Botšepehi “’Musong oa Morena oa Rōna le oa Kreste oa Hae”

“Ke tla u rata haholo, Jehova, uena u leng matla a ka. Ea molemo [ea tšepahalang] u mo etsetsa ka molemo [botšepehi].”—Pesaleme ea 18:1, 25.

1. (a) Davida o arabetse joang botšepehing ba Jehova? (b) Davida o ile a hlokomela eng, ho fihlela botsofaling?

KE JEHOVA eo ka botšepehi a ileng a hloesetsa Davida teroneng ea Iseraele eohle. E ne e le ka selemo sa 1070 B.C.E. A ananela mosa o lerato ona oa Molimo, Davida ea beiloeng teroneng a ’na a lumela hore Molimo ke Morena oa hae, kahoo e le eena Morena ea Phahameng oa Iseraele. E ne e le haholo tabeng ea setloholo se neng se tla hlaha khale kamorao ho Davida sa Messia, Molimo o itseng: “Ke ’na ka sebele ke tlotsitseng morena oa ka Sione, thabeng ea ka e khethehileng!” (Pesaleme ea 2:6) A ela hloko morena oa sebele oa leholimo, Davida a re: “Mamela lentsoe la ka le hoeletsang ho uena, Morena oa ka le Molimo oa ka! hobane ke rapela uena. Jehova, u mamele lentsoe la ka e sa le ka meso; e sa le ka meso ke talima ho uena, ’me kea lebella.” (Pesaleme ea 5:1-3) Ha a nea mora oa hae Salomone terone botsofaling ba hae, Davida a rapela Molimo ka pel’a phutheho eohle ea Iseraele ’me a re: “Boholo, le matla, le letlōtlo, le hlōlo, le khanya, ke tsa hao! Hobane tsohle tse maholimong le lefatšeng ke tsa hao. Borena le bona ke ba hao, Jehova, ’me u phahametse tsohle u le morena.”—1 Likronike 29:11, 12.

2. (a) Ke khang efe ea lilemo-lemo eo re lokelang ho e lumela kajeno? (b) Ke potso efe e matla eo re lokelang ho e arabela joale motho ka mong?

² ’Nete eo ea bohlokoa kahohle eo Morena Davida a ileng a e lumela pontšeng khale hakaalo ke eo rōna libopuoa tse batho, tseo re seng marena, re lokelang ho e lumela ka ho tšoanang ntle ho lihlong. Ho sebelisoa ha borena ba bokahohle, kapa bobusi, ba Jehova Molimo ke khang e lilemo-lemo e rutoang ka Bibeleng e Halalelang. Ke khang ea molao ea bomolimo eo hajoale e leng ka pel’a batho bohle le lichaba hore e lekanyetsoe ka ho e qetela. Ke mehleng ena ea ho qetela ho lokelang hore ho lokisoe khang ena e pel’a bohle ba leholimong le lefatšeng. Tlhōlo le khanya li ea ho Jehova, li paka ntle ho pelaelo borena ba hae , ba bokahohleng, bobusi ba hae. Potso e matla ka pel’a rōna bohle ke hore Ke mang ea tla tšepahala joale ’musong oa Jehova? Hore na re ema joang hona joale tabeng ena ho ama hore na re tla fumana bophelo bo sa feleng kapa re tla timetsoa ka ho sa feleng!

