Na u Hlompha Bafu?

NA U se u kile ua utloa tahlehelo e matla e tsamaeang le lefu la moratuoa? Ba bangata ba lahlehetsoeng ba ikutloa ba imetsoe ke qetello ea lefu le ho hloka thuso ho hlahang moo. Hangata ho teng takatso ea ho koala sekheo sena ka liketso tse reretsoeng ho hlompha bafu. Ka baka la ho lumela hore moea ha o shoe, litšebeletso tsa lepato hangata li akarelletsa mekete eo ho nahanoang hore e khutsisa bafu le ho khothalletsa mohau oa bona, kapa thuso ea bona lefatšeng la meea.

Ke tlhaho ho hopola moratuoa ka hlompho. Boikutlo bo loketseng ba botho bo hloka hore ho lokisetsoe “lepato le itlhomphileng.” Bona boikutlo boo bo bōpa takatso ea ho phethahatsa litakatso tsa ho qetela tsa mofu, ha feela tsena li ke ke tsa hanana le letsoalo la motho le kutloisiso ea hae ea se nepahetseng. Ka ho tšoanang, batho ba bangata ba tlohela liketso tse neng li ka bontsa ho hlompholla mofu.

Leha ho le joalo, ba lakatsang ho laoloa ke melao ea Molimo ba tla tiisa hore mekhoa ea bona ha e susumetsoe ke tumello ea hore mofu o hlokomela se ntseng se etsoa. Hobane’ng? hobane tumelo e joalo ha e-ea theoa ’neteng, empa holim’a tumelakhoela e tlileng e tsoa Babylona ea boholo-holo. E boetse e fumanoa lithetsong tsa bademona ba iketsang eka ke bafu.

Bopaki bo bonahalang bo tšehetsa thuto ea Bibele ea hore lefu ke pheletso ea bophelo bohle le hore motho hase moea o sa shoeng o nang le matla a ho pholohela ka lefatšeng la meea. Motho ka boeena ke moea, hobane rea bolelloa ka Mangolong: “Jehova Molimo a bōpa motho ka lerōle la lefatše; ’me a bululela linkong tsa hae phefumoloho ea ho phela, ’me motho ea e-ba moea o phelang.” Lefung, batho ba khutlela lerōleng ’me monahano oa bona o-oa khaotsa.—Gen. 2:7; 3:19; Pes. 146:4; Ezek. 18:4.

Koana, ho na le litumelo tse hananang le ena. Empa re ka phahamisa ’nete joang ka liketso tsa rōna mabapi le bafu? ’Me hona re ka ho etsa joang mabapi le ho bontša ho sareloa ka ho lahleheloa ke moratuoa?

U BONTŠA HO SARELOA JOANG?

Ho bontša ho sareloa ho na le phello ea ho lokolla boima ba boikutlo, empa boikutlo bo ke ke ba lumelloa hore bo bonahale ka mokhoa o sa laoloeng ebe ha bo bonahale ka mokhoa o feteletseng. Kahoo hoa hlokahala hore boitšoaro bo be teng ha ho bontšoa ho sareloa.

Bahlanka ba Molimo ba mehleng e fetileng ba ne ba bontša masoabi ha baratuoa ba e-shoa. (Gen. 23:2; Deut. 34:8; Joh. 11:33) Leha ho le joalo ba ne ba haneloa ho etsa liketso tse neng li ka fana ka maikutlo a hore bafu ba pholohetse lefatšeng la meea. Batho ba Jehova ba ne ba ke ke ba silafatsa bolumeli ba bona ka ho etsisa lichaba liketsong tse bontšang boikutlo bo fosahetseng ka bafu.—Lev. 19:28; Deut. 14:1; 18:10-12.

Jesu o ile a lla ha ho shoele Lazaro, ’me a hla a bolela hore balateli ba hae ba tla itima lijo ke ho sareloa kamor’a lefu la hae. (Joh. 11:35, 38; Mar. 2:20) Empa hape a bolela hore ba itime lijo e le hore ba bonoe ke Molimo feela e seng batho. Pontšo ea bona e be e tlohang pelong, e seng “mponeng.” (Matt. 6:16-18; bapisa Joele 2:12, 13.) Jesu a bolella barutuoa ba hae hore e ne e se karolo ea lefatše. ’Me, koana, o ne a sa batle hore ba batle ho amoheloa ke lefatše ka ho etsa lintho tse hananang le ’nete.—Joh. 15:19.

