Ho Boloka Bophelo Nakong ea Tlala

 1. Ke bohato hofe bo bohlale bo ileng ba nkoa ke Josefa lilemong tsa nala, hona ka phello efe?

HANG hoba a khetheloe ho ba molaoli oa lijo, Josefa o ile a lekola naha ea Egepeta. Nakong ea ha lilemo tsa nala li qala o ne a se a hlophisitse litaba hantle. Eaba naha e bea lijo tse ngata-ngata! Josefa a ’na a bokella lijo masimong a motse o mong le o mong, a li bokella motseng. A ’na “a bokella koro e ka ka lehlabathe la leoatle ka bongata, e ngata-ngata, ho fihlela a ba a lesa ho e bala, hobane e ne e se na palo.”—Genese 41:46-49.

 2. Ke ka boitelo bofe ba botho batho ba ileng ba fumana lijo?

² Lilemo tse supileng tsa nala tsa fela, ’me tlala ea qala hantle joalokaha Jehova a ne a profetile—tlala ea sekoboto e seng Egepeta feela empa “lefatšeng lohle.” Ha batho ba lapileng ba Egepeta ba qala ho kōpa bohobe ho Faro, Faro a re ho bona: “E-eang ho Josefa, le etseng seo a tlang ho le bolella sona.” Josefa a rekisetsa Baegepeta lijo-thollo ho fihlela ba felloa ke chelete. Eaba joale o ba rekisetsa tsona ka mehlape ea bona. Qetellong, batho ba tla ho Josefa, ba re: “Ak’u re reke joale, rōna le masimo a rōna, ka bohobe, ’me rōna le masimo a rōna re tla ba bahlanka ba Faro.” Eaba Josefa o rekela Faro naha eohle ea Egepeta.—Genese 41:53-57; 47:13-20.

Tokisetso ea Phepo ea Moea

 3. Jesu o profetile boemeli bofe ba ho lokisetsa lijo ka nako ea teng?

³ Joalokaha lijo-thollo tse ileng tsa abjoa ke Josefa li ne li bolela bophelo bakeng sa Baegepeta, ka ho tšoanang lijo tsa ’nete tsa moea lia hlokahala bakeng sa ho phelisa Bakreste ba fetohang bahlanka ba Jehova ka boineelo ba bona ho eena ka Josefa e Moholoanyane, Jesu Kreste. Nakong ea tšebeletso ea hae ea lefatšeng Jesu o profetile hore balateli ba hae ba ne ba tla jara boikarabelo ba ho aba litokisetso tsena. O ile a botsa: “Ana ke mang mohlanka ea khabane, ea bohlale, eo morena oa hae a ’meileng moalosi oa bahlanka ba hae ho ba nea lijo nakong ea teng? Ho lehlohonolo mohlanka eo morena oa hae, mohla a fihlang, a tla mo fumana a etsa joalo.”—Mattheu 24:45, 46.

 4. Tokisetso e entsoeng ke sehlopha sa “mohlanka” kajeno e lumellana joang le se neng se hlophisitsoe mehleng ea Josefa?

⁴ Masala a tšepahalang a sehlopha sena sa “mohlanka ea bohlale” kajeno a nka mehato leha e le efe ea Mangolo ho bona hore lipaki tse ineetseng tsa Jehova hammoho le batho ba thahasellang ba lefatšeng ba amohela lijo tsa moea tse phelisang. Kabelo ena e hlokomeloa e le tšoanelo e halalelang ’me e etsetsoa Jehova e le tšebeletso e halalelang. Ho feta moo, “mohlanka” o hlophisitse liphutheho ’me o li fepela ka lingoliloeng tsa Bibele tse ngata hoo li nang le “peō” e ngata ea ’Muso bakeng sa ho e aba phatlalatsa masimong ao li a abetsoeng. Hona ho lumellana le mehleng ea Josefa ha a ne a bokella batho metseng ’me a ba nea lijo-thollo tseo e neng e sa tl’o ba tsa phepo feela empa hape ba tla li jala hore hamorao ba tle ba kotule.—Genese 47:21-25; Mareka 4:14, 20; Mattheu 28:19, 20.

