Ho Bontša Kameho ka “Mohlape oa Molimo”
“Itlhokomeleng, le hlokomele le mohlape oohle, oo Moea o halalelang o le beileng balebeli ba oona, hore le alose kereke ea Molimo, eo o iphumanetseng eona ka mali a Mora oa hae.”—Lik. 20:28, phet. e ncha.
1. Jesu Kreste o bontšitse kameho e khōlō joang bakeng sa bao a ba tšoantšitseng le linku?
HA HO lea mong lefatšeng ea kileng a bontša kameho e khōlō bakeng sa litho tsa lelapa la motho ho feta Jesu Kreste, ’Mei-mohlala e moholo. O buile ka ba mamelang lentsoe la hae joalokaha e le “linku” tsa hae. ’Me, joaloka Molisa ea Molemo, a tela moea oa hae kapa bophelo bakeng sa bona. (Joh. 10:11, 27) Kamor’a tsoho ea hae bafung, Jesu a hatisa ho moapostola oa hae Simone Petrose bohlokoa ba ho hlokomela “linku’’ tsena ka mokhoa o khethehileng. Hona Jesu o ho entse joang? Ka tsela e ileng ea fela ea susumetsa Petrose bophelong bohle ba hae ba lefatšeng.
2. (a) Ho ea ka Johanne 21:15-17, Petrose o ile a itšoara joang lipotsong tsa Morena oa hae? (b) Jesu a hatisa eng ntlheng ee? Joang?
2 Ka makhetlo a mararo Jesu a botsa Petrose potso e tšoanang: Ka makhetlo a mabeli a botsa: “Simone, mor’a Jona, a ua nthata na?” Ka lekhetlo le leng, Jesu a botsa: “Simone, mor’a Jona, a u nthata haholo . . . ?” Kamor’a ho botsoa potso e le ’ngoe ka makhetlo a mararo, Petrose a hlomoha ’me a hatisa ho Morena oa hae: “U tseba tsohle; u tseba hoba kea u rata.” E, Jesu o ne a hlile a hlokometse lerato la Petrose ho eena. Empa taba ke hore moapostola o ne a tla tlameha ho paka sena ka nako e telele. Joang? Ka ho bontša kameho ka “linku.” Ka lekhetlo le leng le le leng, kamor’a hore Petrose a arabele ka ho lumela potsong e botsoang, Jesu o ne a tiisa taba, a re: (1) “Alosa likonyana tsa ka”; (2) “Lisa linku tsa ka”; (3) “Alosa linku tsa ka.” (Joh. 21:15-17) Kahoo, Jesu ka ho sebetsang haholo ha a hatisa feela kameho ea hae ea botho ka “linku” empa le boikarabelo bo boima ba kamoso ba Petrose ba ho li hlokomela joalokaha Morena oa hae a ile a totobatsa ka khatiso e kaalo.
3. (a) Petrose o fane ka bopaki ba lerato la hae bakeng sa “molisa ea molemo” joang? (b) Ke eng e bontšang hore Petrose o ne a sa ameha a le mong ka “mohlape”?
3 Eo e bile phihlelo e sa lebaleheng ho Petrose. Ntle ho pelaelo, Jesu o ne a fihlile botebong ba pelo ea Petrose. Ha a paka lerato la hae bakeng sa Molisa ea Molemo, Jesu Kreste, Petrose o ne a ke ke a hlokomoloha ho fepa “linku.” Ka lerato le ka phalimeho o ne a tla leka ho alosa “mohlape.” Hoo e ka bang lilemo tse 30 hamorao, Petrose a ngolla “bakhethoa ba jakileng,” ke hore, bao e neng e le barutuoa ba Jesu Kreste. E le karolo ea “mohlape oa Molimo” ba hopotsoa ka ho lopolloa boitšoarong ba bona ba nakong e fetileng bo se nang thuso. Hona ho ne ho finyelletsoe joang? E seng ka theko e theiloeng linthong tse tloaelehileng tse kang silevera, kapa gauda, empa “ka mali a bohlokoa a Kreste, konyana e se nang letheba le sekoli.” (1 Pet. 1:1, 18, 19) Petrose o ne a ile a ananela hore hona e bile theko e boima haholo. Ho ne ho ile ha hloka Jehova Molimo hore a tele mora ea tsoetsoeng a le mong oa hae, eo a neng a mo rōmile lefatšeng lena ho fana ka topollo bakeng sa ba bangata. (Matt. 20:28; Joh. 3:16) Nakong eo ka eona Petrose a ngotseng lengolo la hae la pele, litho tse lopolotsoeng tsa “mohlape” li ne li se li baloa ka likete tse ngata. Joale “linku” li ne li feta palo eo Petrose a ka e hlokomelang a le mong. Hammoho le Petrose, leha ho le joalo, ho ne ho hlahile banna ba bang ba tšoanelehang ba ileng ba bontša kameho ka “mohlape” ka ho o fepa, ho o etella pele le ho o sireletsa. Le bona, ba ananela hore “mohlape” ke oa Jehova. ’Me mehleng ea rōna ntlha ena e hlokomeleha ka ho feletseng ho balisa ba tlase ba moea ba liketekete ba neiloeng boikarabelo ba ho alosa “mohlape oa Molimo” o kalosong ea bona.
