Khaolong ea 23

Bibele e Re’ng ka ho Ratana ha Batho ba Bong bo Tšoanang?

Batho ba neng ba tlile moketeng oa likhau ba ile ba hlaba litlatse ha basali ba babeli ba tummeng lifiliming ba lumelisana ka ho sunana ka tsela ea baratani! Bashebelli ba ile ba makala ba ntan’o hlaba litlatse. Batho ba ratanang le ba bong bo tšoanang ba re seo ke tlhōlo. Batho ba bang ba re eo ke tsela feela ea ho ipitsetsa mahlo. Matsatsi ka mor’a moo, video ea basali bao ba sunanang e tla bapaloa khafetsa khasong ea litaba tsa thelevishene—’me e hohele batho ba limilione hore ba e shebe Inthaneteng.

JOALOKAHA ho bontšitsoe ka holimo, ha motho ea tummeng a fana ka maikutlo kapa a bolela phatlalatsa hore o rata batho ba bong bo tšoanang ebile o rata le ba bong bo fapaneng le ba hae, seo se etsa hore ba mecha ea litaba ba bue haholo ka taba eo. Batho ba bang ba babatsa batho ba joalo ka hore ba sebete; ha ba bang bona ba ba nyatsa ka hore ba itšoere hampe. Ho boetse ho na le ba bang ba bangata ba talimang ho ratana le batho ba bong bo tšoanang e le mokhoa o mong feela oa ho phela. Daniel ea lilemo li 21 o re: “Ha ke ne ke le sekolong, esita le bana ba ratanang le batho ba bong bo fapaneng, ba ne ba nka hore motho o khetholla ba bang ebile oa ba ahlola haeba a sa amohele mokhoa oo.”

Tsela eo batho ba ikutloang ka eona ka ho ratana ha batho ba bong bo tšoanang e ka ’na ea fapana ho ea ka hore na ba phetse mehleng efe kapa ho ea ka libaka. Empa Bakreste ha ba ‘isoe koana le koana ke moea o mong le o mong oa thuto.’ (Baefese 4:14) Ho e-na le hoo, ba khomarela pono ea Bibele.

Pono ea Bibele ke efe ka ho ratana ha batho ba bong bo tšoanang? Haeba u phela ka melao ea Bibele ea boitšoaro, u ka re’ng ho batho ba reng u na le khethollo, u ahlola ba bang, kapa u hloile batho ba ratanang le ba bong bo tšoanang? Nahana ka lipotso kapa lipolelo tse latelang le tsela eo u ka ’nang ua li araba ka eona.

“Bibele e re’ng ka ho ratana ha batho ba bong bo tšoanang?”

“Bibele e hlakisa hore Molimo o ne a reretse hore e be monna le mosali feela ba kopanelang liphate le hona ha ba le tokisetsong ea lenyalo. (Genese 1:27, 28; Levitike 18:22; Liproverbia 5:18, 19) Ha Bibele e nyatsa bohlola e bua ka boitšoaro ba ho kopanela liphate bo etsoang ke batho ba ratanang le ba bong bo tšoanang hammoho le boitšoaro bo litšila bo etsoang ke ba bong bo fapaneng.”a—Bagalata 5:19-21.

“U nahana’ng ka ho ratana ha batho ba bong bo tšoanang?”

“Ha kea hloea batho ba ratanang le ba bong bo tšoanang le ba bona, empa ha ke lumellane le boitšoaro ba bona.”

Hopola: Haeba u tataisoa ke melao ea Bibele ea boitšoaro, eo ke tsela eo u khethileng ho phela ka eona, ’me ke tokelo ea hao. (Joshua 24:15) U se ke ua hlajoa ke lihlong ka tsela eo u ikutloang ka eona.—Pesaleme ea 119:46.

“Na Bakreste ha baa lokela ho hlompha batho bohle, ebang ba ratana le ba bong bo tšoanang le ba bona kapa che?”

“E, ba lokela ho ba hlompha. Bibele e re: ‘Hlomphang batho ba mefuta eohle’ kapa joalokaha Bibele ea Sesotho e bolela, ‘Hlomphang batho bohle.’ (1 Petrose 2:17) Kahoo Bakreste ha baa hloea batho ba ratanang le ba bong bo tšoanang. Ba mosa ho batho bohle, ho akarelletsa ba ratanang le ba bong bo tšoanang.”—Matheu 7:12.

“Na tsela eo u ikutloang ka eona ka ho ratana ha batho ba bong bo tšoanang ha e khothalletse hore ba khetholloe?”

“Che. Ke hloile boitšoaro ba batho ba ratanang le ba bong bo tšoanang, eseng bona.”

U ka phaella ka ho re: “Ka mohlala, ke boetse ke khethile hore ke se ke ka tsuba. Ha e le hantle, ha ke batle ho utloa letho ka ho tsuba. Empa ha re re ua tsuba ’me u ikutloa ka tsela e fapaneng. Ke ne nke ke ka u khetholla ka lebaka la tsela eo u ikutloang ka eona, feela joalokaha ke kholisehile hore le uena u ke ke ua nkhetholla ka lebaka la tsela eo ke ikutloang ka eona—na ha ho joalo? Hoa tšoana le tabeng ea maikutlo a rōna a fapaneng ka batho ba ratanang le ba bong bo tšoanang.”

