Na u Ananela “Mohlanka ea Khabane, ea Bohlale”?

“ANA ke mang mohlanka ea khabane, ea bohlale?” Ka potso eo, Jesu Kreste a kenyelletsa setšoantšo, kapa papiso, ea bohlokoa boprofeteng. Ke karolo ea “pontšo” eo a faneng ka eona ka “ho fela ha lefatše,” ho re phelang ho hona hona joale. (Matt. 24:3) Kamor’a ho laela barutuoa ba hae hore ba lebele, Jesu a re:

“Ana ke mang mohlanka ea khabane, ea bohlale, eo morena oa hae a ’meileng moalosi oa bahlanka ba hae ho ba nea lijo nakong ea teng? Ho lehlohonolo mohlanka eo morena oa hae, mohla a fihlang, a tla mo fumana a etsa joalo. Ka ’nete ke re ho lōna; O tla ’mea moalosi oa mesebetsi ea hae kaofela.”—Matt. 24:42-47.

“Mohlanka” enoa ke mang ’me “bahlanka” ke bo-mang? Hona “mesebetsi” ke efe? Lipotso tse joalo hase tse khahleho e fetang feela. Ho tseba ka mokhoa o hlakileng le ho sebelisana le “mohlanka ea khabane ea bohlale” ho tla bolela thabo e khōlō le meputso e enneng ea moea.

“ANA KE MANG MOHLANKA EA KHABANE, EA BOHLALE”?

Ba bang ba bolela hore “mohlanka” ke basebeletsi ba Bakreste, kapa ofisi ea bona ea bolebeli, ka boikarabelo ba ho hlokomela litlhokahalo tsa moea tsa phutheho. Ho fihla ha ‘morena’ ho boleloa hore ke ho tla ha bobeli ha Kreste kapa lefu la mosebeletsi ka mong. Kahoo ho nkoa hore setšoantšo se lokela ho susumelletsa basebeletsi ba Bakreste ho hlokomela hantle seo ba se tšepetsoeng.

Lipaki tsa Jehova li lumela hore setšoantšo sena se sebetsa ho phutheho e le ’ngoe ea ’nete ea balateli ba tlotsitsoeng ba Kreste. Ho tloha ka Pentekonta, 33 C.E., le ho theosa le lilemo tse makholo a 19 ho tloha ka nako eo, phutheho ena e kang “mohlanka” e ’nile ea fepa litho tsa eona moeeng, e etsa joalo ka bokhabane le ka bohlale. Ho tsebahala ha “mohlanka” enoa ho hlile ha totobala nakong ea ho khutla ha Kreste kapa ho ba teng ha hae. “Mohlanka” o tsebahala ka ho falimeha ha hae le ka ’nete ea hore ka bokhabane le ka bohlale o fana ka lijo tsa moea kamoo li hlokoang ke phutheho eohle ea Bokreste. Ka sebele, “mohlanka” enoa, kapa phutheho e tlotsitsoeng ka moea, ke oona mocha o amohelehang o emelang ’muso oa Molimo lefatšeng ‘nakong ea bofelo.’ (Dan. 12:4) Lipaki tsa Jehova li utloisisa hore “mohlanka” o entsoe ka litho tsohle tse tlotsitsoeng tsa Bakreste e le sehlopha se lefatšeng ka nako leha e le efe lilemong tse fetileng tse makholo a 19 ho tloha ka Pentekonta. Ka ho loketseng, “bahlanka” ke balateli bana ba Kreste e le motho ka mong.

Babali ba bang ba ka ’na ba ikutloa hore ana ke maikutlo a litaba a khethollang. Kapa ba hana maikutlo a hore “mohlanka” le “bahlanka” ba emela sona sehlopha seo, ho hong e le sehlopha ho hong e le motho ka mong. Bahanyetsi ba ka pheakhang ka hore hase bohle ba tlotsitsoeng ba kopanelang ho lokisetsa lijo tsa moea, hoo e leng hore mohlomong “mohlanka” o tšoantšetsa feela ba etellang pele, ’me “bahlanka” ke bao ba ba sebeletsang ka phuthehong.

