Lintlha tsa Bibele Tsa Sehlooho Lipesaleme Tsa 1 ho ea ho 41

Mopesaleme o Bina Lithoriso Tsa Jehova

“Lithoriso.” Lena ke lebitso la Seheberu bakeng sa buka ea Lipesaleme, ’me ke le loketseng hakaakang! Buka eohle, ha e le hantle, ke letoto la thoriso e lebang ho Jehova Molimo. Lipesaleme li qaqisisa makhabane a Jehova le liketso tsa hae tse matla. Li na le boprofeta ’me hape li na le boikutlo ba bangoli ba bululetsoeng ha ba ntse ba mamella hloriso, keko, ho nyahama haesita le letsoalo le lebe. Bakreste ba bangata ba mahlomoleng a liteko tse tšoanang ba ’nile ba fumana matla mantsoeng a Lipesaleme.

Buka ea Lipesaleme e arotsoe likarolo tse hlano. Mona re tla buisana ka karolo ea pele, Lipesaleme 1 ho ea ho 41.

Ho Ikokobeletsa Merero ea Jehova

Ka kōpo bala Lipesaleme 1 ho ea ho 14. Sehlopha sena sa lipesaleme se kenyeletsa lihlooho tse ling tse khōlō tsa buka ea Lipesaleme: bohlokoa ba Molao, boprofeta bo buang ka Morena oa Messia ea tlang le lithapelo bakeng sa thuso ha ho tobanoe le khatello e matla. Ho phaella moo, re ithuta hore, ho sa tsotellehe ho phahama hoa nakoana hoa ba khopo, ba lokileng ba tla hlohonolofatsoa.

◆ 2:1—Ke ntho efe ea ‘lefeela’ eo lichaba li ’nileng tsa e ‘rera’?

Lichaba li ’nile tsa ‘rera’ (kapa tsa “thuisa”) ho lelefatsa borena ba tsona, ho e-na le ho amohela Motlotsuoa oa Jehova. Mantsoe ana a ile a sebetsa lekholong la pele la lilemo C.E., ha ba boholong ba Baroma le Bajode ba sebelisana ho bolaea Morena ea tlotsitsoeng oa Jehova, Jesu Kreste. (Liketso 4:26-28) Leha ho le joalo, phethahatso e khōlō e bile ho tloha ka 1914, ha lichaba tsohle li ne li hana Morena ea tlotsitsoeng oa Molimo ’me li leka ho ntšetsa pele borena ba tsona.

◆ 2:12—Ke hobane’ng ha ho laeloa, “Akang Mora”?

Mehleng ea Bibele, ho aka e ne e le pontšo ea botsoalle ’me ho ne ho sebelisoa ho amohela baeti kamohelong e mofuthu ea lelapa la motho. Temaneng ena, Jehova o laela lichaba ho aka, kapa ho amohela, Mora oa hae e le Morena oa hae ea tlotsitsoeng.—Pesaleme ea 2:2, 6-8.

◆ 9:12—Ke hobane’ng ha Jehova a batla ho ‘phetetsa mali’?

Joaloka moahloli ea lutseng ho ahlola, Jehova o batla ba molato oa mali ka lebaka la ho tšolla mali a batho ba hae ba se nang molato. (Genese 9:5, 6; Luka 11:49, 50) Hape o otla ba molato. Empa likotlo tsa hae ke tse khethollang. Mopesaleme Davida o’a re tiisetsa: “Ha a lebale mohoeletso oa ba malimabe.”—Bapisa 2 Petrose 2:9.

◆ 11:3—“Metheo” e qhaqhoang ke efe?

Metheo ke toka, molao le taolo—metheo eo tsamaiso ea batho e lutseng ho eona. Ha taolo e senyehile har’a batho, ho se monyetla oa toka, motho ea tšabang Molimo o lokela ho etsa joang? A tšepe Jehova. O teroneng ea hae ea leholimo, o bona sohle se etsahalang ’me a ke ke a re soetsa.

