Ho Fumana Matšeliso Lentsoeng la Molimo
JEHOVA ke “Ntat’a mehauhelo, Molimo oa matšeliso ’ohle, o re tšelisang mahlomoleng ’ohle a rōna.” (2 Ba-Korinthe 1:3, 4) Ka hona, re tlameha ho retelehela ho eena le Lentsoeng la hae hore re tle re fumane phomolo le matšeliso a ’nete linakong tsa ho tepella.—Ba-Roma 15:4.
Haeba re tšepahala ho Molimo, a ‘ke ke a re tlohela, a ke ke a re lahla.’ Ka tšepo re ka re: “[Jehova] ke mothusi oa ka, nke ke ka tšoha letho; motho a ka nketsa’ng?” (Ba-Heberu 13:5, 6; Pesaleme ea 37:39, 40; 145:20) Ka hona, ka sebele ha rea lokela ho tepella kapa ho nyahama, esita leha re tujoa ka ho fetisisa.
E le karolo ea boprofeta ba hae bo boholo bo phethahatsoang mehleng ea rōna, Jesu o itse: “Le tla ekoa le ke batsoali ba Iōna, le ke banab’abo lōna, le bahabo lōna, le metsoalle ea lōna; ba tla bolaea ba bang ho lōna; ’me le tla hlouoa ke batho bohle ka baka la lebitso la ka.” Empa hang kamorao ho moo Jesu o ile a phaella: “Empa qoba leha e le ’ngoe ea moriri oa lihloho tsa lōna, e ke ke ea timela.” (Luka 21:16-18) Hoo ho ka ba joalo joang? Ka baka la tsoho, eona tšepo ela e ileng ea tšehetsa Pauluse. (Johanne 5:28, 29; 2 Ba-Korinthe 1:9, 10) Na hase ho tšelisang ho tseba hore esita le lefu ka bolona le ke ke la re amoha tšepo ea rōna e babatsehang bakeng sa bokamoso?
Nahana ka matšeliso a ka tlisoang ke tšepo ena le litiiso tsa thuso ea Molimo ho Bakreste ba hlorisoang ba mamelletseng ho hlokofatsoa ’meleng, ba holofetseng le ba qhoalileng ka baka la lihlōhō, le basali ba barapeli ba ileng ba betoa, le batsoali ba arohantsoeng le bana ba bona ka likhoka. E, Lentsoeng la Jehova re fumana lipolelo tse ngata tsa matšeliso le tiiso tse ka bang tsa re etsa hore re thabe ha re le tlas’a mahlomola.—Mattheu 5:10-12.
Hopolang Moputso
Ha u latsoa bomalimabe le ho tujoa, hopola hore ha ho letho le re etsahallang le sa kang la etsahalla bahlanka ba bang ba tšepahalang ba Jehova. Re ka hanela liteko tsa Diabolose tsa ho leka ho re emisa ho sebeletsa Jehova haeba re etsa seo moapostola Petrose a se khothalelitseng: “Hanang ho eena [Diabolose] ka ho tiea tumelong, le ntse le tseba hobane lihloreho li le ling le tsena li ntse li hlahela banab’abo lōna ba lefatšeng.” (1 Petrose 5:9) E, Bakreste ba bang ba mamella liteko tse tšoanang ka baka la litaba tse molemo ’me ba etsa joalo ba sa sekisetse. Re ka etsa ho tšoanang.
Ha rea lokela ho hlokomela ba ileng ba ema ba tiile feela empa hape le meputso eo ba e amohetseng. Ho etsa mohlala: Satane, o ile a sekamela ho pakeng hore Jobo o sebeletsa Jehova feela ka mabaka a boithati, a tlisetsa monna enoa oa Molimo litsietsi li latellana. Pele ho ile hoa bolaoa liphoofolo tsa hae, hoa latela bahlanka ba hae, ’me qetellong ea e-ba bana ba hae ba leshome. A sa khotsofala ke seo. Satane a otla Jobo “ka mathopa a bohale, ho nka bohatong ba maoto ho isa har’a hloho.” (Jobo, likhaolo 1 le 2) Na Jobo o ile a khaola botšepehi ba hae ho Molimo ka baka la litsietsi tsee?