3. Ke koluoa efe e etsahetseng ka 607 B.C.E., empa ke’ng ha hona ho sa ka ha hlahisa Jehova e le ea sa tšepahaleng?

³ Leha ho le joalo, na Jehova Molimo o ile a lahla ’muso oa hae khale koa ka 607 B.C.E.? Potso e joale e botsoa hobane’ng? Hobane ka selemo seo o ile a lumella ’Muso oa Babylona tlas’a Nebukadnezare hore o timetse Jerusalema le tempele ea eona le ho liha ’muso oa Bajode ho tla fihlela kajeno. Ke ’nete, empa ka tsela eo Molimo ha o ka oa latola le borena ba oona, kapa puso. Ha e le hantle, ke Eena ea laetseng ho timetsoa ha motse oa moreneng oa Jerusalema. Hona, leha ho le joalo, e ne e se ketso ea ho hloka botšepehi ’musong oa hae o tlase o busang batho ba hae bao a ba khethileng. O ne a sebetsa feela tumellanong le litumellano tsa selekane seo a neng a se entse le Iseraele se neng se ekellelitsoe selekaneng sa boholo-holo sa Abrahama. Ka selemo seo sa phelo sa 607 B.C.E., Juda le masala a Iseraele ba ne ba fetohile batlōli ba totobetseng ba selekane. Eaba Molimo o sebetsana le bona ho latela litumellano tsa selekane sa Molao se buelletsoeng ke Moshe Thabeng ea Sinai.

Morena ea Nang le ‘Tokelo ea Molao’

4. Mantsoe a bululetsoeng a Ezekiele 21:25-27 a supa ho tšepahala ha Jehova joang?

⁴ Ka morena oa ho qetela oa Judea Jerusalema, Molimo oa bululela moprofeta oa oona Ezekiele (ea neng a isitsoe kholehong Babylona) hore a re: “Ha e le uena, khosana ea Iseraele, uena molotsana u seng u tla hlajoa, eo letsatsi la hao le fihlang nakong ea bokhopo ba ho qetella, Morena Jehova o re: Rola moqhaka, u tlose mokhabo oa hao; se leng teng ha se sa tla ba teng; ho phahamisoa se kokobetseng, ho kokobetsoa se phahameng. Ke tla mo heletsa, ke mo heletse, ke mo heletse; se leng teng ha se sa tla ba teng, ho be ho fihle eo kahlolo e leng ea hae, eo ke mo neileng eona.”—Ezekiele 21:25-27.

5. (a) Ke hobane’ng ha ho senngoa ha ’muso e ne e tla ba ha nakoana? (b) Hona ho ile ha tiisoa joang lilemong tse fetileng tse fetang 600?

⁵ Ho latela mantsoe ao Morena Molimo Jehova o sa ntsane a laola ka matla litaba tsa ’Muso. Ho senngoa ha ’muso oa hae o tlase o lefatšeng e ne e lokela hore feela e be ha nakoana. Ka nako ea teng e mong o ne a tla tla ea nang le tokelo ea molao boreneng ba bomessia, e be joale Morena Molimo Jehova o mo nea bona. Ho tla fihlela ka nako eo ho sebelisoa ha tokelo ea molao ea borena ho tlameha ho emisa. Kaha tokelo ea selekane e ne e lutse lelapeng la borena la Davida, ea neng a lokela ho tla le eo borena bo neng bo tla beoa matsohong a hae o ne a tlameha hore e be ngoana ea tšepahalang oa Morena Davida. Ke ka lebaka la ho tšepahala ha Davida Boreneng bo sa feleng ba Jehova ho ileng ha etsoa selekane sena le eena bakeng sa ’muso oa ka ho sa feleng lesikeng la hae. (2 Samuele 7:8-16) Lilemo tse fetang makholo a tšeletseng hamorao, kapa ka selemo sa 2 B.C.E., Lengeloi le tsoang ho Molimo la iponahatsa ho mosetsana oa lesika la Davida ’me la mo bolella hore e tla ba ’mè oa mojalefa ea tšepisitsoeng oa Davida. Lengeloi ha le tsoela pele la re: “Morena Molimo o tla mo nea terone ea Davida ntat’ae. O tla busa ntlo ea Jakobo ka ho sa feleng, ’me borena ba hae ha bo ka ke ba e-ba le bofelo.” O ne a tla reoa lebitso la Jesu.—Luka 1:32, 33; Mattheu 1:18-23.

6. (a) Jesu o ile a fetoha mojalefa oa molao oa ’muso oa Davida joang? (b) Ke hobane’ng ha oona e bile ’muso o phahametseng oa lefatše?

