Na Tumelo e ka u Fumantša Molemo?

HORE ho tle ho arabeloe potso ena ka nepo, pele re tlameha ho hlahloba potso e ’ngoe: Tumelo ea ’nete ke eng? Le hoja e ka ’na ea bonahala e makatsa, maikutlo a tloaelehileng ka “tumelo” a fapane haholo le se rutoang ke Bibele. Buka e tsebisahalang haholo e hlalosang mantsoe e fapoha hole litabeng ha e hlalosa tumelo e le “ho lumela lithuto tsa neano tsa bolumeli” hape e le “tumelo e tiileng nthong e ’ngoe e se nang bopaki.” Ho joalo hobane’ng?

Tabeng ea pele, lithuto tsa neano tsa bolumeli hase kamehla ho etsahalang hore e be thuto ea ’nete. Jesu o bontšitse sena ha a bua ka lineano tsa bangoli le Bafarisi ka mantsoe ana: “Le lōna, le tlolela’ng molao oa Molimo ka mokhoa oo le o neanang? . . . Baikaketsi, Esaia o na a profete tsa lōna hantle, ha a itse: Sechaba sena se ntlhonepha ka molomo feela; empa pelo tsa bona li hole le ’na. Ba nkhumamella lefeela, ha ba ruta lithuto tseo e leng melao ea batho.” (Matt. 15:3-9) E ne e le baeta-pele ba “moloko o sa lumelang, o khopo” o ileng oa bontša ho haelloa ha oona ke tumelo ka ho bolaea Messia ea neng a tšepisitsoe ke Molimo, “Moemeli e Moholo oa bophelo” oa oona.—Matt. 17:17; Lik. 2:40; 3:15, NW.

Ho feta moo, “tumelo e tiileng nthong e ’ngoe e se nang bopaki” ke se fapaneng hantle le tumelo ea ’nete. Koana, mohlomong buka e hlalosang mantsoe e ka ’na eaba e supa bopaki bo bonahalang. Empa, moo bopaki bo leng sieo ho hang, tumelo e joalo ke ka nepo e hlalosoang e le tumelakhoela. E hanana le tlhaloso ea Bibele ea tumelo, joalokaha e fanoa ho Ba-Heberu 11:1: “Tumelo ke tšepiso e tiileng ea lintho tse lebeletsoeng, ke pontšo e kholisang ea [linnete le hoja li e-so ho bonoe.]” (bapisa le NW) Hlokomela hore tumelo e amana le lintho tsa sebele, lintho tse nang le tiiso tse nang le pontšo ea bonnete ba tsona. Tumelo e na le metheo e tiileng ho feta eohle, e theiloe holim’a bopaki bo bongata.

MOTHEO BAKENG SA TUMELO EA RŌNA

Ho le leng la mangolo a hae, moapostola Pauluse o fana ka lebaka le matla la ho lumela. Ho Ba-Roma 1:20 o re bolella hore “Tse sa bonoeng tsa oona [Molimo], e leng matla a oona a ka mehla le bomolimo ba oona, li bonahala haholo, ha e sa le lintho li hloloa, ha ho lemohuoa mesebetsi ea oona.” Ena ke meeka eo re e bonang ka mahlo a rōna—leholimo le linaleli, pōpo e leka-lekanang ka ho babatsehang e lefatšeng, lintle tsa “tlhaho,” kamoo li boleloang, tseo ho tsona ho totobetseng lerato le bohlale tsa moqapi e Moholo. Ho nahanisisa ka lihloliloeng tsena ho lokela ho thusa ho haha ka ho rōna tumelo e kang e ileng ea boleloa ho Pesaleme ea 104:24: “Jehova, mesebetsi ea hao e mengata hakaakang! U e entse kaofela ka bohlale.” Ena hase tumelo “e se nang bopaki.”

