Ho Eketseha ha Leseli Mehleng ea Kajeno

“Tsela ea ba lokileng e joale ka leseli le khanyang, le ntseng le eketsa ho khanya ho fihlela motšehare o moholo o phethehileng.”—Liproverbia 4:18.

1. Ke bopaki bofe boo re seng re bo hlahlobile ka ho phethahala ha Liproverbia 4:18?

TLALEHO ea Bibele ea Genese ho ea ho Tšenolo e bontša hore tsela ea bahlanka ba Jehova ruri e ’nile ea khanya joaloka leseli le ntseng le eketsa ho khanya. (Liproverbia 4:18) Mehleng ea Jesu le baapostola ba hae boprofeta bo bongata bo amanang le Messia bo ile ba utloisisoa, joalokaha Mattheu le bangoli ba bang ba Melaetsa ba ho tiisa. Ho tšolloeng ha moea oa Molimo ka Pentekonta le ho isoa ha ‘litaba tse molemo’ ho Balichaba ho ile ha tsamaea le khanya e tsoelang pele ea Lentsoe la Molimo.—Liketso 2:14-16; 10:34-43; 15:6-21.

2. (a) Ke eng se ikarabellang bakeng sa nako ea lefifi e ileng ea oela ba neng ba ipolela hore ke balateli ba Jesu Kreste? (b) Ke eng e nkileng karolo e khōlō mosebetsing oa ho arola ka kotulo?

² Leha ho le joalo, hoba baapostola ba shoe ha ’na ha aparela nako ea lefifi e ileng ea apesa ba neng ba ipolela hore ke balateli ba Jesu Kreste. “Liphiri tse bohale” tsa nka marapo. (Liketso 20:29, 30) Ha e-ba kamoo Jesu a neng a hlile a bolela ho se seng sa litšoantšo tsa hae. A tšoantša ’muso oa leholimo le “motho ea jalileng peō e ntle tšimong ea hae.” Joale “ea mo hloileng a tla, ’me a jala mofoka har’a koro.” Ka baka leo, mofoka oa tlala tšimong eo ea lefatše lohle ea bolumeli ka makholo-kholo a lilemo. Empa ha ho fihla nako ea kotulo ha fihla le nako ea khetho. Hona joale re fihletsoe ke nako eo ea kotulo, hobane ‘kotulo ke ho fela ha lefatše.’ Ka thabo, sehlopha sa “koro” sa Bakreste ba ’nete se bokelletsoe. Linnete li supa hore leseli le ntseng le khanya haholo tseleng ea Bakreste bana le nka karolo e khōlō ho ba aroleng ‘mofokeng’ o se nang molao, oo qetello ea oona e leng timelo.—Mattheu 13:24-30, 36-43.a

Leseli Ho Jehova Molimo Le Lentsoe La Hae

3, 4. Ke linnete life ka ’Mōpi, Jehova Molimo, tseo Liithuti tsa Bibele tsa pele li ileng tsa ithuta ho li ananela?

³ Mathoasong a bo1870 sehlopha sa liithuti tse tiileng, tse maikutlo a bulehileng tsa Bibele sa qala ho kopana ho ithuta Lentsoe la Molimo ka maikutlo a sa sekisetseng. Ho sa tsotellehe litumelo tsa Bojakane, ba nka Mangolo a bululetsoeng e le motataisi oa bona. Bohlale, ho utloahala, tumellano le matla a molaetsa oa Bibele tsa khanyetsa lipelong tsa bona. Tsa ba kholisa—ho fapana le lithuto tse teng hohle tsa ho se lumele ho Molimo le hore lintho li ikentse—ka ’nete ea motheo ea hore ’Mōpi ea bohlale o fela a le teng. Ba ne ba hlile ba bona hore ‘ho hlahang e le phello ho lokela ho hlahisoa ke sesosa se bohlale’ le hore ‘boholo ba pōpo, litekanyetso tsa eona, botle, taoleho, kutloano, ho se tšoane ha lintho’ li Mo pakela hore ke Moqapi e moholo.b (Ba-Roma 1:20) Ba boela ba fumana maikutlo a hlakileng ka boleng ba ’Mōpi, hore o na le litšoaneleho tse ’ne tse khōlō kapa litšobotsi tsa motheo, e leng bohlale boo ho seng bo kang bona, matla ’ohle, toka e phethahetseng le lerato leo ho seng le tšoanang le lona.—Deuteronoma 32:4; Pesaleme 62:11; Liproverbia 2:6, 7; 1 Johanne 4:8.