Ha ho bonahale lebaka la ho leka ho qobella tlhaloso ea setšoantso. Ho ithetsa hase ha molemo oa letho ’me ho kotsi moeeng. Ka baka leo, re tlameha ho sheba mangolong bakeng sa kutloisiso. Ka ho etsa joalo, re fumana’ng? “Mohlanka” enoa ke lekhoba la Morena Kreste Jesu le Ntate oa hae, Jehova. (Bapisa Mattheu 10:24:25.) ’Me mohlanka e ka ba sehlopha se bokelletsoeng. Nakong e fetileng, sechaba sohle sa Iseraele e ne e le mohlanka oa Jehova, kapa lekhoba. A re ho bona: “Uena Iseraele, mohlanka oa ka.” (Esa. 41:8, 9; 44:21) Mohlanka enoa o ne a entsoe ka batho ka bomong, joalokaha Esaia 43:10 e bontša hona ha e re: “Ke lōna lipaki [ka bongateng] tsa ka, ho bolela Jehova, le eena mohlanka [ka bonngoeng] oa ka eo ke mo khethileng, hore le tle le tsebisise, ’me le ntumele.” Baiseraele bana ba mehleng ea boholo-holo e ne e le “letlotlo la . . . sebele,” la Jehova, “sechaba se khethehileng.” (Ex. 19:5, 6) Le hoja e ne e se e mong le e mong ea nkileng karolo tsamaisong ea litaba tsa sechaba, batho bohle ka bomong e ne e le batho ba le bang, “mohlanka” oa Molimo. Ke ba seng bakae feela ba neng ba kopanela le ho ngola kapa ho kopitsa Mangolo a Halalelang, empa moapostola Pauluse o ne a ka bua tjena ka sechaba sa Iseraele: “lipolelo tsa Molimo li tšepetsoe bona.” (Ba-Roma 3:1, 2) Lilekane e ne e le tsa bona, Molao le lipallo. (Ba-Roma 9:3-5) Kahoo sechaba kaofela e ne e le “mohlanka” oa Jehova ea kopaneng kapa ea entsoeng ka litho tse ngata, ha sona, ka nako eona eo, se ne se entsoe ka batho ka bomong, “lipaki” tsa hae.

Ha Jesu a ne a le lefatšeng, a re ho baeta-pele ba bolumeli ba Iseraele: “’Muso oa Molimo le tla o amohuoa, ’me o tla neoa sechaba se seng se tla bea litholoana tsa oona.” (Matt. 21:43) “Sechaba” sena se beang litholoana tsa ’Muso e tlameha ho ba ho jaleha ha phutheho ea ’nete ea Bokreste, eo Petrose a itseng ka eona ha a ngola: “Ha e le lōna, le moloko o khethiloeng, le baprista le marena. le mofuta o halalelang, le sechaba se ruiloeng, le tle le bolele lithoko tsa ea le bitsitseng lefifing ho le kenya leseling la hae le hlollang; lōna bao le neng le se sechaba pele, empa joale le sechaba sa Molimo.” (1 Pet. 2:9, 10) Phutheho e joalo e boetse e bitsoa “Iseraele oa Molimo” le ‘ntlo ea Molimo.’ (Ba-Gal. 6:16; 1 Tim. 3:15) Batho ka bomong ba ka phuthehong ba bitsoa “ba ntlo ea Molimo.” (Ba-Ef. 2:19) ‘Boabi bo khabane’ har’a litho tsa lelapa tse joalo bo ama ho abuoa ha linnete tsa moea, e leng ho theang “lijo” tse tšoanelehang bakeng sa balumeli. (1 Ba-Kor. 3:2-5; 4:1, 2) Hoa hlokomeleha hore “mohlanka ea khabane, ea bohlale” o bitsoa “mohlahlobi” ho Luka 12:42-48.