Hona hohle ho nyahamisa Bakreste hore ba ka etsisa mokhoa oa ho apara botšo e le pontšo ea ka ntle ea ho lla ha bona. Leha ho le joalo, nakong ea ho sareloa ka baka la lefu, batho ba bomolimo ba tla apara liaparo tse hlomphehang pontšeng, kaha e ke ke ea e-ba ho hotle ho ikaparela feela tjee.—Moek. 3:1, 4.

Na hona hape ho ka lahla mokhoa oa tebelo? Kamoo ho etsoang ke litumelo tse sa tšoaneng, hangata mokhoa ona o etsoa ka ’mino oa ho lla le ho bokolla bosiu bohle. O bōpa moea oa botšo le o tepeletsang bakeng sa lelapa le lahlehetsoeng. Tebelo ho bonahala e hlahile ka baka la ho tšaba bafu, ’me tloaelo e ne e reretsoe ho khutsisa bafu le ho leleka meea e litšila. Empa kaha Bibele e bontša hore “bafu ha ba tsebe letho leha le le leng,” tloaelo e joalo e theiloe leshanong ’me kahoo ha ho kamoo e ka etsoang hore e lumellane le Bokreste ba ’nete.—Moek 9:5, 10.

Leha ho le joalo, e ka ba ho loketseng ho etela lelapa le lahlehetsoeng. Hona ho ka etsoa le haeba setopo se e-s’o tlosoe lapeng, le hoja Mokreste a ke ke a kopanela tebelong e theiloeng lineanong tseo e seng tsa mangolo le mekhoa. Ka tlhaho, ho lula feela moo mesarelo e leng teng ho ke ke ha fana ka matšeliso kapa ha theola mesarelo. Leha e le hore e ka ba ho nahanela ho jarisa batho ba lahlehetsoeng moroalo oa lichelete oa ho fana ka lijo tse ngata bakeng sa baeti. E ka ba ho nahanela ho qoba boeti bo bolelele, ntle le haeba u le setho sa lelapa kapa motsoalle ea haufi. Empa ekaba ho hlasimollang ho thusa le ‘ho tšelisa ba pelo li tepeletseng.’ (1 Ba-Thess. 5:14) Mohlomong u ka ’na ua thusa ka mesebetsi ea lelapa kapa ho reka kapa ua fana ka lijo tseo ho hlokahalang hore li lokisetsoe.

Uena, leha ho le joalo, u bontša ho sareloa joang haeba e le uena ea lahlehetsoeng? Bakreste ha ba ineele masoabing a fetisisang ’me ha ba tšohe bafu. Leha e le hore ba nahana hore bafu ba hloka thuso ea ba phelang. Ho e-na le hoo, Bakreste ba na le tšepo ea hore bafu ba tla khutlisetsoa bophelong, hobane moapostola Pauluse o itse: “Ha ke rate hore le ka hloka tsebo tabeng ea ba ithobaletseng, le tle le se ke la hlomoha joale ka ba bang ba se nang tšepo.” (1 Ba-Thess. 4:13) Kahoo, ho soaba ha Bokreste ho laoloa le ho tsitsisoa ke tšepo.—Joh. 11:24; Lik. 24:15.

Haeba u lahlehetsoe ke moratuoa lefung, tšepo ena ea tsoho e tla u thusa hore u hlōle boikutlo ba tahlehelo le ho sareloa. E tla u etsa hore u sebelise hamolemo haholo maemo a hao a hona joale ’me e u tiise hore u thuse ba bang. Ka mohlala, u ka bolella batho ba bang ba lahlehetsoeng ka tšepo ea hao tsohong ’me kahoo u ba thuse hore ba thulane ka katleho le ho sareloa ha bona.—Joh. 5:28, 29.

HO THOE’NG KA LIPHUPU?

Phupu ea Bokreste e lokisetsa ho tlosoa ha setopo ka tsela e lumellanang le se hlokoang ke melao ea bohloeki le e amohelehang sebakeng seo. E fana ka monyetla oa ho fana ka matšeliso ho ba lahlehetsoeng le molaetsa oa tšepo ho bohle ba teng. Che, phupu ea Bokreste hase sakaramente ea ho fumana seo ho thoeng ke ho phomotsa moea, kapa eona ketso ea ho khutsisa “moea o ileng.” Hape, Bakreste ha ba ho nke e le ho bonolo ho “halaletsa” mofu ka hore na o patoa joang. Kaha “bafu ha ba tsebe letho leha le le leng,” liketso tseo ba li etsetsoang li ke ke tsa ba fumantša molemo kapa tsa ba khutsisa, kapa tsa susumetsa boemo ba bona mahlong a Molimo. (Pes. 6:5; 115:17) Leha ho le joalo, phupu, (kapa tšebeletso ea boikhopotso, joalokaha setopo se le sieo) e fela e tšelisa beng ka mofu ba setseng ’me e bontša kamoo moratuoa ea shoeleng a neng a hlomphuoa kateng.

