“Mohlahlobi ke Ofe ea Khabane, ea Bohlale?”
“Mohlahlobi ke ofe ea khabane, ea bohlale, eo mong a hae a ’meileng moalosi oa bahlanka ba hae?”—Luka 12:42
1. Potso e ka pel’a rōna ke ea khale hakae, ’me ba sa fumaneng karabelo ba sitoa ho fumana eng?
POTSO ena joale e na le lilemo tse fetang 1 900. Makholo a mangata a likete hona joale a lumela hore a fumane karabelo. Ba sa fumaneng karabelo ba sitoa ho fumana melemo e amang bokamoso ba bona ba ka ho sa feleng. Potso ke ena: “Mohlahlobi ke ofe ea khabane, ea bohlale, eo mong a hae a ’meileng moalosi oa bahlanka ba hae, ho ba nea lijo tsa bona ka nako e tšoanelang?”—Luka 12:42.
2. (a) Potso e botsitsoe ka lekhetlo la pele neng, hona ke mang? (b) Potso e lokela ho ipiletsa ho bo-mang, hona hobane’ng
2 Potso e ile ea botsoa ka lekhetlo la pele naheng ea Iseraele e Bochabela bo Hare. Nako e ne e le selemo sa 32 sa Mehla e Tloaelehileng ea rōna, pakeng tsa mokete oa Baiseraele oa litabernakele hoetla le mokete oa ho khakoloa ha tempele ea bona e tsosolositsoeng e Jerusalema mathoasong a mariha. Monna ea ileng a botsa potso o fetohile eo ho phehoang khang ka eena lefatšeng lohle. Lebitso la hae ke Jesu Kreste. Potso ea hae ka baka leo e lokela ho ipiletsa ka mokhoa o khethehileng ho Bojakane, kaha bo bua ka eena e le “Morena” ’me bo ipolela hore bo tletse ka barutuoa ba hae.
3, 4. (a) Bamameli ba Jesu ba ne ba thahasella eng, ’me kahoo a ba bolella hore ba se ke ba tšoha eng? (b) Ke litšoantšo life tse peli tseo Jesu a ileng a fana ka tsona mabapi le bohlokoa ba hore ba falimehe?
3 Ho latela tlaleho ea Bibele, potso e batlisisang e ile ea botsoa e le ha ho arabeloa potso e ’ngoe ’me e tobisitsoe ho batho ba neng ba thahasella ’muso o moholo o neng o tla ke o hlongoe lefatšeng, ’muso oa ’Mōpi oa leholimo le lefatše, “’muso oa Molimo.” Ke ka lebaka leo Jesu Kreste a hlileng a bua tjena ho bamameli ba hae ba Baiseraele: “mohlatsoana, se tšabe, hobane ho khahlile Ntat’a lōna ho le fa ’muso. Bapatsang ka tseo le nang le tsona, ’me le fane; iketsetseng mekotla e sa tsofaleng, letlotlo le sa feleng maholimong, moo lesholu le sa atameleng teng, le moo tšoèlè e sa senyeng. Hobane, moo letlotlo la lōna le leng teng, ke moo le lipelo tsa lōna li tla ba teng.
4 “Matheka a lōna a tlangoe, ’me mabone a lōna a tuke. Le lōna le be joale ka batho ba lebeletseng morena oa bona hore na o tla khutla neng bohaling, hore, etlere ha a fihla, a kokota, ba ’mulele hang-hang. Ho lehlohonolo bahlanka bao, morena ha a fihla, a tla ba fumana ba falimehile! Ka ’nete ke re ho lōna: O tla itlama, a ba lulise lijong, ’me o tla atamela, a ba sebeletse. Leha a ka tla tebelong ea bobeli, leha a ka tla tebelong ea boraro, ’me a ba fumana ba le joalo, ho lehlohonolo bahlanka bao. Le lemohe hoba, hola mong a ntlo a ka tseba nako eo lesholu le tla tla ka eona, a ka lebela, a se ke a lesa ntlo ea hae ea phunngoa. Joale, le lōna le itokise; hobane Mor’a motho o tla tla ka nako eo le sa e hopoleng.”—Luka 12:32-40.
