Khaolo 11

Na Lebitso la Hao le Teng Bukeng ea Bophelo?

SARDA

 1. Boemo ba moea ba phutheho e Sarda ke bofe, ’me Jesu o qala molaetsa oa hae joang?

LIK’HILOMITHARA tse ka bang 48 ka boroa ho Akhisar ea kajeno (Thyatire) ke moo phutheho e latelang e amohelang molaetsa o tsoang ho Jesu ea tlotlisitsoeng e neng e le hona teng: Sarda. Lilemong tsa bo-500 pele ho Mehla ea rōna e Tloaelehileng, motse ona e ne e le motse-moholo o ikhohomosang oa ’muso oa boholo-holo oa Lydia hape e ne e le moo Morena Croesus ea neng a ruile haholo a neng a lula teng. Mehleng ea Johanne, motse ona o se o hula ka thata, ’me botle boo o neng o e-na le bona pele tlas’a puso ea Croesus e se e le pale feela. Ka ho tšoanang, phutheho ea Bokreste mona e futsanehile moeeng. Ka lekhetlo la pele, Jesu ha a qale molaetsa oa hae ka mantsoe a pabatso. Ho e-na le hoo, o re: “Ngolla lengeloi la phutheho e Sarda u re: Tsena ke lintho tse boleloang ke ea nang le meea e supileng ea Molimo le linaleli tse supileng, ‘Ke tseba liketso tsa hao, hore u na le lebitso la hore ua phela, empa u shoele.’”—Tšenolo 3:1.

 2. (a) Ha Jesu a re o na le “meea e supileng” hoo ho bolela’ng ho Bakreste ba Sarda? (b) Phutheho eo ea Sarda e ne e e-na le botumo bofe, empa linnete e ne e le life?

² Ke hobane’ng ha Jesu a ikhetholla e le ea nang le “meea e supileng”? Hobane meea ena e emela moea o halalelang oa Jehova ha o phalla ka ho feletseng. Hamorao, Johanne o boetse o e hlalosa e le “mahlo a supileng,” ho bontša pono e phunyelletsang eo moea o halalelang oa Molimo o e fileng Jesu. (Tšenolo 5:6) Kahoo, o khona ho koaholla le ho sebetsana le boemo leha e le bofe bo ka ’nang ba e-ba teng. (Matheu 10:26; 1 Bakorinthe 4:5) Phutheho ea Sarda e tumme ka hore ea phela, e mafolofolo. Empa Jesu oa bona hore e shoele moeeng. Ho bonahala eka boholo ba litho tsa eona bo khutletse moeeng oa ho se tsotelle o tšoanang le boemo boo li neng li le ho bona pele e e-ba Bakreste.—Bapisa le Baefese 2:1-3; Baheberu 5:11-14.

 3. (a) Ke hobane’ng ha “lengeloi la phutheho e Sarda” le ne le lokela ho hlokomela ka ho khetheha ’nete ea hore Jesu o na le “linaleli tse supileng”? (b) Jesu o fa phutheho e Sarda keletso efe e matla?

³ Jesu o boetse o hopotsa “lengeloi la phutheho e Sarda” hore ke Eena ea nang le “linaleli tse supileng.” O tšoere baholo bao ba phutheho ka letsohong la hae le letona, ’me o na le matla a ho ba tataisa mosebetsing oa bona oa bolisa. Ba lokela ho beha lipelo tsa bona ‘ho tsebeng ponahalo ea mohlape ka hohle-hohle.’ (Liproverbia 27:23) Kahoo, ho ne ho ka ba molemo hore ba mamele ka hloko mantsoe a latelang a Jesu, a reng: “Lebela, ’me u matlafatse lintho tse setseng tse neng li se li tla shoa, kaha ha kea fumana liketso tsa hao li entsoe ka botlalo ka pel’a Molimo oa ka. Ka hona, u tsoele pele ho hopola kamoo u amohetseng le kamoo u ileng ua utloa, ’me u tsoele pele ho ho boloka, ’me u bake. Ka sebele ntle le hore u tsohe, ke tla tla joaloka lesholu, ’me ho hang u ke ke ua tseba hore na ke tla tla ho uena ka hora efe.”—Tšenolo 3:2, 3.

