Khaolo ea Boraro

Tšoara Lentsoe la Molimo ka Tieo

 1. (a) Iseraele ea boholo-holo e ile ea latsoa bonnete ba lentsoe la Molimo joang? (b) Ke hobane’ng ha hoo ho thahasellisa ho rōna?

“LE TSEBA hantle ka lipelo tsa lōna tsohle le ka meea ea lōna eohle hore ha ho lentsoe leha le le leng mantsoeng ’ohle a molemo ao Jehova Molimo oa lōna a le boleletseng ’ona le hlōlehileng ho phethahala. A phethahetse kaofela bakeng sa lōna.” (Joshua 23:14-16) Ana ke mantsoe ao Joshua a ileng a a bua le banna ba hōlileng ba Iseraele ha ba se ba lutse Naheng e Tšepisitsoeng. E, litšepiso tsa Jehova li ipakile li tšepahala. Re boloketsoe tlaleho eo—le Bibele eohle—e le hore “re ka ba le tšepo.”—Baroma 15:4.

 2. (a) Bibele e “bululetsoe ke Molimo” ka kutloisiso efe? (b) Ka ho tseba hore Bibele e bululetsoe ke Molimo, re na le boikarabelo bofe?

² Le hoja ho ile ha sebelisoa bangoli ba batho ba ka bang 40 ho ngola Bibele, Jehova ke eena Mongoli oa eona. Na hoo ho bolela hore ke eena ea neng a tataisa ho ngoloa ha ntho e ’ngoe le e ’ngoe ka ho toba? E. O entse sena ka moea oa hae o halalelang o matla, e leng matla a hae a sebetsang. Moapostola Pauluse o buile tjena ka botšepehi: “Lengolo lohle le bululetsoe ke Molimo . . . e le hore motho oa Molimo a ka tšoaneleha ka botlalo, a hlomelloa ka ho feletseng bakeng sa mosebetsi o mong le o mong o molemo.” Batho ba kholisehileng ka seo hohle ba ela Bibele hloko ’me ba phela tumellanong le seo e se fupereng.—2 Timothea 3:16, 17; 1 Bathesalonika 2:13.

Thusa ba Bang Hore ba e Utloisise

 3. Ke tsela efe e molemohali ea ho thusa ba bangata ba sa kholisehang hore Bibele ke Lentsoe la Molimo?

³ Ba bangata bao re buang le bona ha ba lumele seo re se lumelang, hore Bibele ke Lentsoe la Molimo. Re ka ba thusa joang? Hangata tsela e molemohali ke ho phetla Bibele ’me re ba bontše seo e se fupereng. “Lentsoe la Molimo lea phela ’me le fana ka matla ’me le bohale ho feta sabole leha e le efe e sehang ka nģa tse peli . . . ’me le khona ho lemoha menahano le boikemisetso ba pelo.” (Baheberu 4:12) “Lentsoe la Molimo” hase histori e shoeleng; lea phela! Litšepiso tsa Bibele ha ho ea ka li thibelang ho phethahala. Tšusumetso ea molaetsa oa Bibele ha o fihla pelong ea motho e matla ho feta ntho leha e le efe eo re ka e buang.

 4. Ke litlhaloso life tsa linnete tsa Bibele tse fetotseng boikutlo ba batho ba bang ka Bibele, hona hobane’ng?

⁴ Ka ho bona lebitso la Molimo ka Bibeleng, ho entse hore ba bangata ba e hlahlobisise. Ba bang ba ile ba etsa qeto ea ho ithuta Bibele ha ba bontšoa seo e se buang ka morero oa bophelo, hore na ke hobane’ng ha Molimo a lumeletse bokhopo, bohlokoa ba liketsahalo tsa hona joale, kapa tšepo ea bophelo bo sa feleng lefatšeng la paradeise. Linaheng tseo ho tsona mekhoa ea bolumeli e pepeselitseng batho hore ba tšoenngoe ke meea e mebe, tlhaloso ea Bibele ea hore na e bakoa ke eng le mokhoa oa ho imoloha ho eona li tsositse thahasello. Ke hobane’ng ha lintlha tsee li khahla batho ba tšepahalang? Hobane Bibele ke oona feela mohloli o tšepahalang oa boitsebiso litabeng tsohle tse joalo tsa bohlokoa.—Pesaleme ea 119:130.

