Likahlōlo tsa Molimo Li Tlameha Ho Phatlalatsoa
“U eme, u ba bolelle tsohle tsee ke tla u laela tsona; u se ke ua tšaba pel’a bona.”—JEREMIA 1:17.
1. Lipaki tsa Jehova li ile tsa ‘etsa hore leseli la tsona le khanye’ Jeremane ea Bonazi joang?
“MAHLORISO a Lipaki tsa Jehova ’Musong o Neng o Chesa Batho [Jeremane ea Bonazi] a ile a ikhetha har’a linako tse ling tsa ho lekoa historing ea tsona.” (Holocaust Studies Annual, Volume II—The Churches’ Response to the Holocaust) Daily News ea Afrika Boroa ea la 15 Phupu, 1939, le eona e ile ea bolela tjena ka Lipaki tsa Majeremane: “Joaloka khanya eo ho seng mohla e tukelang tlaase, sehlopha sena se senyenyane sa banna le basali ba Bakreste se ema se tiile tumelong ea sona, e le moutloa lehlakoreng la Morena oa Munich [Adolf Hitler] ’me e le bopaki ba hore baa phela ho fapana le eena ea shoeleng ea neng a itse o tla ba felisa.” Mantsoe ana a re hopotsa hore Jesu o ile a re balateli ba hae e ne e tla ba “leseli la lefatše” ’me ba ne ba tla lokela ho etsa hore leseli la bona le khanyetse lefatše, ho sa tsotellehe hore na hoo ho ne ho tla ba hloka ho hokae.—Mattheu 5:11, 12, 14-16.
2, 3. Ke mohlala ofe oa motho ea ileng a bolela a sa tšabe letho o ileng oa etsahala Sri Lanka?
2 Tlaleho e ’ngoe, e tsoang Sri Lanka e khathatsoang ke likhukhuni, e bolela ka mohlankana e mong oa Paki oa Motamil, David Gunaratnam, eo ka mokhoa o kang oa Jeremia, a ileng a fana ka boboleli ho ba boholong sesoleng a sa tšabe letho. O ne a ile a tšoaroa le bahlankana ba bang bakeng sa ho hlongoa lipotso. Tlaleho e bolela hore: “Liofisiri tseo le banna bao li ne li khahliloe ka ho fetisisa ke tsebo e batsi ea monna eo, hape ho feta moo, ke ho tiea ha hae ho neng ho le pepenene, haholo-holo ha a ne a re, ‘’Me haeba ke ne ke tla kopana leha e le mang ea bitsoang sekhukhuni, ke ne ke tla mo nea boboleli bo tšoanang.’”
3 Bosiung bona boo likhukhuni li ile tsa mo tlosa lapeng la hae ka mahahapa, ’me tsa mo qosa ka hore o sebelisana le sesole. O ile a hatella hore o ne a sa nke lehlakore ’me a bolela hore o ne a mpa a bolela molaetsa oa ’Muso oa Molimo. “Ke etsa mosebetsi oa Molimo ’me ke tla tsoela pele ho o etsa. Ke bolella mang kapa mang ea tla mamela ntle le khethollo.” Paki ena e sebete e ile ea thunngoa ’me ea bolaoa ke likhukhuni, e siea mohlolohali e monyenyane le lesea la moshemane.—Bapisa Liketso 7:51-60.
4. Ke mahlōriso afe a Lipaki tsa Jehova a ileng a lumelloa ke baruti a ileng a etsahala naheng e ’ngoe ea Latin America?
4 Ho tsoa naheng e ’ngoe ea Latin America, moo mahlōriso a Lipaki a lumeletsoeng ke baruti ba bang ba K’hatholike le ba Mapresbitheri, ho fumanoe tlaleho ena: “Ho ne ho e-na le Lipaki tsa Jehova tse hlano kampong ea sesole . . . Li ne li otloa khafetsa ’me li behelloa kathōko li sa fuoe lijo. Ofisiri ea bopolotiki e neng e ikarabella ka ho fana ka thupelo ea mokha o busang e ne e li otla hobane li ne li bolella masole a mang. E ile ea re har’a bakhelohi bohle ba bolumeli, Lipaki tsa Jehova e ne e le tse kotsi ka ho fetisisa.”
