Kopano e Ekelitseng Tšepo ea Rōna ho Jehova

NTATE oa rōna oa leholimo, Jehova Molimo, o tseba seo re hlileng re se hlokang. ’Me o kenya sena mehopolong ea bahlanka ba hae ba inehetseng ba tsamaisang mosebetsi oa hae lefatšeng ho khotsofatsa tlhōko eo. Ka sebele ho ka boleloa joalo ka likopano tsa Setereke tsa “Tšepa Jehova” tse tšoeroeng ho potoloha lefatše ho tloha ka Phuptjane 1987, ho ea pele. Ruri li matlafalitse Bakreste khahlanong le lipelaelo, le ho hloka tšepo ho tletseng hohle lefatšeng.

Sehlooho “Tšepa Jehova” se ile sa kenyelletsoa ka bokhabane lenaneong. Se ile sa totobatsoa ka lipuo tse matla tse tobileng, le tse neng li toba taba. Tsena tsohle li matlafalitse tšepo ea bamameli ho Jehova. Ba khutletse mahaeng sehlooho se hatisitsoe ka matla lipelong tsa bona le likelellong, ba ikemiselitse hore ka liketso tsa bona le mantsoe hore ba tla tsebisa bohle hore ba tšepa Jehova ka ho feletseng.

“Lona Batho, Tšepang Jehova”

Mantsoe ao a fumanoa ho Esaia 26:4, NW e bile sehlooho sa letsatsi la pele. Ka ho loketseng, lenaneo le qalile ka puo “Sekehela Mantsoe a Molimo Tsebe.” Sebui se bontšitse hore mantsoe ana, a hlahang ka makhetlo a mangata Lentsoeng la Molimo, a bolela ho lebisa tlhokomelo e feletseng ka kelello le pelo, ka sepheo sa ho sebelisa seo u se utloileng. Seo se bolela boitšoaro le ho beha mohopolo ho se boleloang, e seng ho tlohella monahano ho lelera. Ka ho sekehela mantsoe a Molimo tsebe tšepo ea rōna ho Jehova e tla matlafatsoa ke seo re se utloang ’me re tla susumeletsoa ho sebelisa se boletsoeng. ’Me na bona ha ea lokela ho ba boikutlo ba rōna neng le neng ha re utloa Lentsoe la Molimo le hlalosoa, joaloka libokeng tsa rōna tsa phutheho?

Molula-setulo oa kopano o ile a nehelana ka puo e latelang, “Ba Tšepang Jehova ba Thabela ho ba Mona.” O bontšitse hore ha re tšepa Jehova haholoanyane, thabo ea rōna le eona e ba khōloanyane. Ho tšepa Jehova ho bolela ho itšetleha ka eena ka ho feletseng le ka tieo. Ha re e-na le tsebo e khōloanyane ka Jehova re mo rata, le tšepo ea rōna ho eena e tla ba matla haholo. Sehlooho sa kopano e ne e se lepetjo feela. Empa re bontša tšepo ea rōna ho Jehova ka litsela tse ngata, e ’ngoe ea tsona ke ho nahanela ba bang. Ha a phetha puo ea hae, molula-setulo o ile a thabisa bohle ka ho ntša tokollo ea pele—kofuto e rutang ea ho paka e nang le mebala. E ne e le pampitšana Lebaka la Hore U Tšepe Bibele.

Hoba se bolele ka mohlala o ka sehloohong oa Davida ha a ne a thulana le seqhobane Goliathe, sebui se hlahlamang se ile sa fana ka puo: “Kamoo ba Bang ba Ileng ba Tšepa Jehova” mehleng ea kajeno. Ka mohlala, ho ne ho e-na le khaitseli eo monna oa hae ea sa lumeleng, ea neng a tšoere sethunya letsohong, a ileng a mo tšosa ka ho ’molaea haeba a sa khaotse ho ea libokeng. Ba bang ba bontšitse tšepo ea bona ho Jehova ha ba bolelloa hore bophelo ba bona bo itšetlehile ka ho amohela tšelo ea mali. Bacha ba fane ka bopaki ba tšepo ea bona ho Jehova ka ho hanyetsa likhatello tsa ho kenela lipapali kapa ho hahamalla thuto e phahameng kamor’a hore ba qete sekolong se phahameng.