5. (a) Petrose o bitsa mantsoe a Jesu a khothatso eng. ’me kahoo karabelo ea Jesu e ka beoa sehlopheng sefe? (b) Potso ea Petrose ka ho seblisoa ha mantsoe a Jesu e hlahisa potso efe ka hore na mantsoe ao Jesu a arabetseng ka oona a sebetsa joang?
5 Se boletsoeng ke Morena Jesu Kreste moo, moapostola Petrose o se bitsitse “setšoantšo,” hobane tlaleho ea Luka e tsoela pele e re: “Morena, setšoantšo seo hleka u se bolella rōna feela, kapa u se bolella le bohle na?” (Luka 12:41) Kahoo, ka ho utloahalang, seo Jesu a neng a tla se bua ha a arabela se ne se tla nkoa e le setšoantšo, se neng se tla tšoantšetsa kapa se bapise linnete tse itseng tse neng li tla tla nakong e tlang. Ke hore, karabelo ea Jesu ho Luka 12:42-44 e ne e tla bōpa karolo ea setšoantšo sa ‘mohlahlobi ea khabane ea bohlale.’ Ha joale re hlahloba setšoantšo, re lokela ho hopola potso ea Petrose, eo tšebelisong ea eona e jereng setšoantšo sena se latelang, e leng, “Morena, setšoantšo seo hleka u se bolella rōna feela, kapa u se bolella le bohle na?” (Luka 12:41) Rea botsa, ka baka leo, Na setšoantšo see sa “mohlahlobi” se sebetsa ho sehlopha, sehlopha sa “rōna,” baapostola ba 12 ba Jesu Kreste, kapa bohle ba neng ba mametse Jesu, ’me, kajeno, ho motho e mong le e mong ea balang setšoantšo sa Jesu, ho sa tsotellehe kameho ea hae bolumeling ka hare kapa ka ntle ho Bojakane? Na setšoantšo ke taba ea sehlopha kapa ea motho ka mong?
“MORENA OA HAE”
6. Jesu o ile a arabela potso ea Petrose ka setšoantšo sefe?
6 Jesu ha a ka a arabela ka ho toba potso ea Petrose ea “setšoantšo” sa pele, empa bakeng sa hoo a etsa setšoantšo se seng, a re: “mohlahlobi ke ofe ea khabane, ea bohlale, eo mong a hae a ’meileng moalosi oa bahlanka ba hae, ho ba nea lijo tsa bona ka nako e tšoanelang? Ho lehlohonolo mohlanka eo, etlareng ha morena oa hae a e-tla, a mo fumane a ntse a etsa joalo. Ka ’nete ke re ho lōna: O tla ’mea moalosi oa mesebetsi ea hae kaofela.”—Luka 12:42-44.
7. “Morena” oa mohlahlobi o tšoantšetsa mang, kahoo ba amehang le “morena” eo ba lokela ho ameha ka boikutlo bofe ‘mehleng ea qetello ea tsamaiso ea lintho’?
7 Ha ho lea mong ea ka belaelang hore “morena” oa mohlahlobi ea tšepahalang o tšoantša ea neng a bolela setšoantšo ka boeena, Morena Jesu Kreste. Setšoantšong seo ho sona Petrose a ileng a botsa potso Jesu o ile a itšoantša le monyali, eo, ka baka la liketsahalo tsa lechato, a khutlelang lapeng ka hora e sa tsejoeng ea bosiu kapa ka meso. (Luka 12:35-40) Ka sebele, he, ba amehang ho phethahaleng ha setšoantšo sa Jesu ba lokela ho falimeha, haholo nakong ena ea ‘bofelo ba tsamaiso ea lintho.’—Matt. 24:3, NW.