4. Ke keletso efe e loketseng eo Petrose a faneng ka eona ka bolisa ha a ngolla banna ba hōlileng phuthehong ea Bokreste?
4 Ha Petrose a ne a bululeloa ho ngola lengolo la hae la pele, ntle ho pelaelo o ne a hopola seo Jesu a neng a se hatisitse mohopolong oa hae le pelong mabapi le ho alosa “linku.” Hona ho totobala mantsoeng a moapostola a khothatso a neng a sa tobisoa feela ho banna ba hōlileng moeeng ba har’a batho ba Molimo ba lekholong la pele la lilemo empa le ba hona joale. Petrose o ngolile: “Ke khothatsa baholo ba ho lōna, ’na ke leng moholo le bona, le paki ea mahlomola a Kreste, le ea nang le kabelo khanyeng e tlang ho senoloa, ke re: Alosang mohlape oa Molimo o ho lōna, le o lebele, e seng ka ho qophelloa, e mpe e be ka ho rata; e seng ka baka le moruo o mobe, e mpe e be ka ho rata; e seng ka ho busa mehlape ea lōna ka thata, e mpe e be ka ho etsetsa mohlape mehlala. ’Me mohla molisa e moholo a hlahang, le tla nka moqhaka oa khanya, o sa boleng.”—1 Pet. 5:1-4.
Ho Hlokomela “Mohlape oa Molimo” ka Lerato
5. (a) Hore a be le molemo, molebeli oa Mokreste o lokela ho ba le boikutlo bofe e le hore a ka phethahatsa boikarabelo ba hae ho “mohlape”? (b) Ke hobane’ng ha molebeli kajeno a ka talima litaba joaloka Petrose?
5 E le paki e boneng ka mahlo ea mahlomola a Kreste, Petrose o ne a susumeletsehile ho hatisa bohlokoa ba ho bontša kameho ka “mohlape oa Molimo.” Joalokaha Molisa e Moholo, Jesu Kreste a ile a bontša kameho e joalo, ho lokela ho be joalo ho bohle ba alosang “mohlape.” Empa molebeli oa Mokreste kannete o ne a ke ke a etsa joalo haeba a ikutloa hore o sebeletsa ka ho qobelloa. Ho se be moholo ea khethiloeng kajeno ea ka ikutloang hore o tlameha ho sebeletsa ka baka la hobane a hatelloa. Le hoja mosebetsi o le mongata o amehang ho jareng boikarabelo bona bo nang le tokelo, molisa ea lerato ea tlase o tla bontša takatso ea ho thusa le ho ba ea sebelisoang. Empa o tla bontša moea oo ha feela a e-na le khopolo e kang eo Kreste Jesu a neng a e-na le eona, a ileng a bontša boikokobetso le boithaopo ho mamella mahlomola. (Ba-Fil. 2:5-8; 1 Pet. 4:1) Haeba moholo a itlhokomela hore ke karolo ea “mohlape” o tlasa tlhokomelo ea Molisa e Moholo, Jehova Molimo, a ikarabella ho Eena le ho Molisa ea Molemo, Jesu Kreste, e seng ho motho e mong, ke hona a ka sebeletsang ka cheseho, a bile a sa belaele. (1 Pet. 2:25) Le hoja ba sa bona ka mahlo mahlomola a Kreste joaloka Petrose, balebeli kajeno ba ratiloe ka litlaleho tse qaqileng tsa Bibele tsa bophelo le tšebeletso ea Kreste. Kahoo ba ka talima litaba kamoo Petrose a li talimang kateng ’me kahoo ba ba le moea o tšoanang le oa moapostola ha ho fihloa ho aloseng “mohlape.”
