Josiase o ne a Rata Molao oa Molimo

Josiase e ile ea e-ba morena oa Juda ha a le lilemo li robeli. Ka nako eo, batho ba ne ba sebelisa boloi ba bile ba rapela litšoantšo. Ha Josiase a le lilemo li 16, o ile a ithuta ho rapela Jehova ka tsela e nepahetseng. Ha a le lilemo li 20, a felisa litšoantšo tse rapeloang naheng eohle ’me ha a le lilemo li 26, a lokisetsa hore tempele ea Jehova e tsosolosoe.

Moprista ea phahameng Hilkia o ile a fumana moqolo oa Molao oa Jehova, mohlomong o ngotsoeng ke Moshe. Mongoli oa morena ea bitsoang Shafane o ile a isetsa Josiase moqolo oo ’me a qala ho mo balla oona. Ha Josiase a ntse a mametse, a hlokomela hore haesale batho ba tlola Molao oa Jehova. Morena Josiase a re ho Hilkia: ‘Jehova o re halefetse haholo. Tsamaea u il’o bua le eena. Jehova o tla re bolella hore na re lokela ho etsa’ng.’ Jehova o ile a ba araba a sebelisa moprofeta oa mosali ea bitsoang Hulda, a re: ‘Batho ba Juda ba mphuraletse. Ke tla ba fa kotlo empa eseng ha Josiase e ntse e le morena, hobane o ile a ikokobetsa.’

Ha Morena Josiase a fumana molaetsa oo, a bitsetsa Bajuda tempeleng. A ba balla Molao oa Jehova. Josiase le Bajuda ba tšepisa Jehova hore ba tla mo mamela ka lipelo tsohle tsa bona.

Bajuda ba ne ba qetile lilemo tse ngata ba sa etse mokete oa Paseka. Josiase o ile a bala Molaong hore Paseka e lokela ho ketekoa selemo le selemo. Kahoo, a re: ‘Re tla tšoarela Jehova Paseka.’ Eaba Josiase o lokisa mahlabelo a mangata ’me a hlophisa hore ho be le libini ka tempeleng. Kahoo, Bajuda ba tšoara Paseka le Mokete oa Mahobe a sa Lomosoang ka matsatsi a supileng. Ho ne ho e-s’o ka ho e-ba le Paseka e kang eo haesale ho tloha mehleng ea Samuele. Josiase o ne a rata Molao oa Molimo e le kannete. Na u thabela ho ithuta ka Jehova?