Tumelo ho Mora oa Molimo—E Lokela ho u Ama Joang?
“Le itsamaeleng ka mokhoa o tšoanelang evangeli ea Kreste; . . . le eme moeeng o le mong le pelong e le ’ngoe, le ntse le loanela hammoho tumelo ea evangeli.”—Ba-Fil. 1:27.
1. (a) Ke mosebetsi ofe oo joale o fihlang tlhorong ea oona? (b) Ke eng se pakang hore tumelo kannete e ka fumanoa lefatšeng kajeno?
BOPROFETA bo phethahetseng bo supa hore re kene ka ho teba mehleng ea ‘bofelo ea tsamaiso ea lintho.’ (Matt. 28:20) Joale ho se ho fetile lilemo tse 64 esale “Mor’a motho” Jesu Kreste, a fihla le mangeloi ’ohle ho “lula teroneng ea khanya ea hae [ea leholimo].” Ho ahloloa le ho aroloa ha batho ba beoa ka “linku” tse tšepahalang le “lipoli” tse sa tšepahaleng ho haufi le tlhoro ea hona. (Matt. 25:31-33) Joale rea botsa, Na “Mor’a motho” o fela a fumane tumelo lefatšeng? Ho bokelloa ha phutheho ea lichaba tsohle ea Lipaki tsa Jehova—tse fetang limillione tse peli ho pakela hore o e fumane.
2. Ke hobane’ng ha ka nepo likopano tsa batho ba Molimo li hlalosoa e le ‘tseo e seng tsa lefatše lena’?
2 Mehloli ea litaba e ’nile ea hlalosa likopano tsa Lipaki tsa Jehova ‘e le tseo e seng tsa lefatše lena.’ ’Me ruri lia lokela hore e be ntho e ’ngoe e khethehileng! Hobane batho ba Molimo ba loanela botle. Bonneteng, phutheho ena e khōlō e nkile leeto ho tloha lefatšeng la hona joale le sa phethahalang ho ea “taolong e ncha” ea khanya moo ho kula, lefu le masoabi li ke keng tsa hlola li e-ba teng. Lentsoe la Jehova le re tiisetsa sena! (Tšen. 21:1-4) Hore re finyelle sepheo seo, ho hlokahala hore re itšoarelle ka matla ho hlōleng ha rōna ka tumelo. Hoo re ho etsa joang?
KAHLOLO EA LEFATŠE E-EA QALEHA
3. Ke liphetoho life tse etsahetseng ho tloha ka 1914, li supa eng?
3 Ha ‘bofelo ba tsamaiso ea lintho’ bo qaleha ka selemo sa 1914, liphetoho tse kholo tsa qala ho etsahala lefatšeng lena. Ho bile joalokaha Jesu ka boeena a itse—lintoa tsa lichaba, litšisinyeho tsa lefatše, mafu a seoa, litlala, tlōlo ea molao e ntseng e eketseha le ho tapa ha lerato. (Matt. 24:3-12; Luka 21:10, 11) Nako ea ho ahloloa ha lefatše e ne e qalehile.
4, 5. (a) Litumelo tsa Bojakane li bonahalitse ho haelloa ke tumelo joang? (b) Tsena li bapisoa joang le Lipaki tsa Jehova mabapi le kamano le lefatše? (c) Tumelo ea rōna e hlōlang e bontšoa joang?