6. Balebeli ba lokela ho hopola eng ha ba sebetsana le “mohlape”?
6 Ho ba mohlala oa sebele, molisa ea tlase oa Mokreste a se ke a thahasella leruo le fumanoang ka bolotsana kapa ka boikhabi, kapa ka ho fumana botumo bo sa lokelang. ‘Boholo’ leha e le bofe bo amehang bo tla ka hore a fumanehe habonolo ho baena, a atamelehe, a sebeletse lithahasello tsa bona tsa moea. Ba tseba hore “mohlape” ke oa Jehova ea o rekileng ka mali a Mora oa hae, banna ba hōlileng ba beang mohlala ha ba ‘iketse marena holim’a lefa la Molimo.’ Ho e-na le hoo, balisa bana ba tlase ba tšoara “mohlape” ka bonolo le ka ho o sireletsa, kahoo ba latela keletso le mohlala tse fanoeng ke Molisa ea Molemo.—Matt. 20:25-27; Tite 1:7; bapisa Ezekiele 34:2-4; Juda 16.
7. Ke ka litsela life balebeli ba bangata ba bontšang kameho ea sebele ka “mohlape”?
7 Kannete ho ka lumeloa hore balebeli ba bangata ba Bakreste kajeno ba bontša kameho e loketseng ka “mohlape” ka litsela tse sa tšoaneng. Nako le boiteko tse sebelisoang ho fepa “linku,” ka ho fana ka tlhokomelo ea botho ho motho ka mong, le ho okamela libokeng tsa phutheho li fana ka mehlala e metle bakeng sa balumeli ba bang. (1 Tim. 5:17) Hape, nahana ka ketello pele e ntle eo balisa ba seli ba tlase ba e neang tšebetsong ea tšimo, ho batleng batho ba bang ba kang linku le ho etseng barutuoa. (Matt. 28:19, 20; 2 Tim. 4:5) ’Me ho thoe’ng ka kameho e bontšoang ho sireletseng “mohlape” mekheng ea lefatše le ho ba ka bolaeang “mohlape”? (Ba-Ef. 4:11-14; Ba-Kol. 2:8; Juda 22, 23) Ka litsela tsena le tse ling tse ngata “mohlape oa Molimo” o fumana molemo ho ba o alosang ka baka la kameho e lerato bakeng sa boiketlo ba bona ba moea.
Lithuto tsa Bohlokoa ho Rōna Kajeno
8. Ho fana ka khothatso ea moea, moapostola Pauluse o ile a lokisetsa eng lebitsong la baholo ba Efese?
8 Ka ho bala litlaleho tsa Bibele tsa balebeli ba lekholong la pele la lilemo ka seo ba ileng ba se finyella lebitsong la “mohlape,” re khahloa ke mohlala o motle oa moapostola Pauluse. O boetse a khothatsa banna ba hōlileng, joaloka Petrose. Ha a le leetong le eang Jerusalema, Pauluse a bitsa seboka sa banna ba hōlileng ba Efese. Ntle ho pelaelo ba ile ba ananela haholo monyetla oa ho ba le Pauluse, joalokaha balebeli kajeno ba kopana nako le nako ho fapanyetsana liphihlelo tse thusang, ho hahana tumelong le ho amohela khothatso e lerato ea Mangolo.
9. Tlaleho ea Liketso 20:18-21 e bontša joang hore Pauluse e ne e le monna ea itetseng oa Molimo?
9 Re ka ithuta lithuto tsa bohlokoa puisanong ea Pauluse le balebeli bao ba Efese. Tlaleho e ho Liketso 20:17-38 e re nea temoho e tebileng ka mohlala oo moapostola a neng a o beetse baena, ho akarelletsa baholo bao ba Efese. Na Pauluse e ne e le mohlanka ea ipaballang ea neng a thabela feela ho etela likarolong tse fapaneng tsa setereke sa Asia? Le hanyenyane. E ne e le monna ea itetseng oa Molimo ea neng a ‘sebelelitse Morena ka boikokobetso bohle, le ka meokho e mengata, le ka meleko’ ka nako eohle eo a bileng moo. (Lik. 20:18, 19) Ha a ka a checha ho ‘ruta pontšeng le ka matlung,’ ’me hoo a ho etsa har’a likotsi. Leha e le hore o ne a tšohile hore na baahi ba bang ba motse ba ne ba tla re’ng ka eena, kapa litšokelo tse etsoang ke bahanyetsi leha e le bafe. Pauluse a fana ka bopaki bo phethahetseng sebakeng seo.—Lik. 20:20, 21; bapisa Liketso 19:1–20:1; 2 Ba-Korinthe 1:8-11.