⁴ Ho feta moo, ba ithuta ho ananela hore Molimo ‘ke oa ho tloha ho bo sa hlaheng ho isa ho bo sa feleng’ le hore lebitso la hae ke Jehova. (Pesaleme 83:18; 90:2) Ba bona hore thuto e khōlō ea Bojakane—thuto ea Boraro-bo-bong—ha e utloahale ebile hase ea Mangolo. Leseli la ’nete ea Bibele la ba bontša hore Molimo ke ‘Jehova a le mong,’ hore Jesu ke Mora oa Molimo (eena ka boeena a paka hore Ntate oa hae ‘o moholo ho eena’) le hore moea o halalelang oa Molimo, ho hang hase motho oa boraro oa Boraro-bo-bong, empa ke ‘matla a Molimo ao o a sebelisang ho phetha lintho tse sa tšoaneng.’c—Mareka 12:29; Johanne 14:28; Liketso 2:17, 18.

5. Barati bao ba ’nete ba nka boemo bofe ka Bibele?

⁵ Ka sebete le kholiseho ba bolela hore Bibele ke Lentsoe le bululetsoeng la Molimo; hore ka baka la litšoaneleho tsa Molimo hoa utloahala ho lebella ’Mōpi hore a fane ka tšenolo e halalelang bakeng sa ho tataisa motho. Ba hlalosa Bibele e le ‘lebone la tsoelopele le tokoloho.’ Ke ‘buka ea khale ho feta tsohle tse teng; e mamelletse lifefo tsa lilemo tse makholo a mashome a mararo.’ Ho feta moo, ‘libuka tsohle li kopane hammoho li hlōtsoe ho tlisa thabo, khotso le tlhohonolofatso ho libopuoa tse bobolang tse kang tseo Bibele e tsebileng ho li tlisa.’d Liithuti tsena tse tiileng tsa bona bophelong bo itetseng, le bo se nang boikhabi ba bangoli ba Bibele bopaki bo hlakileng ba hore sepheo sa bona se ne se hloekile. Ka kakaretso, ba bona hore ‘Bibele ke polelo e utloahalang le e lumellanang ea hore na bobe bo bakoa ke eng, le hore e bolela ka pheko le seo e tlang ho ba qetello; le hore e sebeletsa ho tataisa le ho matlafatsa bahlanka ba Jehova Molimo.’

Jesu Kreste Le ’Muso

6. Ke linnete life tseo Liithuti tsena tsa Bibele li ileng tsa li ananela ka Jesu Kreste?

⁶ Ho tloha qalehong, liithuti tsena tse tiileng tsa Bibele, kamoo li neng li ipitsa kateng, tsa utloisisa ka ho hlakileng linnete tsa motheo mabapi le Jesu Kreste. Ke ‘Mora ea tsoetsoeng a le mong’ oa Molimo. O phetse pele a tsoaloa e le motho lefatšeng. O fane ka bophelo ba hae e le “topollo ea bohle.” O tsositsoe e le moea ’me a nyolohela leholimong e le moea, ’me o ne a tla khutla e le moea—e le morena oa Messia ea sa bonahaleng oa ’muso oa Molimo. Ruri taba ea ho khutla la bobeli ha Kreste e ne e le ea bohlokoa: Hobane’ng, joang hona neng?—Johanne 3:16; 17:5; 1 Timothea 2:5, 6; 1 Petrose 3:18.

7. Leseli le eketsehang le ile la senola eng ka ’muso oa Molimo le mahlohonolo a oona?

⁷ Leseli le ntseng le khanya ho ea pele la hlakisetsa Bakreste bana bohlokoa ba ’muso oa Jehova e le oona pheko feela bakeng sa mahloko a batho. ’Muso oo o entsoe ka Jesu Kreste le ba nang le eena ba 144 000, ba lopolotsoeng har’a batho, le ba busang le eena e le marena le baprista ka lilemo tse 1 000. Motheong oa sehlabelo sa topollo sa Kreste, Morena o tsosa bohle ba lopolotsoeng mabitleng a khopotso, ka tebello ea bophelo bo sa feleng lefatšeng la paradeise. Kahoo Bibele e na le qetello e habeli bakeng sa batho ba lopolotsoeng—qetello leholimong bakeng sa “mohlatsoana” oa majalefa a ’Muso, le bophelo lefatšeng bakeng sa “linku tse ling” tsa Jesu, tse akarelletsang “bongata bo boholo” ba baphonyohi ba “mahlomola” a moholo ho feta ’ohle hape le ba bangata ba limillione ba mabitleng a khopotso ’me ba tla tla ho tla thabela bophelo lefatšeng la paradeise.—Luka 12:32; Johanne 5:28, 29; 10:16; Tšenolo 7:9, 14; 14:1, 4; 20:6.