⁶ Ka ho tsoalloa ha hae motseng oo Davida a tsoaletsoeng ho oona oa Bethlehema, Jesu Mora oa Molimo ea tsoang leholimong ea e-ba mojalefa oa tlhaho oa tšepiso ea selekane sa ’Muso eo Molimo o neng o e etselitse moholo-holo oa hae Davida. Tokelo ea ’Muso ea e-ba ea hae ka molao le ka tlhaho. Empa ha Jesu a kolobetsoa le ho tlotsoa ka moea o halalelang oa Molimo Ntate oa hae oa leholimo, ’muso oo oa phahamela puso ea lefatše holim’a ntlo ea Jakobo, kapa Iseraele. Ka lekhetlo leo o ile a tlotsoa ka moea o halalelang oa Ntat’ae ea khanyang ’me kahoo a fetoha Mora oa Molimo oa moea ea boloketsoeng bophelo ba leholimo. Ha a le joalo a tlotsoa ka moea oa Molimo ’me kahoo ea e-ba Messia, tlotla e bolelang Motlotsuoa.—Liketso 4:27; 10:38; Esaia 61:1-3.

7. (a) Ke hobane’ng ha Jesu a sa ka a amohela ’muso oa Messia hang-hang? (b) Ho sa le joalo, balateli ba hae ba tlotsitsoeng ba ne ba tla amohela ’muso ofe?

⁷ Kaha ’muso joale e ne e le oa leholimo, Molimo ha o ka oa mo nea oona a sa le lefatšeng, le hang hoba a nyolohele leholimong hape. Le hoja ho ne ho lumeloa hore ke Morena holim’a phutheho ea hae ea moea ea barutuoa ba tlotsitsoeng ba lefatšeng, ho neoa ha hae ’muso oa Messia ho ne ho tlameha ho ema ho fihlela ho felella seo Jesu ka boeena a se bitsitseng “mehla ea lichaba.”—Ba-Kolosse 1:13; Luka 21:24.

8. (a) Ke nako efe e koaheloang ke “linako tsa lichaba,” ’me ke liketsahalo life tse nang le seo li se bolelang tse tšoaileng ho fela ha tsona? (b) Ke joang “pontšo” e totobetseng, hona tšobotsi e totobetseng e bile efe?

⁸ ‘Linako tseo tsa lichaba’ li ne li se li qalile ka selemo sa 607 B.C.E. ha ho ripitloa Jerusalema ka lekhetlo la pele ke Bababylona, ’me ho latela ho etsoa lesupi ha naha ea Juda. Ho latela buka ea boprofeta ea Daniele, khaolo ea 4, “mehla” eo e ne e tla supa, kakaretso ea eona e le lilemo tse 2 250. Kaha e qalile ha ho etsoa Jerusalema lesupi le naha ea Juda le Benjamine mathoasong a hoetla ka 607 B.C.E., e ne e tla fela ka hoetla ka 1914 C.E. Ntoa ea I ea Lefatše ea qhoma karolong e qetellang ea 1914 e na le seo e se bolelang. Ke ka tsela eo boprofeta boo Jesu a faneng ka bona ka “pontšo” e tšoaeang “ho fela ha lefatše” bo qalileng ho phethahala. (Mattheu likhaolo 24, 25; Mareka khaolo ea 13; Luka khaolo ea 21) Ho tloha ka nako eo “pontšo” e hlileng ea boleloa e ntse e hlaka haholoanyane le ho totobala haholoanyane. A bontša hore na tšobotsi e ka sehloohong ea “pontšo” eo e ne e tla ba efe, Jesu a re: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.”—Mattheu 24:14.

9, 10. (a) Mabapi le khang ea botšepehi, joale ho ne ho fihlile nako efe? (b) Ba sa tšepahaleng ba leholimong ba ile ba tlosoa joang, hona ka phello efe lefatšeng la rōna?

⁹ E, joale ho ne ho fihlile nako ea hore qetellong ’muso oa Davida o neoe Mora oa Molimo ea tlotlisitsoeng leholimong, hobane ke eena feela ‘eo tokelo ea molao e leng ea hae’ ho oona ho latela molao o phahameng oa Molimo. Hona ha mema ntoa leholimong. Hobane’ng?