Ho Alosa Linakong tsa Mahloriso
10. Balebeli ba bangata ba kajeno ba etsisitse Pauluse joang boitekong ba bona ba ho thusa “mohlape” ho sa tsotellehe mahlomola a botho?
10 Moapostola joale o ne a habile Jerusalema, a sa tšoha letho ke tebello ea hore “litlamo le lihloriso” li mo emetse moo. O ne a itokiselitse ho tela bophelo ba hae, haeba ho hlokahala, e le hore a ka qeta tsela ea hae ka botšepehi ’me a phethe mosebetsi oo a o fumaneng ho Morena Jesu. (Lik. 20:22-24) Oo e bile mohlala o motle hakaakang bakeng sa balebeli bao ba Efese! Pauluse o ne a sa ameha feela ka bao ho hlokahalang hore ba utloe ‘litaba tse molemo’ empa bakeng sa batho ka bomong ba jereng boikarabelo ba ho jala molaetsa ho ba bang. Na ena ha se kameho eo baholo bohle ba khethiloeng ba Bakreste ba lokelang ho ba le eona kajeno? Ka thabo, re na le banna ba etsisang Pauluse ka hore ba ithaopela ho bea bophelo ba bona kotsing ka baka la ‘litaba tse molemo’ le ho sireletsa baena ba bona. Ruri, linaheng tseo ho tsona Bakreste ba hlorisoang haholo, balisa ba bangata ba tšepahalang ka bokhabane ba lutse le “mohlape,” le hoja ho ne ho e-na le tsela ea hore banna bana ba ikarabellang ba ka ea linaheng tseo ba neng ba ka qoba mahlomola a joalo. Ho etsa papiso: Haufinyane moholo ea seng a fetile lilemo-lemo litlamong le lichapo tse sehloho o ile a etela Linaha tse Kopaneng tsa Amerika ho ea koetlisoa ke Mokhatlo oa Watch Tower bakeng sa basebeletsi ba makala. Monyetla o ne o mo bulehetse oa hore a ka ea naheng eo hona joale ho seng mahloriso. Empa a ikhethela ho khutlela naheng eo a neng a e sebeletsa le hoja litlamo le mahloriso a sehloho ho ne ho bonahala li mo tobile moo. Ho tšoana le balisa ba tlase ba bangata, o nka ho hlokomela “mohlape” e le tokelo ea bohlokoa ho feta bolokolohi ba hae ba botho. Kannete, balebeli ba joalo baa babatsoa. Ke hantle hakaakang hore ba ntse ba hlokomela ‘linku tse mahlomoleng’!—Bapisa Esaia 32:1, 2.
11. (a) Ka baka la Liketso 20:25-27, boemo ba Pauluse e ne e le bofe mabapi le molato oa mali, ’me balebeli kajeno ba ka boloka boemo bo joalo joang? (b) Ka ho utloahalang, balebeli ba ikutloa joang ho batho bao ba ba thusitseng hore ba fetohe barutuoa?
11 Ke har’a bao joale e neng e le balebeli Efese moo Pauluse a neng a ile a ‘bolela ’muso.’ Bona ka bobona ba ne ba utloile molaetsa melomong ea hae. O ne a ba tšolletse pelo ea hae le ba bang ho boleleng “morero oohle oa Molimo,” e seng maikutlo a hae. Kahoo letsoalo la hae le ne le hloekile. O ne a ke ke a qosoa ka molato oa mali ka ho hlōleha ho fana ka bopaki. (Lik. 20:25-27) Ho lokela ho be joalo ka balebeli mehleng ena ea teko, bothata le maima ho phetheng mosebetsi oa ho fana ka bopaki ba ’Muso hoohle. Balebeli kajeno baa tseba hore ho hongata ho itšetlehile ka mohlala o chesehang oa bona ho etelleng pele mosebetsing. Ka lebaka lena, ba leka ho ba le karolo e khōlō kamoo ho ka khonehang ho boleleng ‘litaba tse molemo.’ E le hore kahoo, le bona, ba ka hloeka le ho lokoloha molatong oa mali leha e le afe. Ba bang ka phuthehong ba hlokomela hore baholo bana ba nka ketello pele ho lemoseng ba lonya le ho batla batho ba pelo li tšepehang. Ka ho loketseng, balumeli hammoho joalo ba khothalletsoa ho latela mohlala o motle oa bona. Joaloka tabeng ea bao Pauluse a ileng a ba thusa, ba bangata kajeno ba etsang “mohlape” ke batho ba ileng ba fumanoa ka lekhetlo la pele ke balebeli ba neng ba paka sebakeng sa habo bona. Ha joale batho bana ba le ka phuthehong, balebeli ba bontša kameho e khōlō ka bona.—1 Ba-Thess. 1:5, 6; 2:7, 8.
