“A re Beng Sebete”

1. Na ho sa na le lintho tse ling tseo re ka ithutang tsona ka sebete?

MOTHATING oo, na ho sa na le letho leo re ka le buang ka ho ba sebete? E. Taba ea pele, hlokomela hore Bibele e bua ka lintho tse ngata haholo ka taba ena ea bohlokoa ho feta tseo re seng re buile ka tsona bukeng ena e le ’ngoe. Taba ea bobeli, re lokela ho hatisa hore na ho hlokahala eng e le hore re rue molemo o feletseng ho seo re ithutang sona ka sebete ka Bibeleng.

2. Ke bahlanka bafe ba bang ba tšepahalang ba Molimo ba ileng ba bontša hore ba sebete?

² Na u ka nahana ka batho ba bang ba hlahang ka Bibeleng ba ileng ba bontša sebete, ntle le bao re seng re buile ka bona? Mohlomong u nahanne ka ba bang ba baprofeta ba behileng mohlala o motle ba hlahang ka Mangolong a Seheberu, ba kang Esaia, Jeremia, Ezekiele, Jonase, kapa Malakia. E tlameha ebe moapostola Pauluse o ne a bua ka batho ba kang bona ha a ne a ngola mantsoe ana a susumetsoa ke moea o halalelang, a re: “Ba bang ba ile ba lekoa ka ho songoa, ho shapuoa, ho fasoa ka liketane le ho lahleloa literonkong.” A boela a re, ba bang ba ne “ba le matšoenyehong, ba tšoaroa hampe.” Ha ba bang bona ba ile ba bolaoa. (Baheb. 11:​36, 37) Leha ho le joalo, ka sebete ba ile ba emela Jehova Molimo.

3, 4. Basali ba babeli ba sa boleloang ka mabitso ka Bibeleng ba ile ba thusa Morena Davida joang nakong e kotsi?

³ Ho na le batho ba bangata ba sebete ba hlahang ka Bibeleng empa ba sa boleloa ka mabitso. Nahana ka mohlala oa basali ba babeli ba mehleng ea Morena Davida. Ba ile ba mo thusa nakong eo mora oa hae, Absalome, ea neng a le khopo a bile a ikhohomosa a leka ho ketola puso ea hae. Absalome o ile a qobella Davida hore a balehele Jerusalema. Ha Davida a se a balehile, o ile a kopa hore moprista Tsadoke ea sebete, a khutlele Jerusalema ’me a lule moo e le hore a khone ho mo fumanela boitsebiso ba lintho tseo Absalome a neng a rera ho li etsa. Tsadoke o ne a lokela ho romella Davida litaba tseo a neng a tla li fumana. Ngoanana e mong oa mosebeletsi ea sa boleloang ka lebitso, o ile a beha bophelo ba hae kotsing ha a ne a bolella bahlanka ba babeli ba Davida molaetsa o tsoang ho moprista Tsadoke. Ka mor’a hore a bolelle bahlanka bao molaetsa, ba ile ba ea ho Davida, empa ba ile ba bonoa ke mohlanka e mong ea neng a sebeletsa Absalome. O ile a bolella Absalome hore o ba bone, empa ka bohlale bahlanka bao ba ile ba ipata ka har’a seliba. Mosali e mong hape ea sa boleloang ka lebitso, eo e neng e le mohatsa oa mong’a seliba seo, o ile a se koahela ka lesela ka potlako a ba a tšela koro holim’a lona. Ha banna ba Absalome ba fihla ho eena ’me ba mo botsa hore na bahlanka bao ba babeli ba hokae, o ile a ba thetsa. Basali bao ba babeli ba tšepahalang ba ile ba sireletsa morena eo Jehova a mo khethileng!—2 Sam. 15:​23-37; 17:​8-22.

⁴ Bibele e na le mehlala e mengata ea banna le basali ba sebete. Ba bang ba boletsoe ka mabitso empa ba bang ha baa boleloa. Ba bang ba ne ba ruile, ba bang ba futsanehile. Ba bang e ne e le ba hlaheletseng ha ba bang e ne e le batho feela tjee. Kaofela ha bona ba ile ba e-ba sebete ’me ba ema ka lehlakoreng la Jehova. Lipale tsa bona li ka re thusa mehleng ena.

