Balehela ’Musong oa Molimo!
1. Lengolong la Pauluse le eang ho Ba-Heberu, ho hlokomeleha eng e amanang le pholoho?
MOAPOSTOLA Pauluse, lengolong la hae le eang ho Baheberu, o na le lintho tse ling tsa bohlokoa tseo a li buang mabapi le ho pholoha. O nka litšobotsi tse peli: lintho tse ka bolokoang le lintho tse ka qojoang. Ha a tšehetsa khang ea hae, nako le nako o qotsa Mangolong a Seheberu, ao babali ba hae ba nakong eo—Bajode ba neng ba fetohile Bakreste—ba neng ba tloaelane le oona haholo.
2. Pauluse o bapisitse Mor’a Molimo le mangeloi joang, hona ho isa qetong efe?
2 Khaolong ea pele ho Ba-Heberu, Pauluse o hatisa boemo bo phahameng ba Mora oa Molimo holim’a mangeloi. Joale moapostola o re: “Ka baka leo, e ka khona [rōna Bakreste] re ele ka ho fetisisa litaba tsee re li utloileng hloko, e se be ra [hoholehela hole] le tsona. Hobane ha esitile lentsoe le boletsoeng ka mangeloi le sa ka la lesa ho tiea, . . . ana re tla phonyoha joang, ha re sa hlokomele poloko e kalo, e neng e qale ho boleloa pele ke Morena [Jesu Kreste], . . . ?” Ba-Heb. 2:1-4, bapisa le NW.
3. (a) Tšepo ea poloko ka Kreste Jesu e molemo ho feta tšepo efe e ’ngoe, hona ka litsela life? (b) ‘Tšepo ena e molemo’ e tsamaea le eng? (c) Ho hlokahala eng, le haeba re na le tšepo ea leholimo kapa ea lefatšeng?
3 Tšepo ea poloko e fanoeng ka Jesu Kreste e molemo haholo le ho ba khōlō haholo ho feta se nehelanoeng ka Molao se “boletsoeng ka mangeloi” Thabeng ea Sinai. (Ba-Gal. 3:19) Se molemo hobane se theiloe ‘selekaneng se molemo haholoanyane . . . se theiloeng litšepisong tse molemo haholoanyane,’ sehlabelo se molemo haholo (se entsoeng ‘hang bakeng sa ka mehla,’ se fana ka ‘tšepo e molemo’) le boprista bo phahameng, bo tsoanang le ba Melkisedeke. (Ba-Heb. 7:15-25; 8:6; 9:23-28) Leha ho le joalo, hammoho le ‘tšepo e molemo haholoanyane’ ena ho na le boikarabelo bo boholoanyane. Kahoo, ho hlokahala hore re ele hloko haholo le ho ba hlokolosi hore re se hlokomolohe, ra ‘hoholeha.’ Le hoja mona ho boleloa ka poloko ea leholimo, boikarabelo bo joalo bo holim’a ba tšepileng polokeho ea lefatseng tlas’a ‘muso oa Molimo.
4 Ho hoholeha ho bolela eng, ’me hona ho ka sebetsa joang ho Bakreste?
4 Ho hlokahala boiteko bo bokae ho hoholeha? Ba letho. Ha re le nōkeng, leha e le ka seketsoana kapa ka metsing, re hoholelloa feela ke leqhubu. Ho joalo le bophelong ba sebele. Haeba rōna joaloka Bakreste, re qala ho hoholeha, re ea le tšusumetso efe le efe e ka fetang tseleng ea rōna, e bang ke ka ntle kapa ka litšekamelo tseo re li futsitseng. Re qala ho felloa ke kananelo bakeng sa lintho tsa moea. Hona ho ka tsoela pele hanyane-ka-hanyane ’me ho lokela ho alosoa. Ho seng joalo, re tla be re se re sa ‘itšoarella bophelong ba sebele’ ’me re tla ba kotsing ea ho lahleheloa ke bophelo ho hang. (1 Tim. 6:19) Joalokaha Pauluse a totobalitse, re ka pholoha joang liphello tse qetellang haeba boikutlo le tsela ea ho se tsotelle li sa hlahlojoe?