Lenaneo la Labohlano hoseng le phethiloe ka puo “Batho ba Ikarotseng ka Morero Lefatšeng.” Re bontša hore re tšepa Jehova ka ho boloka boitšoaro ba rōna le ba batona kapa ba batšehali bo hloekile, ka ho lumella melao-metheo ea Bokreste ho laola boikhathollo ba rōna, le ka ho qoba moaparo ’ohle le boitlhopho tse tla sira ho khetholleha ha motho e motona kapa e motšehali. Ka ho ikarola ha rōna lefatšeng ka morero, nako le nako ho fanoa ka bopaki bo matla, ha esita le ho qetella ka hore ba bang ba amohele ’nete.

Labohlano motšehare oa mantsiboea, lenaneo le qalisitse ka puo “Bopula-maliboho bo Potlakisa Khōlo ea Moea.” ’Me seo ke ’nete hakaakang! Ka Lentsoe la Jehova, moea oa hae o halalelang, le mokhatlo oa hae o hlophisitsoeng, Jehova o fana ka seo re se hlokang ho tsoela pele ho ba “monna ea hōlileng ka botlalo,” empa bopula-maliboho bo re beha boemong bo molemo ba ho sebelisa hamolemo litokisetso tsena tsohle tsa moea. (Ba-Efese 4:13, NW) Ka lipuisano, bo-pula-maliboho ba boletse kamoo tšebeletso ea nako e tletseng e ba thusitseng kateng ho hlaolela haholoanyane litholoana tsa moea oa Molimo, ho bontša lerato le eketsehileng ho batho, ho ba ba beang litholoana boboleling, le ho tšepa Jehova haholoanyane, esita le ho eketsa kamano e haufi le eena. Tsena tsohle li potlakisitse khōlo ea bona ea moea.

Ha latela puo ea sehlooho, “Batho ba Tšepileng Jehova Kamehla.” Puo ena e susumetsang e bontšitse hore re fapane le lefatše kahobane re tšepile Jehova ka ho feletseng. E theiloe likhaolong tse sa tšoaneng tsa buka ea Esaia, sebui se bontšitse kamoo re boneng boprofeta bo thahasellisang bo phethahala ho Lipaki tsa Jehova hobane li tšepa Molimo. Re lebelletse pele ka tšepo bokamosong bo haufi ha Jehova a tla bontša khalefo ea hae ho lichaba tsohle ’me a tlise Paradeise.

Ba bileng teng kopanong ba ile ba khothaletsoa ho “Phatlalatsa Litaba tse Molemo ha Monyetla o Mong le o Mong o Buleha.” Hoba ho hatisoe bohlokoa ba ho etsa seo lipontšo tse ngata li bontšitse kamoo pampitšana e ncha Lebaka la Hore U Tšepe Bibele e ka sebelisoang ka katleho bopaking ba kamehla le bo sa rereloang. Ruri, kamehla re batla ho lula re e-na le lipampitšana tsena, kahobane ho phatlalatsa litaba tse molemo ha monyetla o mong le o mong o buleha e lokela ho ba letšoao le khethollang paki e ’ngoe le e ’ngoe ea Jehova ’me ke tsela e ’ngoe ea ho bontša hore re ea Mo tšepa.