 5. (a) Ke tlhokomelo efe eo “mohlanka” a e neang litlhoko tsa ntlo nakong ea koluoa? (b) ‘Bongata’ ba litokisetso tsa moea ka 1986 bo bapisoa joang le phepelo ea lijo nakong ea Josefa?

⁵ Leha mosebetsi oa ho bolela pontšeng o thibetsoe ’me Lipaki tsa Jehova li hlorisoa, “mohlanka ea khabane” o nka ho fana ka lijo tsa moea e le boikarabelo bo halalelang. (Liketso 5:29, 41, 42; 14:19-22) Ha likoluoa tse kang lifefo, likhohola le litšisinyeho tsa lefatše li otla, “mohlanka” o hlokomela hore ho fanoa ka se hlokoang ke ntlo ea Molimo nameng le moeeng. Le ba likampong tsa mahloriso ba ’nile ba fihleloa kamehla ka lentsoe le ngotsoeng. Meeli ea bochaba ha ea lumelloa ho thibela hore lijo tsa moea li phallele ho ba li hlokang. Ho hloka sebete, tumelo ho Jehova ’me hangata masene a maholo hore lijo li ’ne li be teng. Lefatšeng ka bophara ka 1986 feela, “mohlanka” o entse hore ho phalle Libibele le libuka tse sekoahelo se thata tse 43 958 303, hammoho le limakasine tse 550 216 455—ka sebele ‘tse ngata haholo, joale ka lehlabathe le lebōpong la leoatle.’

Boiphetetso, Kotlo, kapa Mohau?

6, 7. (a) Tlala e ile ea fella joang ka hore banab’abo Josefa ba leshome ba mo khumamele? (b) Ke ka litsela life Josefa ka boeena joale a neng a le tekong?

⁶ Qetellong tlala ea sekoboto ea oela naha ea Kanana. Jakobo a roma banab’abo Josefa ba leshome hore ba ee Egepeta ho ea reka lijo-thollo. Empa ha a ka a roma Benjamine, eena feela ngoan’abo Josefa oa letsoele, ka lebaka la ho tšaba hore, joalokaha a boletse, “a ka tšoha a hlaheloa ke kotsi.” Kaha Josefa ke eena ea neng a rekisa, banab’abo ba tla ho eena ’me ba khumama ka pel’a hae. Le hoja ba sa ka ba tseba ngoan’abo bona, Josefa o ile a ba tseba.—Genese 42:1-7.

⁷ Joale Josefa a hopola litoro tsa hae tsa pejana ka bona. Empa o ne a tla etsa joang? Na a ka iphetetsa? Nakong ea ha ba ne ba tsielehile ka ho fetisisa, na a ka ba leballa tšoaro eo ba neng ba ile ba mo tšoara ka eona? Ho thoe’ng ka mahlomola a fetisisang a ntat’ae? Na a ka a lebala? Banab’abo joale ba ile ba ikutloa joang ka phoso e khōlō eo ba neng ba e entse? Josefa le eena, o ne a le tekong tabeng ena. Na liketso tsa hae li ne li tla ba tumellanong le boikutlo boo Josefa e Moholoanyane, Jesu Kreste, a neng a tla bo bontša hamorao, joalokaha bo hlalositsoe ho 1 Petrose 2:22, 23: “Eena ea sa kang a etsa sebe, ’me le thetso ha ea ka ea fumanoa molomong oa hae; enere ha a rohakoa, o na a sa rohake; ha a na a utloisoa bohloko, o na sa bope; empa o na a tšepa ea ahlolang ka ho loka. ”

 8. Josefa o ne a tla tataisoa ka eng, ho bontša eng mabapi le Jesu le barutuoa ba Hae?

⁸ Kaha Josefa o ne a bona letsoho la Jehova phethahalong ea liketsahalo tsena, o ne a tla ba hlokolosi hore a boloke melao le melao-metheo ea Molimo. Ka tsela e tšoanang, Jesu kamehla o ne a chesehela ho etsa ‘thato ea Ntat’ae’ ha a ntse a aba bophelo bo sa feleng ho ‘bohle ba lumelang ho eena.’ (Johanne 6:37-40) Joaloka “manģosa a Kreste,” barutuoa ba hae ba tlotsitsoeng le bona ba phethahatsa boikarabelo ba bona bo halalelang ka ‘ho bolella sechaba litaba tsohle tsa bophelo bona.’—2 Ba-Korinthe 5:20; Liketso 5:20.

