mekhoa eohle ea bophelo. Ho e-na le hoo, o rutile hore tsela e isang polokong e bulehetse “e mong le e mong ea bontšang tumelo ho eena.” (Johanne 3:16) Ho bontša tumelo ho Jesu ho akarelletsa ho latela melao ea Molimo ea boitšoaro, e hanelang mekhoa e itseng ea boitšoaro—ho akarelletsa ba bosodoma.—Baroma 1:26, 27.

Haeba e mong a re: “Basodoma ba ke ke ba khona ho fetola tsela eo ba leng ka eona, ba hlahile ba le joalo.”

U ka ’na ua re: “Bibele ha e bue ka hore na ’mele ea basodoma e bōpehile joang, le hoja e lumela hore ho na le mekhoa e itseng e metseng ka metso. (2 Bakorinthe 10:4, 5) Esita le haeba ba bang ba sekametse bosodomeng, Bibele e re Bakreste ba lokela ho qoba liketso tsa bosodoma.”

✔ Tlhahiso: Ho e-na le ho pheha khang ka hore na ke’ng e bakelang motho takatso ea ho ba mosodoma, totobatsa hore Bibele e hanela boitšoaro ba bosodoma. Ka mohlala, u ka ’na ua re: “Ua tseba hore batho ba bangata ba re liphatsa tsa lefutso li ka etsa hore motho a be mabifi, ’me batho ba bang ba sekametse ho beng mabifi. (Liproverbia 29:22) Haeba seo e ne e le ’nete, ho ne ho tla ba joang? E ka ’na eaba ua tseba hore Bibele e nyatsa khalefo. (Pesaleme ea 37:8; Baefese 4:31) Na molao o joalo o bontša leeme hobane feela ba bang ba sekametse ho beng mabifi?”

Ke joang Molimo a ka reng motho ea khahloang ke oa bong bo tšoanang le ba hae a qobe bosodoma? Hoo ke ho se nahanele. Monahano o joalo o thehiloe khopolong e fosahetseng ea hore batho ba lokela ho latela litakatso tsa bona tsa ho kopanela liphate. Bibele e tlotla batho ka ho ba tiisetsa hore ba ka khetha ho se latele litakatso tsa bona tsa boitšoaro bo bobe ba ho kopanela liphate, haeba ba hlile ba batla.—Bakolose 3:5.

Haeba e mong a re: “Esita le haeba ha u mosodoma, u lokela ho fetola tsela eo u ikutloang ka eona ka bosodoma.”

U ka ’na ua re: “Ha re re u rata ho becha empa ’na ha ke ho rate. Na e ne e tla ba ho utloahalang hore u nqobelle ho fetola maikutlo a ka, hobane feela batho ba limilione ba khetha ho becha?”

✔ Hopola: Batho ba bangata (ho akarelletsa basodoma) ba na le melao e itseng ea boitšoaro e etsang hore ba hloee lintho tse itseng—mohlomong tse kang bomenemene, ho hloka toka le ntoa. Bibele e hanela boitšoaro boo; e boetse e hanela mekhoa e itseng ea boitšoaro ba ho kopanela liphate, ho akarelletsa ba bosodoma.—1 Bakorinthe 6:9-11.

Bibele ha e bue lintho tse sa utloahaleng ebile ha e khothalletse khethollo. E mpa e laela batho ba lakatsang ho kopanela boitšoarong ba bosodoma hore ba etse se tšoanang le se lebeletsoeng ho ba khahloang ke ba bong bo fapaneng—e leng hore ba ‘balehele bohlola.’—1 Bakorinthe 6:18.

Ke ’nete hore banna le basali ba limilione ba lakatsang ho latela melao ea Bibele ba sebelisa boitšoaro ho sa tsotellehe liteko tseo ba ka ’nang ba tobana le tsona. Ba akarelletsa masoha a mangata a se nang monyetla o mokaalo oa hore a ka kena lenyalong le ba bangata ba nang le balekane ba holofetseng ba sitoang ho kopanela liphate. Ba thabile bophelong le hoja ba sa khone ho khotsofatsa takatso ea bona ea ho kopanela liphate. Batho ba sekametseng bosodomeng ba ka etsa se tšoanang haeba ruri ba batla ho khahlisa Molimo.—Deuteronoma 30:19.