Leha ho le joalo, tumelo ea rōna ho Molimo ha e khaotse ka ho lumela hore o teng le ka ho ananela likhanya tsa pōpo ea oona. E fetela tokelong ea rōna ea ho kena kamanong e hlohonolofetseng ka ho fetisisa ea botho le Molimo ona le ’Mōpi. Ekare ha re o batla, re tla o fumana, le hoja, “a se hole ho e mong le e mong oa rōna.” (Lik. 17:24-27) Ho fumana ha rōna le ho tseba Molimo ho ka re khotsofatsa le ho re thabisa bophelong ka mokhoa o fetang phihlelo leha e le efe e ’ngoe ea botho. Ho mo khahlisa ho ka tlisa meputso e meholo ka ho fetisisa. ’Me hona ho ka fumaneha feela ka tumelo. Joalokaha moapostola a ngola: “Empa tumelo ha e le sieo, ha ho kamoo Molimo o ka khahlisoang; ea atamelang Molimo e ka khona a lumele hobane o teng, le hoba ke oona moputsi oa ba o batlang.”—Ba-Heb. 11:6.

NTATE EA TSOTELLANG

Molimo oa rōna le ’Mōpi ke ntate ea molemo ho feta bo-ntate bohle. Ho moprofeta Moshe, o itlhalositse e le: “Jehova, Jehova, Molimo o mohau, o lereko, o liehang ho halefa, o tletseng mohau le ’nete, o hauhelang meloko e likete, o tšoarelang motho bokhopo le boikhantšo le sebe, o sa latoleng molato oa motho ea nang le oona.” (Ex. 34:6, 7) Na re ka nahana hore Molimo o nkang boleng bo nang le litšoaneleho tse phahameng joalo a ka hlōleha ho phethahatsa lipallo tsa hae ho libopuoa tsa hae tse batho tse mona lefatšeng? Le hanyenyane! Le eena ntate ea sa phethahalang ha a tšepisa bana ba hae ntho e ’ngoe, ka tieo o tla latela hore a fetole mpho eo a neng a e tšepisitse ntho ea sebele. Ho joalo haholo hakaakang ka Ntate oa leholimo oa batho! Joalokaha Jesu a ile a bolella bamameli ba hae Thutong ea hae ea Thabeng, a re: “’Me lōna, ba lonya, ha le tseba ho nea bana ba lōna ntho tse molemo, Ntat’a lōna ea maholimong o tla fetisa hakakang ka ho nea ba kōpang ho eena tse molemo!” (Matt. 7:11) Re ka ba le tumelo e tiileng ea hore lipallo tsohle tsa Molimo li tla fetoha ’nete ka nako ea oona e molemo le ka tsela ea oona.—Josh. 23:14.

Empa lipallo tseo ke life? Hase feela lipallo tsa nakong e fetileng. Ho e-na le hoo, lipallo tsa Molimo mabapi le molemo oo Molimo o tlang ho o etsetsa batho bohle li ’nile tsa pheta-phetoa, tsa phetoa-phetoa le ho phetoa-phetoa ka nako e fetang lilemo tsa 4 000. Li ke ke tsa bapisoa le lipallo tsa mapolotiki, a bolelang hore a tla etsa ntho e ’ngoe ’me qetellong a etse ntho e ’ngoe esele. Lipallo tsa Molimo lia tšepahala. Ruri li tla phethahatsoa, kaha li fanoa ka lebitso la oona leo ho seng le lekanang le lona, Jehova. ’Me tabeng ea e ’ngoe ea lipallo tsa ona tsa khale haholo, o bile a e tiisa ka kano ea oona. “Molimo, mohla o ratileng ho kholisisa majalefa a pallo hoba morero oa oona ha o na ho fetoha, o kile oa kenya kano.”—Ba-Heb. 6:17.