5. Re hlokomelisoa ka boemo bofe bo kotsi ba pelo ke mantsoe a mang a Pauluse ho Bakreste ba Baheberu?
5 Ka mantsoe a tsoelang pele a moapostola ho Bakreste ba Baheberu, re falimehisetsoa tsela e kotsi haholoanyane. O ngolile: “Banab’eso, iponeleng, e se be e mong ho lōna a ka ba le pelo e mpe ea ho se se lumele, e mo [suthisetsang hole le] Molimo o phelang; le mpe le khothatsane ka matsatsi ’ohle, ha ho sa ntsane ho thoe: Kajeno! e se be e mong ho lōna a ithatafatsa ka thetso ea sebe.”—Ba-Heb. 3:12, 13, bapisa NW.
6. (a) Ho boleloa eng ka “ho suthela hole” le motho? (b) ‘Ho suthela hole le Molimo o phelang’ ho bakoa ke eng, ’me ho ka qojoa joang?
6 Ho hoholeha ha ho hloke boiteko; empa ho “suthela hole” le e mong ho hloka ketso e tiileng. Le hoja mohlomong re sa ntsane re shebile ka ho motho eo ka boiteko ba hore a ’ne a re rate, leha ho le joalo ra qala ho checha ho eena. Ke hobane’ng ha motho a ka qala ho ‘suthela hole le Molimo o phelang’? Karabelo ke hore: Ka baka la ho haelloa ke tumelo. Joalokaha se fuperoeng ke taba se bontša, Pauluse ha a bue ka tumelo e fokolang e hlahisitsoeng ke tsebo e sa fellang kapa kutloisiso e sa nepahalang. Ho e-na le hoo, o qotsa temoso: ‘Le se thatafatse lipelo tsa lōna.’ Ke se ileng sa etsoa ke Baiseraele ba nama lefeelleng, le hoja moo ba ne ba bone ‘mesebetsi ea Jehova ka lilemo tse mashome a mane,’ ba ’nile ba thabela litokisetso tsa mohlolo le tšireletso ea hae. (Ba-Heb. 3:7-11) Kahoo, Bakreste bohle ba ’nete kajeno ho hlokahala hore ba ’ne ba thusane le ho khothatsana e le hore ba ka qoba ho chechela morao ka baka la ho “ithatafatsa ka thetso ea sebe.” Re khothatsane hore re boloke tumelo ea rōna e phela. Joang? Ka mesebetsi ea tumelo. Hopola, Abrahama a etsa ka kutlo ka tumelo tlas’a teko e matla ’me kahoo ‘a bitsoa motsoalle oa Jehova.’ Rōna, re le lipaki tsa Jehova kajeno, re tla hlōla feela haeba “re tiisetsa ho fihlela bofelo.”—Ba-Heb. 3:13, 14; Jak. 2:21-26.
7. Ho ea qetellong ea lengolo la hae ho Baheberu. Pauluse o bontša joang hore boikarabelo bo ho Bakreste bo boholo ho feta bo neng bo beiloe ho Baiseraele ba tlhaho?
7 Ho ea qetellong ea lengolo la hae le eang ho Baheberu, Pauluse o phea khang eona eo e kang e ho Ba-Heberu 2:1-4. O bontša boikarabelo bo boholoanyane bo ho Bakreste, ha ho bapisoa le Baiseraele ba boholo-holo ba tlhaho. Leha ho le joalo, o sebelisa tlhaloso e matla haholoanyane, a re: “Hobane ba nyelisitseng ea neng a bua le bona a le lefatšeng, ha ba sa ka ba phonyoha, haholo-holo rōna re ka phonyoha joang ha re furalla ea buang le rōna a le maholimong?”—Ba-Heb. 12:25.
8, 9. (a) Ke eng se amehang ho furalleng motho, ’me, litabeng tsa moea, hona ho ka isa phellong efe? (b) Ke joang hona hobane’ng ha re lokela ho tebisa litemoso tsee pelong? (c) Ho tla etsahala joang ha re amohela taeo ea Molimo?
8 Ho furalla motho e mong ho bolela ho sokoloha ka ’mele ka morero ’me hangata ho supa ho lahla. Bona ke boikutlo le tsela e nkiloeng ke Baiseraele ba nama e le sechaba ho tla fihlela mehleng ea Malakia, ha Jehova a re ho bona: “Ha e sa le mehleng ea bo-ntat’a lōna, la kheloha litaelo tsa ka, ’me ha lea ka la li boloka.” (Mal. 3:7) ’Me haeba Mokreste ea tlotsitsoeng, Moiseraele oa moea, a nka mehato ena e tsoelang pele ka bobe, phello e tla ba efe? Kotsi e khōlō ea hore o tla oela sehlopheng seo Pauluse a ngolileng ka sona, a re: “Ba seng ba kile ba bonesetsoa . . . bao ha ba [furalla] ha ho kamoo ba ka boelang ba nchafatsoa hore ba boele ba bake.” (Ba-Heb. 6:4-6 bapisa NW) Koana, ke Jehova Molimo feela le Kreste Jesu ba ka lekanyetsang ha motho a se a fihlile moo ho leng thata ho mo tsosetsa pakong hape.