Thuto ho Rōna: Pesaleme ea 4:5 e phehella ba tšabang Molimo hore ba ‘hlahise mahlabelo a ho loka.’ Mehleng ea Davida, Baiseraele ba ne ba tlameha ho nyehela mahlabelo aletareng ea Jehova. Empa hape ba ne ba tlameha ho ba le sepheo se nepahetseng ’me ba bake ka ’nete. (Esaia 1:11-17) Ha Bakreste ba nyehela mahlabelo a bona a moea, le bona, ho hlokahala hore ba be le sepheo se nepahetseng ’me ba tlameha ho phelela litekanyetso tse phahameng tsa Molimo.—Ba-Heberu 13:4, 5, 15, 16; 1 Petrose 2:1, 5.

Molimo o Sa Lekanngoeng

Bala Lipesaleme tsa 15 ho ea ho 24. Sehlopha sena sa lipesaleme se na le lipoleloana tse ’maloa tsa thoriso ho Jehova. Ke Mosireletsi oa batho ba hae (18), ’Mōpi le Monei-molao (19), ’Moloki (20), Mosireletsi oa Morena eo a mo khethileng (21), Molisa e Moholo (23) le Morena ea Khanyang (24).

◆ 16:10—“Mokhethoa” ea boleloang moo ke mang?

Liithuti tse ling tsa Bibele li sebelisa temana ena ho ba tšepahalang ka kakaretso, ho itšehetsa li qotsa ’nete ea hore mangolong a mang a khale a ngotsoeng ka letsoho a Seheberu lentsoe bakeng sa “mokhethoa” le ka bongateng. Leha ho le joalo, ha temana ena e qotsoa ka Mangolong a Bakreste a Segerike, lentsoe le ka bonoosing, ho bontša “mokhethoa” a le mong feela. Ke mang eena eo? Tabeng ea pele, mohlomong ke Davida ka boeena. Empa ka boprofeta, Petrose le Pauluse ba sebelisetsa Jesu temana ena.—Liketso 2:25-32; 13:35-37.

◆ 21:3—“Moqhaka oa gauda e tšekehileng” e ne e le eng?

Mohlomong ona e ne e le moqhaka oa sebele, o kang o ileng oa roloa setšoantšong se rapeloang Malkome. (Bapisa 2 Samuele 12:29, 30.) Kapa mohlomong moqhaka ke oa tšoantšetso feela, tšoantšetso ea ’nete ea hore tlhōlo ea Davida e ne e boetse e khabisitse borena ba hae bo khanyang. Leha ho le joalo, ka boprofeta, pesaleme ena e supa kamoo Jehova a neileng Jesu moqhaka oa bobusi ka 1914. “Moqhaka oa gauda e tšekehileng” o supa ’nete ea hore puso ea hae ke ea boemo bo phahameng ka ho fetisisa.

◆ 22:1—Na Molimo o ne o furaletse Davida?

Che, empa ha Davida a ne a le tlas’a khatello e matla e tsoang ho lira tsa hae, ho ile hoa bonahala e ka ho joalo. Leha ho le joalo, boitšoaro ba botho ba Davida ha a le maqakabetsing a hae ha boa ka ba bontša ho haelloa ke tumelo, kaha o tsoela pele ho rapella topollo ka tšepo. (Litemana 16-19 ea Ps 22) Ho khahlisang, Jesu o ile a qotsa Pesalemeng ena pele a e-shoa thupeng ea tlhokofatso. Ka ho botsa “u ntloheletse’ng?” Jesu o bontšitse khatello e matla ka ho fetisisa eo a neng a le tlas’a eona, ha ka nako e tšoanang a bolela ho hloka molato hoa hae liqosong tsa bohata tse entseng hore a bolaoe.