 9, 10. (a) Josefa joale a nka tsela efe, hona hobane’ng? (b) Josefa o bontšitse qenehelo e tšoanang le e neng e tla bontšoa ke Jesu joang?

⁹ Josefa ha a ka a itsebisa banab’abo hang-hang. Ho e-na le hoo, o ile a ba buisa ka thata ka toloko, a re: “Le lihloela!” Kaha ba ne ba buile ka moena oa bona, Josefa a laela hore ba pake botšepehi ba bona ka hore ba tle le eena Egepeta. Josefa a ba utloa ha ba bolellana ka pako hore tsela ena eo litaba li etsahalang ka eona e tlameha e be e le tefetso ea hore ba mo rekise bokhobeng. Ha a furalla, Josefa a lla. Leha ho le joalo, a etsa hore Simeone a tlangoe ho fihlela ba khutla le Benjamine.—Genese 42:9-24.

¹⁰ Josefa o ne a sa iphetetse ka lebaka la bobe boo a bo etselitsoeng. O ne a batla ho lekanyetsa hore na e be pako ea bona ke ea ’nete, botebong ba lipelo tsa bona, e le hore ba ka hauheloa. (Malakia 3:7; Jakobo 4:8) Ka boikutlo ba qenehelo, bo tšoanang le bo neng bo tla bontšoa ke Jesu, Josefa ha a ka a tlatsa mekotla ea bona ka lijo-thollo feela empa hape a ba buseletsa chelete ea bona molomong oa mokotla oa e mong le e mong. Ho phaella moo, a ba fa mefaho bakeng sa leeto la bona.—Genese 42:25-35; bapisa Mattheu 11:28-30.

11. (a) Kamorao ho nako, Jakobo o ile a qobelloa ho etsa joang, ’me ke hobane’ng ha a ile a qetella a lumetse? (b) Ba-Roma 8:32 le 1 Johanne 4:10 ka ho tšoanang li re tiisetsa lerato la Molimo joang?

¹¹ Kamorao ho nako, ba qeta lijo tseo ba neng ba li rekile Egepeta. Jakobo a kōpa bara bana ba robong hore ba khutle ho ea reka tse ling. Pele ho moo, o ne a ile a etsa kōpo bakeng sa Benjamine, a re: “Mor’a ka a ke se ke a tsamaea le lōna; hobane moholoane oa hae o shoele, ’me eena o siiloe a ’notši; ekare ha a ka hlaheloa ke kotsi leetong leo le le tsamaeang, le tla theosetsa moriri oa ka o moputsoa nģalong ea bafu ka bohloko.” Leha ho le joalo, kamorao ho ho mo phehella halelele le hore Juda a itlame ka Benjamine, Jakobo ka monyebe a lumela hore ba nke moshemane ba ee le eena.—Genese 42:36–43:14.

12, 13. (a) Josefa o ile a bea teko joang ho senola se ka lipelong tsa banab’abo? (b) Phello e ile ea nea Josefa motheo oa ho bontša mohau joang?

¹² Ha Josefa a bona hore Benjamine o tlile le banab’abo, a ba memela ha hae, moo a etsa mokete. Benjamine a mo ngoathela hahlano ho feta ba bang. Eaba Josefa o leka banab’abo ka lekhetlo la ho qetela. A boetse a busetsa chelete ea bona mekotleng ea bona ka bomong, empa senoelo sa hae se khethehileng sa silevera sa tlamelloa molomong oa mokotla oa Benjamine. Hoba ba tlohe, Josefa a romela molaoli oa ntlo ea hae ho ea ba nģosa ka bosholu le ho batla senoelo sa hae mekotleng ea bona. Ha se fumanoe mokotleng oa Benjamine, banab’abo ba hahola liaparo tsa bona. Ba khutlisetsoa ho ea talimana le Josefa. Juda a ikōpela mohau, a ithaopela hore e ka ba lekhoba bakeng sa Benjamine, e le hore moshemane a ka khutlela ho ntat’ae.—Genese 43:15–44:34.