Ha ba sa phela lefatšeng, baapostola ba tšepahalang ba Jesu ba ne ba hlile ba ikarabella haholo bakeng sa ho fana ka thuto ea moea “tlung ea Molimo.” ‘Balisa’ ba khethiloeng ba “mohlape” hammoho le ba bang, le bona ba ne ba ikarabella ka ho tšoanang. Leha ho le joalo, moapostola Petrose o bontša hore bohlahlobi bo joalo ba linnete tsa bomolimo ho hlile ho beiloe ho bohle ba ‘bakhethoa.’ Kahoo, setho se seng le se seng sa phutheho se kolekela ho haheng ’mele. (Ba-Ef. 4:11-16; 1 Pet. 1:1, 2; 4:10, 11; 5:1-3) Kahoo re bona motheo o hlakileng oa Mangolo bakeng sa ho bolela hore balateli bohle ba tlotsitsoeng ba Kreste Jesu ke “mohlanka” oa Molimo, ka Jesu e le morena oa hae. Ka ho loketseng, mohlanka eo, kapa “lekhoba” e le sehlopha se bokelletsoeng o fana ka lijo tsa moea bakeng sa bohle ka bomong ba phutheho, eo e leng ntlo ea “bahlanka.” Bana ba fumana molemo e le motho ka mong lijong tseo.—1 Ba-Kor. 12:12, 19-27; Ba-Heb. 3:5, 6; 5:11-14.

‘MOHLANKA EA KHABANE’ O NYAMELA PONAHALONG E HLAKILENG

Ho tsebahala hona ho hlakileng ha sehlopha sa “mohlanka ea khabane, ea bohlale” ho ne ho ke ke ha tsoela pele le makholo a lilemo ho fihlela Morena a khutla ka matla a hae a ’muso. Baapostola ba hlokomelisitse hore koeneho e khōlō e ne e tla ba teng kamor’a lefu la bona ’me e tsoele pele ho fihlela ha Kreste a le teng. (2 Ba-Thess. 2:1-12; Lik. 20:29, 30; 1 Joh. 2:18, 22; 4:2, 3) Jesu le eena o bontšitse hona setšoantšong sa hae sa ‘koro le mofoka.’ Ka papiso ena, peō e ntle, koro, e jaliloe tšimong ea lefatše. “Koro” ke “bana ba ’muso,” kapa barutuoa ba ’nete ba tlotsitsoeng ba Jesu Kreste. Leha ho le joalo, “sera” (Diabolose) se emeloa e le se jalang “mofoka” (‘bana ba e mobe,’ kapa Bakreste ba bohata) ba har’a “koro,” ’me ka bobeli ba ne ba lokela ho hōla ho fihlela ‘nakong ea kotulo.’—Matt. 13:24-30, 36-43.

Bokoenehi ba hōla ka ho kenngoa ha maikutlo a bohetene le lithuto tsa bohata. Ka ho eketsehileng, phutheho ea bokoenehi ea fetoha karolo ea lefatše lena, e nka lithuto, mekhoa le boitšoaro ba lona. Jesu o hlile a bolela hore “koro” hammoho le “mofoka” li tla hōla hammoho ho fihlela ‘ha ho kotuloa,’ kapa ‘bofelong ba tsamaiso ea lintho,’ ha “koro” (Bakreste ba ’nete) ba tla aroloa ho “mofoka” (Bakreste ba bohata) ’me ba tla etsa hore leseli la bona la moea le khanye. (Matt. 13:30, 39-43) Kahoo ho khetholloa ha sehlopha sa “mohlanka ea khabane, ea bohlale” ho ne ho ke ke ha hlola ho hlaka hape ho fihlela nakong ea ho khutla ha Kreste Jesu.

Ka nako eo, barutuoa ba tšepahalang ba Jesu ba ne ba tla hlahella pooaneng. Boemo ba bona bo fepehileng hantle moeeng bo ne bo tla lumellana le boprofeta ba Daniele, bo hlileng ba bolela hore ‘nakong ea bofelo’ ba hlalefileng ba tla khanya joaloka linaleli, ba thabele tsebo e atolohileng ea Mangolo le kutloisiso ’me ba ise ba bangata ho lokeng. (Dan. 12:3, 4, 9, 10) Hona ho bontša hore phutheho ea barutuoa ba tlotsitsoeng ba Kreste, ba hlalefileng, ba ne ba tla lebella ho khutla ha Morena ’me ba fumanoe ba tšepahetse ho faneng ka lijo tsa moea ka nako e tšoanelehang ha a khutla.—Matt. 24:43-46.