Thuto ho Rōna: Moapostola Pauluse o qotsa Pesaleme ea 22:22 ’me o e sebelisetsa tseleng eo ka eona Jesu Kreste a etellang pele har’a baena ba hae ba tlotsitsoeng ho boleleng lebitso la Jehova. (Ba-Heberu 2:11, 12) Pesaleme ea 22:27 e supa nako ea ha “mefuta eohle ea lichaba” e tla ikopanya le batho ba Jehova ho mo rorisa. Kajeno, letšoele le leholo la machaba le rapela Molimo hammoho le baena ba Jesu. (Tšenolo 7:9) Re lokela ho lulella haufi le tokisetso ena e hlophisitsoeng ke Molimo.

Matla a Maholo a Jehova

Bala Lipesaleme tsa 25 ho ea ho 34. Ho Lipesaleme tsa 25 le 26, Davida o bolela takatso ea hae ea ho tsamaea botšepehing ba hae. Joale ho latela lipolelo tsa tšepo e sebete ho Jehova ’me, ho Pesaleme ea 33, tlhaloso e babatsehang ea matla a Jehova.

◆ 28:8—“Motlotsuoa” oa Jehova ke mang?

Temaneng ena “motlotsuoa” ke sechaba se khethiloeng sa Jehova, joalokaha ho bonoa tabeng e tšoanang “Jehova ke matla a sechaba sa hae.” Mantsoe ana a na le bohlokoa ba boprofeta bo tšoanang le ba Habakuke 3:13. A supa ho bolokeng hoa Jehova masala a hae a tlotsitsoeng ntoeng ea Harmagedone.

◆ 29:5, 6—Lentsoe la Jehova le robakanya likedare joang?

Pesalemeng ena matla a Jehova a bontšitsoe ka matla ka ho tšoantšetsa lentsoe la hae le sefefo sa sealuma. Sefefo se thetheretsa ho tloha Lebanone ka leboea ho ea libakeng tse lehoatata ka boroa, se kenya tšabo ha se feta. (Temana ea 9b ea Ps 29) Meea ea sona e ekethehisa likedare tsa Lebanone, e li etsa hore ‘li tlole joale ka namane,’ ’me lehalima la sona le liha lifate tse ling, ‘le li robakanya.’ Ka ho tšoanang, meea ea lifefo ‘e thothometsa lefeella’ (temana ea 8 ea Ps 29), e sisinya lehlabathe la lehoatata hoo le bonahalang le thothomela ke ho hlokoloa.

◆ 33:6—‘Pululo ea molomo oa Jehova’ ke eng?

Moea, kapa pululo, e boleloang mona ke moea o halalelang oa Jehova, kapa matla a sebetsang. Joalokaha mantsoe a rōna le phefumoloho li e-tsoa melomong ea rōna ka nako e le ’ngoe, ho joalo le ka lentsoe la Jehova, kapa taelo ea hae, mona le momahanngoa le pululo ea hae, kapa moea oa hae. Molimo o sebelisitse moea oa oona o halalelang ha o bōpa letsatsi, khoeli le linaleli, ke hore, mabotho oohle a tšoantšetso a maholimo a bonahalang.—Bapisa Genese 1:1, 2.

Thuto ho Rōna: Ho Pesaleme ea 26:5, Davida o itse o ne a hloile mokhatlo oa ba bolotsana. Lipaki tsa Jehova kajeno ka ho tšoanang li qoba ho tloaelana le ba bolotsana. (1 Ba-Korinthe 15:33) Joalokaha Davida a bontšitse thahasello e khōlō ntlong ea Molimo, Bakreste bana ba ’nete ba nyakallela ho kopana hammoho mokhatlong o hlophisitsoeng oa Jehova.—Pesaleme ea 26:6-8; 122:1.

“Ho Rorisoe Jehova”

Bala Lipesaleme tsa 35 ho ea ho 41. Tse hlahelletseng sehlopheng sena ke Pesaleme ea 36, e tsebahatsang Jehova e le Mohloli oa bophelo, le Pesaleme ea 37, e re tiisetsang hore ba rutehang ba tla fumana meputso qetellong. Ho hlokomelehang haholo-holo hape, ke Pesaleme ea 40, e nang le lipolelo tse profetang Jesu Kreste.