 5. (a) Ha batho ba re ha ba lumele Bibele, e ka ’na eaba lebaka ke lefe? (b) Re ka thusa batho ba joalo joang?

⁵ Leha ho le joalo, ho thoe’ng haeba batho ba re bolella hore ha ba lumele Bibele? Na seo se lokela ho khaotsa moqoqo? Eseng haeba ba utloisisa ho behelana mabaka. Mohlomong ba talima Bibele e le buka ea Bokreste-’mōtoana. Tlaleho ea bona ea boikaketsi le ea ho itšunya-tšunya lipolotiking, hammoho le ea ho lula bo qela chelete, e ka ’na eaba ke eona e ikarabellang tseleng eo batho ba itšoarang ka eona ka Bibele. Ke hobane’ng ha u sa botse hore na ho joalo na? Ho nyatsa ha Bibele litsela tsa lefatše tsa Bokreste-’mōtoana, hammoho le lintlha tse hanyetsanang pakeng tsa Bokreste-’mōtoana le Bokreste ba ’nete, ho ka ’na ha tsosa thahasello ea bona.—Mikea 3:11, 12; Matheu 15:7-9; Jakobo 4:4.

 6. (a) Uena u kholisoa ke eng hore Bibele ke Lentsoe la Molimo? (b) Ke mabaka afe a ka sebelisoang ho thusa batho ho utloisisa hore e hlile Bibele e tsoa ho Molimo?

⁶ Ho ba bang, puisano e tobileng ea bopaki ba hore Bibele e bululetsoe ke Molimo e ka ’na ea e-ba molemo. Hantle-ntle u pakeloa ke eng hore Bibele e tsoa ho Jehova Molimo? Na ke seo Bibele ka boeona e se buang mabapi le hore na e tsoa hokae? Kapa na ke ’nete ea hore Bibele e na le boprofeta bo bongata bo hlalosang ka ho qaqileng boemo ba litaba ba nakong e tlang, kahoo boprofeta boo e tlameha ebe bo tsoa mohloling o phahametseng motho? (2 Petrose 1:20, 21) Na mohlomong ke hobane Bibele e bonahatsa ho lumellana ho babatsehang ha eona, le hoja e ngotsoe ke banna ba 40 ka nako ea lilemo tse ka bang 1 600? Kapa na ke ho nepahala ha eona litabeng tsa saense ha e bapisoa le libuka tse ling tsa mehleng ea eona? Kapa na ke ho hloka leeme ha bangoli ba eona? Kapa na ke ho bolokoa ha eona ho sa tsotellehe boiteko bo lonya ba ho e felisa? Ho sa tsotellehe hore na uena u khahliloe ke eng, seo se ka boela sa sebelisoa ho thusa batho ba bang.a

’Malo oa Rōna oa Bibele

 7, 8. (a) Re lokela hore ebe re etsa eng ka Bibele? (b) Re hloka eng ho phaella ho ipalleng ha rōna Bibele? (c) U utloisisitse merero ea Jehova joang?

⁷ Ho phaella ho thuseng ba bang ho lumela Bibele, rōna ka borōna ho hlokahala hore re iphe nako ea ho e bala kamehla. Na u etsa seo? Libukeng tsohle tse kileng tsa hlahisoa, ena ke eona ea bohlokoahali. Ke ’nete hore hona ha ho bolele hore ha re ipalla eona, ha re hloke letho le leng. Mangolo a lemosa khahlanong le ho itšehla thajana. Ha rea lokela ho nahana hore re ka fumana karabo ea ntho e ’ngoe le e ’ngoe ka ho iketsetsa patlisiso. Thuto ea botho le ho ba teng kamehla libokeng tsa batho ba Molimo lia hlokahala e le hore re be Bakreste ba tsitsitseng.—Liproverbia 18:1; Baheberu 10:24, 25.