‘MOHLANKA EA KHABANE’ O TSEJOA KA MOSEBETSI OA HAE

Le hoja “mofoka” o busitse lefatše la bolumeli ka makholo ana a lilemo, “koro” e ne e le mafolofolo ’me lijo tsa moea li fanoa ho “bahlanka.” Mathoasong a bo-1870 ho ne ho le teng sehlopha se tiileng sa liithuti tsa Bibele tse fepiloeng hantle moeeng se ka lebellang ho khutla ha Morena le ho hlokomela bohlokoa ba boithuto bo phethahetseng ba Mangolo hore se ka lula se loketse. Phuputso ea sona e batsi ea Bibele ea hlahisa tsebo e ngata haholo.

Lilemong tseo, likereke tsa Bojakane li ne li tlamiloe ke neano, lithuto le litšebeletso tse hlōmelang bokoenehing bo boholo. Tsa khomarela lithuto tse joalo tsa bohata tse kang Boraro-bo-bong, ho se shoe ha moea le lihele tse tukang. Hape, e ne e le karolo ea lefatše lena. Ho belaella Bibele ho ne ho silafatsa liseminare tsa bona tsa bolumeli. Khopolo ea Darwin ea hore lintho li ikentse e ne e khethoa bakeng sa tlaleho ea Bibele ea pōpo. Bohlale bo sebelisoang bo ne bo hana thuto ea sebe se futsitsoeng le bohlokoa ba topollo, ’me karolo eohle ea nyatso e phahameng e ne e hlasela boqapi bo halalelang ba Mangolo.

Har’a sena sohle, Liithuti tsa Bibele (kamoo Lipaki tsa Jehova li ne li tsejoa ka teng ka nako eo) li ne li eme e le babuelli ba matla ba thuto ea Bibele. Tsa tšoarella Mangolong hore ho na le Molimo o le mong o Matla ’ohle le ’Mōpi, Jehova, le hore Kreste Jesu ke Mora oa hae ea tsoetsoeng a le mong le sebopuoa sa pele, eo Molimo o mo rōmileng lefatšeng ho tla neela bophelo ba hae e le topollo bakeng sa batho ba baetsalibe. Tsa inkela ntoa ea ho sireletsa Bibele eohle e le lentsoe le sa foseng le le bululetsoeng la Molimo ’me tsa hatisa boithuto ba tsona ba Bibele e le “lijo nakong ea teng,” kahoo ba kopanela boitsebisong bona ba bohlokoa le bohle ba lakatsang ho lokela ho khutla ha Morena. liithuti tsa Bibele tsa tsebahatsa thuto ea ’nete ea Bokreste hore moea oa motho oa shoa le hore tšepo ea bafu ke tsoho. Tsa supa hore morero oa topollo ea Kreste hase feela ho hleka tsela bakeng sa ba 144 000 hore ba lopolloe lefatšeng e le hore e be majalefa hammoho le Kreste maholimong empa hape le ho nea bana bohle ba Adama monyetla oa ho fumana bophelo bo sa feleng lefatšeng nakong ea puso ea ’Muso oa Messia oa lilemo tse 1 000. Hape, tsa bolella lefatše hore bofelo ba ‘mehla ea lichaba’ bo tla ka 1914. (Luka 21:24) Ho khutlisoa hona ho tiisang tumelo ha linnete tsa Bibele le ho phehella ho falimehela ho ba teng ha Kreste Jesu ha fella ka ho bokelloa hammoho le ho hahuoa ha phutheho ea barutuoa ba tlotsitsoeng ba Kreste ba bontšitseng bopaki ba hore ba fepiloe hantle moeeng.

BOPAKI BO FETISISANG

“Mohlanka ea khabane, ea bohlale” o na le bopaki bo bongata. Ho latelang ke letoto le kammoho la Mangolo le litlhaloso tsa boprofeta le sebetsang kapa le emelang masala a Jesu Kreste a tlotsitsoeng ho tloha selemong se hlokomelehang sa 1919:

