Lipesaleme

“Thuso ea ka e Tla Tsoa Kae?”

U BATLA thuso hokae nakong ea tsieleho e kholo? Na ke mohloling o tšoanang le oa mopesaleme? Seroki sena sa boholo-holo se boletse: “Ke lelaletsa mahlo a ka lithabeng; thuso ea ka e tla tsoa kae? Thuso ea ka e tsoa ho Jehova, ea entseng maholimo le lefatše.”—Pes. 121:1, 2.

Ha ho ne ho tlalehoa mantsoe ana, sehalalelo sa ea holimo-limo Molimo se ne se le Jesusalema. Ka kutlosisiso ea boemeli, ka baka leo, motse oo e ne e le tulo eo a lulang ho eona. Kahoo mopesaleme o ne a lelaletsa mahlo a hae lithabeng, ka ho totobetseng tsa Jerusalema, ’me a ipiletsa ho ’Mōpi e moholo, Jehova bakeng sa thuso.—1 Mar. 8:30, 44, 45; Dan. 6:10.

A bolela tumelo ea hae e sa sisinyeheng matleng a Molimo a ho fana ka thuso e hlokahalang, mopesaleme a tsoela pele: “A ke ke a leseletsa leoto la hao ho khothometseha; molebeli oa hao a ke ke a otsela. Bona, ha a otsele, ha a robale, molebeli oa Iseraele.” (Pes. 121:3, 4) Ho ke ke ha etsahala hore Ea matla ’ohle a lumelle ba talimileng ho eena hore ba khothometsehe, hore ba oe hoo ba ke keng ba tsoha. O tla ba tlohela ba eme pel’a hae e le bahlanka ba hae ba amohelehang. Ha ho kotsi ea letho eo a ka e lumellang hore e ba soetse nakong ea boroko kapa ea ho otsela. Ea Holimo-limo ka linako tsohle o tlhorong ea matla a hae ho fana ka thuso ’me o hlokometse ka botlalo ntho e ’ngoe le e ’ngoe e etsahalang. Ha ho mohla a otselang, leha e le hona ho robala. Ka baka leo, bao a ba lebetseng ba sireletsehile.

Ho ea pele mopesaleme o re: “Jehova ke molebeli oa hao; Jehova ke moriti oa hao tsohong la hao le letona. U ke ke ua batoa ke letsatsi ka nyene, leha e le ke khoeli ka bosiu. Jehova o tla u sireletsa bobeng bohle; o tla boloka moea oa hao. Leha u ka tloha, leha u ka khutla, Jehova o tla u baballa, joale le ho isa ho sa feleng.”—Pes. 121:5-8.

Ha Jehova a lebela batho, o tšoana le moriti o sireletsang o ba sireletsang mahlaseling a chesang a lebatama la letsatsi. O ka letsohong le letona, letsoho le molemo. Hona ke habohlokoa, hobane ntoeng boholo-holo lerumo le ne le tsokotsoa ka letsoho le letona ’me, kahoo, le sa sireletsoa ka thebe e ka letsohong le letšehali. Tšireletso e ne e etsoa hangata ka motsoalle ea tšepahalang ea ka letsohong le letona la mohlabani. Ho tšoana le motsoalle ea tšepahalang joalo, Jehova Molimo o ‘fana ka moriti ka letsohong le letona.’

Ka Jehova e le molebeli, motho o tla sireletsoa bobeng bo tšoanang le lebatama la letsatsi motšehare le serame se bohloko sa bosiu, ha khoeli e bonahala leholimong. Ha e le hantle, Jehova o tla sireletsa bahlanka ba hae tlokotsing tsohle tse ka ’nang tsa fella ka hore ba tsoe kotsi ea ka ho sa feleng. Hona joale le nakong e tlang, o tla lokisetsa tšireletso e joalo ha motho a tsoa ka tlung ea hae leha a khutla.

Ka sebele, he, bohle ba nang le Jehova e le Mothusi oa bona ha ho hlokahale hore ba belaele. Ba ka ’na ba utloa mathata, mohlomong ba ba ba talimana le lefu le befileng. Leha ho le joalo, ha feela ba shebelletse thuso ea bona ho ’Mōpi oa bona, o tla ba sireletsa linthong tsohle tse ka ba senyang moeeng. Kahoo ba tla tsoela pele ba eme ba tiile e le bahlanka ba hae ba amohelehang.