TUMELO LIPALLONG TSA MOLIMO

Ho Baheberu khaolo ea 11 bukeng ea Bibele, lipallo tsa Molimo li lohelletsoe ka ho sa arohaneng le sehlooho sa tumelo. Monna oa pele oa tumelo paleng ea Bibele, Abele, ka ho totobetseng o tsebile ka pallo ea Molimo e tlalehiloeng ho Genese 3:15 mabapi le “peō”—ngoana ea ileng a ipaka e le ea hlahisitsoeng har’a phutheho ea Molimo ea mangeloi a maholimo—ea neng a tla felisa mesebetsi ea “noha ea khale, e bitsoang Diabolose le Satane.” (Tšen. 12:9) Abele o ile a nyehela sehlabelo se nonneng sa “matsibolo a mohlape oa hae,” ka ho loketseng o ne a tšoantšetsa sehlabelo seo “peō” e tšepisitsoeng “Konyana ea Molimo,” e neng e tla se etsa lilemong tse tlang tse neng li ka ba 4 000 hamorao, e le hore ho ka lopolloa batho sebeng le lefung. Kahoo, “ka tumelo, Abele o hlahisitse pel’a Molimo sehlabelo se fetisang sa Kaine.”—Gen. 4:4; Joh. 1:29; Ba-Heb. 11:4.

Joale, ho bile teng Henoke, eo le eena a ileng a phela mehleng ea pele ho Moroallo. “Ka tumelo, Henoke o nkiloe hore a se ke a bona lefu.” E seng ka hore a se ke a shoa, hobane ho 1 Ba-Korinthe 15:22 Pauluse o ngolile hore: ‘Bohle ba shoa ka Adama.’ Empa Molimo ha o-oa ka oa mo lumella hore a utloe bohloko ba lefu. Ka ho totobetseng, tumelo ea Henoke e ne e theiloe tsebong ea lipallo tsa Molimo, hobane o ne a tseba ka kahlolo ea makhotla a Molimo a mangeloi a neng a tla e phethahatsa ka nako e loketseng ho tlosa batho bohle ba khopo lefatšeng lena. Ke kahoo Henoke a ileng a profeta hore: “Bonang, Morena o tlile le bahalaleli ba hae ba likete-kete ho etsa kahlolo holim’a bohle, le ho khalemela banyefoli bohle ka baka la liketso tsohle tsa bonyefoli, tseo ba sitiloeng ka tsona, le la lipolelo tsohle tse thata, tseo baetsalibe bao ba banyefoli ba li buileng holim’a hae.” (Ba-Heb. 11:5; Gen. 5:21-24; Juda 14, 15) Ho tšoana le Henoke, le rōna kajeno re ka lumela lipallo tsa Molimo hore o tla tlosa bokhopo bohle lefatšeng.

Phihlelo ea ’nete bophelong ea monna e mong oa tumelo e hatisa bonnete ba pallo ea Molimo. Monna eo e ne e le Noe, eo mabapi le eena ho ngoliloeng: “Ka tumelo, Noe, eitse hobane a tsebisoe ke Molimo tse e-song ho bonahale, o kile a tšaba Molimo, ’me a haha areka ho pholosa ba ntlo ea hae ’me ka tumelo eo o tsoile lefatše, le hona a etsoa mojalefa oa ho loka ho leng ka tumelo.” (Ba-Heb. 11:7) Ka mokhoa o tšoanang, ba sebeletsang Jehova Molimo ka tumelo kajeno ba ema e le bopaki bo tiileng ho tsoa lefatše le khopo. ’Me tumelo ea bona e sebakeng se loketseng. Hobane na “Mor’a Molimo,” Jesu Kreste, ha a ka a bapisa le moroallo ha a profeta mabapi le ‘bofelo ba tsamaiso ea lintho’? O itse: “Ha e le letsatsi leo le hora eo, ha ho ea tsebang; esita le mangeloi a leholimo ha a tsebe, leha e le Mora; empa ho tseba Ntate a ’notši. Empa joale ka ha ho bile mehleng ea Noe, le ho tleng ha Mor’a motho ho tla ba joalo. Hobane joale ka mehleng e bileng teng pele ho moroallo oa metsi, ha batho ba ne ba e-ja, ba e-noa, ba nyala, ba nyalisa, ha ba ha fihla tsatsi leo Noe a keneng arekeng ka lona; ha ba ka ba lemoha, ha ba ha fihla moroallo, ’me ba nkoa bohle ke oona: ho tla ba joalo le ho tleng ha Mor’a motho.” (Matt. 24:36-39) Empa na tumelo ea rōna ha e akarelletse ho fetang feela ho lebella hore ‘tsamaiso ea kajeno e khopo ea lintho’ e tla felisoa lefatšeng? Ho joalo ka sebele.