9 Re tebise litemoso tsena pelong. Ho felloa ke tumelo ho ka ’na ha qala ka hore re nke lintho ka tloaelo, re bontše moea oa boiphapanyo, ho hoholeha ho sa hlokomeleheng. Bohato bo le bong bo fosahetseng kapa boikutlo bo isa ho bo bong habonolo ho fihlela ha re se re le hole haholo, ’me re fumane hore re oetse hole ho isa moo re ke keng ra khutla. Pele hoo ho etsahala ntle ho pelaelo Jehova o tla re laea, e leng hoo Pauluse a buang ka hona hona lengolong lena e leng keletso eo re lokelang ho e amohela ka bohlale. Pauluse a ngolla Bakreste bao ba Ba-Heberu: “’Me le lebetse khothatso ea Molimo kamoo o buang le lōna, ka hore, le bana ba oona, ha o re: Mora oa ka, se nyatse taeo ea Morena, ’me u se ke ua tepella ha u khalemeloa ke eena; hobane Morena o ee a laee eo a mo ratang, ’me a shape mora e mong le e mong eo a mo amohelang . . . Empa taeo ha e hlahela motho, ha ho bonahale kamoo e ka mo thabisang kateng; ea mo llisa; empa hamorao, ba rutoang ke eona e ba kotulisa khotsong litholoana tsa ho loka.”—Ba-Heb. 12:5-11.
10. Ke hobane’ng ha re sa tšoanela ho nka baena ba rōna ba moea kapa rōna ka bōrōna hampe?
10 Ka sena, re se etse qeto ea hore Pauluse o ne a e-na le maikutlo a mabe ka baena ba hae ba moea. Leha e le hore rōna kajeno re ka italima kapa ba bang ka phuthehong ka tsela eo. Esita le kamor’a hore moapostola a bolelle Bakreste bao ba Baheberu hore ‘ba fetohile ba botsoa kutlong ea bona’ ’me ba ‘hloka lebese, e seng lijo tse thata’—’me kamor’a ho lemosa ka ba furallang hoo ba sa bakeng—o re: “Empa leha re bua joalo, ha e le bakeng sa lōna, baratuoa, re tšepile tse fetisang tseo ka botle, tse tšoanelang poloko.” Pauluse joale o fana ka khothatso e ntle “le mpe le be balateli ba ba ruileng lipallo ka tumelo le ka sebete.”—Ba-Heb. 5:11, 12; 6:4-6, 9-12.
HO BALEHA BABYLONA
11. Ke boprofeteng bofe moo Daniele a ileng a bululeloa ho bolela pele ho nako ho pholoha ha sechaba sa Molimo?
11 Lebaka le ka sehloohong la ho baleha leha e le hofe ke ho balehela sebaka kapa boemo bo kotsing ’me u etsa joalo ka kutloisiso ea hore ho potlakile. Na hoa hlokahala ho nka bohato bo joalo kajeno? Ho joalo ruri. Ho tiisang boemo bo thata boo Bakreste ba iphumanang ba le ho bona hona joale ke mantsoe ana ao moprofeta Daniele a ileng a bululeloa hore a a ngole: “Mehleng eo, Mikaele, khosana eo e kholo, e emelang bara ba sechaba sa heno, o tla hlaha, ’me matsatsi a matsoalo a tla ba teng, ao a joalo a e-song ho be teng e sa le lichaba li hlaha, ho tla fihla nakong eo; empa mehleng eona eo, sechaba sa heno se tla bolokeha, e leng bohle ba ngoliloeng bukeng.” (Dan. 12:1) E, sechaba sa habo Daniele—ha e le hantle sechaba sa Molimo—se tla pholoha. Ke tiiso e babatsehang hakaakang!
12. (a) Jesu o buile ka boprofeta boo ba Daniele neng? (b) Ke neng hona lebitsong la bo-mang Mikaele a hlahileng le ho bontša matla a hae?
