Na u Fumane Senotlolo?
KE HOBANE’NG ha lerato e le la bohlokoa hakaale ho Bakreste? Ka lebaka la Molimo oo ba o rapelang. Moapostola Johanne o o hlalositse ka mantsoe ana: “Molimo ke lerato.” (1 Johanne 4:8, TLP) Joalokaha batsoali ba bangata ba e-na le tšepo ea hore bana ba bona ba tla latela mehlala ea bona, ka ho tšoanang Jehova Molimo o batla ha Bakreste ba leka ho tšoana le eena. Ka hona, moapostola Pauluse o phehelletse hore: “Le fele le be baetsisi ba Molimo, kaha le le bana ba ratoang; ’me le tsamaee leratong.”—Ba-Efese 5:1, 2.
Lerato le boetse le tsitsisa litšoaneleho tse ling tsa Bokreste. Mehleng ea Jesu, Bajode—haholo-holo baeta-pele ba bona—e ne e le liithuti tse hloahloa tsa Bibele. Empa nahana ka seo Jesu a ileng a ba bolella sona: “Le botsisisa Mangolo, kahobane le lekanya hore le na le bophelo bo sa feleng ho ’ona; . . . empa kea le tseba hobane lerato la Molimo ha le eo ho lōna.” (Johanne 5:39, 42; Luka 11:42) Haeba ba ne ba bile le lerato le tsebo, ba ka be ba ile ba lemoha hore Jesu ke Messia. Kamoo ho leng kateng, boholo ba bona bo ile ba lahleheloa ke monyetla oa ho ba har’a ba pele ba phutheho ea Bokreste.
Hape, hopola Baroma ba K’hatholike ba neng ba hapa linaha ba ileng ba isa bolumeli ba bona Lefatšeng le Lecha. E tlameha e be ba ne ba e-na le tumelo e matla le cheseho e tukang malakabe hore ba finyelle seo ba se entseng. Empa ka sebele e ne e sa tsoakoa le lerato. Ho seng joalo, ba ka be ba sa ka ba utsoa, ba hlorisa, ba beta le ho bolaea batala ba mafatše a Amerika.
Ke kahoo lerato e leng tšoaneleho e ka sehloohong ea Bokreste. Lerato lee le lokela ho tobisoa ho bo-mang? Jesu o’a re bolella: “Rata Morena, Molimo oa hao, ka pelo ea hao eohle, le ka moea oa hao oohle, le ka khopolo ea hao eohle. Molao oo ke o moholo oa pele. ’Me oa bobeli, o tšoanang le oona, ke o reng: Rata oa heno joale ka ha u ithata.”—Mattheu 22:37-39.
Ha e le hantle, lerato la Mokreste lona le fetela pejana. Jesu o boetse a re: “Ratang bao e leng lira ho lōna, le hlohonolofatse ba le rohakang; ba le hloileng le ba etse hantle, le rapelle ba le tsohelang matla le ba le hlorisang; le tle le be bana ba Ntat’a lōna ea maholimong; hobane o chabisetsa ba babe le ba batle letsatsi la hae, ’me o nesetsa ba lokileng le ba khopo.” (Mattheu 5:44, 45) Ka mantsoe a mang, lerato la Mokreste le akarelletsa hoo e ka bang bohle! Empa ketsong hoo ho bolela eng?
Haeba re Hlile re Rata Molimo
Ha e le hantle, haeba re hlile re batla ho rata Molimo, ho tla hlokahala hore re o tsebe hamolemonyana. Molimo o nolofalitse hoo ka hore o fane ka Bibele, eo, ha e le hantle, e leng lengolo le tsoang ho oona le tlang ho rōna. Ba bangata ho rōna ha re amohela lengolo le tsoang ho eo re mo ratang, re le bala hona hoo ho sa tsotellehe hore na re phathahane hakae. Na re ka etsa ho fapaneng le hoo ka ho bala Bibele? Che re ke ke. Ke ’nete hore ho ba bangata, kajeno bophelo bo tletse litšitiso ’me ho bonahala ba bangata ba ikhethela ho shebella thelevishene ho e-na le ho bala lintho tse tebileng. Empa Bakreste ba sebele ha ba lumelle hoo hore ho ba thibele ho bala Lentsoe la Molimo. Kahoo, ba tšoana le mopesaleme ea ileng a ngola: “Moea oa ka o boloka likeletso tsa hao [tse fumanoang Bibeleng kajeno], ke li rata ka ho fetisisa.”—Pesaleme ea 119:167.
