Paradeise eo Bibele e Buang ka Eona e Hokae?

Babali ba Batla ho Tseba . . .

Paradeise eo Bibele e Buang ka Eona e Hokae?

▪ Sena ke seo Jesu a ileng a se tšepisa monna ea neng a le makhatheng a lefu, eo ka sebete a ileng a bontša tumelo ho eena: “U tla ba le ’na Paradeiseng.” (Luka 23:43) Monna eo o ne a tla ba hokae? Na Paradeise eo e ne e tla ba leholimong, lefatšeng kapa sebakeng se seng moo batho ba emetseng kahlolo ba le hona teng?

Baholo-holo ba rōna ba kile ba lula Paradeiseng. Bibele e re bolella tjena: “Jehova Molimo a lema serapa Edene, ka nģ’a bochabela, ’me moo a beha motho eo a mo entseng . . . Jehova Molimo a nka motho a mo beha serapeng sa Edene ho se lema le ho se hlokomela.” (Genese 2:8, 15) Ha mantsoe ao a fetoleloa Segerikeng, lentsoe “serapa” le ile la fetoleloa e le pa·raʹdei·sos, e leng lentsoe leo “paradeise” le nkiloeng ho lona.

Joalo feela kaha batsoali ba ka eketsa ntlo ha bana ba ntse ba eketseha, batsoali ba rōna ba pele le bona ba ne ba lokela ho atolosa Paradeise hore e se felle Edene ha bana ba bona ba ntse ba eketseha. Molimo o ile a re ho bona: “Le tlale lefatše ’me le le buse.”—Genese 1:28.

Ka hona, morero oa ’Mōpi e ne e le hore batho ba phele Paradeiseng mona lefatšeng ’me ba be le bana. Ba ne ba tla phela ka ho sa feleng serapeng se mona lefatšeng, ho sa hlokahale mabitla. Lefatše e ne e lokela hore e be lehae la ka ho sa feleng la batho bohle. Hase feela ka tlhaho re khatholloang ke ponahalo e ntle ea libaka tse lefatšeng mona! Re ne re etselitsoe hore re phele lefatšeng le letle.

Na morero oa Molimo o fetohile? Le hanyenyane. Jehova oa re tiisetsa: “Le lentsoe la ka le tsoang molomong oa ka le tla ba joalo. Le ke ke la khutlela ho ’na le se na litholoana, empa ka sebele le tla etsa seo ke se thabelang.” (Esaia 55:11) Ka mor’a lilemo tse 3 000 batho ba bōpiloe, Bibele e ile ea re “’Mōpi oa lefatše le Moetsi oa lona” ha aa le “bōpela lefeela,” empa o le ‘etselitse hore le be le baahi.’ (Esaia 45:18) Thato ea Molimo ha ea fetoha. Lefatše e ntse e tla ba paradeise.

Hoa thahasellisa hore litemana tse ngata tsa Bibele li bua ka Paradeise e le feela bophelo ba lefatšeng. Ka mohlala, boprofeta ba Esaia bo re: “Ka sebele ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona.” (Esaia 65:21) Ke hokae moo ho hahoang matlo le moo ho lengoang lirapa tsa merara? Ke hokae moo ho jeoang litholoana? Ke lefatšeng. Liproverbia 2:21 e hlalosa ka ho hlaka: “Ba lokileng ke bona ba tla lula lefatšeng.”

Jesu le eena o buile ka paradeise e tla ba lefatšeng mona. Ke ’nete hore o tšepisitse le paradeise leholimong, empa o e tšepisitse ba ’maloa feela ba khethiloeng. (Luka 12:32) Bana ha ba shoa ba tsosetsoa Paradeiseng leholimong ho ea ba hammoho le Kreste ho busa Paradeise e lefatšeng. (Tšenolo 5:10; 14:1-3) Batho bana ba tlang ho busa hammoho le Jesu leholimong ba tla etsa bonnete ba hore Paradeise e lefatšeng e busoa hantle e bile e tsamaisoa hantle ho latela melao-motheo ea Molimo.

Jesu o ne a tseba hore ena e ne e le thato ea Molimo ka lefatše. Etsoe o ne a e-na le Ntate oa hae leholimong ha serapa sa Edene se ne se etsoa. Bohle bao hona joale ba nang le tumelo ba bulehetsoe ke monyetla oa ho phela paradeiseng lefatšeng nakong e tlang. (Johanne 3:16) Ke ho batho ba joalo moo Jesu a ileng a fana ka tšepiso ena: “U tla ba le ’na Paradeiseng.”—Luka 23:43.

[Tlhaloso ea Moo Setšoantšo se Nkiloeng Teng e leqepheng la 25]