4 Litumelo tsa Bojakane li ne li tla arabela joang boemong bona? Na li ne li tla iponahatsa hore li hlōtse lefatše ka tumelo? Hole hampe le moo! Ho e-na le ho amohela “pontšo” ea hore ’muso oa Molimo o haufi, baruti ba Bojakane ba tšehetsa ‘tsamaiso ea lintho’ e shoang. Eare ha ntoa ea lefatše e koahela Europe, likereke ka mahlakoreng a mabeli tsa khothalletsa Mokreste hore a bolaee Mokreste, kahoo li jara molato o tšabehang oa mali. ’Me eare ha ntoa e felella, litumelo tsa Bojakane ha lia ka tsa buella Morena ea busang joale, Jesu Kreste, empa sehlopha se entsoeng ke motho sa bopolotiki seo ka ketselletso ba ileng ba se bitsa “pontšo ea bopolotiki ea ’Muso oa Molimo lefatšeng.” Sena e ne e le Selekane sa Lichaba, se ileng sa hlahisoa ka 1919 ka morero feela o ileng oa boleloa e le ho sireletsa khotso ea lefatše le tšireletseho. Buka ea Bibele ea Tšenolo e se hlalosa e le “sebata se ’mala oa sekarelata, se tletseng mabitso a bonyefoli.”—Tšen. 17:3.
5 Likereke tsa Bojakane, ho tšehetseng ha tsona ntoa e feletseng, joale le setšeetso sena sa nakoana se entsoeng ke motho, li se li bonahalitse ka ho hlakileng hore na li ema hokae—e le karolo ea lefatše lena. Ka lehlakoreng le leng, Lipaki tsa Jehova, ka ho ema li sa jele paate mabifing le lipolotiking tsa lichaba, li bonahalitse ka lentsoe le le leng hore hase ‘karolo ea lefatše.’ (Joh. 15:19) Tumelo ea rōna ha e-ea itšetleha lihlomong tsa nama kapa mechineng ea ntoa ea banna ba shoang. Empa tumelo ea rōna e sa hlōloeng e amohela ‘Molimo e le morena ho e-na le batho.’ ’Me kaha “re utloa Molimo e le morena” ha re paka mabapi le merero ea ’Muso oa oona, re bontša hore re na le moea oa Molimo. (Lik. 5:29-32) Kahoo re filoe matla a ho etsa mesebetsi eo Jesu a buileng ka eona: “Ea lumelang ho ’na, mesebetsi eo ke e etsang, o tla e etsa le eena, o tla etsa le e fetisang ena”—ho boleleng ’muso o hlomiloeng lefatšeng lohle.—Joh. 14:12.
6. Moea o halalelang o bonahetse joang ho tloha ka 1919?
6 Moea ona o halalelang oa Jehova o ne o totobetse haholo likopanong tsa lichaba tsa Lipaki tsa Jehova Cedar Point, Ohio, U.S.A., ka 1919 le ka 1922. Oa matlafatsa tumelo ea masala a manyenyane a Bakreste ba tlotsitsoeng le ho a nea matla a hore a arabele pitso e reng: “Tsebahatsang, tsebahatsang, tsebahatsang, Morena le ’muso oa hae.” Ka matla a tsoela pele ho bolela ‘litaba tse molemo’ hole le haufi. Nakong ea ha ho qhoma ntoa ea bobeli ea lefatše e mabifi, a ne a eketsehile ka palo ho tloha liketeng tse seng kae ho isa palong e fetang 67 000, a bolela linaheng tse sa tšoaneng tsa lefatše.
TUMELO E HLŌLA MAHLORISO
7. Ke mehlala efe e bontšang hore tumelo e hlōla mahloriso?
7 Katoloho ena ha e-ea ka ea finyelloa ntle ho mahloriso a matla. Ka mohlala, kaha lipaki tse tšepahalang tsa Jehova li ile tsa hana ho rapela ’muso oa Manazi, li ile tsa tsongoa le ho qobelloa joaloka mehlape ka likampong tsa mahloriso tse litšila. Hape, ba 635 ho bona ba shoa teronkong. Empa tumelo ea bona e ne e ke ke ea senngoa. Moshebelli e mong o ile a hlalosa Paki ka ’ngoe e le “qhobosheane e ka senngoang empa e ke ke ea haptjoa.” Joalokaha paki e boneng e ile ea hlalosa mabapi le ngoan’abo eona, ea ileng a thunngoa ka sehloho ke balebeli ba Manazi ba SS polaong ea pontšeng: “E mong le e mong o ile a khahloa ke khutso le sebete, a tšoana le motho ea seng a hlōtse ntoeng.”
