Na Molimo oa u Tsotella?
“NENG le neng ha ke inahana ka boiphahamiso, ke ee ke inahane ka matla, kamoo ho leng kateng, ebe ke re: ‘Lerōlenyana tooe. Ekaba ke eng eo u ka ikhohomosang ka eona.’”
Polelo eo, e ileng ea etsoa ke mohlanka oa Mokreste lilemong tsa ho feta, e ile ea bontša tšoaneleho e hlokomelehang haholo—boikokobetso. ’Me tšoaneleho eo ke e lakatsehang e le kannete, hobane “moputso oa boikokobetso le oa ho tšaba Jehova ke leruo, le khanya, le bophelo.”—Liprov. 22:4.
Ha re nahana ka boholo ba bokahohle le lihloliloeng tsa bona tse khanyang tse likete-tsa-likete, re hlokomela hore baahi ba lefatše lena ke nthoana e fokolang ’me ruri ba na le lebaka la ho ikokobetsa. Hase ntle ho lebaka ho ileng ha boleloa hore batho ke feela ‘lerōlenyana’ bokahohleng.
Empa na hona ho bolela hore Ea Holimolimo o phahame haholo ka ho fetisisa hore a ka ameha ka batho naletsaneng ee e nyenyane? Ka sebele, na Molimo o hlile oa u tsotella?
HO THOE’NG KA LEFATŠE?
Ke ’nete, lefatše le lenyenyane haholo sepakapakeng ha ho bapisoa. Leha ho le joalo, na ke lerōlenyana feela le sa reng letho? E seng ho Molimo, hobane o re: “Leholimo ke terone ea ka, ’me lefatše ke bonamelo ba maoto a ka.” (Esa. 66:1) Kannete, “bonamelo ba maoto” bo joalo ba tšoantšetso bo sebelisoang ke Ea Holimolimo hase ‘lerōlenyana’ feela le sa reng letho.
Bonneteng, Jehova o na le lintho tse kholo tseo a li hopotseng bakeng sa “bonamelo ba maoto” a hae, lefatše. Ka letsatsi le leng e tla ba sebaka sa botle ba paradeise, lehae le letle bakeng sa batho ba baikokobetsi. (Esa. 45:18; Luka 23:43) Kahoo, le hoja liithuti tsa Bibele li lumela hore lefatše le lenyenyane, li hlokomela hore le bōpiloe ke Jehova Molimo le hore ke la bohlokoa ho eena.—Gen. 1:1.
‘MOTHO KE ENG?’
Ponong ea Molimo, he, lefatše hase ‘lerōlenyana’ le sa reng letho le bokahohleng. Empa batho bona ho thoe’ng ka bona?
A khahliloe haholo ka mesebetsi ea leholimo ea Molimo, mopesaleme ea bululetsoeng Davida o ile a botsa, a re: “Ha ke boha leholimo la hao, mosebetsi oa menoana ea hao, khoeli le linaleli tseo u li bōpileng, ke re: Na motho ke’ng ha u tla mo hlokomela?” (Pes. 8:3, 4) Ke ’nete, ha re nahana ka hore na re sebakeng sefe bokahohleng, re lokela ho ikokobetsa. Motho, ea bōpiloeng a le tlase ho mangeloi, kamoo ho bonahalang o ne a ke ke a lokeloa ke hore Jehova a mo nahane. Leha ho le joalo potso ea mopesaleme e bontša hore Molimo o hlile o tsotella batho.
Nahana: Davida o ile a botsa, ka bonnete: “Motho ke’ng, ha u tla mo hopola, le mor’a motho ke’ng ha u tla mo hlokomela?” Ka ho hlakileng, he, Molimo o lula o hopotse motho. Ea Holimo-limo o hlokomela motho. Ho e-na le hore a sebetse batho joaloka ‘lerōlenyana,” Molimo o lumella letsatsi hore le khanye le hore pula e nele ba lokileng le ba sa lokang. (Matt. 5:45) Bonneteng, meloko ea batho ka ho latellana ha eona e na le lebaka la ho leboha Molimo hore ha a ea e lebala, hobane o ba neile ‘lipula tsa leholimo le lilemo tsa nala.’—Lik. 14:16, 17.
