“Ngoan’a Tali, o Tsejoa ka Mereto”

E Seng Tabeng ea Asa!

NTAT’AO o ne a le joang? Kapa, haeba u mosali, ’m’ao o ne a le joang?

Polelo e tloaelehileng ea Sesotho ke hore “Ngoan’a tali o tsejoa ka mereto.” Maikutlo a joalo a teng le Sejeremaneng Der apfel fällt nicht weit vom Stamm. (Apole ha e oele hole haholo le kutu.) Lipolelo tsena li hlaha ’neteng ea hore ngoana hangata o ba le litšobotsi le maikutlo ao motsoali oa hae a bileng le oona pele ho eena.

Na ho joalo ka uena? Mohlomong batho ba bile ba bolela hore u etsa kapa u nahana joaloka motsoali oa hao. Na u khahlisoa ke hoo? Na u rata ho tšoana le ntate oa hao kapa ’mè?

Mohlomong u ka nahana ka lintho tse ngata tse ratehang ka motsoali oa hao tseo u ka thabelang ho li bontša ho uena. Empa ho joang haeba kannete motho a bona hore tsela ea bophelo ea motsoali oa hae e ne e hanana le metheo e meng ea Bibele? Koana, a ke ke a fetohela motsoali ea joalo pepenene. Empa ha ho talingoa hore na tšusumetso ea botsoali e matla hakae, mora kapa morali ea boemong boo ho tla hlokahala hore a iteke ka tieo le ka tiisetso ho hōlisa litsela kapa maikutlo a sa lateleng mohlala oa motsoali. Empa ho tla tšoaneleha hore a etse joalo, haholo haeba hona ho tla atametsa bana haufi le Molimo, Ntate oa rōna oa leholimo. Hona re ka ho bona ka mohlala o khahlisang oa Bibele oa Asa.

TSELA E NKILOENG KE ASA

Lekholong la bo-10 la lilemo B.C.E. Asa ea e-ba morena oa Juda. Ntat’ae Abijame (Akija) o ne a beile mohlala o mobe; ho e-na le ho tšepa Jehova Molimo ka cheseho, ntate oa Asa a mamella borapeli ba litšoantšo ‘linqalong tse phahameng’ tsa borapeli ba bohata. Ho sena, Abijame “a tsamaea libeng tsohle tse entsoeng. ke ntat’ae” Roboame. (1 Mar. 14:22-24; 15:3) Kahoo na u nahana hore mora oa Abijame, Asa, o ne a ka kheloha mohlala o sa tšepahaleng? Kapa, ‘ngoan’a tali o ne a tla tsejoa ka mereto’?

Pale e ngoliloeng e senotsoeng ka Mangolong e bontša hore Asa ha a ka a latela mehato ea ntat’ae kapa ntat’ae moholo. “Asa a etsa tse lokileng mahlong a Jehova, joale ka ntat’ae moholo Davida.” E, a ikhethela hore a se ke a tšoana le ntat’ae ea mo tsoalang, leha e le eena ntat’ae moholo. A etsisa moholo-holo oa hae, Davida, ka ho chesehela borapeli ba ’nete. Bibele e tsoela pele e re ka Asa: ‘A tlosa ba-Sodoma naheng, a tlosa litšoantšo tsohle tse entsoeng ke bo-ntat’ae.’ (1 Mar. 15:11, 12; 2 Likron. 14:2-5a) A tsoa letšolo le matla ho loantša borapeli ba litšoantšo.

A PUTSOA KE JEHOVA

Tumelo ea Asa ho Jehova ea putsoa haholo. Joang? Kamor’a nako lebotho la banna ba millione tlas’a Zerake Moethiopia la futuhela ’muso oa Juda. Morena a ipiletsa ho Ea Holimo-limo ka mantsoe ana: “Oho, Jehova, ha ho e mong ea ka namolelang ea se nang matla ho ea nang le matla, ha e se uena; re tlatse, Jehova, Molimo oa rōna, hobane re itšetlehile ka uena, ’me re futuhetse bongata boo ka lebitso la hao. Ke uena Jehova, Molimo oa rōna.”—2 Likron. 14:9-11.

Molimo oa mamela morena enoa ea neng a ipaka hore ha a tšoane le ntat’ae. Ka thuso ea Molimo, bafo ba Asa ba atleha ho nyelisa lira tsa Baethiopia ka tlhōlo.—2 Likron. 14:12, 13.

Kamor’a sena moprofeta Azaria a kopana le Asa ’me a mo khothalletsa le bafo ba hae ho tšepahala ho Jehova, a re: “Jehova o na le lōna mohla lōna le nang le eena. Ha le ka ’na la ’matla, o tla ’ne a fumanoe ke lōna; ’me ha le ka mo furalla, o tla le furalla le eena.” Mohlomong a bua ka nako e mahlonoko ea borena, pele bo qaleha, Azaria a tsoela pele: “Ka tšiu tse ngata, ba-Iseraele ha ba ka ba e-ba le Molimo oa ’nete, . . . mefere-fere e mengata e ne e le teng ho bohle ba ahileng lefatšeng; ’me sechaba se seng se ne se thulana le sechaba se seng, motse o mong o thulane le motse o mong; hobane Molimo o no o ba ferekanya ka mahlomola a mangata a mefuta.” Empa ho ne ho sa hlokahale hore ho be joalo. Haeba batho le morena ba ne ba ipaka ba fapane le bo-ntat’a bona moholo ba sa tšepahaleng, moprofeta a re “moputso o tla ba teng bakeng sa seo le se etsang.”—2 Likron. 15:1-7.