8. Ha fumanoa kutloisiso efe ka moea oa motho le ka boemo ba bafu?

⁸ Leseli le ntseng le eketseha hape la senolela liithuti tsena tse maikutlo a ahlameng tsa Bibele hore lithuto tsa Bojakane ka sebopeho sa moea oa motho le boemo ba bafu ho hang li fosahetse. Tsa bona ka ho hlakileng hore ha Adama a bōptjoa o ile a fetoha “moea o phelang,” le hore ha a khutlela lerōleng ka baka la ho se utloe ha hae, o shoele e le moea, a khaotsa ho ba teng ho hang. E, a khutlela lerōleng leo a neng a nkiloe ho lona. Boemong ba lefu motho ha a ikutloe, ha a na mosebetsi. (Genese 2:7; 3:19; Moeklesia 9:5, 10) “Moputso oa sebe ke lefu,” e seng tlhokofatso ea ka ho sa feleng. Lihele tse tukang le pelekatori ea tlhokofatso li teng feela ka likelellong tsa balumeli ba se nang tsebo ea litaba. Ke feela kahobane motho a khaotsa bophelo ho hang lefung ho hlokahalang tsoho, e le hore a ka fumana molemo sehlabelong sa Kreste.—Ba-Roma 6:23.

Litlameho Tsa Bokreste

9. Bakreste bana ba leseling ba nka boemo bofe ka khalalelo?

⁹ Bakreste bana ba boetse ba nka ka botebo seo Bibele e se buang ka khalalelo ea ’nete. Ena e ke ke ea ferekanngoa le boikaketsi ba boineelo bolumeling. Ba bona hore ba tlameha ho phela ka metheo ea Bibele e kang “lenyalo a le ke le hlomphehe har’a batho bohle, le liphate li hloke litšila; hobane Molimo o tla ahlolo babōki le bafebi.” (Ba-Heberu 13:4) Ba ananela hore ba ke ke ba iphoufaletsa kapa ba mamella har’a bona mekhoa e kang bohlola, bofebe le bosodoma—e nyatsuoang ke Bibele. (1 Ba-Korinthe 6:9, 10) Ka ho tšoanang, ba tlameha ho qoba ho tlōla molao, ba nee ‘Sesare lintho tsa Sesare,’ haesita le ho nea ‘Molimo lintho tsa Molimo.’ Ba tlameha ho tšepahala litšebelisanong tsohle tsa bona le ba bang, ba phela ka molao oa Bokreste: “Joale ka ha le rata ho etsoa ke batho, ba etseng joalo le lōna.”—Mattheu 22:21; Luka 6:31.

10. Ke ’nete efe eo Bakreste bana ba pele ba ileng ba e hlokomela ka thōmo ea Bokreste?

¹⁰ Kameho e ka sehloohong ea Liithuti tsena tsa Bibele kamoo ho bonahalang e ne e le ho hlaolela botho bo kang ba Kreste. Hape, ba bone hore hoa hlokahala ho pakela Molimo le Jesu. Ba hlokomela hore Mokreste e mong le e mong ea amohetseng leseli la ’nete, o tlamehile ho le jala ho ba bang. Ba hlokomela hore hoa hlokahala ho ba bahlanka ba Molimo, ho lumella leseli la motho le khanye ke boitšoaro bo botle le ka polelo ea molomo. (Mattheu 5:14-16) Ha e le hantle, pitso ea hla ea tsoa: “Ho hlokoa Babobeli ba 1 000.” E ne e le boipiletso bo khethehileng ho ba se nang litlameho ka malapeng ba neng ba ka neela halofo kapa ho feta ea nako ea bona ho jaleng ‘litaba tse molemo’ ka maqephe a hatisitsoeng.