 4. Mantsoe a Petrose a ne a tla thusa phutheho e Sarda joang hore e “matlafatse lintho tse setseng”?

⁴ Ho hlokahala hore baholo ba Sarda ba hopole thabo eo ba neng ba e-na le eona pele ha ba ithuta ’nete le mahlohonolo ao ba ileng ba a amohela ka nako eo. Empa hona joale ba shoele mesebetsing ea moea. Lebone la bona la phutheho lea panya-panya ka lebaka la ho haelloa ke mesebetsi ea tumelo. Lilemo pele ho moo, moapostola Petrose o ile a ngolla liphutheho tse Asia (mohlomong ho akarelletsa le Sarda) hore li ananele litaba tse molemo tse khanyang tseo Bakreste ba neng ba li amohetse le tse neng li boletsoe “ka moea o halalelang o rometsoeng o tsoa leholimong”—joalokaha o emeloa ke meea e supileng e ponong ea Johanne. Petrose o ile a boela a hopotsa Bakreste bao ba Asia hore ke ‘morabe o khethiloeng, baprista ba marena, sechaba se halalelang, batho bakeng sa letlotlo le khethehileng, e le hore ba ka bolela hohle makhabane a hlomphehang a ea ba bitsitseng ho ba ntša lefifing ho ba kenya leseling la hae le hlollang.’ (1 Petrose 1:12, 25; 2:9) Ho thuisa ka linnete tse joalo tsa moea ho tla thusa phutheho e Sarda hore e bake ’me e “matlafatse lintho tse setseng.”—Bapisa le 2 Petrose 3:9.

 5. (a) Ho etsahetse’ng ka kananelo ea Bakreste ba Sarda? (b) Ho tla etsahala’ng haeba Bakreste ba Sarda ba sa amohele keletso ea Jesu?

⁵ Hona joale kananelo ea bona le lerato leo ba ratang ’nete ka lona li tšoana le mollo o seng o batla o timme. Ke mashala a seng makae feela a ntseng a hlenne. Jesu o ba khothalletsa hore ba butsoele tlhase eo, ba fehle mollo oo, ba bake libeng tseo ba li entseng ka lebaka la ho se tsotelle, ’me e boele e be phutheho e phelang moeeng hape. (Bapisa le 2 Timothea 1:6, 7.) Ho seng joalo, ha Jesu a tla ka tšohanyetso—“joaloka lesholu”—ho tla phethahatsa kahlolo, phutheho e Sarda e tla be e sa itokisa.—Matheu 24:43, 44.

Ho Tla “Joaloka Lesholu”

 6. Jesu o ile a tla “joaloka lesholu” joang ka 1918, ’me o ile a fumana boemo bofe har’a ba ipolelang hore ke balateli ba hae?

⁶ Temoso ea Jesu ea hore o ne a tla tla “joaloka lesholu” ea sebetsa le mehleng ea kajeno. E ile ea sebetsa ka ho khethehileng ho Bakreste bao letsatsi la Morena le ileng la fihla ba ntse ba phela. Hang ka mor’a 1914, ho ile ha phethahala boprofeta ba Malakia bo reng: “‘Ka tšohanyetso ho tla tla Morena oa ’nete tempeleng ea Hae, eo le mo batlang, le lenģosa la selekane leo le le thabelang. Bonang! Ka sebele o tla tla,’ ho boletse Jehova oa mabotho.” (Malakia 3:1; Tšenolo 1:10) E le “lenģosa la selekane,” Jesu o ile a tla ho tla hlahloba le ho ahlola ba neng ba ipolela hore ke balateli ba hae. (1 Petrose 4:17) Ka nako eo, ka 1918, Bokreste-’mōtoana bo ne bo qoetse tšollong ea mali Ntoeng ea I ea Lefatše ’me bo ne bo shoele ka ho feletseng moeeng. Esita le Bakreste ba ’nete, bao pele ho ntoa ba neng ba ile ba bolela ka cheseho, ba ile ba otsela moeeng. Baholo ba bang ba bona ba ka sehloohong ba ile ba kenngoa teronkong, ’me mosebetsi oa boboleli oa batla o khaotsa. Ha moea oa Jehova o tsosa Bakreste bana selemong se latelang, e ne e se bohle ba neng ba itokisitse. Ba bang, ba joaloka baroetsana ba maoatla ba boleloang papisong ea Jesu, ba ne ba sa hlomela moeeng bakeng sa tlotla ea ho sebeletsa Jehova. Leha ho le joalo, hoa thabisa hore ebe ho ne ho e-na le ba bangata, ba tšoanang le baroetsana ba bohlale, ba neng ba ile ba ela hloko temoso ea Jesu e reng: “Ka hona, le lule le lebetse, hobane ha le tsebe letsatsi kapa eona hora.”—Matheu 25:1-13.

