Khaolo ea 23

Lebaka Leo ka Lona Batho ba Kulang

NA HO na le motho ea kulang eo u mo tsebang?— Mohlomong le uena ka linako tse ling u ee u kule. Mohlomong u ee u tšoaroe ke sefuba, kapa u tšoaroe ke mala. Batho ba bang ba kula haholo. Ba bang ba sitoa le ho ema ha ho se motho ea ba thusang. Hangata sena se etsahala ha batho ba se ba hōlile haholo.

Motho e mong le e mong oa kula ka linako tse ling. Na ua tseba hore na ke hobane’ng ha batho ba kula, ba tsofala ba bile ba e-shoa?— Ka letsatsi le leng monna e mong ea neng a sitoa ho tsamaea o ile a tlisoa ho Jesu, ’me Jesu a bontša hore na ke hobane’ng ha batho ba kula ba bile ba e-shoa. E-re ke u phetele pale eo.

Jesu o ne a lula ntlong e ’ngoe motsaneng o haufi le Leoatle la Galilea. Batho ba bangata ba ile ba tla ho eena ho tla mo bona. Kahoo ho ile ha tla batho ba bangata hoo ba bang ba ileng ba hloka sebaka sa ho kena ka tlung. Ba bang ba ile ba sitoa le ho atamela monyako feela. Leha ho le joalo, batho ba ile ba ’na ba tla ka bongata! Batho ba bang ba ile ba tlisa monna ea shoeleng litho ea neng a sitoa ho tsamaea. Ho ile ha hlokahala banna ba bane hore ba mo jare ka bethe e nyenyane, kapa lempara.

Na ua tseba hore na ke hobane’ng ha ba ne ba batla ho tlisa monna eo ea kulang ho Jesu?— Ba ne ba lumela hore Jesu a ka khona ho mo thusa. Ba ne ba lumela hore Jesu a ka mo folisa ho kuleng ha hae. Na ua tseba hore na ba ile ba etsa joang hore monna eo ea shoeleng litho a fihle ho Jesu le hoja batho ba ne ba tletse hohle ka tlung eo?—

Setšoantšo sena seo u se bonang mona se bontša hore na ba ile ba etsa seo joang. Ba ile ba qala ba hloesetsa monna eo ka holim’a ntlo. Marulelo a ntlo eo a ne a bataletse. Eaba ba phunya lesoba le leholo marulelong. Ba ntan’o theolela monna eo ea kulang ka lesoba leo ba mo kenya ka tlung. Ka sebele ba ne ba e-na le tumelo e matla!

Batho bohle ba neng ba le ka tlung eo ba ile ba makala ha ba bona se etsahalang. Monna ea shoeleng litho ea jeroeng ka lempara o ile a theoleloa har’a bona. Na Jesu o ile a halefa ha a bona se entsoeng ke banna bao?— Le hanyenyane! O ile a thaba ha a bona hore ba na le tumelo. O ile a re ho monna ea shoeleng litho: “U tšoaretsoe libe.”

Batho ba bang ba ne ba nahana hore Jesu ha a na tokelo ea ho bua joalo. Ba ne ba sa nahane hore a ka tšoarela libe. Kahoo e le hore a ba bontše hore o khona ho tšoarela batho libe, Jesu a re ho monna eo: “Ema, u nke lempara la hao, ’me u ee lapeng la hao.”

Ha Jesu a bua seo, monna eo o ile a fola! O ne a se a sa shoa litho. Joale o ile a khona ho ikemisa le ho tsamaea. Batho ba ileng ba bona mohlolo ona ba ile ba makala. Ho ne ho se mohla ba kileng ba bona ntho leha e le efe e makatsang joaloka eo bophelong bohle ba bona! Ba ile ba rorisa Jehova ka hore o ba file Mosuoe enoa e Moholo, ea neng a khona le ho folisa batho ba kulang.—Mareka 2:1-12.

Re ithuta’ng mohlolong oo?— Re ithuta hore Jesu o na le matla a ho tšoarela libe le a ho folisa batho ba kulang. Empa re boetse re ithuta taba e ’ngoe ea bohlokoa, ea bohlokoa haholo. Re ithuta hore batho ba kula ka lebaka la sebe.