8. (a) Nakong ea lilemo tse lekang tsa Ntoa ea II ea Lefatše, tumelo ea Bokreste e ile ea atleha joang? (b) Empa baeta-pele ba bolumeli ba ile ba hlohonolofatsa le ho phahamisa eng?
8 Joalokaha ho se ho boletsoe, Lipaki tsa Jehova li ile tsa kena lilemong tse thata tsa ntoa ea bobeli ea lefatše li ka ba 67 000, empa tsa tsoa khohlanong li feta 141 000. Lithibelo, litlamo le liteko tse ling tsa botšepehi li ne li sa ba etsa hore ba thekesele tumelong ea bona. Litumelo tsa Bojakane, leha ho le joalo, tsa hlohonolofatsa mahloriso le lipolao. ’Me le hoja “sebata se ’mala oa sekarelata se ne se ba soetsitse ha e le Selekane sa Lichaba, baeta-pele ba bolumeli ba potlakela ho se thooletsa hape ha se hlaha e le Machaba a Kopaneng. Ba hloma tšepo ea bona ho sona. (Tšen. 17:3-8) Nakong ea ha a ne a etetse Machabeng a Kopaneng New York ka 1965, Mopapa Paul VI ea fetileng o ile a rorisa sehlopha sena e le “mokhatlo o moholo ho feta eohle ea lichaba” le “tšepo ea ho qetela ea tumellano le khotso.”
HO HLŌLA HO TSOELANG PELE KA TUMELO
9. (a) Ke boitsebiso bofe bo nakong boo Lipaki tsa Jehova li ileng tsa bo tsebahatsa ka 1942? (b) Batho ba Molimo joale ba hatela pele joang ho hlōleng ha bona?
9 Ha ho ne ho etsoa tlhahiso ea Machaba a Kopaneng ka lekhetlo la pele ke lichaba tsa selekane ka 1942, Lipaki tsa Jehova li ile tsa tsebahatsa, kopanong ea tsona ea lichaba sa selemo seo, hore hona e ne e tla ba feela ho tsosoa ha Selekane. Tsa bontša ka Lentsoe la Molimo hore Machaba a Kopaneng a tlameha hore a qetelle a theohetse timelong, hammoho le mekhatlo eohle e meng ea bopolotiki, khohlanong ea ho qetela Harmagedone. Ba potolohiloe ke bopaki ba ‘mehla ea qetello,’ batho ba Jehova ba hatela pele ho hlōleng ha bona ka tumelo. (Dan. 11:35) Sekolo sa Watchtower sa Bibele sa Gileade sa hlophisoa ka 1943, ’me baromuoa ba rōmeloa lipheletsong tsohle tsa lefatše. Ka phello efe? Ha ka 1945 ho ne ho le teng baboleli ba ’Muso ba 141 606 ba mafolo-folo linaheng tse 66, ka 1978 ba 2 182 341 ba ne ba tlaleha tšebeletso linaheng tse 205. Ho hlōla ka tumelo ho bonahetse ka mokhoa o totobetseng, ’me haholo linaheng tse fetang 40 moo Lipaki tsa Jehova joale li sebeletsang ka tlas’a ho thibeloa kapa ho sitisoa.