Tšusumetso le Boitšoaro
5. Ho tšoana le tabeng ea Jeremia, ke eng eo hangata e hlohlelletsang mahlōriso a Lipaki?
5 Joalokaha Jeremia a ile a hlōrisoa ke babusi ba bolumeli le ba bopolotiki ba mehleng ea hae, kahoo Lipaki tsa Jehova li talimana le khanyetso lefatšeng ka bophara ho tsoa lihlopheng tsona tsena. Liketso tsee li susumetsoa ke eng? Le hoja Lipaki e le karolo e nang le khotso ka ho fetisisa le e utloang molao ka ho fetisisa sechabeng sefe kapa sefe, lira tsa tsona li talima Lentsoe la Molimo le le kotsi, hobane le ea li khopisa li bile li hana molaetsa oa lona ka ’Muso oa Molimo. Boboleli ba tsona bo sa sekisetseng le melao-motheo li pepesa boithati le ho hloka ’nete ha likaroloana tsa bopolotiki, tsa khoebo, le tsa bolumeli tsa tsamaiso ea Satane.—Johanne 15:18, 19; 1 Johanne 5:19.
6. Lipaki tsa Jehova li ile tsa itšoara joang mahlōrisong?
6 Empa, ho sa tsotellehe ho kenngoa teronkong, ho otloa, le lona lefu, Lipaki tsa Jehova lefatšeng ka bophara li ’nile tsa itšoara joaloka Jeremia oa boholo-holo. Le hoja li bontša lerato le hlompho, li tsoela pele ho bolella lichaba likahlōlo tsa Molimo tse sa ratoeng. (2 Timothea 2:23-26) Lia tseba hore li tlameha ho utloa Molimo e le ’Musi ho e-na le batho. (Liketso 4:19, 20; 5:29) Li hlokomela keletso ea Pauluse ho Bakreste ba Baheberu, ka ho khethehileng, ho mamella ho etseng thato ea Molimo. Joale li tla bona phethahatso ea tšepiso eo, bophelo bo sa feleng. Kahoo, joaloka Pauluse le Jeremia, re lokela hore re khone ho re: “Ha e le rōna, ha re batho ba koenehang ho ea timela; empa re ba tiisang tumelo ho pholosa meea ea rōna.”—Ba-Heberu 10:35-39.
Jeremia oa Kajeno o Pepesa Bokreste-’mōtoana
7. Lipaki li ile tsa latela mohlala oa baprofeta ba tšepahalang ba Jehova ba neng ba rometsoe ho Iseraele le ho Juda joang lekholong lee la bo20 la lilemo?
7 Joalokaha Jehova a ile a ’na a romela baprofeta ba hae ho Iseraele le Juda, o romile lipaki tsa hae hore li eo pheta-pheta molaetsa oa kahlōlo ea hae e tlang. (Jeremia 7:25, 26; 25:4, 8, 9) Haholo-holo ho tloha ka selemo sa 1919 se neng se fana ka bophelo bo tsosolositsoeng moeeng, masala a tlotsitsoeng a baena ba Kreste a ile a fana ka likahlōlo tsa Molimo a sa tšabe letho, melaetsa e matla ea kotsi, ho Bokreste-’mōtoana. (Bapisa Jeremia 11:9-13.) Selemong sona seo makasine oa The Golden Age o ile oa qalisoa. Ho theosa le lilemo o ’nile oa sebeletsa ho pepesa mashano a bolumeli a Bokreste-’mōtoana le Bokreste ba bona boo e mpang e le lekoko feela, ka lihlooho tsa oona tse ’nileng tsa fetoha, Consolation (1937) le Tsoha! (1946).
8, 9. (a) Ke hobane’ng ha likereke li ile tsa nyatsoa ka 1922? (b) Ke kotsi efe e ileng ea boleloa esale pele bakeng sa tsona?