12 A supa phethahatso e khōlō le e ka sehloohong mehleng ea rōna, ‘mehleng ea bofelo,’ Jesu o ile a supa mantsoe ao ha a fana ka boprofeta ba hae bo boholo bo tlalehiloeng ho Mattheu khaolo ea 24. O itse: “Mahlomola a tla ba maholo, ha e sa le le tšimolohong ea lefatše, ho fihlela joale, tsietsi e kalo ha e e-so ho ka e e-ba teng, ’me ha e ka ke ea boela ea e-ba teng.” (Dan. 12:4; Matt. 24:21) Ho tloha ka 1914 C.E. Jesu Kreste e bile khosana ea leholimo, Mikaele, e emeng ’me ea bontša matla a eona lebitsong la batho ba Molimo kajeno. Ke bafe? E seng Baiseraele ba nama, empa masala a Baiseraele ba moea ‘ba lebollo la pelo, le etsoang Moeeng, e seng letere e ngotsoeng.’—Ba-Roma 2:29.
13. Ke ho tloha neng masala a Baiseraele ba moea a bilelitsoeng ho baleha ho Babylona e Moholo, ’me boemo ba oona pele ho moo e ne e le bofe?
13 Leha ho le joalo, haholo ho tloha ka 1919 C.E. masala ana a tšepahalang le a hlatsoitsoeng a utloile pitso: “Balehang, lōna ba leng naheng ea Leboea, . . . Sione, u phonyohe, uena ea ahileng ha morali oa Babylona.” (Zak. 2:6, 7; Jer. 51:45) Pele ho nako eo le nakong ea Ntoa ea I ea Lefatše, masala ana a ne a bile litlamong ho Babylona e Moholo, ’muso oa lefatše oa bolumeli ba bohata.
14. (a) Ke bo-mang ba “ngoliloeng bukeng”? (b) Na ho na le ba bang ba pholohang timetso ’me, haeba ho joalo, ke bomang?
14 Joalokaha Daniele a boleletsoe, e mong le e mong ho masala ana o ‘fumanoa a ngoliloe bukeng.’ Ke karolo ea phutheho ea ‘matsibolo a ngoliloeng maholimong.’ (Ba-Heb. 12:23; bona hape Malakia 3:16.) Ho phaella ho bana ba pholohang ho timetsoa ha ba khopo, ho na le “bongata bo boholo” boo e seng Iseraele oa moea, empa bao e leng “basele” ka papiso. Leha ho le joalo bana, le bona, ‘ba rata lebitso la Jehova’ ’me ba fetohile bahlanka ba tšepahalang ba hae. Ka litebello life? Jehova oa arabela, a re: “Ke tla ba tlisa thabeng ea ka e halalelang, ke ba thabise ka tlung ea ka ea thapelo.” Bana ba “bongata bo boholo” ba etsetsa Molimo tšebeletso e halalelang tempeleng ea hae. Ba pholoha ‘mahlomola a maholo’ ’me ba isoa “lilibeng tsa metsi a bophelo.”—Esa. 56:6, 7; Tšen. 7:9-17.
15. Ke temoso efe ea ho qetela e fanoang ka ho baleha Babylona e Moholo?
15 Bakeng sa ho tiisoa ha boprofeta bona, re bala ho ea pele bukeng ea ho qetela ea boprofeta ba Bibele, e tobisitsoeng ho batho ba Molimo ba kajeno. E fana ka temoso e qetellang mabapi le Babylona e moholo, ’muso oo oa bolumeli ba bohata ba lefatše, ka mantsoe ana: “Tlohang ho eena, lōna sechaba sa ka, le se tšohe le kenella libe tsa hae, ’me la oeloa ke likotsi tsa hae. Hobane libe tsa hae li se li kolohane ho ea fihla leholimong, ’me Molimo o hopotse makhopo a hae. . . . Likotsi tsa hae li tla hlaha ka tsatsi le le leng . . . ’me o tla chesoa ka mollo; hobane o matla, Molimo o mo ahlolang.”—Tšen. 18:4-8.
16. (a) Ke hobane’ng ha ho ka boleloa hore ho sa na le nako ea ho pholoha timetso ea Babylona e Moholo? (b) U ka balelloa joang le bao Molimo o ba bitsang “sechaba sa ka”?