Ka Bibeleng Molimo o re bolella hore na o batla ha re itšoara joang. Joalokaha batsoali ba beela bana ba bona litekanyetso tsa boitšoaro, Jehova o beile litekanyetso tseo a lebelletseng hore re li boloke—litekanyetso tse ke keng tsa sekisetsoa. Ka mohlala, Bibele e’a re bolella: “Ha e le ba litšila, ha e le ba rapelang litšoantšo, ha e le babōki le bafebi, leha e le basodoma, le masholu, le ba lakatsang leruo, le matahoa, le ba sebang ba bang, le ba utsoang, ba joalo ba ke ke ba rua lefa la ’muso oa Molimo.” (1 Ba-Korinthe 6:9, 10) Leo ke letotohali! Empa mang kapa mang ea hlileng a ratang Molimo o tla thabela ho le hlokomela. Hobane’ng? Hobane joalokaha moapostola Johanne a totobalitse: “Ho rata Molimo, ke ha re boloka litaelo tsa ’ona.”—1 Johanne 5:3.
Ka bomalimabe, mekhoa e mengata e nyatsuoang ka Bibeleng e fetoha e amohelehang kajeno, le hona har’a batho ba “Bakreste.” Tlaleho ea kereke e ’ngoe ea Boprostanta ea Canada e buelletse hore ho inahaneloe ho amohela basodoma hore ba tlotsetsoe ho ba basebeletsi, ea hatisa hore ho kopanela liphate ka thōko ho lenyalo ho ka ’na hoa amoheleha tlas’a maemo a itseng, ’me ea etsa tlhahiso ea hore ho tšepahala lenyalong ho ka ’na hoa khoaela bofebe. Ha ho pelaelo hore bangoli ba tlaleho eo ba ne ba batla ho hlaha ba le likelello li bulehileng e bile e le ba nahanelang. Empa na ba ne ba bontša lerato ho Molimo kapa ho bao ba neng ba ba khothalletsa litsela tsa boitšoaro bo bobe joalo? Le hanyenyane, kaha Pauluse o itse ha etsang lintho tse joalo ba ke ke ha e-ja lefa la ’Muso oa Molimo. E ka ba lerato le lekaakang ho tšoarella ntle ho tšabo litekanyetsong tsa Molimo, ho thusoa ba fokolang hore le bona ba etse ho tšoanang, ho e-na le hore ka ho nkeha maikutlo ba khothalletsoe ho latela tsela e bonolo e tla qetella ka tlokotsi!
Ho Susumelletseha ho Kopanela le ba Bang
Ha re bala Bibele, re boetse re ithuta lintho tse hlollang tseo Molimo o li reretseng batho. Re ithuta hore “Molimo o ratile lefatše hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.” (Johanne 3:16) Re boetse re ithuta ka morero oa Molimo oa ho tlosa bokhopo lefatšeng le ho tlisa tsamaiso e ncha ea lintho ea khotso le ea paradeise ka ’Muso oa oona tlas’a Jesu eena enoa. (Mattheu 6:9, 10; Tšenolo 21:3, 4) Joalokaha Bibele e tšepisa: “Ho se ho se hokae, ’me molotsana o tla ba sieo; . . . empa ba bonolo ba tla rua lefatše, ba iketle khotsong e kholo.”—Pesaleme ea 37:10, 11.
Ha e le hantle, molaetsa oa Bibele ke oona o hlileng o hlokoang ke moloko oa motho. Ke ka lebaka leo e leng ho soabisang ho bala ka baromuoa ba Bokreste-’mōtoana ba nkehileng ke bofuma le leeme tseo ba li bonang linaheng tse futsanehileng hoo ba amehileng lipolotiking le ho fetoheleng mebuso. Ho fetohela mebuso ho ke ke hoa rarolla mathata a linaha tseo. Na baromuoa ba joalo ba hlile ba rata Molimo? Haeba ho joalo, na ba ne ba ke ke ba ho bontša ka tumelo litšepisong tsa oona le ho supisa mehlape ea bona ’Muso oa Molimo? Balisa ba ratang mehlape ea bona ka sebele ba ka e bontša kannete kamoo ho mamela melao ea Molimo ho ka thusang leha e le hona joale ho e-na le ho etsa hore e itšunya-tšunye mererong ea bopolotiki e ka ’nang ea fella feela ka tsieleho.
’Nete ke hore, molaetsa oa Bibele o babatseha hoo ho seng motho ea lerato ea ka ipolokelang oona. Ke ka lebaka leo lerato le susumeletsang Bakreste ba sebele hore ba arolelane le ba bang seo ba se tsebang. Ho Bokreste-’mōtoana mosebetsi oa ho bua le ba bang ka Bibele hangata o tlohelloa sehlopha se senyenyane, se lefuoang le sa litsebi—baruti. Hona ho bile le liphello tse mpe. Joalokaha moruti oa Lutere a lumetse makasineng oa Christianity Today. “Kajeno Kereke e’a fokola hobane baeta-pele ba moea ba hlōlehile ho rupela sehlopha sa balumeli hore se etse mosebetsi o tšoanang le oo ba o etsang. Kapa hobane balumeli ba hlōlehile ho hlokomela le ho amohela tšebeletso e joalo.”