11. Motho o ne a lokela ho nka mehato efe hore e be mosebeletsi oa Mokreste, ’me khethollo ea baruti ho phutheho ea lahloa hobane’ng?

¹¹ Ho ba mosebeletsi oa Mokreste, e mong le e mong o tlameha ho lumela Lentsoe la Molimo, a bake, a sokolohe ’me a lumele ho Molimo le Jesu Kreste e le Molopolli oa batho. Motho ka mong e be ea ‘ineetseng’ ho Molimo ho etsa thato ea Oona le ho kolobetsoa ka ho qoelisoa ka ho feletseng metsing. (Liketso 3:19; Mattheu 28:19, 20) Kaha e ne e le bahlanka kaofela, Bakreste bana ba hana khethollo ea baruti ho phutheho. Ka Lentsoeng la Molimo, leha ho le joalo, ba bona ho hlokahala ho khetha banna ba tšoanelehang e le “baholo” le “badiakone” ho hlokomela se hlokoang ke phutheho ka ’ngoe.—Ba-Filippi 1:1; 1 Timothea 3:1-10, 12, 13.

12. Ke ’nete efe ka liphutheho eo bana ba ileng ba ithuta ho e ananela, ’me ka ho utloahalang ha latela eng?

¹² Ha leseli le ntse le khanya ho ea pele, ba ’na ba ananela haholo bohlokoa ba ho hatisa lebitso la Molimo Jehova, le ’muso oa hae e le oona tšepo feela bakeng sa batho. Hape ba bona hore ho na le liphutheho tse peli feela bokahohleng le hore e mong le e mong ke oa phutheho e ’ngoe, ea Molimo kapa ea Satane, ena ea Satane e lefatšeng e entsoe haholo ka khoebo e khōlō, bopolotiki bo boholo le bolumeli bo boholo. Phutheho ea Molimo ea leholimo ea libopuoa tsa moea tse tšepahalang e emetsoe lefatšeng ke lipaki tsa oona tse hlophisitsoeng. (Ba-Galata 4:26; 2 Ba-Korinthe 4:4) Ho hlakile hore Bakreste ba ke ke ba kopanela lipolotiking kapa ba ameha litoantšanong pakeng tsa lichaba; ha e le hantle, ba ke ke ba kopanela le mekhoeng ea bochaba. Bahlanka ba Jehova Molimo ba tšehetsa le ho loanela ’muso oa hae, le hoja e se ka lihlomo tsa nama.—Mattheu 26:52; Johanne 15:19; 18:36; 2 Ba-Korinthe 10:4; Jakobo 1:27; 4:4.

13. Ke ho utloisisa khang efe e matla ho ileng ha etsa hore Liithuti tsena tsa Bibele li nke lebitso “lipaki tsa Jehova,” ’me ke hobane’ng ha le ne le loketse hakaale?

¹³ Ka nako ea teng bahlanka bana ba tšepahalang ba Jehova ba hlokomela hore ho tumisoa ha lebitso la Jehova ke khang e khōlō e talimaneng le batho, le hore hona ke habohlokoa haholo, le ho feta ho bolokeha ha libopuoa tse batho. Hona ruri ea e-ba ho jaleha ho khanyang haholo ha leseli, ho khanyang haholo ho feta ntho leha e le efe e neng e kile ea utloisisoa pele. ’Nete ena e matla ea etsa khethollo e khōlō pakeng tsa bolumeli ba ’nete ba Bokreste le ba bohata ho feta leha e le neng. Hang hoba ’nete ena e matla e ananeloe ha hoa ka ha nka nako hore Bakreste bana ba bone hore lebitso leo ba ipitsang ka lona (Liithuti tsa Bibele), le hoja le sa fosahala, ha le khetholle ka ho lekaneng. Tabeng e ’ngoe thōmo ea bona e ka sehloohong le morero bophelong e ne e se feela ho ba liithuti tsa Bibele empa hape le ho ba lipaki tsa Jehova. Leha e le hore lebitso Liithuti tsa Bibele le ne le ba khetholla ho limillione tse neng li ipolela hore li ithuta Bibele empa bao, leha ho le joalo, ba neng ba tlatsetsa thutong e fosahetseng. Kahoo ka matla a beang leseling a moea o halalelang oa Molimo ba bona lebitso leo ka nepo le ka ho khethehileng le sebetsang ho bona le fumanoang ho Esaia 43:10-12, e leng, “lipaki tsa Jehova.” Ka 1931, ka thabo ba amohela lebitso lena.