8. Ke ho tloha neng Jesu Kreste e bileng “morena” oa “bahlanka,” ’me Tšenolo 7:1-8 e ba hlalosa joang?
8 Tabeng ea setšoantšo sa mohlahlobi, morena o na le sehlopha sa “bahlanka,” seo mohlahlobi e leng e mong oa bona. Hona ho lumellana le ’nete ea hore ea neng a bolela setšoantšo, Morena Jesu Kreste, o na le lelapa ka kutloisiso ea moea. Ka ntlha eo ho ngoliloe, ho Ba-Heberu 3:4-6: “Ea hahileng ntho tsohle ke Molimo. Ha e le Moshe, o fela a bile khabane ka tlung eohle ea Molimo, ka mokhoa oa mohlanka, ho behela batho tse neng li tšoanetse ho boleloa. Empa Kreste o bile khabane pusong ea ntlo ea oona ka mokhoa oa Mora.” Moprofeta Moshe o ne a alositse ntlo ea meloko e 12 ea Iseraele qalehong ea sechaba seo. Jesu Kreste, joaloka Moshe e moholoanyane, o alositse ntlo ea Iseraele oa moea ho tloha ka letsatsi la Pentekonta ea 33 C.E. ho tla fihlela joale. Tšenolo 7:1-8 e senola hore “ntlo” e entsoe ka Baiseraele ba moea ba 144 000, ba arotsoeng ka meloko e 12 ea ba 12 000 moloko ka mong. Ena ke “ntlo” e entsoeng ka bara ba moea ba Molimo, ho tšoana le Hlooho ea bona Jesu Kreste ka boeena. Bana ha ba le hammoho ke “mohlatsoana,” oo ho ona, kamoo Jesu a boletseng, Jehova Molimo Ntate oa leholimo a lumetseng hore a ka o nea ’muso o khanyang.—Deut. 18:15-18; Luka 12:32; Lik. 3:19-23.
9. Haeba ho etsoa khang ea hore “mohlahlobi” ke motho a le mong oa Mokreste, ea khethiloeng lekholong la pele la lilemo C.E., ho thulanoa le bothata bofe ka ho bea nako e tiileng ka ho fihla ha morena?
9 Kahoo bara ba Molimo ba moea ba etsa ba 144 000 ba bopang “bahlanka” bao Morena, Morena Jesu Kreste, a khethang “mohlahlobi” oa setšoantšo. Ho tsebahala ha “mohlahlobi” oa setšoantšo (oikonómos, ka Segerike; so·khenʹ, ka Seheberu—phetolelo ea Delitsch) e sa ntsane e le taba ea khang e khōlō har’a ba bangata ba ipolelang hore ke Bakreste. Haeba re bolela hore “mohlahlobi” o tšoantšetsa motho a le mong oa Mokreste, re kena mathateng ao re ke keng ra a hlōla. Ka mohlala, setšoantšo se bontša hore morena oa mohlahlobi o nka leeto le itseng ’me, kamor’a hore a be sieo ka nako e sa tsejoeng, o khutlela hae ka hora eo a sa e bolelang. Lekholong la pele la lilemo C.E. ho ne ho ke ke ha beoa hora e tobileng, kaha ka nako eo batho ba ne ba se na melemo ea kajeno e kang lifono-fono, puisano ea sea-le-moea le mekhoa ea ho tsamaea ka potlako e beetsoeng linako.
10. Ke bothata bofe bo hlahang ka bolelele ba motho leha e le ofe oa Mokreste, ba bophelo ka nako ea ho fihla ha “morena”?
10 Ho latela mantsoe a Jesu “mohlahlobi” o ile a khethoa holim’a “bahlanka” pele Morena oa hae a ea leetong. Ka ho loketseng, kaha morena oa mohlahlobi o ne a tšoantšetsa Morena Jesu Kreste, “mohlahlobi” oa hae o ile a khethoa pele a nyolohela hape leholimong matsatsi a 10 pele ho mokete oa Sejode oa Pentekonta, 33 C.E. “Mohlahlobi” o ne a lokela hore a be a phela a bile a tšepahala boikarabelong boo a bo khethetsoeng nakong ea ha Morena oa hae a khutla. Joale e se e le lilemo tse makholo a 19 esale Morena Jesu Kreste a ne a tlohe ho ea lehaeng la hae la Ntate oa hae la leholimong. Kahoo, haeba mang kapa mang a phea khang hore “mohlahlobi” oa setšoantšo o tšoantšetsa Mokreste a le mong oa monna ka phuthehong ea ’nete ea Bokreste, ho ka tla joang hore ebe o ntse a phela ho tla fihlela joale kamorao ho lilemo tsa ho khethoa ke Jesu Kreste ka 33 C.E. lekholong la pele la lilemo la Mehla e Tloaelehileng ea rōna? Ha ho motho ea kileng a phela halelele hakaalo, leha e le eena Methuselah ea tsebisahalang.—Gen. 5:27.