Puo e ileng ea ananeloa haholo ebile “Batsoali—Finyellang Pelo ea Ngoana oa Lōna ho Tloha Boseeng.” Hore ngoana a hōle a tšepile Jehova, koetliso ea hae e lokela ho qalisoa ho tloha boseeng ’me e lokela ho nka boemo ba pele. Ke ka ho etsa joalo feela ho ka etsahalang hore a hanele litšusumetso tsohle tse mpe tsa thelevishene, sekolo le seterata. Batsoali ba ile ba bolelloa hore, ‘seo u batlang hore ngoana oa hao a be sona, o lokela ho se bona ho uena.’ E, ho bea mohlala o motle ke tsela e molemohali ea ho finyella pelo ea ngoana oa hao. Litšobotsi tsohle tsa tšebeletso e halalelang li lokela ho itlela ka tlhaho e be tse thabisang haeba boemo ba lelapa e tla ba ba moea ka ’nete. Ha re batle ho hlokomoloha nako le boiteko tse amehang. Tsoela pele ho finyella pelo ea ngoana ka puisano e ntle. Hlaolela botsitso le lerato, ’me u fane ka mabaka ha u fana ka taeo. Mo rorise le ho mo babatsa ha ho hlokahala, empa u se ke ua putsa ngoana oa hao.

Mabapi le mathata a tebileng har’a bacha ba bang ba Lipaki tsa Jehova ha fanoa ka puo “Bacha—Itebeleng Hore le se Phele ka Mekhoa e ’Meli Sephiring le Pontšeng.” Ke hobane’ng ha ba bang ba leka ho phela ka mekhoa e ’meli sephiring le pontšeng? Ke hobane ba batla kamohelo ea batsoali ba bona le phutheho empa ba boetse ba tšaba ho sonngoa ke lithaka tsa bona tsa lefatše. Kapa ba nahana hore ba itima monate o itseng haeba ba sa tsube, ba sa sebelise lithethefatsi, kapa ba sa kopanele boitšoarong bo bobe ba botona le botšehali. Empa ho ke ke ha iphapanyetsoa ’nete ea hore ho phela ka mekhoa e ’meli sephiring le pontšeng ho tlisa thohako ho Jehova, masoabi ho batsoali ba motho, le masisa-pelo ho motho ka boeena. E mong le e mong ea jalang nameng o kotula ho bola, empa ho boloka kamano e ntle le Jehova, ho mo tšepa ka ho feletseng, ho sireletsa motho khahlanong le ho phela ka mekhoa e ’meli sephiring le pontšeng.—Ba-Galata 6:8.

Tšoantšiso e ileng ea latela e buelletse ka matla melao-metheo ena kaofela. Sehlooho sa eona ebile “Ho Ikokobetsa ka Botšepehi ho Jehova le Mokhatlo oa Hae o Hlophisitsoeng,” ’me e ne e fupere boitsebiso bo bongata boo motho a ka bo thuisang joalokaha e bontšitse kamoo moholo a ileng a ikutloa a tlamehile ho theoha boemong ba ho ba moholo kahobane ho ile ha bonahala hore morali oa hae o ne a phela ka mekhoa e ’meli sephiring le pontšeng. Tšoantšiso e hlahisitse mantsoe a mangata a kananelo.

“Tšepa Jehova ’me U Etse ho Hotle”

Sena ebile sehlooho sa letsatsi la bobeli la kopano se theiloeng ho Pesaleme ea 37:3, NW. Kamor’a puisano ka temana ea letsatsi, e kopanyelelitseng khothatso ea ho etsa sena kamehla, lenaneo le ile la hlahisa lipuo tse tharo tse neheletsanoang sehloohong “Ho Bontša Tšepo ea Rōna ho Jehova.” Sebui sa pele se bontšitse bohlokoa ba ho etsa sena ka ho “Khothalla ho Ithuta Lentsoe la Molimo.” Re lokela ho etsa sena ho qoba leraba la boithati le la maruo, boitšoaro bo bobe ba botona le botšehali, le bokoenehi. Mokhatlo o fane ka lithuso tse ngata tsa ho ithuta Bibele, tse joaloka Watch Tower Publications Index 1930-1985 e ncha. Ke feela ka ho sebelisa litokisetso tsena hamolemo re ka bang le botsoalle bo tšepahalang le Ntate oa rōna oa leholimo le ho ba lipaki tsa hae tse atlehang.