10. Tumelo e lekiloeng e bonahalitsoe joang Malawi le linaheng tse ling tse tlas’a lithibelo?
10 E hlileng e hlokomelehang har’a linaha tseo teko ea tumelo e bileng thata haholo ke sechabeng se senyenyane sa Afrika sa Malawi. Ho tla fihlela ka 1962, Lipaki tsa Jehova li ile tsa thabela khōlō e potlakileng naheng eo. Empa, he, ka 1964, mahloriso a befileng a qhoma. Kahobane Lipaki tsa Jehova li ne li ke ke tsa rapela karolo ea Malawi ea ‘sebata se hlaha se nyolohang leoatleng’ (Tšen. 13:1, 4) ka ho reka karete ea ho ba setho ea mokha oa bopolotiki, li ile tsa tsongoa malapeng a tsona, tse ngata li betoa le ho bolaoa. Qetellong, bongata ba tsona ba lelekeloa ka ntle ho naha ea habo tsona. Empa tumelo e lekiloeng ea tsona, e pakiloeng joalokaha eka e fetile mollong, e bile lebaka la thabo, e seng ho tsona ka botsona feela empa le ho baena ba bona ba Bakreste lefatšeng lohle. (1 Pet. 1:7) Linaheng tsohle moo Lipaki tsa Jehova li tlamehang ho sebetsa ka sekhukhung, tšoaneleho eona eo e matla ea tumelo e-ea hlokomeleha. Lipaki tsena kaofela, ’me ho le teng tse fetang 200 000 linaheng tse joalo, li atleha ka mokhoa o babatsehang ho hlōleng ha tsona ka tumelo.
11. Ke eng se bontšang hore re tlameha ho mamella ho hlōleng ha rōna ka tumelo?
11 Leha ho le joalo, ho thoe’ng ka Lipaki tsa Jehova linaheng tseo ho tsona ho leng bonolonyana, moo re sa pheleng re le kotsing ea ho tšoaroa, ho tlangoa kapa ho lahleheloa ke bophelo ka linakho tsohle? Le hoja ho le bohloko ho ho bolela, tse ling tsa libaka tsena ha lia etsa hantle haholo. Tsena li akarelletsa linaha tsa ngata tse naleng, moo ho thetsa ha menyaka le boitšoaro bo bobe li atileng. Empa ha ho lea mong ea lokelang ho fifalloa ke ’nete ena: Re tlameha ho mamella ho hlōleng ha rōna ka tumelo ho fihlela re lokolloa tsamaisong ena e khopo ea lintho, le haeba e le ka lefu kapa ka ho pholoha ‘mahlomola a maholo.’
12. Ke mantsoe afe a boprofeta ba Jesu ao re lokelang ho a ela hloko ka potlako kajeno, hona hobane’ng?
12 Ke ho potlakileng hakaakang hore bohle ba be le kananelo ee e hlakileng! Bopaki bo hlakile kahohle hore lefatše le thothomela lintšing tsa timelo. ‘Mehla ea qetello’ e phethile nako ea eona. Kahoo, mantsoe a qetellang a boprofeta ba Jesu ka bofelo ba tsamaiso ea lintho a lokela ho luma ka ho hlaka ho nyarosang ho batho bohle ba Jehova kajeno: “Le iponele, hore lipelo tsa lōna li se ke tsa imeloa ke ho ja le ho noa hampe, le ke lipelaelo tsa bophelo bona, ’me letsatsi leo la le tšoara sehlōhō; hobane le tla oela ba ahileng lefatšeng lohle joale ka sefi. Falimehang ke hona, ’me le rapele ka mehla, le tle le neoe tokelo ea ho phonyoha ho tseo tsohle tse tla etsahala, le ea ho ema pel’a Mor’a motho.”—Luka 21:34-36.
‘NAKO E BEILOENG’ E-EA ATAMELA
13. Ke hobane’ng ha ho tlama hore re lule re lebelletse kahlolo ea Jehova?
13 Le hoja ‘mahlomola a maholo’ mohlomong a sa ka a tla ka potlako kamoo bongata ba rōna bo neng bo lebelletse, leo hase lebaka la ho nyahama. Molimo ha o fetohe. (Mal. 3:6) Leha e le hore merero ea oona e meholo e fetohile. Jehova o bua tjena mabapi le ‘litaba tse molemo’: “Ho lutse joalo le lentsoe la ka le tsoang molomong oa ka: le ke ke la khutlela ho ’na le le feela, empa le tla sebetsa se ratoang ke ’na, le phethe seo ke le rometseng sona.” (Esa. 55:11) Nako ea hore Molimo o lihe kahlolo ha e-ea checha. E atamela le letsatsi le leng le le leng. Ka hona a re hopole mantsoe a Esaia 30:18: ‘Jehova ke Molimo oa kahlolo. Ho lehlohonolo ba lulang ba mo lebelletse.’ (NW)
14. (a) Ho tšoarella tšepong efe ke hona ho tla re nolofaletsa hore re qetelle re fetotse mantsoe a Joshua a rōna? (b) Ke khothato efe eo re ka e fumanang boprofeteng ba Habakuke?