HO KHETHOLLA “PEŌ” EA PALLO

Lentsoe “tumelo” le hlaha ka lekhetlo la pele ka Bibeleng mabapi le Abrahama, ea ileng a phela lilemo tse 2 000 kamorao ho Abele. Abrahama a “lumela ho Jehova, ’me Jehova a ’malla ho lumela ha hae hore ke ho loka.” (Gen. 15:6) Abele, Henoke, le Noe ba ne ba lumetse pallo ea Jehova ea “peō” e neng e tla phethahatsa kahlolo holim’a lira tsa Molimo, empa ho Abrahama, Jehova a fana ka pallo e atolohileng. Hona ho etsahala kamor’a hore tumelo ea hae e lekoe ke Jehova ka hore na o itella ho fana ka mora oa hae ea tsoetsoeng a le mong, Isaka, hore e be sehlabelo. Eaba Molimo o re: “Ke tla u hlohonolofatsa, ’me ho atiseng ke tla atisa moloko oa hao, o be ka ka linaleli tsa maholimo, le lehlabathe le lebopong la leoatle, ’me moloko oa hao o tla rua likhoro tsa lira tsa oona. Lichaba tsohle tsa lefatše li tla itlhohonolofatsa lelokong la hao, ka baka la hobane u mametse lentsoe la ka.”—Gen. 22:1-18.

Kahoo, ho hlohonolofatsoa ha batho bohle ba lefatše ho tlameha ho tla ka “peō” ea Abrahama. Joale “peō” eo ke mang? Moapostola Pauluse o-oa arabela: “’Me joale, lipallo li etselitsoe Abrahama le leloko la hae; . . . le ho leloko la hao, e leng Kreste.”—Ba-Gal. 3:16.

Ke ka mokhoa ofe, he, Kreste a hlohonolofatsang batho ba lichaba tsohle? Ke ka “motse” oa ’muso. Ka tumelo, Abrahama o ne a lebelletse motse oo o tšepisitsoeng: “O na a lebeletse motse o nang le motheo, oo Molimo e leng mohahi le mothei oa oona.” (Ba-Heb. 11:10) Ona ke motse oa leholimo, oo “Konyana” Kreste Jesu, a beiloeng teroneng e le morena. ’Me o na le balekane har’a batho ba tšepahalang, ba tsositsoeng bafung, ba tlang ho busa le eena e le ‘marena holim’a lefatše.’ (Tšen. 5:9-12) Hopola, Abrahama o ile a phela lilemo tse ka bang 2 000 pele Kreste a hlaha e le “peo” e tšepisitsoeng, leha ho le joalo tumelo ea hae pallong eo e ne e sa sisinyehe. Tumelo ea hao, le uena e ka ba ea sebele—e tiileng joaloka tumelo ea Abrahama pallong ea Molimo.—Ba-Roma 4:20-22.