12. Re ka utloisisa polelo ea Pauluse joang e ho Liketso 20:28?
12 Kameho e khōlō ea Pauluse ka banna bao ba Efese ba baholo, hammoho le “mohlape” o kalosong ea bona, e bontšoa ke mantsoe a hae: “Itlhokomeleng, le hlokomele le mohlape oohle, oo Moea o halalelang o le beileng balebeli ba oona, hore le alose kereke ea Molimo, eo a iphumanetseng eona ka mali a Mora oa hae.” (Lik. 20:28, phet. e ncha) E mong le e mong ho banna bana ka sebele o ne a utloa hore hoa hlokahala hore a itlhahlobe ka baka la boikarabelo bo boima bo amehang ho aloseng “mohlape.” Hape, balebeli bao ho ne ho hlokahala hore ba sebelise keletso ea Pauluse ho bona e le sehlopha sa banna ba hōlileng. Ba ne ba tlameha ho sebelisana ho hlokomeleng “mohlape.” Bakeng sa liphello tse molemo haholo, ba ne ba tlameha ho kopana monahanong le ketsong. Hona ka bohona, ho ne ho tla bontša hore ba na le kameho e tebileng bakeng sa “mohlape.”
13. Ho ka thoe’ng ka ho sebelisoa ha Liketso 20:28 kajeno?
13 Ke ho loketseng hakaakang ho sebelisa keletso ea Pauluse molemong oa banna ba hōlileng ba Bakreste kajeno! Hangata, ha balebeli ba tsamaeang ba kopana le baholo ba phutheho, mantsoe a tlalehiloeng ho Liketso 20:28 a sebelelitse e le motheo oa keletso e utloahalang. Ho ke ho hlokomeloe hore se boleloang moo ha se bolele hore motho a itlhokomele eena a le mong. Ho e-na le hoo, sehlopha sohle sa baholo phuthehong e ’ngoe le e ’ngoe se na le boikarabelo ba ho hlokomela litlhokahalo tse tobileng tsa “mohlape.” Hona ke ’nete le hoja moholo e mong le e mong a ka ba le kabelo e tobileng e tlatsetsang sepheong sena se akaretsang. Balebeli ba tlameha ho phethahatsa boikarabelo ba bona ba ho alosa ka phalimeho le ka kameho e lerato, ba hlokomela hore “mohlape” ke ntho e ka liatleng ho Jehova ka baka la theko e lefiloeng ho o reka.—Ba-Ef. 1:7.
Ho o Alosa ho “Liphiri” tse Koenehileng
14. (a) Ke temoso efe e fumanoang ho Liketso 20:29, 30? (b) Ke hobane’ng ha ho ne ho le nakong hore Pauluse a lemose balebeli ba Efese?
14 A tseba se tla hlaha kamor’a lefu la hae le la baapostola ba bang, Pauluse a ntša temoso ena: “Kea tseba hobane, ha ke se ke tlohile, ho tla kena ho lōna liphiri tse bohale, tse sa tlong ho qenehela mohlape; le hobane ho tla tsoa har’a lōna batho ba tla bolela litaba tse khopo, ho ikhulela barutuoa.” (Lik. 20:29, 30) Hamorao, moapostola Petrose a lemosa hore ho tla ba le bo-ramenyetla le ba phahamisang lihlopha tse lihang ba sa rutehang, ba sa ikalosang le ba sa tsitsang. (2 Pet. 2:1-3; 3:15, 16) Ha feela baapostola ba ne ba sa le teng, ba ne ba sebeletsa e le thibelo litšekamelong tse isang moo. Empa Mangolo ka ho hlakileng a hlile a bolela koeneho e khōlō, ’me e ile ea fela ea hlaha qetellong. E ntse e tsoela pele e le Bojakane.—2 Ba-Thess. 2:6-10.