14 Hase ho itšetleha ha rōna ka nako eitseng, empa tšepo ea rōna e feletseng ka pelo eohle ho Jehova e le Molimo ‘o ke keng oa thetsa,’ e re nolofaletsang ho hlōla ka tumelo. (Tite 1:2) Tšepo ena e tla qetella e re fihlisitse ntlheng eo ho eona, ho tšoana le Joshua oa boholo-holo, re tla bolelang tjena ho metsoalle ea rōna ho hlōleng hona ka tumelo: “Lea itsebela pelong tsa lōna bohle le meeeng ea lōna bohle hobane ha ho ntho leha e le ’ngoe ea tsohle tse molemo tsee Jehova, Molimo oa lōna, a le baletseng tsona, e hlokahetseng; tsohle li etsahetse ho lōna, ha ho e ’ngoe ea tsona e hlokahetseng.” (Josh. 23:14; 21:45) Re ka ba le tšepo e feletseng mantsoeng a Habakuke hore “tšenolo eo e sa luletse nako ea teng, empa e tla itlhahanela qetellong.” E se eka re ka itlhahanela le pono eo ho fihlela ho hlōla ha rōna ho phethehile! Boprofeta boa re tiisetsa hore: “E ke ke ea thetsa. Ha e ka lieha, u e lebelle, hobane e tla etsahala ruri, e ke ke ea fela.”—Hab. 2:3.
‘JEHOVA HA A LIEHE’
15. (a) Ke hobane’ng ha ho ka boleloa hore ‘Jehova ha a liehe’? (b) Letsatsi lee le qetella le tlile joang?
15 Ho fetile lilemo tse makholo a leshome le metso e robileng mono o le mong ho tloha mehleng ea baapostola. Empa mahlong a Molimo hona ho ka tlase ho matsatsi a mabeli. Ho joalokaha moapostola Petrose a ho bolela: “Feela, baratuoa, se lebaleng taba ena e le ’ngoe, ea hore letsatsi le le leng pel’a Morena, le joale ka mengoaha e sekete, le hoba mengoaha e sekete e joale ka letsatsi le le leng. Morena ha a liehise lipallo tsa hae, joale ka ha ba bang ba lekanya hobane tieho e teng; empa o sa mameletse ka baka la rōna; hobane ha a rate ha ba bang ba ka timela, empa o rata hore bohle ba finyelle pakong. Letsatsi la Morena lona le tla tla ka mokhoa oa lesholu.”—2 Pet. 3:8-10.
16. Ke hobane’ng ha letsatsi la Jehova le ea s’o tle, ’me re lokela ho itšoara joang ka boemo?
16 Kahoo, ho thoe’ng ha ekaba letsatsi la Jehova le sa emiselitsoe ho otla ka makhetlo a seng makae hape nakong ea hae? Na ha re thabele hore hona ho nolofalelitse ba bang ba makholo a likete hape ho “linku” tsa hae hore ba bokelloe? Ha nako eo e ntse e otla ho ea pele, ba mashome a likete bao e neng e le Mak’hatholike pele linaheng tsa Europe e ka boroa ba ntse ba bokana ’Musong, ba makholo lihleke-hlekeng tsa leoatle ba tlohela borapeli ba bona ba litšoantšo ’me ba baloang ka likete Asia ba khaohana le tumela-khoela ea Bochabela ’me ba nka ‘litaba tse molemo.’ Lebaka la hore letsatsi la Jehova le kang lesholu ha lea s’o fihle ke hore o sa ntsane a e-na le mosebetsi bakeng sa rōna hore re o etse ho bokelleng “linku tse ling.” Jehova ha a liehe. Le rōna re se ke ra lieha ho sebeliseng monyetla o mong le o mong ho kopanela ka botlalo mosebetsing oa Hae.