¹⁰ Kaha Morena oa Messia o ile a qala ho rena, ho ne ho fihlile nako ea hore a leleke leholimong bahanyetsi bohle ba puso e ncha, e leng Satane Diabolose le makhotla a hae a bademona. Bana ba lahleloa tlase lefatšeng, moo tsamaiso e laoloang ke bademona ea lintho e ntseng e eme. Makhotla a joalo a khopo a mangeloi a thibetsoe ho kena maholimong a Molimo ka ho sa feleng kaha ke moo ho phelang mangeloi a hae a tšepahalang. Marabele ao a lelekiloeng a mangeloi a tla lula a thibetsoe sebakeng sa lefatše ho fihlela a tlangoa ka sekoting sa ho thibeloa ka ho feletseng ka lilemo tse sekete. ‘Ntoa ea leholimo’ le pheletso ea eona li hlalosoa ka boprofeta khaolong ea 12 ea Tšenolo. Hoba a lelekoe leholimong, mangeloi a hlōtseng a leholimong a luma: “Joale, ho hlahile poloko, le matla, le ’muso oa Molimo oa rōna, le matla a Kreste [Messia] oa oona; hobane monqosi oa banab’abo rōna, ea neng a ba nqosa pel’a sefahleho sa Molimo motšehare le bosiu, o lihetsoe.” (Tšenolo 12:10) Hona ha bolela eng bakeng sa baahi ba lefatše lee? Malimabe a tsoetseng pele bakeng sa batho bohle ba lefatšeng!

Nako ea ho Ahloloa ha ba Tšepahalang

11, 12, (a) Ke teko efe ka botšepehi e etsahalang joale? (b) Ho boleloa ha ’Muso ho kenella joang? (c) Ee ke nako ea kotulo joang, ’me mangeloi a sebelisoa joang?

¹¹ Nakong ena ea ‘malimabe ho lōna ba ahileng lefatšeng le leoatleng, hobane Diabolose a theohetse ho lōna a halefile hampe, ka ho tseba hobane nako ea hae ha e sa le ekae,’ ebile nako ea ho leka botšepehi—botšepehi tsamaisong e ahlotsoeng ea Diabolose ea lintho kapa botšepehi ’musong oa Molimo oo hajoale o hlomiloeng maholimong matsohong a Jesu Kreste. (Tšenolo 12:12) Ke nako eo ka eona bohle ba ipolelang hore ke barutuoa ba Kreste ba lokelang ho beoa kahlolong ho lekanyetsa hore na botšepehi ba bona ’musong o theiloeng ke bo bokae. Na e tla ba baboleli ba sehlahlo ba litaba tse molemo tsa ’muso oo “lefatšeng lohle, e tle e be bopaki ho lichaba tsohle”? Nako ena ea phetoho hape e tšoantšoa le nako ea kotulo bakeng sa ho arola Bakreste ba ’nete ho ba bohata. Joalokaha Jesu a profetile setšoantšong sa hae sa koro le mofoka, “kotulo ke bofelo ba lefatše; bakotuli ke mangeloi.” (Mattheu 13:39) Mangeloi a joalo ho bonahala e le oona a tla sebelisoa ke Morena ’Musi Jehova ho phethahatsa taelo ea hae joalokaha e beiloe ho Pesaleme ea 50:5: “Mpokelleleng baratuoa [ba tšepahalang, NW] ba ka e leng bohle ba entseng selekane le ’na ka sehlabelo.”

¹² Ho ba ipolelang hore ke Bakreste ba sitoang ho feta teko ea botšepehi ’Musong, Molimo o re: “U etsa’ng ha u bolela melao ea ka? Molomo oa hao o bolela selekane sa ka ke’ng?”—Pesaleme ea 50:16.

13, 14. (a) U ka tsebahatsa “selekane” sa Pesaleme ea 50:5, 16 joang? (b) Bakreste ba tlotsitsoeng ba ‘tšepahalang’ ba lokela ho tšepahala lilekaneng life tse peli?