 7. Ke hobane’ng ha ho hlokahala hore Bakreste ba lule ba falimehe kajeno?

⁷ Taba ea hore ho hlokahala hore Bakreste ba be hlokolosi ha ea fella qalong ea letsatsi la Morena. Boprofeteng ba hae bo boholo bo mabapi le ‘pontšo ea ha lintho tsena tsohle li reretsoe ho phetheha,’ Jesu o ile a fana ka temoso e matla, a re: “Malebana le letsatsi leo kapa hora eo ha ho ea tsebang . . . Lulang le talimile, le lule le falimehile, kaha ha le tsebe hore na nako e behiloeng e tla ba neng. Empa seo ke le bolellang sona ke se bolella bohle, Le lule le lebetse.” (Mareka 13:4, 32, 33, 37) E, ho tla fihlela horeng ena, ho hlokahala hore e mong le e mong oa rōna, ebang ke oa batlotsuoa kapa oa bongata bo boholo, a lule a falimehile ’me a loantše boroko ba moea. Ha letsatsi la Jehova le fihla “joaloka lesholu bosiu,” e se eka re ka fumanoa re falimehile ka ho feletseng e le hore re ka fumana kahlolo e ntle.—1 Bathesalonika 5:2, 3; Luka 21:34-36; Tšenolo 7:9.

 8. Sehlopha sa Johanne sa kajeno se susumelelitse batho ba Molimo hore ba lule ba phela moeeng joang?

⁸ Kajeno sehlopha sa Johanne se falimehetse taba ea hore ho hlokahala hore se susumelletse batho ba Molimo hore ba lule ba phela moeeng. Ho finyella sena, ho lokisetsoa liboka tse khethehileng lefatšeng lohle ka makhetlo a ’maloa selemo le selemo. Selemong se seng sa haufinyane tjena, ba bileng teng likopanong tsa setereke tse 2 981 kaofela ba bile 10 953 744, ’me balumeli ba bacha ba 122 701 ba ile ba kolobetsoa. Ka lilemo tse fetang lekholo, sehlopha sa Johanne se ile sa sebelisa makasine ea Molula-Qhooa ho tsebahatsa lebitso la Jehova le morero oa hae. Ka lebaka la mahloriso a sehlōhō nakong ea lintoa tse peli tsa lefatše, Molula-Qhooa o ile oa thusa Lipaki Tsa Jehova hore li boele li chesehe ka ho hatisa lihlooho tse kang se reng “Ho Lehlohonolo ba sa Tšabeng” (1919), “Pitso ea ho Nka Bohato” (1925) le se reng “Ho Hlōla Tlhoriso” (1942).

 9. (a) Bakreste bohle ba lokela ho ipotsa eng? (b) Molula-Qhooa o fane ka khothatso efe?