17. (a) Ke keletso efe e nakong eo Petrose a fanang ka eona ka letsatsi lee? (b) Ke eng se khethollang batho ba Jehova, ’me ba bonahatsa tumelo ea bona joang?
17 Moapostola Petrose o eletsa hore: ‘Bofelo ba ntho tsohle bo atametse. Le hlaphoheloe likelellong, ka baka leo, ’me le tsohe masene ka maikutlo a ho rapela. Ka holim’a tsohle, le ratane ka matla.’ (1 Pet. 4:7, 8, NW) Ha ‘tsamaiso ena ea lintho’ e khopo e atamela bofelong boiteko ba eona ba ho qetela ho timetsa batho ba Molimo, kannete ho hlokahala hore re lule re sa ferekana, re falimehile le ho rapela, re tšepile ho hlōla ha rōna ka tumelo. Ho hlokahala hore re kopane leratong leo le matla, leo e leng letšoao le khethollang hakana la batho ba Jehova lefatšeng lohle. Ke hokae, paleng eohle ea motho moo ho bileng teng batho ba kang Lipaki tsa Jehova kajeno? Bona ke bona boena feela bo kenelletseng likhutlong tse hole-hole tsa lefatše le ahiloeng. Ke matla afe, ntle ho moea oa Jehova, a neng a ka kopanya limillione tse peli tsa “lichaba tsohle, le ba mefuta eohle, le ba merabe eohle, le ba lipuo tsohle” kopanong e babatsehang hakana ea tumelo, morero le mosebetsi? Hammoho, re hlōtse ka ho hlōla ka tumelo, ’me hammoho re bontša tumelo eo ka ho pakela ’muso oa Jehova ka Mora oa hae.—Tšen. 7:9.
HA BOFELO BO ATAMELA
18, 19. (a) Mehleng ea baapostola, liketsahalo li ile tsa tsoela pele joang phethahatsong ea boprofeta ba Bibele? (b) Ba bang mohlomong ba ile ba etsa phoso efe e bohloko?
18 Batho ba Jehova kajeno ba tšoana le Bakreste bao ba tšepahalang bao ka cheseho ba neng ba emetse phethahatso ea pele ea “pontšo” morao koana Jerusalema ea mehleng ea baapostola. Ba ne ba lebelletse ho tla ha “manyala a bofeliso” a neng a tla ema “nqalong e halalelang.” Qetellong, ha etsahala. Lebotho la Baroma la hlasela ’me la kenella ho ea fihla lerakong le ka bophirimela la sebaka sa tempele. Joale Bakreste ba ka etsa joang? Jesu o ne a itse: ‘Le balehele lithabeng.’ Eare ha lebotho leo le checha le sa lebelloa, Bakreste bao ba sebelisa monyetla oo. Ba fela ba baleha. Ba balehela lithabeng tsa Berea. Empa na joale ba ne ba sireletsehile? Na ho hlōla ha bona ka tumelo ho ne ho phethahetse? Che, e seng ka nako eo.—Matt. 24:15, 16.
19 Ka cheseho Bakreste bao ba lebella phetoho e latelang—ho phethahatsa ha Jehova kahlolo holim’a Jerusalema. Ba ema selemo se le seng. Ha se ke ha etsahala letho. Lilemo tse peli, le teng ha se ke ha latela letho. Lilemo tse tharo, le teng ho ntse ho sa etsahale letho. Mohlomong ba bang ho Bakreste bao ba ile ba khathala ke ho ema. Mohlomong ba re, ‘A re khutleleng motseng ’me re kene khoebong le tseleng e bonolo ea bophelo.’ Eo e ne e tla ba phoso e soabisang hakakang!