Bohlokoa ba Thapelo

5-7. Ke eng e ileng ea thusa Pauluse hore a be le sebete sa ho mamella ha a ne a hlorisoa?

⁵ Re ka etsisa mehlala ea banna le basali ba sebete ba hlahang ka Bibeleng joang? Re lokela ho utloisisa hore ba bang ba batho bana ba ne ba se sebete ka tlhaho. Lintho tseo ba neng ba li etsa ha ba sebeletsa Jehova, ba ne ba sa li etse ka matla a bona. Ho na le ntho e neng e ba thusa. Ebe ba ne ba thusoa ke eng?

⁶ Hopola moapostola Pauluse. Ha a ne a le motseng oa Filipi le Silase, ba ile ba hlaseloa ke letšoele la batho ba halefileng, ba ileng ba ba tabolela liaparo, ba ba otla ka melamu eaba ba ba lahlela teronkong e lefifi, ba faselelitse maoto a bona likoqong tse kholo tsa patsi. (Lik. 16:​12, 19-24) Na Pauluse o ne a tla tšaba ho bolela ka mor’a hore a lokolloe? Ka botho, o ne a ka ’na a tšaba. Leha ho le joalo, ho na le kabelo e ’ngoe eo Jehova a neng a batla hore Pauluse a e phethe. O ne a batla hore a ee motseng oa Thesalonika ho ea bolela teng. Pauluse o ile a fumana matla le sebete seo a neng a se hloka joang?

⁷ Hamorao o ile a ngola mantsoe a reng: “Lea tseba hore re ile ra hlokofatsoa le ho tšoaroa hampe ha re le Filipi. Leha ho le joalo, Molimo o ile a re fa sebete sa ho le bolella litaba tse monate tse tsoang ho eena le hoja re ne re hanyetsoa haholo.” (1 Bathes. 2:2) Pauluse o ne a tseba hore o hloka sebete e le hore a etse mosebetsi oo Molimo a neng a mo laetse hore a o etse. Empa o ne a tla fumana sebete seo hokae? Na o ne a e-na le matla a itseng a khethehileng a mo thusang hore a be sebete? Che, ‘Molimo o ile a mo fa sebete.’ Ka boikokobetso, o ile a rapela Jehova a mo kopa hore a mo fe sebete seo a se hlokang ’me Jehova o ile a mo araba.

8. Re ka etsisa mohlala oa Pauluse joang e le hore re be sebete?

⁸ U ka etsa seo Pauluse a ileng a se etsa. U se ke oa tšoenyeha ka hore u ke ke oa khona ho ba sebete hobane u se na matla a itseng a khethehileng. Uena ikele ho Jehova Molimo, u mo rapele ’me u mo kope hore a u fe sebete seo u se hlokang.—Lik. 4:29.

9. Ke hobane’ng ha re lokela ho kopa hore Ntate oa rona Jehova, a re fe tumelo e matla?

⁹ U ka boela oa kopa Ntate oa hao Jehova, hore a u fe tšobotsi e ’ngoe e amanang haufi-ufi le sebete, e leng tumelo. Tumelo ke e ’ngoe ea litholoana tse tlisoang ke moea o halalelang oa Jehova. (Bagal. 5:​22, 23) Hape ke karolo ea lihlomo tsa moea tseo Mokreste e mong le e mong a li hlokang. (Baef. 6:16) Tumelo e matla hoo Bibele e reng ‘e re thusa ho hlola lefatše.’ (1 Joh. 5:4) Ha re e-na le tumelo ho Jehova, e tla re thusa ho ba sebete. Hape ha re kholisehile ka pelo eohle hore Jehova o tla re thusa ha re mo hloka, re tla ba sebete le ho feta. Kahoo, Mokreste e mong le e mong o lokela ho kopa ntho eo baapostola ba Jesu ba ileng ba e kopa ha ba ne ba re: “Re thuse ho ba le tumelo e matla.”—Luka 17:5.