⁸ Mabapi le sena, Bibele e bua ka motho e mong ea boholong oa Ethiopia ea neng a bala boprofeta ba Esaia. Lengeloi le ile la laela moevangeli oa Mokreste Filipi hore a botse monna eo: “Na u tseba seo u se balang?” Ka boikokobetso, Moethiopia eo o ile a arabela: “Ka sebele, nka tseba joang ntle leha e mong a ka ntataisa?” O ile a kōpa Filipi hore a hlalose temana eo ea Lengolo. Ha e le hantle Filipi e ne e se motho ea ipallang Bibele feela tjee ebe o fana ka maikutlo a hae ka Mangolo. O ne a sebelisana haufi-ufi le mokhatlo o hlophisitsoeng o bonahalang oa Molimo. Ke ka lebaka leo a ileng a thusa Moethiopia hore a rue molemo taeong eo Jehova a neng a etsa hore e fumanehe ka mokhatlo oo o hlophisitsoeng. (Liketso 6:5, 6; 8:5, 26-35) Ka ho tšoanang le kajeno, ha ho motho ea fihlelang kutloisiso e nepahetseng ea merero ea Jehova ka boeena. Kaofela re hloka thuso eo Jehova a fanang ka eona ka lerato ka mokhatlo oa hae o hlophisitsoeng o bonahalang.

 9. Ke lenaneo lefe la ’malo oa Bibele le ka re tsoelang molemo kaofela ha rōna?

⁹ Ho re thusa ho utloisisa Bibele, mokhatlo o hlophisitsoeng oa Jehova o fana ka boitsebiso bo babatsehang ba Mangolo ka lingoliloeng tse sa tšoaneng. Ho phaella moo, re lokiselitsoe kemiso ea kamehla ea ho bala Bibele Sekolong sa Tšebeletso sa Puso ea Molimo se tšoaroang liphuthehong tsohle tsa Lipaki tsa Jehova ho pholletsa le lefatše. Motho a ka rua molemo o moholo ka ho itlhahlobela Mangolo a Halalelang. (Pesaleme ea 1:1-3; 19:7, 8) Etsa boiteko bo khethehileng ba ho bala Bibele kamehla. Le hoja u sa utloisise ntho e ’ngoe le e ’ngoe ka botlalo, ho fumana kutloisiso e akaretsang ea Mangolo ho tla ba molemo haholo. Ka mohlala, haeba u bala maqephe a mane kapa a mahlano feela ka letsatsi, u ka qeta Bibele ka nako e ka etsang selemo.

10. (a) U etsa ’malo oa hao oa Bibele neng? (b) Ke bo-mang hape ba lokelang ho kopanyelletsoa ha u bala Bibele, hona ke hobane’ng ha e le habohlokoa hore ho etsoe kamehla?

¹⁰ U ka etsa ’malo oa hao oa Bibele neng? Haeba u behella ka thōko metsotso e 10 kapa e 15 ka letsatsi bakeng sa ho e bala, u tla rua molemo o moholo. Haeba u sa khone, bonyane iketsetse kemiso ea kamehla bakeng sa beke e ’ngoe le e ’ngoe, ebe joale u khomarela kemiso eo. Haeba u lenyalong, uena le molekane oa hao le ka thabela ho ballana Bibele ka lentsoe le phahameng. Haeba ho e-na le bana ba hōlileng ka ho lekaneng hore ba ka bala, ba ka ’na ba chenchana ka ho bala ka lentsoe le phahameng. Ho bala Bibele e lokela ho ba tloaelo ea bophelo bohle, joaloka ho ja lijo. Joalokaha le tseba, haeba motho a sa je hantle, o tla fokola ’meleng. Ho joalo le ka bophelo ba rōna ba moea, ’me hamorao bophelo bo sa feleng, bo itšetlehile ka ho iphepa kamehla ka “polelo e ’ngoe le e ’ngoe e tsoang molomong oa Jehova.”—Matheu 4:4.