8 Ka mohlala, Golden Age ea October 11, 1922, e ile ea nyatsa bolumeli ka mantsoe ana: “Boiteko bohle ba mekhatlo e hlophisitsoeng ea likereke ka ho fapana, baruti ba tsona, baeta-pele ba tsona le metsoalle ea tsona, ba ho pholosa le ho tsosolosa tsamaiso ea lintho lefatšeng . . . bo tlameha ho hlōleha, hobane ha li etse karolo leha e le efe ea ’muso oa Messia. Ka ho fapaneng, nakong ea Ntoa [ea I] ea Lefatše baruti ba likereke tsena tse fapa-fapaneng ba ile ba koenehela Morena Jesu Kreste ho sena, ka hore ka tsela e fosahetseng ba ikopantse le khoebo e khōlō le bo-ralipolotiki ba baholo ho ntšetsa pele Ntoa ea Lefatše.”
9 Nyatso e ile ea tsoela pele: “Ba bile ba lahla Morena le ’muso oa hae ’me ba bontša ho hloka botšepehi ha bona ka hore ka boithaopo ba ikopanye le mokhatlo o hlophisitsoeng oa Satane ’me ka sebete ba phatlalletse lefatše hore Selekane sa Lichaba ke pontšo ea bopolotiki ea ’muso oa Molimo lefatšeng.” Qetellong ha tla molaetsa oa “kotsi,” kapa kahlōlo: “Hona joale nako e khōlō e se e ntse e soka ’me e ka ’na ea oela lichaba tsa lefatše holimo, ho latela mantsoe a Kreste Jesu, ea ‘mahlomola a joalo a e-s’o be teng ha e sa le ho tloha tšimolohong ea lefatše ho tla fihlela joale, ’me a ke ke a hlola a e-ba teng hape.’”
10. Ho ile ha etsoa nyatso efe ka 1926?
10 Karolo ea Jeremia e ile ea atolosoa ka ho sebelisoa ha likhatiso tse ling, tse kang makasine oa Molula-Qhooa, libukana, le libuka. Ka mohlala, ka 1926 buka Deliverance e ile ea akarelletsa ho pepesoa ho matla ha lithuto tse khelosang tsa Bokreste-’mōtoana. Leqepheng la 203 e ne e bolela hore: “Lithuto tsa bohata li ile tsa tsebahatsoa ka bolokolohi [Bokreste-’mōtoaneng ba bokoenehi] ’me tsa nkela ’nete sebaka. Har’a tsena ho ne ho e-na le lithuto tsa boraro-bo-bong, ho se shoe ha meea, tlhokofatso ea ka ho sa feleng ea ba khopo, tokelo ea baruti ea bomolimo le tokelo ea bomolimo ea marena ea ho busa. Ha nako e ntse e-ea, Maria, ’mè oa ngoana Jesu, o ile a etsoa molimo; ’me batho ba ile ba mengoa hore ba mo rapele joaloka ’mè oa Molimo.”
Bokreste-’mōtoana bo Litsekana boa Lemosoa
11, 12. (a) Boemo ba baruti ba ho nka lehlakore bo ile ba pepesoa joang? (b) Sehlopha sa Jeremia se ile sa fana ka temoso efe?
11 Khatiso eona eo e ile ea pepesa ho kenella ha baruti lintoeng, ea re: “Baruti ba litsamaiso tsena tse fapa-fapaneng tsa likereke ba hlohonolofatsa mabotho a rometsoeng ke mafapha a khoebo le a bopolotiki, ’me ba fana ka tlhohonolofatso ea bona ho sa tsotellehe hore na mabotho ana a loana a le ka lehlakoreng lefe. Baruti kaofela ba iketsa eka ba rapela Molimo o le mong hore o hlohonolofatse mabotho a loantšanang a mahlakore ka bobeli.” (Bapisa Jeremia 7:31.) Joale ho ile ha boleloa ka kahlōlo e seng e le haufi: “Likaroloana tsena kaofela tse etsang karolo e bonahalang ea mokhatlo oa Satane li bokelloa ntoeng e khōlō ea Armageddone.”—Tšenolo 16:14-16.