TUMELO HA E SOABISE

Ho tla fihlela kajeno, lefatšeng ho bile teng ba tšepahalang ba latelang mehatong ea Kreste Jesu, ’me ka bana Jesu ka boeena o re: “Ke tseba mesebetsi ea hao, le lerato la hao, le tšebeletso ea hao, le tumelo ea hao, le mamello ea hao.” Ka baka la ho hlōla ha bona ka tumelo ba amohela moputso oa maholimong. (Tšen. 2:19, 26-28) Ho feta moo, ho tloha bohareng ba bo-1930 “mesebetsi” ea bona e tšepahalang ho pakeng mabapi le lebitso la Jehova le ’muso li felletse ka ho bokelloa ha “bongata bo boholo ba batho, bao ho seng motho ea ka tsebang ho bo bala, ba lichaba tsohle, le ba mefuta eohle, le ba merabe eohle, le ba lipuo tsohle, ba eme pel’a terone le pel’a Konyana [ea ka sehloohong oa Peō ea pallo, Jesu Kreste].” Ka baka la hore ba lumela matleng a lopollang a “Konyana ea Molimo,” ba tsoa “mahlomoleng a maholo” a oelang ba khopo, hore ba sebeletse Molimo ‘ka tšebeletso e halalelang motšehare le bosiu.’ O ala “tente” ea oona ea tšireletso holim’a bona.—Tšen. 7:9, 14, 15.

Melemo e meng e meholo hape e fetoha kabelo e thabileng ea “bongata bo boholo.” Hobane ho ngoliloe tjena ka bahlanka bana ba lefatšeng ba Molimo: “Ha ba sa tla hlola ba lapa, leha e le ho nyoroa; ha ba sa tla hlola ba batoa ke letsatsi, leha e le ke lebatama le leng; hobane Konyana e har’a terone e tla ba alosa, ’me e tla ba isa lilibeng tsa metsi a bophelo; ’me Molimo o tla hlakola meokho eohle mahlong a bona.” (Tšen. 7:16, 17) Kaha tumelo ea bona e ile ea tšoarella ho tla fihlela “mahlomoleng a maholo” le ho a feta, ba tla fuoa ho hoholo, moeeng hammoho le nameng. Ba tla be ba bolokiloe ‘lebatameng’ la letsatsi la bohale ba Jehova. Mora eo e leng oa Molimo o ba khatholla le ho ba alosa ho kena mahlohonolong a sa feleng a paradeise e khutlisitsoeng hape lefatšeng! Ho bokolla ha bona ka lebaka la ho hloka tsebo ea bolumeli le ho arohana le Molimo oa ’nete e tla ba ntho e neng e fete khale.

Ho isa qetellong ea Tšenolo moapostola Johanne o bona “leholimo le lecha” le “motse o halalelang, Jerusalema e mocha, o theoha leholimong ho Molimo.” Ke ena, he, tšoantšetso ea “monyaluoa” oa Kreste, ea tlang ho kopana le Konyana, Jesu Kreste, ’musong oa eona oa leholimo!” (Tšen. 21:1, 2, 9) Tlas’a puso eo ea ’Muso, “bongata bo boholo,” hammoho le bafu ba tsositsoeng, ba bōpa “lefatše le lecha” la batho ba tlang ho kena kamanong e haufi haholo le ea botsoalle le Ntate oa bona oa leholimo. “O tla aha le bona; e tla ba lichaba tsa oona, ’me Molimo o tla ba le bona ka sebele sa oona.” ’Me moapostola Johanne hape o hatisa melemo ho ba lumelang, a re: “Molimo o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.” Ke mahlohonolo a makaakang a tsoang ho Molimo o hlileng o tsotellang!—Tšen. 21:3, 4; Joh. 5:28, 29.

Na u na le tumelo ea hore lipallo tsee li tla fetoha ’nete? U tšoanela ho ba le tumelo eo, hobane Molimo ka booona ke oona o bolelang o le teroneng ea oona e maholimong hore: “Bonang, ntho tsohle ke li etsa tse ncha.” Ho sena o phaella ka mantsoe ana: “Ngola hobane lipolelo tseo li tiile ke tsa ’nete.” (Tšen. 21:5) Lipallo tsa Molimo ke tsa ’nete! Ho theosa le lilemo tsa 6 000 tsa pale ea motho batho ba tumelo ba ’nile ba lumela le ho etsa ka lipallo tsena. Tumelo e joalo e tla u tsoela molemo le uena. Joalokaha e mong oa baapostola ba “Peō,” Kreste Jesu, a itse ka eena: “Mang le mang ea lumelang ho eena ha a ka ke a soaba.”—Ba-Roma 10:11.