15. (a) Ke hobane’ng ha bao ba alosang “mohlape” hona joale ba lokela ho falimeha? (b) Ka linako tse ling, ke hobane’ng ha ho hlokahala hore baholo ba sebetse ka taelo e fanoeng ho Ba-Roma 16:17-19?
15 ‘Mehleng ena ea bofelo’ Lipaki tsa Jehova tsa Bakreste li hlile li lemosoa ka ho koeneha kapa ho oa. (Dan. 12:4; Matt. 24:9-13) Kahoo, balisa ba tlase ba tšepahalang ba Bakreste ba tlameha ho bontša kameho ka “mohlape” ka ho ba seli. Ba lokela ho falimeha e le hore ba ka sireletsa “mohlape” ho thelleleng litloaelanong tse mpe. (1 Ba-Kor. 15:33) Ho boloka pono e phelang hantle ea moea le boikutlo ha ho bonolo ha ho talingoa likhatello tse sa khaotseng tse tsoang lefatšeng le litšila. Ke ka baka leo motho e mong le e mong ea ka phuthehong a tlamehang ho ela hloko temoso e reng: “Hopolang balisa ba lōna ba le boleletseng lentsoe la Molimo, ’me le etsise tumelo ea bona, le ntse le lemoha qetello ea ho phela ha bona.” (Ba-Heb. 13:7) Ka linako tse ling banna ba hōlileng ba ka ho fumana ho hlokahala ho fana ka keletso ea Mangolo le ho hlokomelisa balumeli hammoho le bona ka ho susumetsoa ke ba ipatlelang lithahasello tsa bona tsa boikhabi le menyaka ho e-na le molemo oa moea oa “mohlape” kaofela ha oona. Taelo e tiileng e fanoeng ke Pauluse ho Ba-Roma 16:17-19 e sebetsa mabakeng a joalo. O itse: “Joale, banab’eso, kea le khothatsa, ke re, le iponele ho ba hlahisang likhaohano le likhopiso ka ho senya thuto eo le ithutileng eona, ’me le ba sesefe. Hobane batho ba joalo ha ba sebeletse Morena oa rōna Jesu Kreste, ba mpa ba sebeletsa limpa tsa bona feela, ’me ba khelosa lipelo tsa ba se nang molato ka lipolelo tse khahlehang le ka tse chachehisang. Empa ho utloa ha lōna ho tsebiloe ke bohle; ke le thabela ke hona, empa ke rata ha le ka ba le bohlale botleng, ’me le be lithoto bobeng.”
Ho Sebetsa Lebitsong la “Mohlape”
16. (a) Ke eng se bontšoang ke ’nete ea hore Pauluse ka nako e ’ngoe o ne a eletsa ka meokho? (b) Ha ba bontša kameho, balebeli kajeno ba sebetsa ka masene ho etsa joang bakeng sa “mohlape”?
16 Kaha Pauluse o ne a tsamaea haholo, o ne a e-na le pono e batsi ka se etsahalang ka liphuthehong tsa mehleng ea hae. O ne a tseba hore ho na le mathata a sa tšoaneng le likotsi. Kahoo hoa utloahala hore o lokela ho phehella banna ba hōlileng ba Efese hore ba falimehe moeeng. Ka lilemo tse tharo Pauluse o ne a bontšitse lerato la hae le kameho ka ho ba eletsa ka ho tsoetseng pele, le ka meokho. (Lik. 20:31) Ka ho totobetseng ho ne ho ameha ho imeloa maikutlong boliseng bo joalo. Ho ne ho hloka Pauluse ho hong ho fana ka tlhokomelo e seli le e lerato joalo. Ha ho makatse, ka baka leo, hore balebeli kajeno ba fihlela ntho e tšoanang ka linako tse ling, haholo ha ba lokela ho sebetsa mathata a tebileng. (Bapisa 2 Ba-Korinthe 2:4.) Maemong a joalo ba amehile haholo ka “mohlape.” Ba sebetsa ka masene ho o boloka o hloekile moeeng o bile o phela hantle, o se na tomoso.—1 Ba-Kor. 5:6; Ba-Gal. 5:7-10; Tite 2:1.
17. (a) Ke ntlha efe ea bohlokoa e ka ithutoang mantsoeng a Pauluse ho Liketso 20:32? (b) Ho bea batho le lithahasello tsa bona matsohong a Jehova ho lumella phello efe?