Lihlooho tse ling tsa “Bacha Baa Botsa” li ka fumanoa mocheng oa boitsebiso oa Inthanete ho www.watchtower.org/ype

[Mongolo o botlaaseng ba leqephe]

SEO U KA NAHANANG KA SONA

● Ke hobane’ng ha Molimo a behela batho melao ea boitšoaro?

● U rua molemo joang ha u khomarela melao ea Bibele ea boitšoaro?

[Lebokose le leqepheng la 24]

HO THOE’NG KA BA KHAHLOANG KE BANANA LE BASHANYANA?

Le hoja banana le bashanyana ba ka kopanya bosodoma le ho rata batho ba bong bo fapaneng, ho bonahala eka mokhoa ona o ntse o ata haholo ho banana. Nahana ka mabaka ana a ’maloa.

● Ho Batla Tlhokomelo

“Bashanyana ba lumela pepenene hore banana ba basodoma ba batle. Banana ba sa itšepeng ba tla etsa ntho leha e le efe hore bashanyana ba ba rate.”—Jessica ea lilemo li 16.

● Ho ba Bohelehele

“Ha ho hlahisoa banana ba sunana lifiliming, mananeong a thelevishene le ’minong, bacha ba tla batla ho ba etsisa—haholo-holo ha ba sa bone seo e le phoso.”—Lisa ea lilemo li 26.

● Ho Khahloa ke ba Bang

“Ha ke le phathing, ke ile ka kopana le banana ba bang ba babeli ba basodoma ba bileng ba ratang bashanyana, ’me hamorao motsoalle oa ka a mpolella hore baa nthata. Ha nako e ntse e ea ke ile ka qala ho romellana melaetsa le e mong oa bona, ’me ka qala ho mo rata.”—Vicky ea lilemo li 13.

Haeba u batla ho khahlisa Molimo, u lokela ho qoba boitšoaro boo Bibele e reng ha boa hloeka. (Baefese 4:19; 5:11) Empa u ka etsa’ng haeba u rata banana le bashanyana ka tsela e tšoanang? Ba bangata ba tla u khothalletsa hore u amohele tsela eo u ikutloang ka eona ’me u lumele hore u khahloa ke banana le bashanyana ka tsela e tšoanang. Leha ho le joalo, u lokela ho elelloa hore ho khahloa ke batho ba bong bo tšoanang le ba hao, hangata ke boikutlo bo iphetelang ka mor’a nako e itseng. Ke seo Lisette ea lilemo li 16 a se hlokometseng. O re: “Ho buisana le batsoali ba ka ka tsela eo ke ikutloang ka eona ho ile ha nthusa. Ho phaella moo, ha ke ntse ke ithuta baeloji sekolong, ke ile ka hlokomela hore lihomone li feto-fetoha haholo lilemong tsa bocha. Ruri ke nahana hore haeba bacha ba bangata ba ne ba utloisisa ’mele ea bona haholoanyane, ba ne ba tla bona hore ho khahloa ke batho ba bong bo tšoanang le ba bona ke ntho ea nakoana ’me ba ne ba ke ke ba ikutloa ba qobelleha hore e be basodoma.”

Esita le haeba boikutlo boo u nang le bona e se ba nakoana bo tsamaeang le ho hōla, hlokomela hore Bibele e u behela pakane eo u ka e finyellang: U ka khetha hore u se ke ua latela litakatso leha e le life tse fosahetseng.c

[Mongolo o botlaaseng ba leqephe]

[Setšoantšo se leqepheng la 23]

Ha ho tluoa tabeng ea maikutlo a tloaelehileng, ka sebete Bakreste ha ba ee le letšoele