Sepheo sa Rōna

11. Sepheo sa rōna e lokela ho ba sefe ha re bala Bibele?

¹¹ Sepheo sa rōna e lokela ho ba sefe ha re bala Bibele? Pakane ea rōna ha ea lokela ho ba feela ho akaretsa palo e itseng ea maqephe. Sepheo sa rōna e lokela ho ba ho tseba Molimo hamolemonyana e le hore re ka eketsa lerato la rōna ho eena le ho mo rapela ka tsela e amohelehang. (Johanne 5:39-42) Boikutlo ba rōna bo lokela ho tšoana le ba mongoli oa Bibele ea ileng a re: “Ntsebise litsela tsa hao, Jehova; nthute litsela tsa hao.”—Pesaleme ea 25:4.

12. (a) Ke hobane’ng ha ho hlokahala ho fumana “tsebo e nepahetseng,” hona ho ka ’na ha hlokahala boiteko bofe ha motho a bala hore a fumane tsebo eo? (b) Ke ka ho sebelisa litsela life tse ’nè re ka hlahlobang seo re se balang Bibeleng ka tsela e molemo? (Bona lebokose le leqepheng la 30.) (c) Bontša lintlha tsena ka ho araba lipotso tse fanoeng serapeng sena. Phetla mangolo a boletsoeng empa a sa qotsoa.

¹² Ha re amohela thuto e tsoang ho Jehova, takatso ea rōna e lokela ho ba ho fumana “tsebo e nepahetseng.” Kantle ho eona, re ka sebelisa Lentsoe la Molimo ka nepo joang bophelong ba rōna kapa ra le hlalosetsa ba bang ka nepo joang? (Bakolose 3:10; 2 Timothea 2:15) Ho fumana tsebo e nepahetseng ho hloka hore re bale ka hloko, ’me haeba e le karolo e tebileng, ho ka ’na ha hlokahala hore re e bale ka makhetlo e le hore re ka utloisisa moko oa eona. Re tla rua molemo hape haeba re ipha nako ea ho thuisa ka boitsebiso boo, re nahana ka bona ka mahlakore a sa tšoaneng. Leqepheng la 30 ho totobalitsoe litsela tse ’nè tsa bohlokoa tseo re ka li sekasekang. Likarolo tse ngata tsa Mangolo li ka hlahlojoa hamolemo ho sebelisoa e le ’ngoe kapa tse ling tsa litsela tsena. Ha u araba lipotso tse maqepheng a latelang, u tla bona hore na ho joalo joang.

(1) Hangata, karolo ea Lengolo eo u e balang e ka u bolella ho hong ka hore na Jehova ke motho oa mofuta ofe. Ka mohlala, Pesalemeng ea 139:13, 14, re ithuta ka ho ameha ho hoholo ha Molimo ka masea a e-song ho tsoaloe: “U ile ua mpoloka ke sirelelitsoe ka mpeng ea ’Mè. Ke tla u roka hobane ka tsela e tšosang ke entsoe ka mokhoa o hlollang. Mesebetsi ea hao ea hlolla, joalokaha moea oa ka o hlokomela hantle haholo.” Mesebetsi ea Jehova ea pōpo e babatseha hakaakang! Tsela eo batho ba entsoeng ka eona e paka hore o na le lerato le leholo ho rōna.

Ha re nahana ka se builoeng ho Johanne 14:9, 10, ha re bala kamoo Jesu a ileng a sebelisana le ba bang kateng, ka sebele re bona kamoo Jehova ka boeena a neng a tla nka bohato kateng. Re hopotse seo, re ka fihlela qeto efe ka Jehova liketsahalong tse tlalehiloeng ho Luka 5:12, 13 le Luka 7:11-15?

(2) Ak’u nahane hore na tlaleho eo e amana joang le sehlooho sa Bibele: ho tlosoa ha qoso bobusing ba Jehova le ho halaletsoa ha lebitso la hae ka ’Muso o tlas’a Jesu Kreste, Peō e tšepisitsoeng.

