Esele ea Bua

NA U kile ua utloa ho thoe esele e-ea bua? U ka ’na ua re: ‘Che, ha ke e-s’o utloe. Liphoofolo ha li tsebe ho bua.’ Empa Bibele e bolela hore esele e kile ea bua. A re bone hore na seo se etsahetse joang.

Baiseraele ba se ba itokiselitse ho kena naheng ea Kanana. Balake, morena oa Moabe o tšaba Baiseraele. Joale o re ho bitsoe monna ea bohlale eo ho thoeng ke Balame hore a tl’o rohaka Baiseraele. Balake o tšepisa hore o tla fa Balame chelete e ngata, kahoo Balame o palama esele ea hae ’me o kena tseleng o ea ho Balake.

Jehova ha a batle hore Balame a rohake batho ba Hae. Kahoo o romela lengeloi le nkileng sabole e telele ho ea thiba Balame tseleng. Balame ha a bone lengeloi leo, empa esele ea hae eona ea le bona. Joale esele e ntse e leka ho qoba lengeloi, ’me qetellong esele e botha ka tseleng. Balame o halefile haholo, o otla esele ea hae ka lere.

Joale Jehova o etsa hore Balame a utloe ha esele ea hae e mo buisa. Esele e-ea botsa, ‘Ke u entse’ng hore u nkotle?’

Balame o re, ‘U nkentse hore ke bonahale eka ke leoatla. Hoja ke ne ke e-na le sabole nka be ke u bolaile!’

Esele ea botsa, ‘Na nkile ka u etsa tjee pele?’

Balame oa arabela, ‘Che.’

Joale Jehova o etsa hore Balame a bone lengeloi le nkileng sabole le eme ka tseleng. Lengeloi leo le re: ‘U otlela’ng esele ea hao? Ke tlile ho tla u thibela tseleng, hore u se ke ua ea rohaka Iseraele. Hoja esele ea hao ea se ke ea nqoba, nka be ke u bolaile, empa ke ne nke ke ka lematsa esele ea hao.’

Balame o re: ‘Ke sitiloe. Ke ne ke sa tsebe hore u eme ka tseleng.’ Lengeloi le tlohela Balame hore a ikele, ’me Balame oa tsamaea o ea ho Balake. O ntse a leka ho rohaka Iseraele, empa ho fapana le hoo, Jehova o etsa hore a hlohonolofatse Iseraele hararo.