Sebui se hlahlamang se hatelletse ’nete ea hore ho tšepa Jehova ho bontšoa ke “Ho Sebelisa Lintho tseo re Ithutileng Tsona.” E, re batla ho ba baetsi ba Lentsoe, kamehla re amehe ka ho bontša tsoelo-pele. Libakeng life? Likamanong tsa rōna le ba bang, moaparong oa rōna le boitlhopong, ka ho batla ’Muso oa Molimo pele, le ka ho hōlisa khotso le bonngoe har’a baena ba rōna! Ho qoba sebe sa boikhohomoso, re lokela ho ba seli ho boloka libaka tsa rōna lapeng le phuthehong. Haeba re sebelisa lintho tseo re ithutileng tsona, e tla ba bopaki ho bohle hore re tšepa Jehova.

Lipuo tsa neheletsano tsa phethoa ka puo e nang le sehlooho “Tšepa Jehova—Ka ho Ikitlaetsa ka Matla Tšimong.” Ka ho etsa sena, re bontša lerato la rōna ho Jehova le moahisani oa rōna esita le ho itšireletsa. Mohlomong re ka khotsofala ke tšebeletso e fokolang, empa ho thoe’ng ka Jehova? Na Mora oa hae ha a re khothalletsa ho ikitlaetsa ka matla? (Luka 13:24) Keketseho eo re e bonang ho bahoeletsi, bo-pula-maliboho, le karolelano ea lihora tse sebelisitsoeng boboleling ba tšimo li lokela ho re susumeletsa ho leka ho etsa ho hongata motho ka bomong. Na ha ho joalo? Ka mosebetsi o joalo o mafolo-folo, re tla bea mohlala o motle, re tla bontša tšepo ea rōna ho Jehova, ’me re tla fumana kamohelo ea hae.

Ho hlahlamang ebile puo e ipiletsang matsoalong a rōna “Ithute ho Fana Haholo.” Jehova o fana haholo hakaakang bakeng sa rōna moeeng le nameng! Re bontša kananelo ea rōna ka ho mo etsisa ka ho fana ka bopaki le ho etsa menehelo ea chelete mabapi le mosebetsi oa boboleli. Na re ka fokotsa boithabiso bo batlang chelete e ngata e le hore re ka fana haholo?

Puo ea kolobetso, “Boinehelo ba Hao le Kolobetso li Bontša hore U Tšepile Jehova,” e bontšitse lebaka la hore ke hobane’ng ha re lokela ho tšepa Jehova ho e-na le batho. Kolobetso ea metsing e tšoantšetsa ho shoa tseleng ea boitšoaro ba rōna ba pele le ho tsosetsoa tseleng ea bophelo e lumellanang le thato ea Molimo. Kamor’a moo, re lokela ho tsoela pele ho ‘etsa se lokileng, ho rata bokhabane, le ho tsamaea ka boikokobetso le Molimo oa rōna.’ (Mikea 6:8) Har’a ba neng ba kolobetsoa ebile ngoanana ea lilemo li 8 ea khannang lithuto tse peli tsa Bibele le bao a kenang sekolo le bona, le monna-moholo ea lilemo li 79, le motho ea lilemo li 44 ea holofetseng maoto.

Lenaneo la Moqebelo motšehare oa mantsiboea le qalisitse ka puo “Ho Etsa ‘Lintho tse Hlokahalang’ ho Thabisa Molimo.” E theiloe ho Liketso 15:28, 29, e bontšitse bohlokoa ba ho tsebisa lingaka tsa rōna boemo ba rōna ka mali pele ho hlaha bothata ba tsa meriana le ho ba nea litlhahiso tse molemo bakeng sa kamoo li ka etsang sena.