20. Tumelo joale e ile ea sebeletsa poloko joang?
20 Hobane ka tšohanyetso, ka selemo sa bone, makhotla a Roma a ile a khutla. Motse le tempele ea oona tsa timetsoa ka ho feletseng, ho se lejoe le le leng le salang holim’a le leng. Ho bile hantle joalokaha Jesu a ne a profetile. (Luka 19:41-44; 21:20-24) Empa batho ba Molimo ba ka ntle ho Judea ba ne ba lutse ba le mafolo-folo ba falimehile. Ba lebelletse Jehova. Tumelo ea bona ea sebeletsa ho bolokeha ha bona.
21. Ke phethahatso efe e hlokomelehang ea boprofeta ba Bibele e ileng ea etsahala ka 1945 ho ea pele?
21 Kajeno, re boemong bo tšoanang. Bojakane ke ntho e lekanang le motse oa boholo-holo o sa tšepahaleng oa Jerusalema. “Manyala a bofeliso” a boprofeta ba Jesu ka ho hlakileng a khetholloa ke Mangolo e le mokhatlo oa kajeno oa Machaba a kopaneng. O tšoana le “sebata se ’mala oa sekarelata” sa Tšenolo khaolo ea 17. Ha “sebata” seo se tsoa ka sekoting ka 1945, ’muso oa lefatše oa bolumeli ba bohata, “Babylona e moholo,” eo Bojakane e leng karolo e ka sehloohong ea eona, o tsebile ho se kalla le ho laola ka mokhoa o itseng.
22. Ke boemo bofe bo fetohileng bo bonahalang joale ho Machaba a Kopaneng, bo hlalosa eng?
22 Leha ho le joalo, kajeno ho fapane. Lichaba tse nkang bolumeli e le “mootselisi oa batho” li fumana matla a maholoanyane ho U.N. Li ema e le kotsi ea ’nete sebakeng sa tšebetso ea Bojakane, ’me, ka sebele, bolumeli bohle. Haufinyane re ka lebella ho bona “linaka tse leshome” tsa “sebata” li fetohela bolumeli ba lefatse, li senya le sona sebaka sa bolumeli ba Bojakane. ‘Mahlomola a maholo’ joale a tla be a qalehile, ’me ka potlako a tla fihla tlhorong ea oona Harmagedone.—Tšen. 17:12-18; 19:19-21.
23. (a) Ha ho talingoa boemo bo thata bo lefatšeng, joale re lokela ho etsa joang? (b) U ka atleha joang u le ea hlōtseng lefatše ka tumelo?
23 Li bona boemo bona bo thata lefatšeng, Lipaki tsa Jehova li lokela ho etsa joang? Re tlameha ho tiisa hore ntoa ea rōna ho ea “thabeng” ea tšireletso ea ’muso oa Molimo e feletse. Re tlameha hore re se sisinyehe ho phehelleng ho hlōla ka tumelo ea rōna. Re tlameha ho ikemisetsa ho ba bahlōli ka Molimo oa rōna o re ratang. Ha nako ea hona e sa le teng, re tlameha ho tsoela pele ho kopanela ka cheseho ho boleleng litaba tsena tse molemo tsa ’Muso lefatšeng lohle le ho etseng barutuoa. Hammoho le Lipaki tsa Jehova kaofela ha tsona lefatšeng lohle, na u tla tsoela pele ‘ho ema moeeng o le mong le pelong e le ’ngoe, re ntse re loanela hammoho tumelo ea Evangeli’? (Ba-Fil. 1:27) Na ka tsela eo u tla phahamisa lebitso la Jehova le ’muso oa Mora oa hae, Jesu Kreste? Ka ho etsa joalo, le uena u ka atleha ka mokhoa o khanyang u le ea hlōlang lefatše ka tumelo.
[Setšoantšo se leqepheng la 21]
Le iponele lipelo tsa lōna li se imeloe ke ho ja haholo le ho noa haholo