16 Nako ea ho pholoha e sa le teng! Temoso ea ho baleha e utloahatsoa ka matla le ka ho hlaka. Ke molaetsa o potlakileng o boleloang ke Lipaki tsa Jehova. Ka lekhetlo lena ha ho che ntlo e le ’ngoe. Ho e-na le hoo, “motse” kaofela o tla tuka malakabe. Hang ha mollo oo o qhoma, nako e tla be e ile ea ho baleha. Bao e leng Bababylona pelong ha ba arabele e bile ba ke ke ba arabela temoso. Empa monyetla o sa le teng bakeng sa ba bang ho bontša hore pelong ba batla ho sebeletsa Jehova Molimo ka botšepehi ‘musong oa hae tlas’a Kreste Jesu. Kahoo ba sa ntsane ba na le nako ea ho bontša hore ka nepo ba ka balelloa har’a bao Molimo o ba bitsang “sechaba sa ka.” Bana ba memeloa ho ba “linku tse ling,” tse etsang karolo ea ‘mohlape o le mong tlas’a molisa a le mong.’ (Joh. 10:16) Ka thabo, ka tšebeletso ea hao e tlohang botebong ba pelo ho Jehova le ho tšepahala ’musong oa hae le uena, u ka balelloa le sechaba sa Molimo.
BALEHELA MOTSENG OA MOLIMO—SIONE
17. Jehova o etselitse ba pholohang tokisetso efe?
17 Joalokaha ho boletsoe pelenyana, hase feela taba ea ho pholoha sebakeng kapa boemong bo kotsi haholo. Hape ho na le taba ea ho fumana le ho thusoa ho ea sebakeng sa tšireletso. Na “Mopholosi” e moholo o elelletsoe see? Na o hlokomelisitse batho ba hae ho baleha ‘motseng’ o tla tloha o senngoa ke mollo, e le hore feela a ba tlohele ba lelera lefeeleng? Hlokomela karabelo e fanoeng Lentsoeng la hae: “’Me ho tla bolokeha e mong le e mong ea rapelang lebitso la Jehova; hobane thabeng ea Sione le Jerusalema ba phonyohileng ba tla ba teng, joale ka ha Jehova a boletse; ’me ho ba phetseng, ba bang ke ba tla bitsoa ke Jehova.”—Joele 2:32.
18. Motse moholo oa khale oa Iseraele o na le se tšoanang le oona joang kajeno?
18 Kahoo Bibele e bolela ka metse e ’meli—oo ho ka baleheloang ho oona le oo re ka fumanang setšabelo ho oona le ba bang ba bangata. Motse moholo oa khale oa Iseraele, hangata o boleloa e le Sione, kapa Jerusalema, o tšoantšang “Jerusalema oa leholimo,” o emeloa lefatšeng ke masala a sehlopha sa “mohlanka ea khabane, ea bohlale” seo Jesu a buileng ka sona ho Mattheu 24:45-47. (Ba-Heb. 12:22) Jehova o bululetse bahlanka ba hae ba bangata ba tšepahalang ba khale ho fana ka mantsoe a khothatso le tataiso bakeng sa bohle hore ba balehele ’musong oa hae.
19, 20. Ke tataiso efe le khothatso tse fanoeng ka Esaia (a) ho Esaia 2:2-4, le (b) Esaia 26:1-4?
19 Esaia e ne e le e mong oa bahlanka bana ba tšepahalang, ’me a bolela pele ho nako ka nako e thabisang ka ho fetisisa, ka mantsoe ana: “Lichaba tse ngata li tla ea, li re: Tlong, re nyoloheleng thabeng ea Jehova . . . o tle o re rute mekhoa ea oona, re tsamaee litseleng tsa oona; hobane molao o tla tsoa Sione, lentsoe la Jehova le tsoe Jerusalema.” Tlas’a molao oo le lentsoe ba ne ba tla ithuta hore na ba phele ka khotso joang ba se ‘ke ba hlola ba ithuta ho loana.’—Esa. 2:2-4; bona hape Sofonia 2:3.
20 Hamorao boprofeteng ba hae, Esaia a bululeloa ho fana ka lintlha tse qaqileng ka hore na hona ho tla finyelloa joang, a re: ‘Ka tsatsi leo, ho tla binoa sefela sena naheng ea Juda: Re na le motse o matla, Molimo o re nea thuso, e be lerako le tširelo ho rōna. Bulang menyako, hore sechaba se lokileng, se bolokang botšepehi, se tle se kene. Ea pelo e tiileng u tla ’moloka khotsong e fetisisang, kahobane o u tšepile. Le tšepe Jehova, ka mehla eohle, hobane Jehova, Jehova, ke lefika la ka mehla eohle.”—Esa. 26:1-4.