Puo e ananetsoeng haholo ebile “Ho Beleha Bana ka Kutloisiso Mehleng Ena ea Bofelo.” E fane ka pono e leka-lekaneng, e bontšitseng hore ho beleha bana ho ka tlisa thabo e ngata, ’me ho boetse ho tlisa boikarabelo bo bongata ’me hangata ho fella ka mathata a joaloka lefu la pelo, ha bana ba etsa liphoso. Ho bonahala bo-’mè e le bona ba tsoang kotsi moeeng ka lebaka la boikarabelo ba ho beleha bana.

Joale ha latela puo “Baholo—Lebelang Boikarabelo ba Lōna.” Boikarabelo bona ke ho alosa mohlape oa Molimo—ho etella pele, ho fepa le ho o sireletsa, tumellanong le Esaia 32:1, 2. Ho hlokomela litlamo tsa lelapa ka botšepehi ebile u hlokometse mesebetsi ea phutheho ho tlisa phephetso ea sebele. Hore baholo ba lebele boikarabelo ba bona ho boetse ho bolela ho qoba maraba a maruo, boikhathollo bo feteletseng, boithabiso bo sa lokang. Har’a bao ho buisanoeng le bona kopanong ea setereke ea Dortmund Rephabliking e Kopaneng ea Jeremane ebile moholo ea lebetseng boikarabelo ba hae ka lilemo tse 60.

Ho ile ha latela puo “Utloang ba le Etelletseng Pele.” Lerato le tla re thusa ho ba ba ikokobelitseng le ho utloa balebeli ba phutheho ’me le tla re thibela ho ba ba hlokang mamello hobane ba sa phethahala joaloka rōna. (Ba-Heberu 13:17) Ha re hlompha baholo litabeng tse khōlō le tse nyenyane, re ba thusa ho jara meroalo ea bona ho e-na le ho e eketsa.

Lenaneo la Moqebelo le ile la phethoa ka lipuo tse tharo tse neheletsanoang “Lentsoe la Molimo Lea Phela,” tse theiloeng ho Ba-Heberu 4:12. Sebui sa pele se bontšitse hore lea phela kahobane “Le Fana ka Matla a Fetolang.” Kajeno, joaloka mehleng ea Bibele, re na le mehlala e mengata e bontšang kamoo ho tšepa Lentsoe la Molimo ho entseng hore batho ba etse liphetoho tse khōlō bophelong ba bona ’me le ba matlafalitse hore ba bolele ka sebete.

Karolo ea bobeli ea neheletsano ena Lentsoeng la Molimo e bontšitse hore Lentsoe la Molimo le “Bohale ho Feta Sabole e Leolitsoeng ka Nģa tse Peli.” Le re nolofaletsa ho hlatha lithuto tsa Babylona. Le boetse le re thusa ‘ho arola pakeng tsa bophelo le moea’ ka kutloisiso ea hore le re nolofaletsa ho khetholla mahareng a liketso tsa rōna le boitšoaro ba rōna ba sebele. Ka ho sebelisa “lerumo” ka tsela ena, re tla thabisa Jehova Molimo haholo hammoho le ho ba le khotso le batho ba bang.

Puo e phethang e bontšitse hore Lentsoe la Molimo lea phela kahobane “Le Matlafatsa Pelo ea Rōna le ho e Susumetsa.” Ka Bibeleng, lentsoe “pelo” ka kakaretso le sebelisitsoe ka tšoantšetso ’me le supa motho ea ka hare ea bontšoang litšobotsing tsa rōna tsa kelello le maikutlo. Lentsoe la Molimo le matlafatsa pelo ea rōna ka ho senola litšobotsi tsa hae tse babatsehang litšebelisanong tsa hae le batho. Lerato la Molimo le hlokang boithati le re susumeletsa ho mo etsisa. Lintlheng tsa sona tsa ho phetha, sebui se boletse ka karolo ea Mokhatlo oa Watch Tower ea ho hlahisa Libibele ’me sa thabisa bamameli ka ho tsebisa ho lokolloa ha khatiso e ntle e lekanang pokotho ea New World Translation ea deluxe.