“Na Jesu ha aa ka a ruta hore re lokela ho amohela ba bang? Haeba ho joalo, na Bakreste ha baa lokela ho amohela boitšoaro ba batho ba ratanang le ba bong bo tšoanang?”

“Jesu ha aa ka a khothalletsa balateli ba hae hore ba amohele mekhoa eohle ea bophelo. Ho e-na le hoo, o ile a ruta hore tsela e isang polokong e bulehetse ‘e mong le e mong ea bontšang tumelo ho eena.’ (Johanne 3:16) Ho bontša tumelo ho Jesu ho akarelletsa ho latela molao oa Molimo oa boitšoaro, o hanelang mekhoa e itseng ea boitšoaro—e akarelletsang ho ratana ha batho ba bong bo tšoanang.”—Baroma 1:26, 27.

“Batho ba ratanang le ba bong bo tšoanang ba ke ke ba khona ho fetola tsela eo ba leng ka eona; ba hlahile ba le joalo.”

“Bibele ha e bue ka hore na ’mele ea batho ba ratanang le ba bong bo tšoanang e bōpehile joang, le hoja e lumela hore ho na le mekhoa e itseng e metseng ka metso. (2 Bakorinthe 10:4, 5) Esita le haeba ba bang ba sekametse mokhoeng oo, Bibele e re Bakreste ba lokela ho qoba lintho tse etsoang ke batho ba ratanang le ba bong bo tšoanang.”

Tlhahiso: Ho e-na le ho pheha khang ka hore na ke’ng e etsang hore motho a lakatse ho ratana le batho ba bong bo tšoanang, totobatsa hore Bibele e hanela boitšoaro boo. Ka mohlala, u ka ’na ua re: “Ua tseba hore batho ba bangata ba re liphatsa tsa lefutso li ka etsa hore motho a be mabifi, ’me batho ba bang ba sekamela ho ba mabifi. (Liproverbia 29:22) Ho thoe’ng haeba seo e ne e le ’nete? E ka ’na eaba ua tseba hore Bibele e nyatsa khalefo. (Pesaleme ea 37:8; Baefese 4:31) Na molao oo o leeme hobane feela ba bang ba sekametse liketsong tse mabifi?”

“Ke joang Molimo a ka reng motho ea khahloang ke batho ba bong bo tšoanang le ba hae a qobe ho ba rata? Taba eo e utloahala e le bokhopo.”

“Monahano o joalo o thehiloe khopolong e fosahetseng ea hore batho ba lokela ho khotsofatsa takatso ea bona ea ho kopanela liphate. Bibele e tlotla batho ka ho ba tiisetsa hore ba ka khetha ho se khotsofatse takatso e sa lokelang ea ho kopanela liphate, haeba ba hlile ba batla.”—Bakolose 3:5.

“Esita le haeba ha u ratane le batho ba bong bo tšoanang le ba hao, u lokela ho fetola tsela eo u ikutloang ka eona ka taba ena.”

“Ha re re u rata ho becha empa ’na ha ke ho rate. Na e ne e tla ba ho utloahalang hore u nqobelle ho fetola maikutlo a ka, hobane feela batho ba limilione ba khetha ho becha?”

Hopola: Joaloka batho ba bang ba bangata, batho ba ratanang le ba bong bo tšoanang le ba bona, ba na le melao e itseng ea boitšoaro e etsang hore ba hloee liketso tse itseng—tse kang bomenemene, ho hloka toka le ntoa. Bibele e hanela boitšoaro boo; e boetse e hanela mefuta e itseng ea boitšoaro ba ho kopanela liphate, e akarelletsang bosodoma.—1 Bakorinthe 6:9, 10.

Bibele e ruta lithuto tse utloahalang ebile ha e khothalletse khethollo. E mpa e laela batho ba lakatsang ho kopanela boitšoarong boo hore ba etse se tšoanang le se lebeletsoeng ho batho ba khahloang ke ba bong bo fapaneng—e leng hore ba ‘balehele bohlola.’—1 Bakorinthe 6:18.

Ke ’nete hore banna le basali ba limilione ba lakatsang ho latela melao ea Bibele ba sebelisa boitšoaro ho sa tsotellehe liteko tseo ba ka ’nang ba tobana le tsona. Ba akarelletsa masoha a mangata a se nang monyetla o mokaalo oa hore a ka kena lenyalong le ba bangata ba nang le balekane ba holofetseng ba sitoang ho kopanela liphate. Le hoja ba sa khone ho khotsofatsa takatso ea bona ea ho kopanela liphate, ba thabile bophelong. Batho ba khahloang ke batho ba bong bo tšoanang le ba bona ba ka etsa seo haeba ruri ba batla ho khahlisa Molimo.—Deuteronoma 30:19.