12 Joaloka mehleng ea Jeremia, ha baetapele ba ne ba re ba sireletsehile ’me ba na le khotso le Molimo, “kahoo baeta-pele bana ba likereke ba ipolella hore bona ba pholohile, hore ba hloka feela ho bitsoa ka lebitso la Kreste, ha ba ntse ba tsoela pele ho bapala ka mollo oa Diabolose. Ba iphoufaletsa boemo ba ’nete ka ho kenya lehlabathe kahar’a mahlo a bona le kahar’a mahlo a batho ba habo bona.” (Deliverance, leqephe 270) Ho ithetsa ha bona ho ile ha pepesoa ke Liithuti tseo tse chesehang tsa Bibele, kamoo Lipaki tsa Jehova li neng li tsejoa kateng ka nako eo.—Mattheu 7:21-23.
13. Ho ile ha ba le ketsahalo efe ka 1931, ’me ke hobane’ng ha e ne e loketse?
13 Ha nako e ntse e-ea, ha Liithuti tsa Bibele li ile tsa khetholloa le Jeremia ka tsela e atamelaneng haholoanyane, ha ka 1931, kopanong e neng e le Columbus, Ohio, U.S.A., ho phatlalatsoa hore lebitso la Bibele la sehlopha sena se sebete sa Bakreste e lokela ho ba “Lipaki tsa Jehova.” (Esaia 43:10-12) Lebitso leo le ne le ile la totobatsoa lekholong la borobeli la lilemo B.C.E. ha Jehova a ne a le sebelisa ho Iseraele. Hoo e ka bang lilemo tse lekholo hamorao, ha Jeremia a ne a sebeletsa e le moprofeta, le eena e ne e le paki ea Jehova. (Jeremia 16:21) Ka ho tšoanang Jesu, ha a e-tla lefatšeng e le Mojode, e ne e le paki ea Ntate oa hae, Jehova. (Johanne 17:25, 26; Tšenolo 1:5; 3:14) Kahona, ho ne ho loketse hore ka nako ea Molimo e loketseng, batho ba hae ba qetelle ba tšoaneleha bakeng sa lebitso lena le khethiloeng ke Molimo—“Lipaki tsa Jehova.”—Johanne 17:6, 11, 12.
Bokreste-’mōtoana bo Koaholloa Sefahleho
14. Bokreste-’mōtoana bo pepesitsoe joang ho theosa le lilemo tse fetileng tse 70?
14 Ho theosa le mashome a supileng a fetileng a lilemo, li sebelisa ho phatlalatsoa ha tšepo e khanyang ea ’Muso oa Jehova o tlang, Lipaki tsa Jehova li ’nile tsa hasa moroallo oa sebele oa nyatso le oa kahlōlo lefatšeng lohle. Ka likhatiso tse makholo a limillione tse tobang taba, tse tebelang habohloko tse theiloeng Bibeleng, li ’nile tsa pepesa Bokreste-’mōtoana e le tšusumetso e matla ka ho fetisisa kahar’a seotsoa sa bolumeli, “Babylona e moholo,” ea nyatsitsoeng ho Tšenolo likhaolo 17 le 18. (Bona “Babylon the Great Has Fallen!” God’s Kingdom Rules!, maqephe 576-615, e hatisitsoeng ka 1963 ke Watchtower Bible and Tract Society of New York, Inc.)
15. Bokreste-’mōtoana bo ile ba pepesoa joang ka 1955?
15 Ka 1955 Lipaki tsa Jehova li ile tsa aba likopi tse limillione tsa bukana Christendom or Christianity—Which One Is “the Light of the World”? Tse likete-kete li ile tsa abeloa baruti ba Bokreste-’mōtoana ka ho toba. Joale bukana eo e ne e ba bolella eng? Ka tsela ea ’nete e kang ea Jeremia, e ne e bolela hore: “Ho sa tsotellehe melemo eohle ea bona e bo phahamisitseng moruong, kelellong, le sesoleng, Bokreste-’mōtoana ha boa ipaka e le ‘leseli la lefatše.’ Hobane’ng? . . . Ha bo rute kapa ho sebelisa Bokreste [ba Bibele].” Joale e ne e phahamisa potso: “Na ho pepesoa ha malumeli a bohata ke mahlōriso ho litho tsa ’ona? Na ke leeme leo e seng la Bokreste?”