Leseli Boprofeteng Le Litšoantšong

14. Ke kutloisiso efe e ileng ea senoloa ke leseli le eketsehang ka boprofeta ba tsosoloso?

¹⁴ Ho tla fihlela nakong ena, batho ba bangata ba ne ba e-na le maikutlo a hore ho khutlela ha Bajode naheng ea habo bona ke phethahatsong ea boprofeta ba Bibele. Empa che, boprofeta bona bo botle le bo khothatsang ba tsosoloso bo ile ba phethahala ka lekhetlo la pele khale lekholong la botšelela la lilemo B.C.E. ha Bajode ba khutla Babylona, ’me bo tla phethahala haholoanyane mehleng ea rōna ho Iseraele ea moea. Re bona ho phethahala ha bona paradeiseng ea moea eo ho eona “Iseraele ea Molimo” ea kajeno le metsoalle ea eona e tšepahalang ba iphumanang ba le ho eona.—2 Ba-Korinthe 12:4; Ba-Galata 6:16.

15, 16. Ke leseli lefe le ileng la khanya litšoantšong tse peli tsa Jesu?

¹⁵ Ha boela ha hlaha kutloisiso e nepahetseng haholoanyane ea litšoantšo tsa Jesu. Mohlala o totobetseng oa ama setšoantšo sa linku le lipōli joalokaha se ngotsoe ho Mattheu 25:31-46. E ne e le khale maikutlo a le teng a hore setšoantšo sena se tla phethahala nakong ea puso ea Kreste ea lilemo tse 1 000. Empa joale Lipaki tsa Jehova tsa bona hore ho hang se ke ke sa sebetsa ka nako eo. Har’a mabaka a mangata e bile hore nakong ea puso ea Kreste ea lilemo tse sekete “baena” ba hae ba ke ke ba e-ba lefatšeng, re se re sa bolele ka hore ba hloke ho hong ka baka la ho kula kapa ho hlorisoa. Kahoo se tlameha ho phethahala hona joale, ha Jesu ea beiloeng teroneng leholimong a phutha lichaba ho tla ahlola, ’me hona ho pakoa ke linnete tse bonahalang phethahatsong ea seo.

¹⁶ Ka ho tšoanang, setšoantšo sa morui le Lazaro se beiloe leseling. Ha bonahala hore morui ha a emele sechaba sa Bajode ka kakaretso, empa baeta-pele ba baikaketsi ba tsoetseng pele ba mehleng ea Jesu, ’me tumellanong le seo, baruti ba bolumeli ba Bojakane ba mehleng ea rōna.—Luka 16:19-31.

17. Ke kutloisiso efe e tsotehang eo ba ileng ba e fumana ka buka ea Tšenolo?

¹⁷ Ka ho tšoanang, leseli le ntseng le khanya ho ea pele la etsa hore bahlanka ba Jehova ba ananele hore buka ea Tšenolo phethahatso ea eona e khōlō e tla qala ka ‘letsatsi la Morena, ke hore, ho tloha ka 1914, e seng paleng eohle ea phutheho ea Bokreste ho tloha mehleng ea baapostola ho tla fihlela kajeno, kamoo ba neng ba kile ba nahana pele ho moo. (Tšenolo 1:10) Ba utloisisa hore ho qaleha ha ‘letsatsi la Morena’ ho ile ha tšoauoa ka ntoa leholimong eo ho eona Mikaele (Jesu Kreste ea beiloeng teroneng) le mangeloi a hae ba ileng ba theola Satane le mangeloi a hae leholimong. (Tšenolo 12:1-12) Batho ba Jehova ba nyakalla haholo ho hlokomela hore mosebetsi oa bona oa ’Muso o hlile oa boleloa, ka ho khethehileng ho Tšenolo likhaolo 2, 3, 6-11.