11. Kahoo, ho fapana le motho a le mong oa Mokreste, “mohlahlobi” o ne a tšoantšetsa eng, ’me ke setšoantšo sefe sa Mangolo se teng ka pono ee?
11 Lebaka, le tšehelitsoeng ke mehlala e joalo ea Mangolo, le hlakisa hore “mohlahlobi” (oikonómos) o tšoantšetsa sehlopha, ’mele o entsoeng ka litho tse itseng, o lumellanang le mokhatlo oa babueli ba molao o eloang hloko ke molao oa naha. Ka mohlala, Jehova Molimo o ne a bitsa sechaba sohle “mohlanka oa ka eo ke mo khethileng.” (Esa. 43:10) Ka mokhoa o tšoanang, “mohlahlobi o tšoantšetsa “mohlatsoana” oa Baiseraele ba moea, sehlopha se feletseng sa barutuoa ba ineetseng le ba kolobelitsoeng ba “morena,” Jesu Kreste, ba tsoetsoeng ka moea oa Molimo ho ea lefeng la leholimo le “morena” oa bona Jesu Kreste ea tlotlisitsoeng. “Mohlahlobi” enoa ea entsoeng ka litho tse ngata o ne a phela ’me a ka fumaneha bakeng sa ho khethoa ke Morena ea tlohang, le masala a sehlopha seo sa “mohlahlobi” a lefatšeng kajeno ’me a ipaka a tšepahala ho Morena Jesu Kreste. Kaha setho se seng le se seng sea tšepahala ’me se bohlale, ho joalo ka sehlopha kaofela.
12. Morero oa ho khetha “mohlahlobi” oa “bahlanka” e ne e le ofe, ’me na linnete li supa hore na morero ona o ntšelitsoe pele ke sehlopha sa “mohlahlobi” kapa che?
12 Setšoantšong “mohlahlobi” o ile a khethoa holim’a “bahlanka” ba morena oa hae ho “ba nea lijo tsa bona ka nako e tšoanelang.” (Luka 12:42) Ka sehlopha se entsoeng ka litho tse ngata tsa “mohlahlobi” morero ona o phethahalitsoe ho tla fihlela joale. Lekholong la pele la lilemo C.E. ho ne ho le joalo, mehleng ea baapostola ba 12 ba Jesu Kreste ho tla fihlela lefung la oa ho qetela moapostola ea neng a setse a phela, Johanne, ea ileng a tlatsetsa ka lekhetlo la ho qetela Mangolo a Halalelang hoo e ka bang selemong sa 98 C.E. (Joh. 21:20-23) Joale, ‘nakong ena ea bofelo ba tsamaiso ea lintho’ e qalileng selemong se bohloko sa 1914, e tla ba ‘nako e tšoanelang’ ka ho khethehileng bakeng ‘sa lijo tse fanoang ka tšoanelo e lekaneng’ hore li fetisetsoe ho “bahlanka,” ’me ho ipakahalitse ho le joalo. Masala a sehlopha sa “mohlahlobi” a ipakile a tšepahala ntlheng eo.—Matt. 24:3-14.
13. Morena Jesu Kreste o khutlile a hopotse eng ha ho talingoa sehlopha sa “mohlahlobi,” ’me sehlopha sena se ne se ntse se etsa’ng ho tla fihlela ka nako eo?
13 Hona ha fihlellana le ’nete ea hore Morena Jesu Kreste o kene matleng a ’Muso le Ntate oa hae oa leholimo qetellong ea Mehla ea Balichaba ka 1914 ’me kahoo a qetella a fumane seo a neng a tlohile ho ea se fumana. (Luka 19:12) Kahoo o ne a ka khutla a sa bonahale ka sebopeho sa moea, a hopotse hore joale “mohlahlobi” oa hae a tle a ikarabelle. Ho tla fihlela ho ikarabelleng hona ho fanoa ha ‘lijo ka nako e tšoanelang’ ha e-ea ba mosebetsi o monyenyane. Empa litho tsa sehlopha sa “mohlahlobi” li sebelitse hammoho ho abeng “lijo” tsa moea har’a tsona ka ho tsoelang pele ha Jehova Molimo a ntse a biletsa ba bang ho ba majalefa a ’Muso, litho tsa “mohlatsoana.”
