Lentsoe la Molimo Lea Phela

U ke ke ua Louoa

NA U tšoana le monna eno? O tšohile hore ho na le ea tla mo ntša kotsi ka boloi, ka leihlo la boloi, ka litaola kapa “Obeah.” Na u lokela ho tšoha boloi bo joalo kapa malepa?

Che, ha ho hlokahale. Le hoja ba bang ba ile ba tsoa kotsi ke lintho tse joalo, Jehova Molimo o tiisa hore o tla sireletsa ba mo utloang. Bibele e re: “Lebitso la Jehova ke qhobosheane e thata; ea lokileng o balehela ho eona, ’me o lula phahameng.”—Liproverbia 18:10.

Molimo o hloile mekhoa eohle ea bodemona. Bibele e re: “Ho se ke ha fumanoa ha eno . . . mophofi ea phofang, kapa selaoli se laolang, kapa senohe, kapa moloi, le moupelli, leha e le ea botsang balimo, le ngaka e reng ea profeta, leha e le ea botsang bafu.”—Deuteronoma 18:10, 11.

Bibele e bolela ka monna ea neng a sebelisana le meea e le senohe. Hona ke tsela ea ho leka ho tseba ka nako e tlang kapa ntho e ’ngoe e sa tsejoeng, ka thuso ea meea e sa bonahaleng. Monna eo e ne e le Balaame, ea bonoang mona a otla esele ea hae. O ne a le tseleng ho ea rohaka batho ba Molimo ha lengeloi le ema tseleng, le etsa hore esele e rapalle ka tseleng.—Numere 22:7, 20-35.

Jehova a nyopisa bonohe ba Balaame. A fetola thohako tlhohonolofatso. Balaame a lumela: “Jakobo a ke ke a louoa, le Iseraele a ke ke a noheloa.”—Numere 23:23.

Jehova o ntse a hlōla linohe, hoo li ke keng tsa ntša ba tšepahalang ho eena kotsi. Na u bona ngaka ena eo malepa a eona a sa thuseng letho ho loantša Lipaki tsa Jehova? E loea batho, empa ka lekhetlo lena e hlōlehile. Lipaki tsa Jehova tsa re: “U tla bona hore Jehova, Molimo oa rōna, o matla ho u feta!” Tsa ema li tiile, ’me ngaka ea oela fatše.

E, “lengeloi la Jehova le lara pel’a ba mo tšabang, lea ba boloka.” (Pesaleme ea 34:7) Haeba re hlile re tšepa Molimo ’me re apara lihlomo tsa moea tseo o fanang ka tsona, Jehova o tla hlōla mang kapa mang ea lekang ho re loea.—Ba-Efese 6:10-18.