¹³ A kholisehile joale hore lipelo tsa banab’abo li fetohile, Josefa a sitoa ho itšoara. Hoba a laele hore bohle ba tsoe, Josefa a re: “Ke ’na Josefa, ngoan’abo lōna, eo le rekileng ka ’na, ke tle ke isoe Egepeta. ’Me joale, le se ke la tsieleha, la itlhonamela kahoba la na la rekisa ka ’na, ka tla koano, hobane Molimo o nthomile ka pele ho lōna hore ke tle ke le pholose. . . . ho le boloka lefatšeng, le ho le pholosa ka pholoso e kholo.” Eaba joale o re ho banab’abo: “Phakisang, le ee ho ntate, le re ho eena: . . . theoha, u tle ho ’na, u se ke ua lieha! U tla aha naheng ea Goshene, . . . ke tla u ōtla teng, hobane lilemo tsa tlala li sa tla li le hlano; hore u se ke ua fumaneha uena le ntlo ea hao, le ba leng ho uena kaofela.”—Genese 45:4-15.

14. Jakobo o ile a bolelloa litaba life tse thabisang?

¹⁴ Ha Faro a utloa litaba tse buang ka banab’abo Josefa, a bolella Josefa hore a lokise makoloi a tlohang naheng ea Egepeta ho ea lata ntat’ae le lelapa la hae ho le tlisa Egepeta hobane karolo e nonneng haholo ea naha e ne e tla ba ea bona. Jakobo a hlasimoloha moeeng ha a utloa sohle se etsahetseng ’me a bua ka thabo: “Ho lekane! Josefa, mor’a ka, o sa phela; ke tla ea, ke ee ho ’mona ke e-so ho shoe.”—Genese 45:16-28.

Lijo tsa Moea li Ngata

15. Joale re shebile mang bakeng sa lijo tsa moea, ’me re ka tiisetsoa nala joang?

¹⁵ See sohle se bolela eng ho rōna kajeno? Kamehla re falimehetse seo re se hlokang moeeng, re sheba ho Ea Moholoanyane ho Faro ea mosa oa mehleng ea Josefa. Ke Morena ’Musi Jehova ea fanang ka se phelisang le ea tataisang mehleng ena e lefifi ea lefatše le tlaleng ea ’nete ea Bibele. Re ikitlaelitse lithahasellong tsa ’Muso oa hae, joalokaha eka re tlisa karolo eohle ea rōna ea leshome polokelong ea hae. O re buletse “liphororo tsa leholimo” ka mosa o mokaakang, a tšolla mahlohonolo “ka tekanyo e fetisisang”!—Malakia 3:10.

16. (a) “Lijo” tse phelisang li ka fumanoa kae feela kajeno? (b) Ho jaloa ha “koro” molemong oa batho ba lapileng ho atolositsoe joang?