⁹ Joaloka Sarda, le kajeno liphuthehong e ntse e le habohlokoa hore Bakreste bohle ba tsoele pele ho itlhahloba. Kaofela re lokela hore re ’ne re ipotse: Na ‘liketso tsa rōna li entsoe ka botlalo’ ka pel’a Molimo oa rōna? Re sa ahlole ba bang, na rōna ka borōna re hlaolela moea oa boitelo ’me re loanela ho sebeletsa Molimo ka moea oohle? Tabeng ena, makasine ea Molula-Qhooa e fane ka khothatso ka ho tšohla lihlooho tse kang tsena, “Le ’Ne le Leke Seo le Leng Sona” le “Ho se Hlole re Iphelela.”a Kaha re na le thuso e joalo ea Mangolo, a re ke re iphenya-phenyeng ka borōna ha re ntse re leka ho tsamaea ka boikokobetso le ka ho rapela ka botšepehi ka pel’a Jehova.—Pesaleme ea 26:1-3; 139:23, 24.

“Mabitso a Seng Makae”

10. Ke tšobotsi efe e khothatsang eo Jesu a ileng a e hlokomela phuthehong e Sarda, ’me seo se lokela ho re ama joang?

¹⁰ Mantsoe a Jesu a latelang a eang phuthehong ea Sarda a khothatsa haholo. O re: “Leha ho le joalo, u na le mabitso a seng makae Sarda a sa kang a silafatsa liaparo tsa ’ona tsa ka ntle, ’me a tla tsamaea le ’na a apere tse tšoeu, hobane aa tšoaneleha. Kahoo ea hlōlang o tla apesoa liaparo tsa ka ntle tse tšoeu; ho hang nke ke ka hlakola lebitso la hae bukeng ea bophelo, empa ke tla bolela hore ke ela lebitso la hae hloko ka pel’a Ntate le ka pel’a mangeloi a hae.” (Tšenolo 3:4, 5) Na mantsoe aa ha a re tsose molota le ho matlafatsa boikemisetso ba rōna ba ho tšepahala? Ka lebaka la ho se tsotelle ha sehlopha sa baholo, phutheho kaofela e ka ’na ea robala boroko bo tebileng ba moea. Empa, batho ba bang hona ka moo ba ka ’na ba ikitlaetsa ka sebete hore boitsebahatso ba bona ba Bokreste bo lule bo hloekile bo bile bo se na letheba, kahoo ba tsoela pele ho ba le lebitso le letle ho Jehova.—Liproverbia 22:1.

11, 12. (a) Le nakong ea bokoenehi bo boholo, e tlameha ebe ba bang ba ne ba tšoana le “mabitso a seng makae” a tšepahalang Sarda ka tsela efe? (b) Ke tokoloho efe e ileng ea tlela Bakreste ba kang koro letsatsing la Morena?

¹¹ E, ‘liaparo tseo tsa ka ntle’ li bolela boitsebahatso bo lokileng ba motho e le Mokreste. (Bapisa le Tšenolo 16:15; 19:8.) E tlameha ebe pelo ea Jesu ea thaba ha a bona hore, ho sa tsotellehe maikutlo a ba bangata a ho se tsotelle, “mabitso a seng makae,” e leng Bakreste ba seng bakae ba tlotsitsoeng Sarda, ba ntse ba khona ho boloka boitsebahatso bona. Ka ho tšoanang, ha ba ipolelang hore ke Bakreste ba ne ba metsoa ke Babylona e Moholo, e leng ’muso oa lefatše oa bolumeli ba bohata, nakong ea lilemo tse makholo-kholo tsa bokoenehi bo boholo, e tlameha ebe kamehla ho ’nile ha e-ba le ba seng bakae ba ileng ba leka ho etsa thato ea Jehova leha ho ne ho le thata haholo. Bana ba ne ba lokile joaloka koro e patiloeng har’a mofoka o mongata oa lihlotšoana tsa bokhelohi.—Tšenolo 17:3-6; Matheu 13:24-29.