◆ 35:19—Ke hobane’ng ha lira tsa Davida li ne Ii ka “nyekotsa ka mahlo”?

Lengolo la Seheberu le hlile le ba bitsa “lira tsa ka leshanong.” Ke hore, lehloeo la tsona le ne le tsoaloa ke morero o silafetseng. Davida o ne a sa etsa letho le lokeloang ke bora ba tsona, ’me a rapela hore li se be le monyetla oa ho thaba kapa ho nyakalla ka eena. (Temana ea 19a) Joale, a kōpa hore lira tsa hae tse bolotsana li se be le lebaka la ho “nyekotsa ka mahlo,” hobane ho nyekotsa ho joalo ho ne ho tla fana ka bopaki ba hore Ii nyekotsa ho atleha hoa merero ea tsona e mebe. (Liproverbia 10:10; 16:29, 30) Jesu o qotsitse temana ena ‘me o e sebeliselitse ba mo hloileng.—Johanne 15:24, 25.

◆ 36:3—Na ho na le mohla ba khopo joalo ba kileng ba e-ba le temohisiso?

Ho fanoa ka maikutlo a hore ho bile le phetoho boitšoarong ba motho ea joalo le hore ha a ka a hlola a e-ba seo a neng a ipolela hore o sona. Mohlomong o ne a kile a ba bohlale ’me a etsa lintho tse molemo. Empa o ne a koenehetse hoo, a fetohile mokoenehi. Morena Saule ke e mong ea ileng a furalla tsela ea bohlale, a bontša ho hloea Davida. (1 Samuele, khaolo 18) Liithuti tse ling li bile li na le boikutlo ba hore Davida o buile sena ho Pesaleme ea 36 a nahanne ka Saule.

◆ 40:6—Ho boleloa eng ka mantsoe ‘u ntokisitse litsebe’?

Hona ho ka ’na hoa bolela hore Jehova o entse hore litsebe tsa Davida li bulehele litaelo tsa Molimo, kapa hona hore Jehova o bōpile litsebe tseo Davida a neng a ka utloa litaelo tsa Hae ka tsona. Ho khahlisang, ho Septuagint mantsoe ana a ngoloa e le: “U ntokiselitse ’mele.” Ho sa tsotellehe hore na mohloli oa phetolelo ena ke ofe, e na le mohopolo o tšoanang le oa Seheberu. Ke hore, e hatisa bohlokoa ba kutlo. (Bapisa 1 Samuele 15:22; Hosea 6:6.) Pauluse o sebelisitse temana ena ho Jesu Kreste. (Ba-Heberu 10:5-10) Kaha Pauluse o sebelisitse phetolelo ea Septuagint, poleloana “u ntokiselitse ’mele” joale ke karolo ea “Lengolo lohle” le “bulutsoeng ke . . . Molimo.”—2 Timothea 3:16.

Thuto ho Rōna: Pesaleme ea 37 e na le lithuto tse ngata bakeng sa rōna, kaha joale re phela bohareng ba moloko o khopo. Le hoja ba babe ba atleha, ha rea lokela ho ba honohela le ho leka ho ba etsisa. Ho e-na le hoo, re lokela ho ‘ikhutsetsa pel’a Jehova,’ re sa tšoaee liphoso empa, ho e-na le hoo, ka khutso re mo tšepile hore o tla nka bohato molemong oa rōna ka nako ea hae.—Pesaleme ea 37:5, 7.

E, Lipesaleme li fana ka mantsoe a mangata a susumetsang le a tšelisang. Lipesaleme tsena tsa pele tse 41 li bontšitse khafetsa hore, ho sa tsotellehe hore na maemo a rōna ke a thata hakae, Jehova a ke ke a re lahla. Ka sebele, kamor’a ho li bala, re lokela ho susumeletseha ho pheta mantsoe a qetellang Pesaleme ea 41: “Ho rorisoe Jehova, Molimo oa Iseraele, ho tloha ho bo sa qaleng, ho isa ho bo sa feleng! Amen, e, amen!”