Taolo Ea Puso Ea Leholimo

18. Ho ile ha ithutoa eng ka taolo ea puso ea leholimo ka liphuthehong tsa Bokreste, ’me hona ha sebelisoa joang?

¹⁸ Mehlala e mengata e ka fanoa ka ho eketseha ha leseli mehleng ea kajeno, empa sebaka se lumella ho thathamisa ho le hong feela hape. Hona ho amana le molao oa puso ea leholimo kapa mokhoa o busoang ke Molimo. Ho isa qetellong ea lekholo la lilemo la bo19, Liithuti tsa Bibele li ne li e-na le tsela ea tsona ea puso ea lentsoe la batho ka liphuthehong tsa tsona; li ne li batla ho tloha tsamaisong ea puso ea borena ba motho a le mong. Empa selemong sa 1938 tsa hlokomela hore tokisetso ena ea lentsoe la batho ha e tšehetsoe ke Mangolo. E ne e se tumellanong le taolo ea puso ea leholimo, e leng puso e qalang ka Molimo e theohela tlase, ho e-na le ho tloha ho motho e ea holimo. (Esaia 60:1, 17-19) Kahoo mehleng ea morao haholo, ka tsamaiso ea moea o halalelang, “mohlanka ea khabane, ea bohlale”e a khetha banna ka liphuthehong ho sebeletsa e le baholo le bahlanka ba sebeletsang. (Liketso 20:28) Bana ba tlameha ho ba le litšoaneleho tsa moea tse boletsoeng ho 1 Timothea 3:1-13 le Tite 1:5-9.

19. Ke hobane’ng ho neng ho ke ke ha lebelloa hore leseli le feletseng le le phethahetseng le tle hang?

¹⁹ Kannete, hona hohle ho bontša hore tsela ea batho ba Jehova e ’nile ea khanya ’me e sa ntsane e khanya joale ka leseli le ntseng le eketsa ho khanya. (Liproverbia 4:18) Ha ba tsoa lefifing le letšo le koahetseng “Babylona e Moholo,” ’muso oa lefatše oa bolumeli ba bohata, ho ne ho sa lebelloa hore ba ka bona lintho tsohle hang feela leseling la tsona la ’nete. (Tšenolo 17:5) Khanya ea ’nete e senoloang e ne e ka ba foufatsa, haesita le ho ba ferekanya moeeng. Hona ho ne ho ka tšoantšoa le motho ea tsoang lefifing le letšo ka kamoreng ’me a kena khanyeng e khanyang haholo ea letsatsi. Ho tla nka nako hore mahlo a motho a tloaelane le khanya e tlang hang ea ho khanya ha letsatsi.

20. (a) Ke sebaka sefe se seholo se koahetsoeng ke leseli la ’nete le ntseng le tsoela pele? (b) Ke potso efe e saletseng hore ho nahanoe ka eona?

²⁰ ’Me, joalokaha re se re bone, leseli le tsoelang pele la ’nete le koahela sebaka se seholo. Ho na le kutloisiso e hloekisitsoeng lithutong, boprofeteng, boitšoarong ba Bokreste le thōmo ea Bokreste, ka se boleloang ke litšoantšo tsa Jesu, tlhophiso e nepahetseng ea phutheho, le tse joalo. Hona hohle ho hlakile ka ho lekaneng. Empa ba bang ba ka ’na ba botsa potso: Ke hobane’ng ha ho bonahala eka kamehla tsela ea Bakreste ba ’nete hase kamehla e tsamaeang e otlolohile ho ea pele? Tlhaloso ke efe? Bakeng sa likarabelo lipotsong tsena re supisa ’mali sehloohong se latelang.

[Mongolo o botlaaseng ba leqephe]

[Lebokose le leqepheng la 25]

Bahlanka ba kajeno ba Jehova ba hlile ba utloisisa hore:

Jehova ke eena Molimo o le mong oa ’nete le hore Jesu Kreste ke Mora ea tsoetsoeng a ’notši oa hae.

Moea o halalelang ke matla a sebetsang a Molimo.

Moea o-oa shoa le hore tšepo ea bafu ke tsoho.

Kreste o tla ba le majalefa hammoho le eena a 144 000 maholimong, ha batho ba bang ba mamelang ba tla amohela bophelo bo sa feleng lefatšeng la paradeise.

Ka nako ea teng ba boela ba ananela hore:

Molimo o lumelletse bokhopo ka baka la khang ea bobusi bo phahameng ba bokahohle.

Boprofeta ba tsosoloso bo sebetsa ho Iseraele ea moea.

Ho phethahala ha Tšenolo ke “letsatsi la Morena.”

[Setšoantšo se leqepheng la 24]

Ho utloisisa merero ea Jehova kamoo e tsebahatsoang ka “Molula-qhooa” ho ’nile ha hlaka ka lilemo