HO BEOA “MOALOSI OA MESEBETSI”
14. Ke hobane’ng ha e ne e tla ba nako ea thabo bakeng sa “mohlahlobi” ha morena oa hae a khutla ’me a mo fumana a etsa tšoanelo ea hae joaloka mohlanka?
14 Setšoantšong sa hae sa “mohlahlobi” ea khabane, ea bohlale, Morena, Morena Jesu Kreste, o buile ka eena e le “mohlanka” ’me a re: “Ho lehlohonolo mohlanka eo, etlareng ha morena oa hae a e-tla, a mo fumane a ntse a etsa joalo!” Hobane’ng? Jesu o re: “O tla ’mea moalosi oa mesebetsi ea hae kaofela.”—Luka 12:43, 44.
15. Ke hobane’ng ha ho khethoa ha “mohlahlobi” holim’a “mesebetsi” eohle ea morena oa hae e ne e tla ba phihlelo e mo thabisang?
15 Hona ho bolela hore, e le moputso oa ho iponahatsa a tšepahala, a le bohlale a bile a falimehile kamehla ha a lebelletse ho khutla ha morena oa hae, “mohlanka” o neiloe boikarabelo bo boholoanyane e le “mohlahlobi.” Hona e ne e le ho ka etsahalang, Hobane’ng? Hobane morena o ne a atlehile ho fumana ho hong ka leeto la hae ’me a khutla a na le se fetang seo a neng a e-na le sona pele a tloha. “Mesebetsi” ea hae e ne e ekelitsoe, ’me kahoo ho ne ho le hongata hoo a neng a ka bea “mohlahlobi” ea tšepahalang oa hae holim’a hona. Hore a ’ne a tsoele pele a sebeletsa ofising ea hae “mohlahlobi” ho ne ho tla bontša bohlokoa ba ho sebeletsa tekanyong e kholoanyane. Morena oa hae ka boeena o ne a khutlile a le tekanyong e kholoanyane ho feta eo a neng a iphumane a le ho eona ha a tloha ka morero o itseng. Phethahatsong ena ea kajeno ea setšoantšo hona e bile ’nete mabapi le masala a sehlopha sa “mohlahlobi” le Morena oa hae, Jesu Kreste ea tlotlisitsoeng.
16. Ke mantsoe afe a Jesu, a boletsoeng nakoana kamorao ho setšoantšo a supang hore o ne a etsa setšoantšo sa “mohlahlobi” ka nako e thata?
16 Ke joang, leha ho le joalo, re ka tiisang hore ena e bile nako e tšoanelang bakeng sa masala a sehlopha sa “mohlahlobi” hore se khetheloe “mesebetsi” e eketsehileng, kapa lithahasello, tsa Morena? Litemana tse ’maloa kamor’a setšoantšo, Jesu o itse: “Ke tlile ho lihela mollo lefatšeng, ’me ke sa batla’ng, ha o se o tukile?” (Luka 12:49) Puo ena ea tšoantšetso e tumellanong le seo Johanne Mokolobetsi a neng a hlile a se bolela ka Jesu likhoeli tse seng kae pele Jesu a qala tšebeletso ea hae. Har’a tse ling, Johanne a re: “Ke eena ea tla le kolobetsa ka Moea o Halalelang le ka mollo. Seoloso sa hae [sa ho arola koro ’mookong] se letsohong la hae; o tla fiela seotlo sa hae ruri, a bokelle koro ea hae molikong, mooko oona a o chese mollong o sa timeng.”—Matt. 3:11, 12.
17. Ke bo-mang mehleng ea Jesu ba neng ba tla feta phihlelo ea ‘mollo,’ ka koluoa efe e le sehlohlolo?
17 Mantsoe ao a boprofeta a supa hore bofelo bo tukang ba tsamaiso ea lintho ea Sejode bo ne bo le haufi. Ho tšoana le mooko, Bajode bao e seng Bakreste ba ne ba tla feta phihlelong ea mollo. Hona ho ne ho tla fella ka ho timetsoa ha Jerusalema le ho jaloa hohle ha Bajode ho tloha Palestina ho ea lefatšeng lohle. Makhotla a Roma a bona hore hona hoa etsahala ka 70 C.E.