“Tšepa Jehova ka Pelo ea Hao Eohle”

Sehlooho sena sa Sontaha, se nkiloeng ho Liproverbia 3:5, NW se ile sa buelloa ke moholo ea butseng lenaneo le ho bua ka temana ea letsatsi. Joale ha latela puo e fatang maikutlo “Na U Nka Lintho tse Halalelang Habobebe?” Lefatše le ikutloa hore ha le kolote Molimo letho, empa joaloka Lipaki tsa Jehova, rea tseba hore ha re batla kamohelo ea hae, re lokela ho etsisa banna ba boholo-holo ba tšepahalang ka ho bontša kananelo bakeng sa lintho tse halalelang. Sebui se boletse ka tse 13 tsa tsona, tseo har’a tsona e le lebitso la Jehova, Lentsoe la hae, moea oa hae o halalelang, melao ea hae, mokhatlo oa hae o hlophisitsoeng o bonahalang, kamano e haufi le Molimo, liboka tsa rōna, litokelo tsa rōna tsa tšebeletso. Haeba ka ’nete re ananela lintho tsena tse halalelang, re tla li etelletsa pele bophelong ba rōna, re tšepile Jehova ka ho feletseng, le ho putsoa ke eena.

Ha latela puo e otlang botsekeng “Nyonya ka ho Feletseng Tsela ea Bophelo e Lihlong ea Lefatše.” Ka lebaka la matla a eona, e hlahisitse lipolelo tse kang, “Ke sona seo re neng re se hloka!” Kaha bokhopo bo fetohile ntho e tloaelehileng, Bakreste ba lokela ho itebela khahlanong le boitšoaro bo bobe le pefo. (2 Timothea 3:1-5) Kahoo, ha rea lokela ho shebella kapa ho mamela lintho tse joalo tse hasoang thelevisheneng kapa seea-le-moeeng kapa ho li bala libukeng. Ha e le hantle, ha re batle le ho nahana ka tsona. ‘Bakreste ba ’nete ba lakatsang ho boloka kamano e ntle le Jehova ha ho moo ba ka amanang le litšoantšo tsa bootsoa,’ che, e seng le hanyenyane feela!

Lenaneo la Sontaha hoseng le ile la phethoa ka tšoantšiso ea Bibele e hapang thahasello “Jehova o Loela ba Bitsang Lebitso la Hae.” E boletse ka liketsahalo tse ngata bophelong ba Joshua. Ka sebele, e bontšitse kamoo baahi ba Jeriko e tlamehang ebe ba ile ba talima kateng ho potoloha ha bahlabani ba Iseraele motse letsatsi le leng le le leng. E boetse ea totobatsa tumelo e khōlō ea Rahaba, e qeteletseng ka hore a pholosoe hammoho le lelapa la hae. Ha ho liheloa likhala, bohle ba ile ba botsoa: ‘Na u na le tumelo e tiileng le tšepo tseo Joshua le metsoalle ea hae ea bahlabani ba neng ba e-na le tsona? Haeba ho joalo, re ka tšepa ho kopanela tlhōlong ea ho qetela ea lira tsa Jehova.’

Puo ea phatlalatsa ea Kopano ea Setereke ea “Tšepa Jehova” ebile puo e reng “Ke Mang eo U ka mo Tšepang ka Sebele Mehleng ea Rōna e Tšosang?” E hlakisitse ’nete ea hore batho ba hloka mohloli oa tšepo e le ka ’nete! E bontšitse ka ho hlaka booatla ba ho tšepa batho. Kahoo, Lentsoe la Molimo le re eletsa ho tšepa Jehova ’me le re nea mabaka a matla a ho etsa joalo. Re lokela ho mo tšepa ka lebaka la litšoaneleho tsa hae le tlaleho ea hae ea ho pholosa ba mo tšepileng, Morena Ezekiase ebile mohlala o hlollang. Haufinyane topollo e joalo e tla latsoa ke bao tsela ea bona e bontšang hore ba tšepa Jehova.