Che, ha a ka a ho etsa. Empa ho thoe’ng ka moputso? Jehova o ile a tsosolosa bophelo ba Jobo, “a mo atisetsa habeli” tsohle tseo e neng e le tsa hae, ’me a mo fa bophelo bo eketsehileng le bo khotsofatsang. (Jobo 42:10-17) Ntle ho meputso ena, ho na le o moholohali oa tsoho ka tebello ea bophelo bo sa feleng lefatšeng la paradeise. (Jobo 14:13-15) Ka sebele, phihlelo ea Jobo e fana ka matšeliso le ho matlafatsa Bakreste ba mahlomoleng kajeno.
“Jehova O-oa Thusa”
Nahana ka taba ea mosali e mong oa Mokreste ea ileng a mamella mahlomola ka lilemo tse ngata likampong tsa mahloriso Jeremane nakong ea Ntoa ea II ea Lefatše. Ho phaelleng maemong a sehlōhō, mahloriso a sehlōhō, le lithibelo ebile ho qobelloa ho arohana le monna oa hae le ngoana oa hae ka lilemo tse hlano, a sa tsebe hore na ho etsahala’ng ka bona. Qetellong, hoba a mamelle ka botšepehi ka lilemo, o ile a boela a kopanngoa le monna oa hae le ngoana oa hae, ’me boraro ba bona ba haesale ba sebeletsa Jehova ka botšepehi. Hlokomela seo a se buang ka phihlelo ea hae:
“Lilemo tseo ke bileng likampong tsa mahloriso Jeremane ka tsona li nthutile thuto e hlakileng. Ke kamoo moea oa Jehova o ka u matlafatsang haholo kateng ha u le tlas’a liteko tse feteletseng! Pele ke tšoaroa, ke ne ke ile ka bala lengolo la khaitseli e mong le neng le bolela hore tlas’a liteko tse matla moea oa Jehova o ka u etsa hore u ikutloe u thobehile. Ke ile ka nahana hore e tlameha e be o fete-fetelelitse. Empa ha ke se ke feta tlas’a liteko, ke ile ka tseba hore seo a neng a se bolela e ne e le ’nete. Ho fetse hoa etsahala ka tsela eo. Ho thata ho utloisisa, haeba u e-so ho latsoe. Empa ho hlile hoa nketsahalla. Jehova o-oa thusa.”
Na ha u tšelisoa le ho matlafatsoa ke lipolelo tsee? Ka baka la ho tiisetsa botšepehing ba hae tlas’a teko, mosali enoa oa Mokreste hammoho le lelapa la hae, o lebelletse ho bona tšepo ea hae ea bophelo bo sa feleng. (Ba-Heberu 10:39) Ke moputso o mokaakang bakeng sa ho tšepahala!
Hoba a latsoe liteko ka lilemo, moena oa rōna ea ratoang Pauluse o ile a ikutloa joang? A nyahame? A khathetse matla? A tepelletse? Le hanyenyane! O ne a le morolo, a tletse tšepo, a thabile hore ebe o ile a mamella. Pauluse o itse: “Ke loanne ntoa e molemo, ke titimile ka qeta sebaka, ke bolokile tumelo. Ho setseng e se e le ho amohela moqhaka oa ho loka oo ke o behetsoeng, oo Morena, moahloli ea lokileng, a tlang ho ’nea ’ona ka letsatsi lela.” (2 Timothea 4:7, 8) Pauluse o ile a tšoarella tseleng ea hae a sa sisinyehe ’me o amohetse moputso oa hae oa leholimo. (Ba-Filippi 3:4-14) Ke mang ea sa tšelisoeng ke mohlala o motle hakaalo? E se eka re ka mamella bomalimabe, re fumana matšeliso a tsoang ka Mangolong ’me re lula re tšepahala ho Molimo oa rōna o lerato, Jehova.
[Setšoantšo se leqepheng la 7]
Phihlelo ea Jobo e matlafatsa Bakreste ba mahlomoleng kajeno