Ho Shoela Thuto

O HLAHETSE Tudela, Spain, hoo e ka bang ka 1511. A ithutela bongaka Paris ’me hamorao a sebetsa metseng e ’maloa ea Fora. O tsebahala ka tlatsetso ea hae mabapi le ho sibolloa ha ho phalla ha mali pakeng tsa pelo le matšoafo.

Empa, boholo ba nako a phelisoa joaloka sephooko hoo a bileng a fetola lebitso la hae. Ka la 13 Phato, 1553, ha a le tseleng ho ea Italy, a fapohela Geneva, Switzerland. A tsejoa, a tšoaroa ’me, bophelo ba hae bo beiloe paneng ka tšusumetso ea moeta-pele oa Boprostanta John Calvin, nyeoe ea lula ka la 14 Phato. Qeto? Molato! Kahlolo? Lefu! Ka hona ka la 27 Mphalane, 1553, a chesoa sefateng mathokong a Geneva.

E ne e le mang? Michael Servetus. O ne a le molato oa eng? Polao? Ho nkela batho chelete ka likhoka? Tlōlo e ’ngoe e mpe ea molao? Che, o ile a bolaoa e le mokhelohi hobane a latotse thuto ea Bojakane ea “orthodox” ea “Boraro-bo-bong bo Halalelang haholo.”

Ho tla fihlela kajeno Boraro-bo-bong e ntse e le khang. Ka mohlala, moevangeli oa Amerika Billy Graham o-oa tlaleha: “Bibele e ruta hore Jesu Kreste ke Molimo ka botlalo, ’me ha ho tsela eo a leng ka tlase ho Molimo Ntate ka eona.” Lilemo hamorao, moruti oa Pentakonta a hanyetsa karolong e hlophisitsoeng ea The Denver Post a fana ka lidolara (U.S.) tse millione ho mang kapa mang ea neng a ka fumana thuto ea Boraro-bo-bong ka Bibeleng. A bolela hore Boraro-bo-bong ke thuto ea bohlale ba motho “e sa lumellaneng le e sa utloahaleng.”

U ka ’na ua ipotsa, ‘Empa ho etsa phapang efe? Na ho hlile hoa tsotelleha hore na u lumela eng?’ E, hoa tsotelleha. Hobane’ng? Hobane Jesu Kreste o itse: “Bophelo bo sa feleng bo bolela ho u tseba u le Molimo o ’notši oa ’nete, le ho tseba Jesu lenģosa la hao e le Kreste.” (Johanne 17:3, An American Translation) Katleho ea bophelo ba rōna bo sa feleng e itšetlehile ka hore re tsebe ka nepo “Molimo o ’notši oa ’nete.” Kahoo ’nete ke efe? Na Jesu Kreste ke “Mora oa Molimo” kapa Molimo Mora? Ho na le phapang e khōlō!