Ezekiele le Daniele ba ile ba hatisa sehlooho sa Bibele joang? (Ezekiele 38:21-23; Daniele 2:44; 4:17; 7:9-14)

Bibele e bontša joang ka ho hlakileng hore Jesu ke Peō e tšepisitsoeng? (Bagalata 3:16)

Tšenolo e hlalosa tlhōrō e hlollang ea sehlooho sa ’Muso joang? (Tšenolo 11:15; 12:7-10; 17:16-18; 19:11-16; 20:1-3; 21:1-5)

(3) Ipotse hore na u ka itšebelisetsa seo u se balang joang. Ka mohlala, ho Exoda ho ea ho Deuteronoma re bala ka boitšoaro bo bobe ba Baiseraele le borabele ba bona. Re ithuta hore boikutlo le liketso tseo li ile tsa hlahisa liphello tse mpe. Kahoo, re lokela ho susumelletseha ho thabisa Jehova ka ho se etsise mohlala o mobe oa Baiseraele. “Lintho tsena li ile tsa tsoela pele ho ba hlahela e le mehlala, ’me li ile tsa ngoloa hore e be temoso ho rōna bao bofelo ba litsamaiso tsa lintho bo ba fihletseng.”—1 Bakorinthe 10:11.

Tlaleho ea hore Kaine o ile a bolaea Abele e na le thuto efe ho rōna? (Genese 4:3-12; Baheberu 11:4; 1 Johanne 3:10-15; 4:20, 21)

Na keletso ea Bibele ho Bakreste ba nang le tšepo ea leholimo e sebetsa le ho ba nang le tšepo ea bophelo bo sa feleng lefatšeng? (Numere 15:16; Johanne 10:16)

Le hoja re e-na le boemo bo botle ka phuthehong ea Bokreste, ke hobane’ng ha ho hlokahala hore re hlahlobe mokhoa oa ho sebelisa keletso ea Bibele ka botlalo nthong eo re ntseng re e tseba? (2 Bakorinthe 13:5; 1 Bathesalonika 4:1)

(4) Nahana ka hore na u ka sebelisa seo u se balang joang ho thusa ba bang. Batho bohle ba tšoenyehile ka mathata a bophelo, kahoo re ka bala le bona seo Jesu a ileng a se etsa ho bontša seo a tlang ho se etsa ka tekanyo e khōloanyane ha a se a le matleng a ’Muso: “Bongata bo boholo ba mo atamela, bo e-na le batho ba holofetseng, ba qhoalileng, lifofu, limumu, le ba bangata ba leng ka litsela tse ling, . . . ’me a ba phekola.”—Matheu 15:30.

Ke bo-mang ba ka ’nang ba thusoa ke tlaleho ea ho tsosoa ha morali oa Jairuse? (Luka 8:41, 42, 49-56)

13. Re ka lebella liphello life ka ho ntšetsa pele lenaneo la ho bala Bibele le ho ithuta le mokhatlo o hlophisitsoeng oa Jehova?

¹³ ’Malo oa Bibele e ba o putsang hakaakang ha ho nahanoa ka lintlha tse ’nè tse boletsoeng ka holimo! Ha e le ho bua ’nete, ho bala Bibele ke phephetso. Empa ho ka re tsoela molemo bophelo bohle ba rōna, hobane ha re bala Mangolo, re tla hōla re be matla moeeng. Ho bala Bibele kamehla ho tla re atametsa haufi le Ntate oa rōna ea lerato, Jehova, le ho barab’abo rōna ba Bakreste. Ho tla re thusa ho mamela keletso ea hore re tšoare “ka thata lentsoe la bophelo.”—Bafilipi 2:16.

[Mongolo o botlaaseng ba leqephe]

Tlhahlobo

• Ke hobane’ng ha Bibele e ile ea ngoloa ’me ea bolokoa ho fihlela mehleng ea rōna?

• Re ka thusa ba bang joang hore ba utloisise Bibele?

• Ke hobane’ng ha ho ipalla Bibele ho le molemo? Ke ka ho sebelisa lintlha life tse ’nè re ka hlahlobang seo re se balang ka tsela e nang le molemo?

[Lebokose/Setšoantšo se leqepheng la 30]

HA U BALA KAROLO E ITSENG EA BIBELE, NAHANA KA

Seo e u bolellang sona ka Jehova e le motho

Kamoo e amanang kateng le sehlooho se akaretsang sa Bibele

Kamoo e lokelang ho ama bophelo ba hao kateng

Kamoo u ka e sebelisang kateng ho thusa ba bang