¹² Jesu o ile a tšepisa hore o ne a tla ba le Bakreste bana ba kang koro “ka matsatsi ’ohle ho fihlela qetellong ea tsamaiso ea lintho.” Oa tseba hore na ke bo-mang le hore na ba iketselitse mabitso afe a matle. (Matheu 28:20; Moeklesia 7:1) Nahana ka thabo eo bao ‘ba seng bakae’ ba neng ba ntse ba phela ha letsatsi la Morena le qala ba ileng ba e-ba le eona! Ba ile ba qetella ba arotsoe ho Bokreste-’mōtoana bo shoeleng moeeng ’me ba kenngoa ka phuthehong e lokileng e batlang e tšoana le phutheho e Smyrna.—Matheu 13:40-43.

13. Bakreste ba tlotsitsoeng ba sa ‘silafatseng liaparo tsa bona tsa ka ntle’ ba tla fumana mahlohonolo afe?

¹³ Ba Sarda ba tšepahalang ho isa bofelong ba sa silafatseng boitsebahatso ba bona ba Bokreste ba amohela ho phethahala ha tšepo e babatsehang. Ka mor’a ho hlongoa ha ’Muso oa Bomesia oa Jesu ka 1914, ba tsosetsoa bophelong ba moea e le bahlōli ’me ba apesoa liaparo tsa ka ntle tse tšoeu tse tšoantšetsang ho loka ha bona ho se nang sekoli, ho sa silafatsoang. Kaha ba tsamaile tseleng e patisaneng e isang bophelong, ba tla fumana moputso o sa feleng.—Matheu 7:14; bona le Tšenolo 6:9-11.

Ka ho sa Feleng Bukeng ea Bophelo!

14. ‘Buka ea bophelo’ ke eng, ’me ke mabitso a bo-mang a tlalehiloeng ho eona?

¹⁴ ‘Buka ea bophelo’ ke eng, hona ke mabitso a bo-mang a tla bolokoa ho eona? Buka, kapa moqolo, ea bophelo e bolela tlaleho ea bahlanka ba Jehova ba tla amohela mpho ea bophelo bo sa feleng. (Malakia 3:16) Mona ho Tšenolo ho buuoa ka ho toba ka mabitso a Bakreste ba tlotsitsoeng. Empa mabitso a ba tla fumana bophelo bo sa feleng lefatšeng le ’ona a tlalehiloe ho eona. Ho feta moo, mabitso a ka ‘hlakoloa’ bukeng eo. (Exoda 32:32, 33) Leha ho le joalo, ba sehlopha sa Johanne bao mabitso a bona a lulang bukeng ea bophelo ho fihlela lefung la bona ba amohela bophelo ba ho se shoe leholimong. (Tšenolo 2:10) Ana ke mabitso ao ka ho khetheha Jesu a bolelang hore o a ela hloko ka pel’a Ntate oa hae le ka pel’a mangeloi a Hae. Moputso oo ke o babatsehang hakaakang!

15. Litho tsa bongata bo boholo li tla etsa joang hore mabitso a tsona a se ke a hlakoloa bukeng ea bophelo?

¹⁵ Bongata bo boholo, boo mabitso a bona le ’ona a ngotsoeng bukeng ea bophelo, bo tla pholoha matšoenyeho a maholo. Ka ho bontša tumelo nakong ea Puso ea Jesu ea Lilemo Tse Sekete le nakong ea teko ea makhaola-khang e tla latela, bana ba tla putsoa ka bophelo bo sa feleng Paradeiseng lefatšeng. (Daniele 12:1; Tšenolo 7:9, 14; 20:15; 21:4) Joale mabitso a bona a ke ke a hlakoloa bukeng ea bophelo. Kaha u tseba se hlahisitsoeng mona ka moea o halalelang, na ka cheseho ha u etse se boleloang ke mantsoe a Jesu a khothatso a pheta-phetoang, a reng: “Ea nang le tsebe a ke a utloe seo moea o se bolellang liphutheho”?—Tšenolo 3:6.

[Mongolo o botlaaseng ba leqephe]

[Setšoantšo se leqepheng la 57]

E se eka lebitso la hao le ke ke la hlakoloa bukeng ea bophelo