¹⁶ Ka letsohong le letona la Jehova ke Molaoli oa hae oa Lijo, eo hona joale e leng Morena ea beiloeng teroneng, Jesu ea tlotlisitsoeng. (Liketso 2:34-36) Joalokaha batho ba ile ba lokela ho ithekisa joaloka makhoba hore ba ’ne ba phele, ka ho joalo kajeno bohle ba batlang hore ba ’ne ba phele ba tlameha ho tla ho Jesu, ba fetoha balateli ba hae ba ineetseng ho Molimo. (Luka 9:23, 24) Joalokaha Jakobo a ile a laela bara ba hae hore ba ee ho Josefa bakeng sa lijo, ka ho tšoanang Jehova o tataisetsa batho ba bakileng ho Mora oa hae ea ratoang, Jesu Kreste. (Johanne 6:44, 48-51) Jesu o bokella balateli ba hae ka liphuthehong tse kang metse—tse fetang 52 000 ka palo lefatšeng ka bophara kajeno—moo ba feptjoang ka lijo tse ngata tsa moea ’me ba fepeloa ka “lijo-thollo” tse ling hape, e le “peō” e ka jaloang masimong. (Genese 47:23, 24; Mattheu 13:4-9, 18-23) Lipaki tsena tsa Jehova ke basebetsi ba baithaopi! Li ntse li ithaopa ka bongata bakeng sa tšebeletso ea nako e tletseng ea bopula-maliboho hoo ngoahola tlhoro ea ba 595 896 e ileng ea kopanela tšebeletsong ena e tlotlehang ka khoeli e le ’ngoe. Hoo ke karolelano ea bo-pula-maliboho ba fetang ba 11 phuthehong e ’ngoe le e ’ngoe!

17. Ke tlaleho efe hape ea boprofeta e tšoanang le ea ho kopanngoa ha Josefa le banab’abo ba leshome?

¹⁷ Hoa hlokomeleha hore kaofela banab’abo Josefa ba leshome, ba bakile boikutlong le liketsong tsa nakong e fetileng, ba ile ba kopanngoa le eena Egepeta, eo eona le Sodoma, li tšoantšetsang lefatše leo Jesu a ileng a khokhotheloa ho lona. (Tšenolo 11:8) Hona ho re hopotsa Zakaria 8:20-23 e fihlang tlhorong ka “banna ba leshome” ba reng, “Re tla ea le lōna,” ke hore, le batho ba tlotsitsoeng ba Jehova, bao masala a bona a sa ntsaneng a sebeletsa mona lefatšeng.

18. Mohau o khethehileng o ileng oa bontšoa Benjamine o tšoana le eng kajeno?

¹⁸ Leha ho le joalo, ho thoe’ng ka Benjamine, eena feela ngoan’abo Josefa oa letsoele, eo mosali ea ratoang oa Jakobo, Ragele, a ileng a shoa ha a mo beleha? Benjamine o ile a fumana mohau o khethehileng ho Josefa eo ntle ho pelaelo a neng a ikutloa a atamelane haholo le mora enoa oa ’m’ae. Ho ka etsahala hore hona ho ikarabella ka hore Benjamine a fumane likarolo tse hlano ha bana babo ba 12 ba kopanngoa hape kaofela ka lekhetlo la pele moketeng ha Josefa. Na Benjamine ha a tšoantšetse hantle masala a Lipaki tse tlotsitsoeng kajeno, ao boholo ba a ntseng a phela e leng a ileng a bokelleloa ka lehlakoreng la Morena ho tloha ka 1919? Sehlopha sena sa “Benjamine” ka sebele se amohetse karolo e khethehileng ho Jehova, ha ‘moea oa hae o emelana le moea oa bona.’ (Ba-Roma 8:16) Bana le bona, ba lekiloe botšepehing ba bona ha “linku” tsa Morena li ntse li ba sebeletsa.—Mattheu 25:34-40.

19. Ke ho tšoana hofe ho hlokomelehang pakeng tsa ho fallela ha lelapa la Iseraele Goshene le ho bokelloa ha batho ba Molimo kajeno?

¹⁹ Hoa thahasellisa hore ha Faro a ne a lokisetsa hore Jakobo le ba ntlo ea hae ba tlisoe Egepeta, banna bohle ba ileng ba fallela moo ba ne ba le 70, palo e fumanoang ha ho atisoa 7 ka 10. Lipalo tsena tse peli li sebelisoa ho hlalosa ho itseng ka Mangolong, “7” hangata e bontša phetheho ea leholimo ’me “10” phetheho ea lefatšeng. (Tšenolo 1:4, 12, 16; 2:10; 17:12) Hona ho lumellana kajeno le boemo ba ha re ka lebella hore Jehova o tla bokellela le moneketselanyana oa ho qetela oa lelapa la hae la Lipaki ka “naheng” ea hae, paradeise ea moea eo re thabileng ka ho eona hona joale. (Bapisa Ba-Efese 1:10.) “Morena [Jehova] o tseba bao e leng ba hae,” leha e le hona joale o ba bea “naheng e fetisang ka botle,” joalokaha ho ne ho le joalo ka Goshene pusong ea Faro.—Genese 47:5, 6; 2 Timothea 2:19.

