Nahanela Pele ’me u be Bohlale

Papiso ea mora ea lahlehileng eo Jesu a sa tsoa e pheta, e lokela hore ebe e ile ea thusa babokelli ba lekhetho, bangoli le Bafarisi ba mo mametseng, hore ba bone hore Molimo o ikemiselitse ho tšoarela baetsalibe haeba ba baka. (Luka 15:​1-7, 11) Mothating ona Jesu o bua le barutuoa ba hae. O etsa papiso e ’ngoe e buang ka monna oa morui ea hlokometseng hore mohlokomeli oa hae oa ntlo, kapa motsamaisi, o bile lebatha.

Jesu o hlalosa hore motsamaisi eo o qositsoe ka ho tšoara thepa ea mong’a hae ka bohlasoa. Kahoo mong’a hae o re o tl’o mo leleka. Motsamaisi eo oa ipotsa o re: “Ke tla etsa’ng, kaha mong’a ka o tla nkamoha botsamaisi? Ha ke matla ka ho lekaneng ho cheka, ke lihlong ho kopa.” E le hore a tle a tobane le se larileng ka pele, o etsa qeto o re: “Ke tseba seo ke tla se etsa, e le hore ha ke tlosoa botsamaising, batho ba tle ba nkamohele ka malapeng a bona.” Hang-hang o bitsa batho ba kolotang mong’a hae, ’me o ba botsa ka bomong o re: “U kolota mong’a ka bokae?”​—Luka 16:​3-5.

Ha oa pele a mo araba o re: “Litekanyo tse lekholo tsa libate tsa oli ea mohloaare.” Tseo ke lilithara tse 2 200 tsa oli. E ka ’na eaba motho eo o ne a e-na le moru o moholo oa lifate tsa mohloaare kapa mohlomong o ne a rekisa oli. Motsamaisi o re: “Khutla le tumellano ea hao e ngotsoeng ’me u lule fatše ’me kapele u ngole tse mashome a mahlano [e leng lilithara tse 1 100].”​—Luka 16:6.

Motsamaisi o botsa ea latelang o re: “Joale uena, u kolota bokae?” Eo o araba ka ho re: “Litekanyo tse lekholo tsa likore tsa koro.” Tseo ke lilithara tse 22 000. Motsamaisi o re ho eena: “Khutla le tumellano ea hao e ngotsoeng ’me u ngole tse mashome a robeli.” Ka tsela ena o fokotsa mokoloto oa hae ka liphesente tse 20.​—Luka 16:7.

Motsamaisi e ntse e le eena ea laolang matlotlo a mong’a hae, kahoo ka tsela e itseng ho ntse ho le matleng a hae ho fokoletsa batho mekoloto. Ka ho theolela batho mekoloto, motsamaisi enoa o iketsetsa metsoalle le batho ba ka ’nang ba mo thusa ha a se a feletsoe ke mosebetsi.

Ha nako e ntse e-ea, mong’a hae o tseba se etsahetseng. Le hoja ketso ena e bolela hore o lahlehetsoe, o tsota seo motsamaisi a se entseng ’me oa mo babatsa hobane “le hoja a ne a sa loka,” o “ile a etsa ka bohlale bo sebetsang.” Jesu o phaella ka ho re: “Bara ba tsamaiso ena ea lintho ba bohlale ka tsela e sebetsang mabapi le moloko oa bona ho feta kamoo bara ba leseli ba leng kateng.”​—Luka 16:8.

Ha se hore Jesu o buella tsela eo motsamaisi a entseng lintho ka eona, ebile ha a khothalletse hore leha e le mang a sebetse litaba tsa khoebo ka bolotsana. Hantle-ntle ntlha ea hae ke efe? O re ho barutuoa ba hae: “Iketsetseng metsoalle ka maruo a sa lokang, e le hore, ha a fela, ba ka le amohela libakeng tsa bolulo tse sa feleng.” (Luka 16:9) Ha e le hantle, ntlha eo a e hatisang mona ke hore ba nahanele pele le hore ba be bohlale. Bahlanka ba Molimo, e leng “bara ba leseli,” ba lokela ho sebelisa maruo a bona ka bohlale, ba ntse ba nahanne ka bophelo bo sa feleng.

Ke Jehova Molimo le Mora oa hae feela ba ka khonang ho amohela motho ’Musong oa leholimo kapa Paradeiseng lefatšeng mona, tlas’a ’Muso oa Molimo. Re lokela ho ikitlaetsa ho ba le setsoalle le bona ka hore re sebelise maruo a rona ho tšehetsa litaba tse amanang le ’Muso oa Molimo. Kahoo, re tla fumana bophelo bo sa feleng ha khauta, silevera le matlotlo a mang a fela.

Jesu o boetse o re batho ba tšepahalang tseleng eo ba tšoarang le ho sebelisa maruo kapa matlotlo leha e le afe a bona ka eona, ba tla tšepahala ka tsela e tšoanang ha ba sebetsana le lintho tsa bohlokoa le ho feta. Ke kahoo Jesu a reng: “Ka hona, haeba le sa tšepahala maruong a sa lokang, ke mang ea tla beha sa ’nete [e leng se amanang le ’Muso oa Molimo] tlhokomelong ea lona?”​—Luka 16:11.

Jesu o bontša barutuoa ba hae hore ho tla lebelloa ho hongata ho bona haeba ba batla ho amoheloa “libakeng tsa bolulo tse sa feleng.” Ha ho motho eo e ka bang mohlanka oa ’nete oa Molimo ha ka lehlakoreng le leng e le lekhoba la maruo a sa lokang. Jesu o phethela ka ho re: “Ha ho mohlanka oa ntlo eo e ka bang lekhoba la benghali ba babeli, kaha o tla hloea e mong ’me a rate e mong, kapa o tla khomarela e mong ’me a nyelise e mong. Le ke ke la ba makhoba a Molimo le a Maruo.”​—Luka 16:​9, 13.