¹³ “Selekane” seo ho boleloang ka sona litemaneng tse kaholimo (Ps 50:5, 16) hase sa botho seo ba tšepahalang ba etsang sehlabelo sa botho ho sona. Ho e-na le hoo, ke selekane sa bosechaba. Selekane, sa Molao oa Moshe se neng se entsoe le sechaba sa Iseraele Thabeng ea Sinai ea Arabia se ile sa sebelisoa ka boprofeta ho emela selekane se secha se entsoeng le ‘sechaba se halalelang’ sa moea sa Iseraele seo ka sona Moshe e Moholo, Jesu Kreste e leng ’muelli. (Jeremia 31:31-34) Bosiung ba Paseka ka 33 C.E. Jesu o ile a thea Sejo sa Morena sa Mantsiboea, kapa Selallo, ’me a re: “Senoelo sena ke selekane se secha maling a ka, se tšolleloang lōna.” (Luka 22:20) Kahoo selekane se secha se ile sa tiisoa ka molao ka mali a sehlabelo a ileng a tšolloa lefung la Jesu Kreste. ‘Ba tšepahalang’ bao Jesu a ba kenyang selekaneng se secha o ba kenya ‘selekaneng sa ’muso.’ (Luka 22:28-30; Mattheu 26:29; Mareka 14:25; Pesaleme ea 116:15) Joale?

¹⁴ Bakreste ba kenngoang selekaneng se secha, e leng ‘selekane se entsoeng ka sehlabelo,’ ha ba lokela feela ho tšepahala ho sona empa hape ba tšepahale ‘selekaneng sa ’muso.’ Bana ke Baiseraele ba moea, “Iseraele oa Molimo.”—Ba-Galata 6:16.

15. Ke ka litsela life Baiseraele ba moea ba lokelang ho ipaka e le ‘ba tšepahalang’?

¹⁵ ‘Ho feleng hona ha lefatše’ ho na le masala a Baiseraele ba joalo ba moea a sa ntsaneng a le lefatšeng. Ke bona ba tlamehileng haholo ho nka bohato tumellanong le boprofeta ba Jesu: “Evangeli ena ea ’muso e tla boleloa lefatšeng lohle; e tle e be bopaki ho lichaba tsohle.” (Mattheu 24:14) Ba ke ke ba hlokomoloha tlameho ena, haeba ba batla ho tšepahala ‘’musong oa Molimo oa rōna [Jehova] le oa Kreste oa hae.’ (Tšenolo 11:15) E ke ke ea e-ba karolo ea tsamaiso ena e ahlotsoeng ea lintho ea lipolotiki, khoebo ea boithati le bolumeli ba eona ba bohata. Bakreste ba tlotsitsoeng ba rapela ka tieo thapelo eo Morena oa bona a ba rutileng eona: “Ntat’a rōna ea maholimong, lebitso la hao a le ke le khethehe; ho tle ’muso oa hao; thato ea hao e etsoe lefatšeng, joale ka ha e etsoa leholimong.” (Mattheu 6:9, 10) Ho e-na le ho kopanela lipolotiking tsa tsamaiso ena ea lintho e litsekana, ba lokela ho etsa ba sa cheche seo Morena oa bona, “Morena oa marena le ’Musi oa babusi,” a se boletseng: “Le mpe le batle muso oa Molimo le ho loka ha oona pele; ’me lintho tseo tsohle le tla li ekeletsoa.” (Tšenolo 19:16; Mattheu 6:33) Ke ka tsela ena feela ba ka ipakang e le ‘ba tšepahalang’ bao e leng ba Iseraele ea moea e ‘entseng selekane le Jehova Molimo ka sehlabelo,’ sehlabelo sa Jesu, ea buelletseng selekane se secha.

