Josiase o ne a E-na le Metsoalle e Lokileng

Na u nahana hore ho thata ho etsa lintho tse lokileng?— Batho ba bangata ba nahana joalo. Bibele e re bolella ka moshanyana e mong ea bitsoang Josiase eo ho ileng ha e-ba thata hore a etse lintho tse lokileng. Empa o ne a e-na le metsoalle e lokileng e neng e mo thusa. A re ke re ithute ka Josiase le metsoalle ea hae.

Ntate oa Josiase e ne e le Amone, morena oa Juda. Amone o ne a etsa lintho tse mpe ’me a rapela litšoantšo. Ha ntate oa Josiase a shoa, Josiase e ile ea e-ba morena oa Juda. Empa o ne a le lilemo li robeli feela! Na u nahana hore o ne a etsa lintho tse mpe joaloka ntate oa hae?— Che!

Leha a ne a le monyenyane haholo, Josiase o ne a batla ho mamela Jehova. Kahoo o ile a khetha feela metsoalle e ratang Jehova. Metsoalle eo e ile ea thusa Josiase hore a etse lintho tse lokileng. Metsoalle e meng ea Josiase e ne e le bo-mang?

E mong oa metsoalle ea hae e ne e le Sofonia. Sofonia e ne e le moprofeta ea neng a bolella batho ba Juda hore ha ba rapela litšoantšo ba ne ba tla hlaheloa ke lintho tse mpe. Josiase o ile a mamela Sofonia ’me a rapela Jehova, eseng litšoantšo.

E mong hape e ne e le Jeremia. E ne e ka ba lithaka ’me ba hōtse hammoho. E ne e le metsoalle e ratanang haholo ’me ha Josiase a shoa, Jeremia o ile a ngola pina e khethehileng e neng e bua ka hore o hopola Josiase. Jeremia le Josiase ba ne ba thusana hore ba etse lintho tse lokileng le hore ba mamele Jehova.

U ka ithuta eng mohlaleng oa Josiase?— Le hoja Josiase e ne e sa le moshanyana feela, o ne a batla ho etsa lintho tse lokileng. O ne a tseba hore o lokela ho ba le metsoalle e ratang Jehova. U lokela ho etsa bonnete ba hore u khetha metsoalle e ratang Jehova le e tla u thusa ho etsa lintho tse lokileng!