Kaha bohle rea kula ka linako tse ling, na see se bolela hore kaofela ha rōna re baetsalibe?— E, Bibele e re bohle re tsoetsoe re e-na le sebe. Na ua tseba hore na ho tsoaloa re e-na le sebe ho bolela’ng?— Ho bolela hore re tsoaloa re sa phethahala. Ka linako tse ling re etsa liphoso le hoja re sa batle ho li etsa. Na ua tseba hore na ho tlile joang hore re be le sebe?—

Re hlaha re e-na le sona hobane motho oa pele, e leng Adama, ha aa ka a mamela Molimo. O ile a etsa sebe ha a ne a tlōla molao oa Molimo. ’Me bohle re futsitse sebe ho Adama. Na ua tseba hore na ho tlile joang hore re futse sebe ho eena? E-re ke leke ho u hlalosetsa taba ena ka tsela eo u tla e utloisisa.

Mohlomong u kile ua bona ha ho bakoa bohobe ka pane. Ha pane e bothetse, bohobe bo tsoa bo le joang? Na ua tseba?— Akere bohobe bo bakoang ka pane eo bo tsoa bo e-na le letšoao, kapa bo bothetse?—

Adama o tšoana le pane eo, ’me rōna re tšoana le bohobe. O ile a fetoha ea sa phethahalang ha a ne a tlōla molao oa Molimo. Ho ile ha tšoana le ha a e-ba le sebothe, kapa letšoao la ho se phethahale. Kahoo ha a e-ba le bana, ba ne ba tla ba joang?— Bana bohle ba hae ba ne ba tla ba le letšoao le kang la hae la ho se phethahale.

Bana ba bangata ha ba hlahe ba e-na le ho se phethahale hoo motho a ka ho bonang. Ha ba hlahe ba se na letsoho kapa leoto. Empa ho se phethahale hoo ba ho futsitseng ho ntse ho le matla hoo ba kulang, ’me ka mor’a nako ba shoang.

Ke ’nete hore batho ba bang ba kula khafetsa ho feta ba bang. Ke hobane’ng ha seo se etsahala? Na ke hobane ba tsoetsoe ba e-na le libe tse ngata?— Che, batho bohle ba tsoaloa ba e-na le sebe se tšoanang. Kaofela ha rōna re tsoaloa re sa phethahala. Kahoo, motho e mong le e mong o tla kula qetellong. Esita le batho ba lekang ho mamela melao eohle ea Molimo le ba sa etseng letho le lebe le bona baa kula.

Joale, ke hobane’ng ha batho ba bang ba kula khafetsa ho feta ba bang?— Ho na le mabaka a mangata. E ka ’na eaba ha ba na lijo tse lekaneng. Kapa mohlomong ha ba je lijo tse loketseng. E ka ’na eaba ba ja likuku le lipompong haholo. Lebaka le leng ke hore e ka ’na eaba ba lieha ho robala bosiu ebe joale ha ba fumane boroko bo lekaneng. Kapa mohlomong ha ba apare liaparo tse mofuthu pele ba tsoela ka ntle serameng. ’Mele ea batho ba bang ea fokola, ’me ha e khone ho itšireletsa ho kuleng, le hoja ba ka ’na ba leka ho itlhokomela.

Na ho tla ke ho be le nako eo ka eona re ke keng ra kula? Na ho na le mohla re tla ke re lokolohe sebeng?— Na u sa hopola hore na Jesu o ile a etsetsa monna ea shoeleng litho eng?— Jesu o ile a mo tšoarela libe ’me a mo folisa. Ka tsela eo, Jesu o ile a bontša seo ka letsatsi le leng a tlang ho se etsetsa batho bohle ba lekang ka matla ho etsa se nepahetseng.

Haeba re bontša hore ha re batle ho etsa sebe le hore re hloile se fosahetseng, Jesu o tla re folisa. Nakong e tlang, o tla tlosa ho se phethahale hoo re nang le hona. O tla etsa sena ha e se e le Morena oa ’Muso oa Molimo. Sebe ha se na ho tlosoa ho rōna hang-hang. Se tla tlosoa butle-butle. Joale ha re se re se na sebe, ha re sa tla hlola re kula. Re tla ba le bophelo bo phethahetseng ’meleng. Eo e tla ba tlhohonolofatso e kaakang!

Ho fumana lintlha tse ling tse eketsehileng tabeng ea kamoo sebe se amang motho e mong le e mong kateng, bala Jobo 14:4; Pesaleme ea 51:5; Baroma 3:23; 5:12; le 6:23.

[Setšoantšo se leqepheng la 123]

Jesu o ile a re monna ea shoeleng litho a etse’ng?

[Setšoantšo se leqepheng la 124]

Re ithuta’ng mohlolong oo?

[Setšoantšo se leqepheng la 125]

Ho tlile joang hore kaofela ha rōna re be le sebe?

[Setšoantšo se leqepheng la 126]

Re tla ba le bophelo bo joang ’meleng ha re se re se na sebe?