“Linku tse Ling” tse Tšepahalang

16. Mangolo a boletsoeng mona a supa sehlopha se seng se seholo sa ba tšepahalang joang?

¹⁶ Botšepehi bo joalo kajeno bo lebeletsoe ho batho ba ineetseng ba ba ba kolobetsoa ba ileng ba tšoantšetsoa ka “letšoele le kopakaneng” le ileng la tloha Egepeta le Baiseraele ’me le ne le le le teng ha ho etsoa selekane sa Molao thabeng ea Sinai. (Exoda 12:38; Numere 11:4) Bana ba lumellana le “bongata bo boholo” boo moapostola Johanne a bo hlalosang ho Tšenolo 7:9-17. Setšoantšong sa Jesu sa linku le lipōli ba boetse ba tšoantšoa e le “linku” tse etsang baena ba moea ba Morena Jesu Kreste hamolemo, ho tloha ha a qalile ho busa ka 1914.—Mattheu 24:3; 25:31-46.

17. (a) “Bongata bo boholo” bona ke karolo ea eng, ’me ba fetoha ‘mohlape o le mong’ le bomang? (b) Ba ka fela ba ‘itlhohonolofatsa’ joang? (Genese 22:15-18)

¹⁷ Ba tšepahalang joalo ke ba “linku tse ling” tseo Jesu a itseng hase tsa “lesaka lena [la Abrahama]” leo ho lona “mohlatsoana” oa ba 144 000 o iphumanang ka ho lona. Empa “bongata bo boholo” bona ba ba tšepahalang bo fetoha “mohlape o le mong” le ba ‘lesakeng’ leo ka ho atametsoa haufi le majalefa ao a ’muso oa Ntate oa bona oa leholimo. (Johanne 10:16; Luka 12:32) Ho lula ka ‘mohlapeng o le mong’ le ‘ba tšepahalang’ bao ba selekaneng se secha le Jehova Molimo ka sehlabelo sa Kreste, le bona ba tlameha ho bontša botšepehi ba bona ’musong oo oa Morena oa rōna Jehova Molimo le oa Kreste oa hae.

18. (a) Moputso oa ba ipakang ba tšepahala hona joale ke ofe? (b) Re ka bontša hore re ananela ho tšepahala ha Jehova ho rōna joang?

¹⁸ Moputso oa ba ipakang ba tšepahala hona joale o moholo haholo. Ka ho ananela Jehova Molimo e le Morena oa leholimo, Morena Davida oa boholo-holo a re ho eena: “Ea molemo [ea tšepahalang, NW] u mo etsetsa molemo [ka botšepehi, NW].” (Pesaleme ea 18:25; 2 Samuele 22:26) Davida a boela a re: “Hobane Jehova o rata ho loka, ’me ha a tlohele bakhethoa [ba tšepahalang, NW] ba hae.” Liproverbia 2:8 e-ea re tiisetsa: “O lisa tsela ea bakhethoa [ba tšepahalang, NW] ba hae.” E, ka sebele, Jehova ke tlhoro ea botšepehi, ’me Kreste oa hae o mo etsisa ka ho phethahetseng tšoanelehong ena. Ho ananeleng ha rōna botšepehi ba Molimo ho rōna ka Kreste, e se eka letsatsing lena la kahlolo re ka ipaka ka botšepehi ba rōna bo sa sisinyeheng ho Jehova le ’muso oa hae o hlomiloeng ka Jesu Kreste, Mora oa hae ea tšepahalang ka ho fetisisa.

HO AKARETSA, BOTŠEPEHI BO BONTŠOA JOANG HO—

□ Lumeleng ha Davida hore Jehova ke Morena?

□ Ahloleng ha Jehova Jerusalema e sa tšepahaleng?

□ Neheng ha Molimo Mora oa hae ’muso oa Davida ka 1914?

□ Loaneng ha Morena oa Messia ntoa leholimong?

□ Mosebetsing oa masala a tlotsitsoeng kajeno?

□ Tšehetseng masala ho etsoang ke “bongata bo boholo”?

[Setšoantšo se leqepheng la 16]

Makhotla ’ohle a mangeloi a sa tšepahaleng ’musong oa Molimo a ile a lelekoa leholimong ha Mora ea tšepahalang oa Molimo a qala ho busa

[Setšoantšo se leqepheng la 17]

Ho tšepahala ’Musong ho hloka hore motho e be ’moleli ea sehlahlo oa oona ho ba bang