17 Ka ho bea baholo ba Efese matsohong a “Molimo le ho lentsoe la mohau oa oona,” Pauluse o ne a ikutloa a khotsoe hore ba matsohong a molemo haholo. (Lik. 20:32) Ho joalo le kajeno, ha balebeli ba entse sohle se matleng a bona ho faneng ka keletso le thuso, kapa ka ho nka mehato leha e le efe ea khalemelo e khothalletsoang ke Mangolo, ba sia litaba matsohong a Molimo. Maemong ao ho oona baena le likhaitseli tsa rōna ba ratoang tumelong ba tlakiloeng ke mathata a tebileng, ka mehla ke ho tšelisang ho tseba hore ka ho ba bea bona le lithahasello tsa bona matsohong a Jehova ka thapelo le ho tlohella Lentsoe la hae, moea le phutheho li fane ka tsamaiso e hlokahalang, se tla hlaha se tla ea ka thato ea hae. Tlas’a maemo ao, eng kapa eng e etsahalang e tla be e lumelletsoe ke Molimo. (Bapisa 1 Petrose 2:23.) Hape, hona ho bontša ho ameha ka “mohlape,” hobane ho lebisa tlhokomelo ho Ea ka etsang molemo o moholo haholo boemong bo bong le bo bong.
18. (a) Pono ea Pauluse e ne e le efe ka litokisetso tsa hae tse bonahalang? (b) Ka ho etsisa mohlala oa Pauluse ho sena, balebeli ba bontša kameho ka mohlape joang?
18 Ka letsoalo le hloekileng, Pauluse o ne a ka supa bopaki ba hore ha a ka a ithuisa ka baena ba hae. O ne a sebelitse ka matsoho a hae ’me kahoo a khotsofalitse seo a se hlokang. (Lik. 20:33, 34) Ke ’nete, ha a ne a hloka o ile a amohela ho hong ho tsoang ho Bakreste ba Filippi. O ne a sa qolotse limpho tse joalo, empa, ho e-na le hoo, tholoana e amanang le ho fana ho joalo. (Ba-Fil. 4:14-17) Kaha Pauluse o ne a le mahlaha-hlaha ’me a sa sebeletse ho rua ka bolotsana, kahoo balebeli ba mehleng ea rōna ba ka bea mohlala o motle ka ho bontša hore ha ba botsoa, kapa hore ba batla ho qoba mosebetsi o boima. Kameho ea bona ka “mohlape” e ba thibela ho fetoha moroalo phuthehong.—2 Ba-Thess. 3:6-10.
19. Ho sebetsa tumellanong le motheo o boletsoeng ho Liketso 20:35 ho na le phello efe ho balebeli le phutheho ka kakaretso?
19 Ba hlokometse seo Pauluse a neng a se bontšitse bophelong le tšebeletsong ea hae, balebeli bao ba Efese ba ne ba e-na le hoo ba ka ho latelang ha ba leka ho thusa ba fokolang le ho itela ho haheng phutheho. Ba sebetsa tumellanong le motheo oa hore “ho nea ke leseho le fetisang la ho fuoa,” balebeli ba kajeno ba Bakreste ba fana ka mohlala o motle bakeng sa ba bang. (Lik. 20:35) Ka sebele, ha ba fane haholo feela empa ba fana ba sa khaotse. Ho ’na ba etsa joalo ho tlatsetsa thabong ea bohle ka phuthehong ea Lipaki tsa Jehova.
“Lipelaetso tsa Likereke Tsohle”
20. Petrose le Pauluse ba ne ba amehile ka “mohlape” ho fella kae?
20 Ho totobetse hore mehlala e metle e fanoeng ke baapsotola ba tšepahalang ba kang Petrose le Pauluse e bile e tsotehang. Ba itella Bakreste bahabo bona ’me ba bontša kameho e tebileng bakeng sa kopano eohle ea baena e seng bakeng sa phutheho e le ’ngoe feela. (1 Pet. 2:17) Ho sa tsotellehe litšitiso tse ngata, mathata le liteko, baapostola ba boloka boiketlo ba moea ba “mohlape” e le bona bo ka sehloohong kelellong.
21. (a) Ho ea ka 2 Ba-Korinthe 11:23-28, tse ling tsa lintho ‘tse kantle’ tseo Pauluse a li utloileng ke life? (b) Pauluse o bontšitse kameho ea hae e tebileng joang bakeng sa ba bang?