Leha ho le joalo, phupu e majaba-jaba e ne e tla ba ea bohlokoa hakae haeba mofu a ne a sa tšoaroa hantle ka hlompho ha a sa phela? Ba bang ba ’nile ba phea khang hore phupu e majaba-jaba le mokete o tsamaeang le eona lia hlokahala ho bontša hlompho le kananelo bakeng sa bophelo bo phetsoeng hantle. Empa kananelo e joalo e ne e tla ba ea bohlokoa haholo haeba e ne e bontšoa ha motho a sa phela, ha a ka bona ’me a fumana molemo moo.

Le hoja teboho e ka ba teng ea hore motho ea shoeleng o phethile bophelo bo botle, lefu ke sera. (1 Ba-Kor. 15:26) Ke nako ea masoabi, e seng thabo, nako ea ho nahana ka kelello e hlaphohileng bohlokoa ba ho sebelisa bophelo tumellanong le thato ea Molimo.—Moek. 7:2; 9:10.

Lintlha tsena li ka nahanoa hamolemo ha ho etsoa qeto ea hore na ho ka felloa kae ha ho bontšoa ho hlompha moratuoa ea shoeleng. Ka lehlakoreng le leng, kaha bafu ha ba ikutloe, ’me ha ho seo ba ka se etsang, lithapelo kapa linyehelo tseo ba li etsetsoang hase tsa lefeela feela, empa li fosahetse. (Esa. 8:19; 38:18) Ka mohlala, Morena Davida o ile a itima lijo le ho rapela ha lesea la hae le kulang le sa phela. Empa eare ha Davida a hlokomela hore ngoana o shoele, a khaotsa lithapelo tsa hae le ho itima lijo.—2 Sam. 12:16-23.

PHUTHEHO EA BOKRESTE E AMEHA JOANG?

Haeba motho ea shoeleng a ne a amana le phutheho ea Bokreste, e ka ba ho loketseng hore phutheho eo e kopuoe ho tsamaisa phupu. Ha e le hantle, mohlomong mofu o ile a bolela hore o lakatsa joalo, ’me e ka ba ho loketseng bakeng sa bana ba setseng kapa litho tse ling tsa lelapa ho e hlompha. Koana, boikarabelo ba lelapa ka ho utloahalang bo atoloha ho isa moo moo bo lokisetsang litokisetso tsa phupu. Leha ho le joalo, ha le ntse le hlokomela litšenyehelo, le mosebetsi oa molao le oa mehla o amehang, lelapa le ka kōpa phutheho, ka baholo, ho tsamaisa phupu.—1 Tim. 5:8.

Leha ho le joalo, haeba ho hlile ho hlokahala, phutheho e ka ’na ea nka boikarabelo ba phupu bo itseng bakeng sa Mokreste ea shoang a ne a tšepahetse ’me e le mohloki a bile a se na beng ka eena ba ka hlokomelang litaba tsena. (Bapisa 1 Timothea 5:9, 10.) Hona ke ntho e ka inahaneloang ke baholo ba sebaka. Ka tlhaho, haeba litho tse sa lumelang tsa lelapa li inkela litokisetso tsa phupu, phutheho ea Bokreste ha e-ea tlameha ho lokisetsa ntho e kang tšebeletso e kopanetsoeng ea phupu ’me kahoo e ipee kotsing ea ho ameha tumelong e kopanetsoeng.—2 Ba-Kor. 6:14-17; Tšen. 18:4.

Litabeng tsohle tse amanang le litšebeletso tsa bafu, ke habohlokoa ho lumellana le seo e leng sa ’nete. Kahoo, Bakreste ba qoba eng kapa eng e tšoantšetsang leha e le hanyenyane borapeli ba baholoholo kapa tumelo ea “meea e ileng.” Batho ba bomolimo ba bontša tumelo tsohong ’me ba ikemisetsa ho rorisa Jehova ka ho kopanela borapeling bo sa silafatsoang ke mokhoa leha e le ofe oa bohata.—Joh. 4:23, 24; Jak. 1:27.

[Litšoantšo tse leqepheng la 5]

Na u tlatsa ntlo ea lillo ka botšo? KAPA

Na u khothatsa ba llang ka tšepo e theiloeng Lentsoeng la Molimo?