(1) Mosali oa Noe, Gen. 7:7; (2) mangeloi a neng a rōmetsoe ho Lota, Gen. 19:15; (3) Rebeka, Gen. 24:64; (4) Josefa le Benjamine, Gen. 45:14; (5) lijo tse neng li khoahlapisoa, Lev. 19:9; (6) lihloela tse peli ho Rahaba, Josh. 2:4; (7) Barake, Baahl. 4:14; (8) Jafeta, Baahl. 11:34; (9) Naomi le Ruthe, Ruthe 2:2; (10) Bahlabani ba Davida ba Baiseraele, 2 Sam. 18:1; (11) Jehu, 2 Mar. 10:11, 15; (12) Mordekai le Esthere, Esthere 4:13; (13) Jobo, Jobo 42:10, 13; (14) Morali oa morena, Pes. 45:13; (15) baratuoa, Pes. 50:5; (16) ba teelang hare, Pes. 89:7; (17) Sheare-Jashube, Esa. 7:3; (18) leseli la lichaba, Esa. 60:3; (19) lifate tse khōlō tsa ho loka, Esa. 61:3; (20) bahlanka ba Molimo oa rōna, Esa. 61:6; (21) sehlopha se bolokoang, Esa. 65:8; (22) bahlanka ba lebitso le leng, Esa. 65:15; (23) batho ba thothometsoang ke lentsoe la Molimo, Esa. 66:5; (24) sechaba se secha se tsoetsoeng, Esa. 66:8; (25) Jeremia, Jer. 1:10; (26) batho ba Jehova selekaneng se secha, Jer. 31:33; (27) seboholi se mamellang, Ezek. 3:16-27; (28) monna ea apereng line, Ezek. 9:2; (29) batho ba hloekileng, Ezek. 36:29-32; (30) ba ahile liphahameng tsa naha, Ezek. 38:12; (31) lekhotla la leholimo, Dan. 8:10; (32) sehalalelo sa hloekisoa (tsosoa), Dan. 8:14; (33) ba bohlale, Dan. 11:33; (34) ea thabileng ea lebelletseng, Dan. 12:12; (35) nama eohle e amohela moea, Joele 2:28; (36) Jonase, Jonase 3:1-3; (37) thaka ea leihlo la Jehova, Zak. 2:8; (38) masala a lokolotsoeng, Zak. 2:7; (39) Mojode, Zak. 8:23; (40) bara ba Levi, Mal. 3:3; (41) koro, Matt. 13:25; (42) bana ba ’muso, Matt. 13:38; (43) basebetsi tšimong ea morara, Matt. 20:1; (44) ba memetsoeng bohaling, Matt. 22:3-14; (45) bakhethoa, Matt. 24:22; (46) lintsu, Matt. 24:28; (47) mohlanka ea khabane, ea bohlale, Matt. 24:45; (48) baroetsana ba bohlale, Matt. 25:2; (49) baena ba morena, Matt. 25:40; (50) mohlatsoana, Luka 12:32; (51) mokōpi Lazaro, Luka 16:20; (52) linku ‘lesakeng lena’, Joh. 10:1-16; (53) makala a morara, Joh. 15:4; (54) ntlo ea borena ea Davida, Lik. 15:16; (55) majalefa le Kreste, Ba-Roma 8:17; (56) masala, Ba-Roma 11:5; (57) makala sefateng sa mohloare, Ba-Roma 11:24; (58) bahalaleli, 1 Ba-Kor. 6:2; Tšen. 16:6; (59) tempele, 1 Ba-Kor. 6:19; (60) ’mopuoa e mocha, 2 Ba-Kor. 5:17; (61) manqosa a Kreste, 2 Ba-Kor. 5:20; (62) kereke ea Molimo, Ba-Gal. 1:13; (63) karolo ea leloko la Abrahama, Ba-Gal. 3:29; (64) Iseraele oa Molimo, Ba-Gal. 6:16; (65) ’mele oa Kreste, Ba-Ef. 1:22, 23; (66) masole a Kreste Jesu, 2 Tim. 2:3; (67) ntlo e hahiloeng ka tlase ho Kreste, Ba-Heb. 3:6; (68) boprista bo halalelang, 1 Pet. 2:5; (69) sechaba se halalelang, 1 Pet. 2:9; (70) kopano ea baena, 1 Pet. 2:17; (71) likereke tse supileng, Tšen. 1:20; (72) baholo ba 24; Tšen. 4:4; (73) Iseraele oa moea, Tšen. 7:4; (74) litsie, Tšen. 9:3; (75) lipaki tse peli, Tšen. 11:3; (76) mehloare e ’meli, Tšen. 11:4; (77) peo ea mosali, Tšen. 12:17; (78) Jerusalema e mocha, Tšen. 21:2; (79) monyaluoa oa Kreste, Tšen. 22:17; 19:7; (80) Lipaki tsa Jehova, Esa. 43:10.