Lentsoe la Molimo Lea Phela

A Hlorisoa ha e le Ngoana

JOALOKA mocha, mohlomong u ho fumana ho le thata kajeno hore u be Mokreste. Mohlomong u songoa ka baka la ho se tsube kapa ho se noe lithethefatsi. Kapa mohlomong u hlorisoa ka baka la ho se kopanele meketeng kapa litšebeletsong tse hananang le metheo ea Bibele. Hona ho hopotsa ka ho hlorisoa ha Isaaka, mora e monyenyane oa Abrahama le mosali ea ratoang oa hae Sara.

Ho Isaaka khathatso e qalehile mohla mokete oo Abrahama a neng a o entse mohla Isaaka a khoesoang. Ka nako eo, Isaaka o ne a batla a le lilemo li hlano. Basali ba ne ba anyesa bana haleletsana mehleng eo. Nakong ea mokete, Ishmaele, mora oa Abrahama ea lilemong tsa bocha oa lekhabunyane la hae la Moegepeta Hagare, a qala ho soma le ho tšeha ngoan’abo. Hona e ne e se komang ea bana feela. E ne e le ho songoa ho mano ha ngoana e monyenyane haholo. Bibele e re Ishmaele o hlile a qala ho “hlorisa” Isaaka.—Ba-Gal. 4:29.

Sara a bona ho etsahalang, ’me a se ke a ho rata. Ka ho totobetseng Ishmaele o ne a hlorisetsa Isaaka taba ea hore na ke mang ea tla amohela e le lefa seo e leng sa Abrahama. Eaba Sara o ea ho Abrahama ’me a re: ‘Bolella Hagare le mora oa hae hore ba tsamaee. A ke ke a kopanela lefa la mor’a ka Isaaka.’

Abrahama a ferekana ke hona. O ne a sa batle ho leleka Ishmaele, kaha le eena e ne e le mora oa hae. Empa Molimo oa bolella Abrahama hore a mamele mosali oa hae Sara. Eaba Abrahama o nea Hagare le Ishmaele tse hlokahalang leetong la bona ’me a ba nea tsela.—Gen. 21:8-14.

Motho ea hlorisoang a ka tšelisoa ke tlaleho ena ea Bibele ea Isaaka. Hobane’ng? Hobane litšomo tsa Ishmaele li ile tsa emisoa ka nako ea teng. Jehova Molimo a bona hore Abrahama o nka bohato ho tlosa mohloli oa bothata lapeng la hae. Ho joalo le kajeno, Molimo le ka mohla o ke ke oa u tlohella ho hlomoha ho feta kamoo u ka mamellang. O tla u nea matla a ho mamella, kapa o tla bona hore mohloli oa bathata o qetella o tlositsoe.—1 Ba-Kor. 10:13.