BALA HO EKETSEHILENG KA TABA ENA BUKENG EA 2, KHAOLONG EA 28

[Mongolo o botlaaseng ba leqephe]

LENGOLO LA SEHLOOHO

“Ka hona, le bolaee litho tsa ’mele ea lōna tse lefatšeng mabapi le bohlola, ho se hloeke, takatso ea botona kapa ea botšehali, takatso e kotsi, le ho chacheha ka mohono, e leng borapeli ba litšoantšo.”—Bakolose 3:5.

KELETSO

Le hoja tsela eo batho ba bang ba itšoarang ka eona e ka ’na ea u tšoenya, qoba ho iketsa moloki. Ha e le hantle, ba na le bolokolohi ba ho ikhethela seo ba batlang ho se lumela—feela joaloka uena.

NA U NE U TSEBA . . . ?

Bakreste ba bang ba lekholong la pele la lilemo bao e neng e le basodoma ba ile ba fetola mekhoa ea bona e litšila ’me ‘ba hlatsuoa hore ba hloeke’ mahlong a Molimo.—1 Bakorinthe 6:9-11.

SEO KE RERANG HO SE ETSA!

Haeba e mong a re pono ea Bibele ka ho ratana ha batho ba bong bo tšoanang e siiloe ke nako, ke tla re ․․․․․

E le ho hlakisa hore ke nyatsa boitšoaro boo—eseng batho, ke tla re ․․․․․

Lintlha tseo ke tla rata ho li botsa motsoali kapa batsoali ba ka tabeng ena ke ․․․․․

U NAHANA’NG KA SEE?

● Ke hobane’ng ha Molimo a e-na le tokelo ea ho behela batho melao ea boitšoaro?

● U rua molemo joang ha u khomarela melao ea Bibele ea boitšoaro?

[Ntlha e Qolotsoeng e leqepheng la 170]

“Moshanyana e mong sekolong o ne a nahana hore ke motho e mobe ha ke nyatsa tsela eo a phelang ka eona. Empa eitse ha ke mo hlalosetsa hore hase hore ke nyatsa eena—le ha a hlokomela hore ke ne ke sa rate mefuta eohle ea boitšoaro bo bobe, e akarelletsang ho ratana ha batho ba bong bo tšoanang—o ile a qala ho ntlhompha esita le ho ntšireletsa ha ba bang ba nkhanyetsa.”—Aubrey

[Lebokose le leqepheng la 168]

Ho Thoe’ng ka ba Khahloang ke Banana le Bashanyana?

Le hoja banana le bashanyana ba ka rata batho ba bong bo fapaneng le ba bong bo tšoanang ka nako e le ’ngoe, ho bonahala eka mokhoa ona o ntse o ata haholo ho banana. Ba bang ba etsoa ke ho ba bohelehele. Lisa ea lilemo li 26 o re: “Ha ho hlahisoa banana ba sunana lifiliming, mananeong a thelevishene le ’minong, bacha ba tla batla ho ba etsisa—haholo-holo ha ba sa bone seo e le phoso.”

Athe ba bang bona ho bonahala eka ba khahloa ke batho bao e le kannete. Vicky ea lilemo li 13 o re: “Ha ke le phathing e ’ngoe, ke ile ka kopana le banana ba bang ba babeli ba ratang batho ba bong bo tšoanang le ba bona ba bileng ba ratang bashanyana, ’me hamorao motsoalle oa ka a mpolella hore baa nthata. Ka mor’a moo, ke ile ka qala ho romellana melaetsa le e mong oa bona, ’me ka qala ho mo rata.”

Na u kile ua ikutloa joaloka Vicky? Batho ba bangata ba tla u khothalletsa hore u amohele tsela eo u ikutloang ka eona ’me u lumele hore u khahloa ke banana le bashanyana ka tsela e tšoanang. Leha ho le joalo, u lokela ho elelloa hore ho khahloa ke batho ba bong bo tšoanang le ba hao, hangata ke boikutlo bo iphetelang ka mor’a nako e itseng. Ke seo Vicky a se hlokometseng. Lisette ea lilemo li 16 le eena o hlokometse seo. O re: “Ho buisana le batsoali ba ka ka tsela eo ke ikutloang ka eona ho ile ha nthusa. Ho phaella moo, ha ke ntse ke ithuta baeloji sekolong, ke ile ka hlokomela hore lihomone li feto-fetoha haholo lilemong tsa bocha. Ruri ke nahana hore haeba bacha ba bangata ba ne ba utloisisa ’mele ea bona haholoanyane, ba ne ba tla bona hore ho khahloa ke batho ba bong bo tšoanang le ba bona ke ntho ea nakoana ’me ba ne ba ke ke ba ikutloa ba qobelleha hore ba ratane le bona.”

Esita le haeba boikutlo boo u nang le bona e se ba nakoana bo tsamaeang le ho hōla, hlokomela hore Bibele e u behela pakane eo u ka e finyellang: U ka khetha ho se khotsofatse litakatso leha e le life tse fosahetseng.

[Setšoantšo se leqepheng la 169]

Ha ho tluoa tabeng ea ho latela bongata, Bakreste ba bontša sebete ka hore ba se ke ba ea le letšoele