21. Paradeise ea moea e hlalosoa ka mokhoa o memang joang ho Esaia 61:4-11?
21 Ho ea qetellong ea boprofeta ba hae, ’me a atolosa pono ea hae hore a nke naha eohle ea Sione, Esaia a hlalosa ka mantsoe a khanyang paradeise e tsosolositsoeng ea moea moo bohle ba pholohileng ba tla thaba ho ‘lithako tsa khale.’ Hase feela hore Baiseraele ba moea ba tla etella pele ho sena, empa ho boleloa hore “balichaba ba tla ba teng, ba alose mehlape ea lōna; bana ba basele ba tla le lemela, ba le hlomele merara.” Boprofeta bo joalo bo bua haholo ka topollo e feletseng le tokoloho, e seng ‘ho tsoa ka lesoba la mohasoa.’ Ka baka leo, bohle ka thabo re ka kopanela le masala a “mohlanka” oa Jehova ea tlotsitsoeng ea tšepehang polelong ena ea thoriso: “Ke tla ithabela ho Jehova, moea oa ka o nyakalle ho Molimo oa ka.”—Esa. 61:4-11.
22. (a) Motheong oa botho, ho entsoe tokisetso efe bakeng sa ho pholoha? (b) Ho fumana molemo oa sena, re lokela ho nka karolo efe?
22 Le hoja u ka lumela hore seo re buileng ka sona ho tla fihlela mona ke ’nete ka batho ba Molimo ka kakaretso, mohlomong u ipotsa hore na se u ama joang ka bouena. Na u batla ho balehela bothata bo le bong kapa a sehlotšoana a botho? Ke mang eo ho seng joalo ka eena? Ke ’nete polelo eo, ka botho, e reng bophelo ke leeto le tlohang boseeeng ho ea lebitleng. Na pholoho ha e teng ho tloha botlamuoeng ba sebe le lefu? Ho khahlisang, sebe le lefu li boleloa e le marena, ’me li tla felisoa ka bobeli. (Ba-Roma 5:14; 6:12) Ha a ngolla Bakreste bahabo, moapostola Pauluse o hlalosa kamoo tsela e isang pholohong e butsoeng, ke hore, “ka topollo e leng ho Jesu Kreste.” Hobane ‘Molimo o ’meile e le pheko ho ba lumelang maling a hae.’ (Ba-Roma 3:24, 25) E, ka ho lumela sehlabelong seo se phekolang, re ka hauheloa ke Molimo. Re sa ntsane re sa phethahala ’me ho hlokahala re kope tšoarelo ea libe tsatsi le leng le le leng. Empa litšekamelo sa rōna ha ho hlokahale hore li buse ka ho lokoloha bophelong ba rōna. Pauluse o ngolile: “Sebe se se ke sa busa ’meleng ea lōna e shoang. . . . Hobane sebe se ke ke sa le busa.” Ho re thusa ntlheng ena, Molimo o lokiselitse thuso ka Lentsoe la oona le bahlanka ba hae ba tšepahalang, le ka moea oa hae o halalelang.—Ba-Roma 6:12-14; 8:11; Jak. 5:14, 15.
23. Ke tebello efe e khōlō ka pel’a rōna, hona tlas’a borena ba mang?
23 Hape, ka nqaane ho ‘linako tsena tse thata ho sebetsana le tsona’ le ha ‘tsamaiso ea lintho’ ea Satane e se e felisitsoe ho hang, ke tebello e khanyang hakaakang e phetlehang ka pel’a rōna! (2 Tim. 3:1; 2 Ba-Kor. 4:4) Sebe le lefu li ke ke tsa hlola li rena. Ho e-na le hoo, ho pholohela tokolohong e tletseng le ea ka mehla ho tla be ho phethahetse. Ha Kreste le majalefa hammoho le eena ba kene moputsong oa bona oa leholimo, joale “tse bōpiloeng li tla holloa bohlankeng ba tšenyeho li tle li be tokollong ea khanya ea bana ba Molimo.” Kreste Jesu “e ka khona a buse a tle a be a bee lira tsohle ka tlas’a maoto a hae. Sera se tlang ho felisoa morao-rao ke lefu.” Ke thabo e kaakang e tlelang bapholohi bohle ba tšepahalang—ba balehelang ’musong oa Molimo! Thoriso eohle le teboho li be ho Jehova, “Mopholosi e moholo”!—Ba-Roma 8:19-21; 1 Ba-Kor. 15:25, 26.
Ea lutseng sephiring sa Mookameli ea phahameng, o phomola moriting oa Ea matla ’ohle. Ke re ho Jehova: U setšabelo sa ka le qhobosheane ea ka, Molimo oa ka oo ke o tšepang!—Pes. 91:1, 2.