21 Ha a ngolla balumeli bahabo Korinthe, Pauluse o boletse lichapo, litlamo, meleko le likotsi tse sa tšoaneng tseo a neng a thulane le tsona ha a sebeletsa e le mohlanka. Moapostola joale a phaella: “Leha ho sa baloe litsietsi tse tsoang kantle, ke likiloe ka matsatsi ’ohle ke lipelaetso tsa likereke tsohle.” (2 Ba-Kor. 11:23-28) Re ka itekanyetsa feela likhatello tseo Pauluse a bileng le tsona le kameho eo a e utloileng ka “likereke tsohle,” kaha o ne a ntse a kopana le metsoalle e ’maloa ea Bakreste. (2 Timothea 4:9-13) O ne a tsamaea haholo maetong a hae a boromuoa ’me a etsa maeto a ’maloa a ho boela liphuthehong. (Lik. 15:36) Liketso tsa hae lebitsong la ba bang li ne li le boima ka sebele. O ne a fana ka lipuo tse telele ’me nako le nako a paka masynagogeng, libakeng tsa pontšeng le ka ntlo le ntlo. (Lik. 17:2; 19:9, 10; 20:20) Ho hlokomela seo a se hlokang nameng le ho qoba ho imetsa phutheho, ho ne ho hlokahala hore Pauluse a sebetse mosebetsi oa boipheliso. (Lik. 18:1-3; 2 Ba-Thess. 3:8, 9) Ka ho totobetseng, moapostola o ne a boetse a nka nako e telele a ithuta lentsoe la Molimo, ’me tsebo e fumanoang ka tsela eo ntle ho pelaelo e ne e mo sebeletsa hantle ha a bululeloa ke Molimo ho ngola libuka tse ka bang 14 ho tse 27 tse etsang Mangolo a Bakreste a Segerike. Kannete, Pauluse e ne e le monna ea tšoarehileng haholo, empa a ’na a tsoela pele, kamehla a bontša kameho e khōlō ka “mohlape.”
22, 23. (a) Mehleng ea rōna, tse ling tsa litsela tseo ka tsona ho etsoang tokisetso bakeng sa “mohlape oa Molimo” ke life? (b) Litokisetso tsena tsohle li fana ka bopaki ba eng, ’me re ka ameha joang ka baka leo?
22 Kajeno ho na le mosebetsi o mongata o etsoang lebitsong la “mohlape oa Molimo.” Ka liphutheho tse fetang 42 000 tsa batho ba Jehova, nahana ka tlhokomelo e lokelang seo ba se hlokang. Mophula o phallang ka mehla oa lijo tsa moea o ntse o lokisetsoa ke “mohlanka ea khabane, ea bohlale.” (Matt. 24:45-47) Mananeo a liboka tsa phutheho, likopano tsa potoloho le tsa setereke a lokisetsoa ka mehla ho nolofaletsa Bakreste ho kopana hammoho bakeng sa thuto e hahang moeeng, borapeli le botsoalle. (Ba-Heb. 10:23-25) Balebeli ba tsamaeang ba rōmeloa ho etela le ho hlokomela se hlokahalang ka ho khethehileng liphuthehong tsohle. (Bapisa Liketso 16:4, 5.) Mangolo a nang le keletso le khothatso a rōmeloa liphuthehong le lihlopha tsa baholo. (Bapisa Ba-Filippi 1:1; 1 Petrose 5:12; Juda 3.) Litokisetso tse ling, tse ngata haholo hore li ka lokolisoa, li etsoa ho fumantša “mohlape oa Molimo” molemo moeeng le ka mekhoa e meng.
23 Mosebetsi ona o ama nako e ngata haholo, boiteko le chelete. Empa ke bopaki ba eng? O bontša hore Jehova o hlokomela batho ba hae. Ka Mora oa hae, Molisa ea Molemo, Molimo o bontša matla a phahameng ka ho fetisisa a bolisa. (Esa. 40:10, 11) Mashome a likete a khethiloe ke moea o halalelang ’me ba kopanela ho aloseng “mohlape oa Molimo.” Hona hohle ho bontša kameho e lerato ka “mohlape” kaofela le bakeng sa motho ka mong ba etsang “mohlape.” E se eka rōna ka bōrōna re ka bontša kananelo e tlohang botebong ba pelo bakeng sa lerato le bontšitsoeng ke Molisa e Moholo, Jehova Molimo, le Mora oa hae, Jesu Kreste, tlhokomelong eohle ea bona e bonolo bakeng sa rōna.
[Setšoantšo se leqepheng la 14]
“Alosa likonyana tsa ka”