Khaolo ea 79

Ha ho Lahloa Sechaba, Empa Eseng Kaofela

NAKOANA ka mor’a puisano ea Jesu le ba neng ba bokane ka ntle ho ntlo ea Mofarisi, ba bang ba itseng ba mo phetela ka “ba- Galilea bano, bao mali a bona a neng a kopantsoe ke [’musi oa Roma Ponse] Pilato le mahlabelo a bona.” Mohlomong Bagalilea bana ke ba ileng ba bolaoa ha Bajode ba likete ba ipelaetsa ha Pilato a sebelisa chelete e tsoang letlotlong la tempele hore a hahe kotopo e neng e tla tlisa metsi Jerusalema. Mohlomong ba phetelang Jesu taba ena ba ne ba fana ka maikutlo a hore Bagalilea bao ba ile ba oeloa ke tlokotsi ena ka lebaka la liketso tsa bona tse khopo.

Leha ho le joalo, Jesu o ba kenya tseleng, a botsa: “Hleka le lekanya hoba ba- Galilea bao e ne e le baetsalibe ho fetisa ba- Galilea bohle, ha ba oetsoe ke kotsi e kalo na?” Jesu oa arabela: “Che.” Joale o sebelisa ketsahalo eo ho lemosa Bajode: “Ekare ha le sa bake, le tla timela joalo kaofela.”

Ha a tsoela pele, Jesu o hopola koluoa e ’ngoe ea sebaka seo, mohlomong le eona e ntse e amana le ho ahoa ha kotopo. Oa botsa: “Leha e le bano ba leshome le metso e robileng meno e le ’meli, bao tora e ba oetseng holimo Siloe, ea ba bolaea, hleka le lekanya hoba ba ne ba le molato ho fetisa batho bohle ba ahileng Jerusalema na?” Che, Jesu o re batho bana ha baa ka ba shoa ka lebaka la bobe ba bona. Ho e-⁠na le hoo, “nako le ketsahalo e sa lebelloang” ka kakaretso ke eona e ikarabellang bakeng sa likoluoa tse joalo. Leha ho le joalo, Jesu hang hape o sebelisa ketsahalo ena ho lemosa: “Empa ekare ha le sa bake, le tla timela joalo kaofela.”

Jesu joale o tsoela pele ho etsa papiso e loketseng, oa hlalosa: “E mong o na a na le sefate sa feiga se hlomiloeng tšimong ea hae ea merara, ’me a ea batla litholoana ho sona, ’me a se ke a li fumana. Eaba o re ho molemi oa merara: Bona; e se e le lilemo tse tharo ke ntse ke tla ho batla litholoana sefateng sena sa feiga, ’me ha ke li fumane; se reme, se thibile ke’ng mobu feela? Molemi a araba, a re ho eena: Morena, ak’u se lese ka sona selemo sena hape, nke ke se leme ke se tšele moiteli. Ekaba se tla beha litholoana; ha ho se joalo, u tla se rema.”

Jesu o lekile ka lilemo tse fetang tse tharo ho hlaolela tumelo har’a sechaba sa Bajode. Empa ke barutuoa ba makholo a seng makae feela ba ka baloang e le litholoana tsa mesebetsi ea hae. Joale, ka selemo sena sa bone sa tšebeletso ea hae, o matlafatsa boiteko ba hae, ka tšoantšetso a lema ’me a tšela moiteli ho pota-pota sefate sa feiga sa Bajode ka hore ka cheseho a bolele a be a rute Judea le Perea. Empa ha ho thuso ea letho! Sechaba se hana ho baka ’me kahoo se mocheng oa ho timetsoa. Ke masala a sechaba feela a nkang bohato.

Nakoana ka morao ho moo Jesu o ne a ruta synagogeng ka Sabbatha. Ha a le moo o bona mosali eo, ka lebaka la modemona ea mo hlorisang, a futahaneng ka lilemo tse 18. Ka kutloelo-bohloko, Jesu o bua le eena: “Mosali, u lokolotsoe lefung la hao.” Ha a rialo o mo bea matsoho, ’me hang-hang mosali eo oa koboloha ’me o qala ho rorisa Molimo.

Leha ho le joalo, mohlanka ea okametseng synagoge, o halefile. Oa ipelaetsa, “Matsatsi a tšeletse ao e ka khonang ho sebetsoe ka ’ona; le n’o tla ka ’ona ho tla folisoa, e seng ka letsatsi la Sabbatha.” Kahona mohlanka eo o lumela matla a Jesu a ho folisa empa o nyatsa batho ka hore ba tle ho tla folisoa ka Sabbatha!

Jesu oa arabela: “Baikaketsi! na e mong le e mong oa lōna ha a ke a lokolla khomo ea hae, leha e le esele ea hae sejelong ka Sabbatha, a tle a e ise ho noa na? ’Me mosali enoa, e leng morali oa Abrahama, ea bofiloeng ke Satane lilemo li se li le leshome le metso e robileng metso e le ’meli, o na a sa tšoanele ke’ng ho lokolloa tlamong eo ka letsatsi la Sabbatha na?”

Ha ba utloa sena, ba hanyetsang Jesu ba qala ho itšoabela. Leha ho le joalo, bongata ba bona bo thabela lintho tsohle tse khanyang tseo bo bonang Jesu a li etsa. Jesu ha a arabela o pheta litšoantšo tse peli tsa boprofeta tse mabapi le ’Muso oa Molimo, tseo a kileng a li pheta a le seketsoaneng Leoatleng la Galilea hoo e ka bang selemo pele ho moo. Luka 13:1-21; Moeklesia 9:11, NW; Mattheu 13:31-33.

▪ Ke likoluoa life tse boleloang moo, ’me Jesu o ruta eng ka tsona?

▪ Sefate se sa beheng sa feiga se ka sebelisoa joang, hammoho le boiteko ba ho se etsa hore se behe?

▪ Mohlanka ea okamelang o lumela matla a Jesu a ho phekola joang, empa Jesu o pepesa boikaketsi ba monna eo joang?