16. Na hore Lipaki li pepese Bokreste-’mōtoana e ne e le leeme? Hlalosa.
16 Karabelo e ne e le: “Che; ho seng joalo Jesu Kreste e ne e le mohlorisi ea leeme oa Bajode, . . . le baprofeta ba Jehova kaofela ba mehleng ea boholo-holo [ho akarelletsa Jeremia] ba pele ho Jesu e ne e le bahlōrisi le batho ba leeme, hobane kaofela ba pepesitse bolumeli ba bohata ba Bajode ba bakoenehi le ba lichaba tsa bohedene.” Ka sebele, haeba Bakreste ba ’nete e tla ba “leseli la lefatše,” joale “lefifi” la moea le tlameha ho pepesoa. (2 Ba-Korinthe 6:14-17) Hona ha ho bolele hore ho hlaseloa batho ka bomong, empa ho e-na le hoo, tsamaiso e ba entseng makhoba. Kahona Jehova o ile a fana ka taelo ena ho Jeremia: “Uena he, itlame letheka, u eme, u ba bolelle tsohle tsee ke tla u laela tsona; u se ke ua tšaba pel’a bona . . . Ba tla u loantša, empa ba ke ke ba u hlōla, hobane ke na le uena ho u namolela, ho bolela Jehova.”—Jeremia 1:17, 19.
Mosebetsi oa Jeremia o Tla Pheletsong
17, 18. (a) Lipaki tsa Jehova li ’nile tsa tsoela pele joang mosebetsing oa tsona oa Jeremia lilemong tsa morao tjee? (b) Ke keletso efe e ’nileng ea neoa batho ba lipelo li tšepahalang?
17 Na Lipaki tsa Jehova li nolofalitse kahlōlo ea Molimo? Ke ’nete hore re phela mehleng eo ka eona ho nyatsa bolumeli bo bong ho sa nkoeng e le ntho e loketseng. Leha ho le joalo, joaloka mehleng, likhatiso tsa Lipaki tsa Jehova li ntse li pheta molaetsa o tšoanang oa kahlōlo. Ka mohlala, lilemong tse ’nè tse fetileng lipaki tsa Jehova li hatisitse likopi tse limillione tse 32 tsa buka U ka Phela ka ho sa Feleng Paradeising Lefatšeng, ka lipuo tse 76. Khatiso ena e fana ka likarabelo lipotsong tse ngata tsa hona joale, tse kang “Ho Etsahala Joang Lefung?” “Ke Hobane’ng ha Molimo o Lumelletse Bokhopo?” le “Ho Khetholla Bolumeli ba ’Nete.” Empa e boetse e fana ka temoso e hlakileng mabapi le ’muso oa lefatše oa bolumeli ba bohata.
18 Khaolong ea 25 e nang le sehlooho “Na u Emela Lefatše la Satane, kapa Tsamaiso e Ncha ea Molimo?” e re: “Ka Bibeleng bolumeli ba bohata bo tšoantšoa ka ‘seotsoa se seholo’ se bitsoang ‘Babylona e moholo.’ . . . Hoa tsebahala hore paleng eohle bolumeli bo ’nile ba tsoakana le lipolotiki, hangata bo bolella mebuso hore na e etse joang.” Kahona, buka ee e buella hore motho a nke tsela efe? Ea botsa: “Na u batla ho ba karolo ea lefatše la Satane? Kapa na u emela tsamaiso e ncha ea Molimo? Haeba u emela tsamaiso e ncha ea Molimo, u tla ikarola lefatšeng, ho akarelletsa le bolumeling ba lona ba bohata. U tla ela hloko molao oa Bibele: ‘Tlohang ho eena [Babylona e moholo], lōna sechaba sa ka.’ (Tšenolo 18:4)”