Jehova Molimo o hlile o tsotella lelapa la motho. Hona ke eng se ka mo sitisang ho tsotella? Rea bolelloa mangolong hore: “Eaba Molimo o etsa motho ka setšoantšo sa oona; oa mo etsa ka setšoantšo sa Molimo, oa mo etsa e le e motona le e motšehali.” (Gen. 1:27) Kaha Molimo ke “Moea,” ha ho teng ho tšoana ha ’mele pakeng tsa Molimo le motho. (Joh. 4:24) Leha ho le joalo, motho o na le litšoaneleho tseo tse bonahatsang tsa Moetsi oa hae oa leholimo, litšoaneleho tseo ka ho tiileng li khethollang motho pōpong ea liphoofolo. Ka mohlala, ho tšoana le Molimo, motho o na le litšoaneleho tse khōlō tsa lerato, toka, bohlale le matla. (1 Joh. 4:8; Deut. 32:4; Jobo 12:13; Esa. 40:26) Kahoo batho ke ba bohlokoa ho ’Mōpi.
Haeba motho a ne a ka talima le ho tšoara motho ea kang eena e le ‘lerōlenyana’ le sa reng letho, ha e le hantle, o tla be a loantša ’Mōpi oa batho. Ka ho loketseng, rea bolelloa ka Lentsoeng la Molimo hore: “Ea tšehang mofutsana o soma Ea ’mōpileng.” (Liprov. 17:5) Hape, ho Liproverbia 14:31 rea bala: “Ea tubang mofutsana o nyelisa ’Mōpi oa hae; empa ea molemo ho mofumanehi oa mo rorisa,” ke hore, Jehova Molimo.
Ha e le hantle, motho ea nyelisang mofutsana kapa a mo sebetsa ka tello o nyefola Moetsi oa motho. Ha e le hantle, borapeli ba rōna bo ka bolela ho honyenyane haeba re nyefola ba bang. (Jak. 3:17) Kahoo, re lokela ho bontša ho hlonepha batho ba kang rōna, joalokaha Jehova a etsa joalo. Empa potso eona e sala e eme:
MOLIMO O TSOTELLA HAKAE?
Ponong ea bokahohleng, lefatše le motho li nyenyane haholo. ’Me, ka sebele, bonyenyane ba motho bo totobala ha a bapisoa le ’Mōpi oa hae. Ho le joalo, sebe se futsitsoeng le ho se phethahale li ne li tla sia batho ba le boemong bo se nang thuso haeba Molimo a ne a hlile a sa tsotelle motho.—Ba-Roma 5:12.
Empa Jehova Molimo o hlile oa tsotella! “Molimo o ratile lefatše hakalo,” kamoo Jesu Kreste a boletseng, “o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.” ’Me tokisetso ena ke ea botho haholo, hobane moapostola Johanne o ngolile hore: “Ea lumelang ho Mora, o na le bophelo bo sa feleng; ’me ea sa lumeleng ho Mora, a ke ke a bona bophelo, empa bohale ba Molimo bo sala holim’a hae.”—Joh. 3:16, 36.
Na hona ho bolela hore Molimo o chesehela ho timetsa batho ba baetsalibe? Che ka sebele! Hobane moapostola oa Mokreste Petrose o ile a bolela hore Jehova “ha a rate ha ba bang ba ka timela, empa o rata hore bohle ba finyelle pakong” ka tebello ea bophelo bo sa feleng tsamaisong ea oona e ncha ea lintho eo o e tšepisitseng. (2 Pet. 3:9, 13) Moapostola eena eo o ile a boela a supa hore Molimo o amehile ka motho ka mong, hobane o ile a bolela hore: “Ke lemoha ka ’nete hore Molimo ha o ee ka tšobotsi ea batho. Empa har’a lichaba tsohle, ea o tšabang, le ea etsang ho lokileng, ke eena ea o khahlisang.”—Lik. 10:34, 35.
Ka hona Jehova o fela a tsotella batho—e le motho ka mong. O tla boloka le ho hlohonolofatsa bohle ba ratang mosa le ba tsamaeang le eena ka boikokobetso. (Mik. 6:8) Ka baka leo, hlaolela kamano e haufi ea botho le ’Mōpi oa hao, hobane Molimo o fela o u tsotella.