Bakreste ba sebele “ba hlokomela le ho amohela tšebeletso e joalo.” Ba nka ka botebo mantsoe ana a moapostola Pauluse: “A re tiiseng kano ea tumelo ea rōna, re se na ho sisinyeha; hobane ea re tšepisitseng oa tšepeha.” (Ba-Heberu 10:23) Sepheo sa bona ke sefe? Ke se tšoanang le se ileng sa susumetsa sehlopha sa Bakreste bao lekholong la pele la lilemo ba ileng ba babatsoa ka mofuthu ke moapostola Pauluse: “Ba bang ba etsa ka lerato.”—Ba-Filippi 1:17.
Ho Rata Bakreste ba Bang
E, lerato ke senotlolo se isang Bokresteng ba sebele ka hore le ama tšobotsi e ’ngoe le e ’ngoe ea bophelo ba Bakreste ba sebele. Kahoo ba fapana ho hang le batho ba ba potolohileng. Hobane’ng? Moapostola Johanne o itse ka lefatše lena: “Lefatše lohle le rapaletse ka tlase ho e mobe.” (1 Johanne 5:19) E mobe ke Satane Diabolose, ’me lefatše le bonahatsa boholo ba litekanyetso tsa hae tsa boitšoaro liketsong tse ngata tsa lona. Tšusumetso ea Satane e bonoa ho hlokeng botšepehi, boitšoarong bo bobe, leemeng, ho imeloeng maikutlo hoa merabe le tlatlapo ea moruo tseo e leng kobo-anela kajeno. Mokreste, ea rapelang Molimo o lerato le ea o etsisang ka ho hlaolela tšobotsi ea lerato, o tlameha ho ba kahosele!
Joale, ena taba ha ho bonolo hore motho a e etse a le mong. Ke kahoo Bibele e boetseng e re khothalletsang ho batla ba nang le kameho e tšoanang bakeng sa tšobotsi ea lerato. Kahoo, Bakreste ba ka thusana. Ke ka lebaka leo moapostola Pauluse a ngotseng mantsoe ana a khothatsang: “A re lebelaneng, re tle re isane ka cheseho leratong le mesebetsing e metle. Re se ke ra ngala liphutheho tsa rōna, . . . re mpe re khothatsane.”—Ba-Heberu 10:23-25.
Haeba u lakatsa ho arabela khothatsong eo, Lipaki tsa Jehova li ka thabela ho u tsebisa sehlopha sa batho ba lekang ka thata ho bonahatsa lerato la bomolimo bophelong ba bona. Ntle ho pelaelo ho na le sehlopha sena sebakeng sa heno, ’me moea oa Molimo o ho bona hobane, bonneteng, ke oona mohloli oa lerato la ’nete le la Bokreste. “Tholoana ea Moea ke lerato.” (Ba-Galata 5:22) Ho kopanela le bona ho tla u thusa hore u ele hloko khothatso ea moapostola Petrose: “Ratang banab’abo lōna bohle.”—1 Petrose 2:17.
E ka ba ho bohloko hakaakang hore motho a iphumane a le har’a bao kamor’a ho leka ka thata ho sebeletsa Molimo, ba utloang mantsoe a kahlolo a Jesu: “Ha kea ka ka le tseba le mehla; ntloheleng, lōna ba sebetsang bokhopo.” (Mattheu 7:23) Haeba re hlaolela lerato, senotlolo se isang Bokresteng ba ’nete, hoo ho ke ke hoa re etsahalla. Lerato le tla re susumelletsa ho bala Bibele, ho phela tumellanong le litekanyetso tsa eona, ho batla Bakreste ba bang hore re kopanele le bona le ho buisana le ba bang ka lintho tse molemo tse ka Bibeleng. E, lerato le tla re susumelletsa ho etsa seo Molimo o batlang ha re se etsa. ’Me, joalokaha Jesu a boletse, ke “ea etsang thato ea Ntate ea maholimong” ea tla ja lefa la litšepiso tsa Molimo. Moapostola Johanne a phaella: “Ea etsang thato ea Molimo, o hlola ka ho sa feleng.”—Mattheu 7:21; 1 Johanne 2:17.
E, hlaolela lerato. Le lumelle ho u susumelletsa ho etsa thato ea Molimo. Kahoo, u tla ipaka u le Mokreste oa sebele, kaha Jesu o itse: “Seo bohle ba tla tseba hobane le barutuoa ba ka ka sona, ke ha le ratana.” (Johanne 13:35) ’Me u tla thabela meputso ea ka ho sa feleng eo Molimo o e tšepisitseng ba o ratang.
[Setšoantšo le leqepheng la 7]
Hlaolela Lerato