18, 19. (a) Boprofeteng ba Jesu, ka “pontšo” ea ‘bofelo ba tsamaiso ea lintho’ ke papiso efe eo a ileng a e etsa e lumellanang le setšoantšo sa “mohlahlobi? (b) Na litho tsa sehlopha seo li ipakile li le khabane li le bohlale nakong ea bofelo ba tsamaiso ea Sejode Palestina, ’me masala a sehlopha seo a entse joang nakong ena ea “bofelo ba tsamaiso ea lintho”?
18 Lilemo tse mashome a mararo a metso e supileng pele ho chesoa “mooko” oa tšoantšetso ka “mollo” o sa timeng ka 70 C.E., Jesu Kreste a fana ka boprofeta ba hae bo bolelang ka “pontšo” ea ‘bofelo ba tsamaiso ea lintho’ bo tukang lefatšeng lohle hammoho le pontšo ea ‘boteng’ ba hae bo sa bonahaleng ka moea. Hare feela ho boprofeta boo a bua ka “mohlanka ea khabane, ea bohlale” ea neng a tla ba mosebetsing lefatšeng ha tsamaiso ea lintho e le haufi le ho fela. Lipolelo tsa Jesu ka “mohlanka” enoa li tšoana haholo le tseo tse buang ka “mohlahlobi ea khabane, ea bohlale.” Ka ho hlakileng li sebetsa ho sehlopha se tšoanang, empa lentsoe “mohlahlobi” le tobile haholo ka hore na ke mosebetsi oa mofuta ofe o etsoang ke “mohlanka.”
19 Hlokomela tlhaloso ea Jesu: “Ana ke mang mohlanka ea khabane, ea bohlale, eo morena oa hae a ’meileng moalosi oa bahlanka ba hae ho ba nea lijo nakong ea teng? Ho lehlohonolo mohlanka eo morena oa hae, mohla a fihlang, a tla mo fumana a etsa joalo. Ka ’nete ke re ho lōna: O tla ’mea moalosi oa mesebetsi ea hae kaofela.” (Matt. 24:45-47) Litho tsa sehlopha sa “mohlanka ea khabane ea bohlale,” sehlopha sa “mohlahlobi,” tsa sebeletsa ka masene ho tla fihlela bofelong ba tsamaiso ea Sejode ea lintho ka 70 C.E. Litho tse saletseng tsa sehlopha sa “mohlanka,” sehlopha sa “mohlahlobi,” li ipakile li tšepahala li le bohlale ‘bofelong ba kajeno ba tsamaiso ea lintho’ ho tloha selemong sa 1914 C.E.
20. Bao ba etsang masala a sehlopha sa “mohlahlobi kajeno ba tsebisahala ka baka la ho lumellana le mantsoe afe a Jesu pele a nyolohela Thabeng ea Mehloare ho khutlela leholimong?
20 Masala a sehlopha sa “mohlahlobi” a tsebisahala habonolo kajeno, hobane a lumellana le seo Jesu, Morena, a se boletseng ho ba bopileng sehlopha sa pele sa “mohlahlobi.” Pelenyana a nyoloha a le Thabeng ea Mehloare a khutlela leholimong, Jesu a re ho bona: “Le tla fuoa matla mohla Moea o Halalelang o tlang ho lōna, ’me le tla ba lipaki tsa ka Jerusalema, le naheng eohle ea Judea, le ea Samaria, le ho isa pheletsong ea Lefatše.” (Lik. 1:8) Ka ho ba Lipaki tsa Morena Jesu Kreste barutuoa bao ba Bajode hape ba ne ba lokela ho ba lipaki tsa Molimo oa hae le Ntate, Jehova. Ha ho mohla ba kileng ba khaotsa ho ba lipaki tsa Jehova!
21. Ka tsoalo ea tlhaho barutuoa bao ba Bajode e ne e le lipaki tsa mang, hona e bile litho tsa mathomo tsa “mohlahlobi” ea entšoeng ka litho tse ngata neng?