Asa le bafo ba hae ba lumellana le mantsoe a Azaria. Ba tsoela pele ka se neng se qaliloe ho hloekisa sechaba borapeling ba litšoantšo. Tempeleng ea Jehova, ba bea aletare hape boemong bo lokileng, hobane ka ho totobetseng e ne e silafalitsoe pelenyana. Kopanong e neng e entsoe selemong sa bo-15 sa puso ea Asa, sechaba sa itlama ho sebeletsa Jehova ’me sa lumellana hore ba hanang ka boomo ho etsa joalo ba bolaoe. Har’a bao ba bokaneng e ne e le ba bangata ba tsoang ’musong oa meloko e 10 ba neng ba balehetse ho Asa “ha ba bona hoba Jehova, Molimo oa hae, o na le eena.”—2 Likron. 15:8-15.

Ha e le ka Asa, ha ka a ithiba hore a ka nka bohato ka nkhono’ae ea rapelang litšoantšo Maaka, ea neng a nkoa e le ‘mofumahali’ ’musong. “Kahobane a entse setšoantšo sa Ashtarothe,” kapa molimo oa mosali oa linqalo tse liphahameng, Asa ha a ka a mo lumella ho tsoela pele setulong sa hae.—1 Mar. 15:13; 2 Likron. 15:16.

TŠEKAMELO EA HO THELLA

Mang kapa mang ea ikhethetseng ho fapana ka litsela tse ling le motsoali ea sa rapeleng Molimo o tla fumana hore o lokela ho iteka ntle ho khaotso e le hore a hlaolele botho ba Bokreste. Ka nakoana motho a ka ’na a bonahala a atleha ho fapana, empa a boela a thellela mohlaleng oa motsoali oa hae oa monyefoli ha a hōla kapa a le tlas’a khatello e khethehileng. Re ka hlokomela kotsi eo bophelong ba Asa.

Ke ka “selemo sa mashome a mararo a metso e tšeletseng sa ho busa ha Asa”b ha Morena Baesha oa Iseraele a futuhela ’muso oa ka boroa oa Juda. Ho thibela bafo ba hae ho balehela ho Asa, Baesha a qala ho sireletsa motse o meeling oa Rama. Ho e-na le ho ’na a tšepa tšireletso ea Jehova, Asa a qapa mano. Asa a reka ka mpho Morena Benhadade oa Syria hore a senye selekane sa hae le ‘muso oa Iseraele oa meloko e 10. Basyria ba futuhela metse ea Baiseraele e ka leboea, ba qobella Baesha ho emisa mosebetsi oa hae oa ho haha le ho tlosa mabotho a hae Rama. Asa a laola bafo ba hae ’me hape a futuhela sebaka sa ’muso oa meloko e 10. Ba hapa thepa ea mohaho e Rama ’me ba e sebelisetsa ho haha Geba le Mitspe.—2 Likron. 16:1-6.

Leha ho le joalo, ketso ea ho hloka tumelo ea Asa ea hlokomeloa ke Jehova. Ka moprofeta oa hae Hanani, Molimo oa re ho Asa: “U itšetlehile ka morena oa Syria, ’me u sa ka ua itšetleha ka Jehova, Molimo oa hao, . . . Ha ke re, ba-Ethiopia le ba-Lybia e ne e le sera se seholo se nang le makoloi le bapalami ba bangata-ngata? Leha ho le joalo, kahobane u no u itšetlehile ka Jehova, a ba neela matsohong a hao. Ruri, mahlo a Jehova a qamaka lefatšeng lohle hore a emele bao pelo tsa bona e leng tsa hae kaofela. U entse ka bothoto; hobane ho qala joale, u tla ’ne u hlaheloe ke lintoa.”—2 Likron. 16:7-9.

Ha a utloa mantsoe ana, na Asa o ile a ikokobetsa? Che. A iphetetsa, a laela hore Hanani a kenngoe litlamong. Asa a qala le ho hatella bafo ba bang ba hae. Lilemo tsa ho qetela tse tharo tsa Asa tsa e-ba bosula. A tšoaroa ke bohloko ba maoto, mohlomong borurusi. Empa le hona tabeng ena, ha a ka a talima thuso ho Jehova Molimo empa a batla pheko ho lingaka tseo mohlomong li neng li sebelisa boloi boitekong ba ho phekola. Kamor’a ho busa ka lilemo tse ka bang 41, Asa a shoa.—1 Mar. 15:23, 24; 2 Likron. 16:10, 12-14.

Bophelo ba Asa bo bontša ka ho hlakileng hore re ke ke ra hlokomoloha tšusumetso ea batsoali ba rōna, tšusumetso ea bobe kapa ea botle. Empa Asa a bontša hore ‘ho tsejoa ha ngoan’a tali ka mereto’ hase molao o ke keng oa qojoa.

[Mengolo o botlaaseng ba leqephe]