“Tsoelang Pele ‘le Phela ka Khotso’” ebile sehlooho sa puo e ileng ea latela kamor’a moo. Ho phela ka khotso ho bolela ho ba mafolo-folo ho hōlisa khotso. Ho boetse ho bolela ho ba le khotso ka borōna ka lebaka la ho ba le letsoalo le letle. Ka ho bontša litholoana tsa moea oa Molimo, haholo-holo lerato le boitšoaro, re tla nolofalloa ho phela ka khotso le malapa a rōna le baena le bo-khaitseli ka phuthehong.

Ha ho pelaelo ka ’nete ea hore kopano ena e re hlomelletse bohle hamolemo bakeng sa “Ho Talima Bokamoso Re E-na le Tšepo e Feletseng ho Jehova,” ebile sehlooho sa puo e phethang. E akarellelitse lenaneo hantle hakaakang! Sebui se hatelletse hore letsatsi le leng le le leng ho hlokahala hore re tšepe Jehova ka pelo ea rōna eohle, re mo ele hloko litseleng tsohle tsa rōna, ’me a re tsamaise. (Liproverbia 3:5, 6) Ba bileng teng kopanong ba thabetse haholo ho utloa ka lipuo tsa phatlalatsa tse ncha tse 16, ho hatisoa hape ha sehlooho se buang ka mali se hlahileng ho Awake! le hore se tla fumaneha hore re se nehe lingaka tsa rōna. E, re ile ra thabela ho utloa ka tokollo e ’ngoe ea k’hasete ea tšoantšiso ea Bibele, le ho hatisoa ha lipampitšana tse ling tse tharo!

Bohle ba bileng teng kopanong ea Setereke ea “Tšepa Jehova” ba matlafalitsoe haholo moeeng. Joale ba ikemiselitse ho talimana le bokamoso ka tšepo e feletseng ho Ntate oa bona oa leholimo. ’Me bohle ba ile ba khothatsoa ka ho loketseng ke mantsoe a qetellang: “Joalokaha re talimane le bokamoso, e se e ka bohle re kopane re ka ipaka ka tsela ea rōna ea bophelo hore re ‘tšepile Jehova.’”

[Chate e leqepheng la 26]

Likopano tse sa tšoaneng tsa Setereke tsa “Tšepa Jehova”

Ba Bileng Teng Ba Kolobelitsoeng

Austria 24 686 360

Brazil 442 731 7 626

British Isles 156 417 1 225

Colombia 82 321 1 852

Denmark 23 029 200

Finland 26 144 284

France 138 683 2 705

Hong Kong 2 661 49

Ireland 4 326 61

Italy 221 227 5 496

Jamaica 18 540 184

Japan 232 904 3 416

Korea 82 296 2 013

Malaysia 1 154 15

Norway 12 703 218

Portugal 55 057 1 074

Puerto Rico 49 953 377

Spain 105 591 2 394

Sweden 30 099 312

Switzerland 19 459 261

Trinidad 10 649 132

United States 1 288 313 13 562

Venezuela 100 777 1 664

Zimbabwe 45 544 580

[Litšoantšo tse leqepheng la 25]

Litšoantšiso tse susumetsang maikutlo li totobalitse bohlokoa ba ho tšepa Jehova

F. W. Franz, setho sa Sehlopha se Busang sa Lipaki tsa Jehova, o buisana le letšoele le mametseng ka hloko kopanong

[Setšoantšo se leqepheng la 26]

Ba bangata ba bontšitse ho tšepa Jehova ka ho kolobetsoa ho tšoa- ntšetsa boinehelo ba bona ho eena