21 Barutuoa bao ba Bajode ba ne ba tlameha ho ba lipaki tsa Jehova, hobane ka tsoalo e ne e le litho tsa sechaba seo Molimo o neng o itse ho bo-ntat’a bona moholo: “Ke lōna lipaki tsa ka, ho bolela Jehova, le eena mohlanka oa ka eo ka mo khethileng, . . . ka baka leo, le lipaki tsa ka ho bolela Jehova, ke ’na Molimo.” (Esa. 43:10-12) Kahoo lipaki tseo tsa Jehova tsa Bajode joale e ne e tla ba lipaki hape le tsa Mora oa Molimo Jesu Kreste. Ka letsatsi la Pentekonta, matsatsi a 10 hoba a nyolohele hape leholimong, ba kolobetsoa ka moea o halalelang ’me ka tsela ena ba khethoa ke Morena Jesu Kreste oa bona ea tlotlisitsoeng ho hlokomela “bahlanka” ba hae, ho ba nea lijo tsa moea. Ke kamoo e bileng bona litho tsa pele kapa tsa mathomo tsa “mohlahlobi” ea entsoeng ka litho tse ngata. Ba qalisa sehlopha sena hantle.
22. Sehlopha sa “mohlahlobi” e hlile ke batho ba bitsoang ka mang, ’me ’nete e ile ea hatisoa joang sebokeng se khethehileng Jerusalema ka nako e ’ngoe kamorao ho 36 C.E.?
22 Sehlopha sena sa “mohlahlobi” ke batho ba bitsoang ka lebitso la Jehova. ’Nete ena ea hatisoa nakoana kamorao ho selemo sa 36 C.E., sebokeng se khethehileng sa baapostola le baholo ba phutheho ea Jerusalema. Moo Jakobo, ngoan’a bo Jesu Kreste, a re: “Simone [ke hore, moapostola Simone Petrose] o le phetetse kamoo Molimo o qalileng ho etela lichaba [Balichaba ba sa bollang] hore o ikhethele har’a tsona sechaba se khethetsoeng lebitso la oona.”—Lik. 15:1-14.
23. ‘Bofelong bona ba tsamaiso ea lintho’ masala a sehlopha sa “mohlahlobi” a ke ke a balehela ho ba lipaki tsa mang le ho bitsoa ka lebitso la mang?
23 Ba joalo bao e seng Bajode ba fetoha karolo ea sehlopha sa “mohlahlobi” sa lekholong la pele la lilemo. Ka baka leo, sehlopha sena e ne e le batho ba tlotsitsoeng bakeng sa lebitso la Molimo, e leng lebitso leo e leng Jehova. Lebitso la Molimo, Jehova, ba ne ba bitsoa ka lona. Ba ne ba ke ke ba qoba ho ba Lipaki tsa hae. Hona e tlameha ho ba ’nete ka masala a tlotsitsoeng a sehlopha sa “mohlahlobi” sa kajeno, ha “pontšo” e bonahetseng ho tloha ka 1914 e supa hore morena ea khutlileng oa sehlopha sa “mohlahlobi” o teng le hore ‘bofelo ba tsamaiso ea lintho’ bo tloha bo fihla tlhorong ea bona ea Harmagedone.—Matt. 24:3.
“Morena” oa setšoantšo sa Jesu sa “mohlahlobi ea khabane” ke mang?
◼ “Mohlahlobi ea khabane” ke mang?
◼ “Bahlanka” ke bo-mang?
◼ “Ho Ba-Heberu 3:6, “ntlo” eo Kreste a beoang holim’a eona ke efe?
◼ Ke hobane’ng ha “mohlahlobi ea khabane” e ke ke ea e-ba motho a le mong?
◼ Na “mohlahlobi ea khabane” ke ntho e le ’ngoe le “mohlanka ea khabane”?
◼ Ke mosebetsi ofe oo “mohlahlobi” ea khabane a o etellelitseng pele e le sehlopha o etsang hore se tsebahale habonolo kajeno?
[Setšoantšo se leqepheng la 17]
“Eaba Petrose o re ho eena: Morena, setšoantšo seo hleka u se bolella rōna feela, kapa u se bolella le bohle na? Morena a re: Mohlahlobi ke ofe ea khabane, ea bohlale?”—Luka 12:41, 42a.