20. Ho sa tsotellehe tlala ea moea kajeno, ke hobane’ng ha re tlameha ho thaba?

²⁰ Mehleng ea Josefa, lilemo tsa nala li ile tsa lateloa ke lilemo tsa tlala. Kajeno, li matahane. Ha ho bapisoa le tlala ea moea naheng e ka ntle ho mohau oa Jehova, lijo tsa moea li ngata sebakeng sa Jehova sa borapeli. (Esaia 25:6-9; Tšenolo 7:16, 17) E, le hoja Bokreste-’mōtoana bo lapetse ho utloa mantsoe a Jehova joalokaha Amose a profetile, lentsoe la Jehova le hlaha ka sebele Jerusalema oa leholimo. Hoo ho re thabisa hakaakang!—Amose 8:11; Esaia 2:2, 3; 65:17, 18.

21. (a) Re thabela tokelo efe e khōlō kajeno? (b) Re lokela ho leboha eng, hona re ka bontša liteboho tsa rōna joang?

²¹ Kajeno, tlas’a tsamaiso ea Josefa e Moholoanyane, Jesu Kreste, re na le tokelo e khōlō ea ho bokelloa liphuthehong tse kang metse. Moo re ka nyakalla naleng ea lijo tsa moea le ho jala peō ea ’nete le ho hasanya litaba tse molemo tsa hore lijo tsa moea lia fumaneha. Hona re ho etsa molemong oa bohle ba amohelang litumellano le litokisetso tse lokiselitsoeng ka lerato ke Morena ’Musi, Jehova. Re ka isa liteboho tse kaakang ho Molimo oa rōna ka mpho ea Mora oa oona, Josefa e Moholoanyane, ea sebeletsang e le Molaoli ea bohlale oa lijo tsa moea! Ke eena ea ntšitsoeng ke Jehova ho sebetsa joaloka ’Moloki oa bophelo nakong ena ea tlala ea moea. E se eka e mong le e mong oa rōna a ka bontša masene ha a etsa tšebeletso e halalelang, a etsisa mohlala oa hae a bile a le tlas’a boetapele ba oona!

Na u Bona ho Tšoana?

◻ Josefa o ile a tšoantšetsa Jesu e le Molaoli oa Lijo joang?

◻ Tšoantšisong ea Josefa ke eng e tšoantšoang le ho ba bahlanka ba Molimo ka boineelo?

◻ Ke tšobotsi efe e bontšoang ke Josefa le Jesu e le mohlala oa rōna kajeno?

◻ Joaloka mehleng ea Josefa, ke tokisetso efe e phethahetseng ea kabo ea lijo e teng kajeno?

◻ Ho buisana ha rōna ka tšoantšiso ena ho lokela ho re tlama hore re etse joang?

[Litšoantšo tse leqepheng la 16, 17]

Lefatšeng le aparetsoeng ke tlala ea moea, Josefa e Moholoanyane o lokisetsa ha hongata bakeng sa bohle ba tlang ho eena ka tumelo

Joalokaha banab’abo Josefa ba leshome ba ile ba bontša ho ikokobeletsa eena, bongata bo boholo hona joale bo amohela Kreste

Joaloka banna ba 70 ba lelapa la Jakobo, palo e feletseng ea linku tsa Jehova e tla fihla “naheng” e nonneng—paradeise ea moea eo re e thabelang hona joale

[Setšoantšo se leqepheng la 18]

Sehlopha sa kajeno sa Benjamine se hauhetsoe ka ho khethehileng ke Kreste, se amohela nala ea “lijo ka nako ea teng”