“Le be Sebete”

10, 11. Ke hobane’ng ha Pauluse a ile a hatisa bohlokoa ba ho ba sebete ha a ne a ngolla Bakreste ba Baheberu?

¹⁰ Ha Pauluse a ngolla Bakreste ba Baheberu ba neng ba lula Jerusalema le metseng e haufi le eona, o ne a tseba hore haufinyane ba ne ba tla tobana le linako tse thata. Jesu o ne a ile a bolela esale pele hore motse oo o ne o tla felisoa ’me nako eo e ne e atamela ka potlako. (Luka 19:​41-44; 21:​20-24) Pauluse o ile a ba thusa joang hore ba hopole bohlokoa ba ho ba sebete? A re khutleleng mantsoeng a hae a qotsitsoeng Selelekeleng sa buka ena. Moo, o ile a bua ka tšepiso ea Jehova e lerato e reng: “Ho hang nke ke ka u tlohela kapa ka u furalla.” Tšepiso ee e ne e tla ba thusa joang? Pauluse o ile a re: “Ka hona, a re beng sebete ’me re re: ‘Nke ke ka tšoha letho hobane Jehova ke mothusi oa ka. Motho a ka nketsa’ng?’”—Baheb. 13:​5, 6.

¹¹ Le hoja Bibele e sa fane ka lintlha tsa hore na Jerusalema e ile ea timetsoa joang ka selemo sa 70, re kholisehile hore Bakreste ba tšepahalang ba neng ba le motseng oo ba ile ba mamela keletso ea Pauluse. Ba ile ba e-ba sebete eaba ba mamela taelo ea Jesu ea hore “ba balehele lithabeng” hantle ka nako e loketseng.—Luka 21:​20, 21.

12. (a) Ke eng e ka u thusang hore u be sebete ha u tobana le mathata? (b) Batho ba bang ba bontšitse joang hore ba sebete matsatsing aa a ho qetela, hona u ikemiselitse ho etsa eng? (Sheba lebokose le reng “E-ba Sebete Joaloka Bona.”)

¹² Le uena Jehova a ka u fa sebete ha u tobana le mathata hona joale le nakong e tlang. (Ezek. 38:​1, 2, 10-12; Mat. 24:21) Lula u hopola hore Jehova o tšepisitse ho re sireletsa. (Ezek. 38:​19-23; 2 Bathes. 3:3) Le ka mohla, a ke ke a lahla batho ba mo ratang le ba nang le tumelo ho eena. Seo Jehova a se buileng ho Joshua le uena sea u ama. U ka ‘ba sebete ’me oa ba matla haholo.’ (Josh. 1:​7, 9, 18) Lula u hopola mantsoe a mofuthu a Jesu a reng: “Le be sebete.” O tla phethahatsa tšepiso ea hae ea ho u fa moea o halalelang oa Jehova, e le hore u be le sebete sa ho hlola teko leha e le efe eo u ka kopanang le eona. (Joh. 14:26; 15:​26, 27; 16:33) Kahoo, kholiseha hore u ka ‘ba sebete’!

13. Ke eng e u susumetsang hore u bontše sebete mehleng ee?

¹³ Ak’u nahane hore na ho tla ba joang ha ho se ho rena khotso lefatšeng lohle, ’me re thabela ho bona batho bohle ba mohopolong oa Jehova ba se ba tsositsoe. Ipone u se u kopana le banna le basali ba sebete bao re buileng ka bona bukeng ena le ba bang ba bangata! Na u nahana hore ho na le ea mong oa bona ea tla ikoahlaela hore ebe o ile a khetha ho sebeletsa Jehova ka sebete lefatšeng la Satane, le haeba a ile a tlameha ho tela bophelo ba hae? Le letho! Na uena u tla ikoahlaea? Ha u ntse u sebetsa ’moho le bona ho etsa lefatše paradeise, na u tla ikoahlaela hore ebe u ile oa bontša hore u rata Jehova le hore u ile oa bontša sebete matsatsing aa a ho qetela? Ho hang! Kahoo, ikemisetse ho lula u le sebete ho fihlela qetellong. Le ka mohla u ke ke oa ikoahlaea!