19. U ka bontša joang hore lentsoe la Jeremia oa kajeno ha lea khutsisoa ho tla fihlela mehleng ee ea morao?
19 Molaetsa oona ona o matla oa ho ikarola le oa kahlōlo o boleloa ka ho hlaka bukeng Tšireletseho Lefatšeng Lohle Tlas’a “Morena oa Khotso,” e hatisitsoeng ka 1986 (likopi tse limillione tse tšeletseng ka lipuo tse 25). O pepesa baruti ba Bokreste-’mōtoana ka ‘ho bolella bahlankana hore ba ee mabaleng a ntoa’ nakong ea Ntoa ea I ea Lefatše. O tsoela pele: “Bokreste-’mōtoana bo tsoela pele e le sera sa Molimo o Holimo-limo ho tla fihlela joale. Ka sebele ha boa sireletsoa ke Molimo, ’me ka lebaka lena la bohlokoa boteng ba bona bo kotsing.” (Bona maqephe 30-2.) Lentsoe la Jeremia oa kajeno ha lea khutsisoa! Le hoja baruti le bo-ralipolotiki ba etsa boiteko ba ho emisa boboleli ba likahlōlo tsa Molimo, lipaki tsa oona tse tšepahalang li tsoela pele, li ikemiselitse ho phetha mosebetsi oa temoso.—Jeremia 18:18.
20. Ke hobane’ng ha Lipaki tsa Jehova li tla tsoela pele ho phatlalatsa likahlōlo tsa Molimo lichabeng?
20 Empa ke hobane’ng ha mosebetsi ona o lokela ho phethoa? Hobane Jehova Morena ’Musi ea phelang oa bokahohle, o na le qoso ho lichaba le malumeli a tsona. Joalokaha Jehova a ile a botsa Juda e khelosang le Jerusalema, kahoo potso eo e ntse e sebetsa ka ho lekanang ho Bokreste-’mōtoana kajeno. “Na le re, nka lesa ho khalemela ntho tseo, ho bolela Jehova, kapa nka lesa ho iphetetsa ho sechaba se joale ka seo na?” Kahona, Lipaki tsa Jehova li tla tsoela pele ho etela batho ba lichaba ka molaetsa o lomang ba bangata ho bona joaloka kahlōlo e sa ratoeng empa e le litaba tse molemo tse thabisang ho ba seng bakae—litaba tse molemo tsa ’Muso oa Molimo.—Jeremia 5:9, 29; 9:9; Liketso 8:4, 12.
21. Ho sa tsotellehe kotsi e boletsoeng esale pele, ke tšepo efe e khōlō e ka pele ho ba elang hloko mosebetsi oa Jeremia? (Pesaleme ea 37:9, 11, 18, 19, 28, 29)
21 Le hoja hangata Jeremia a bitsoa mohoeletsi oa kotsi, ke ’nete hape hore molaetsa oa hae o ile oa fana ka mahlaseli a tšepo ho Bajode. (Jeremia 23:5, 6; 31:16, 17) Ka tsela e tšoanang, le hoja Lipaki tsa Jehova li phatlalatsa ‘mahlomola a maholo’ a seng a atametse, ka kahlōlo ea Molimo ea Armageddone, li boetse li phatlalatsa mahlohonolo a “leholimo le lecha le lefatše le lecha” a tla fella ka ho tsosolosoa ha tōka le paradeise qitikoeng ena, ’moho le bophelo bo sa feleng. (Mattheu 24:21, 22; Tšenolo 16:16; 21:1-4) Kahona, joale ke nako ea ho utloa molaetsa oa Jehova oa kahlōlo le ea ho tšehetsa ho phethoa ha mosebetsi oo o moholo oa Jeremia.—Bapisa Jeremia 38:7-13.
Na U Sa Hopola?
◻ Joaloka Jeremia, Lipaki tsa Jehova li hlōrisoa joang?
◻ Ke hobane’ng ha Lipaki li qophella ka boboleli?
◻ Mosebetsi oa Jeremia o atolositsoe joang?
◻ Ke mehlala efe ea morao tjee e bontšang hore nyatso ha ea fetoha?
◻ Ho sa tsotellehe molaetsa oa kotsi, ho fanoa ka tšepo efe hape?
[Setšoantšo se leqepheng la 23]
Ha nako e ntse e-ea, Maria o ile a etsoa molimotsana ’me batho ba memeloa hore ba mo rapele joaloka “’Mè oa Molimo”
[Setšoantšo se leqepheng la 24]
Ka 1931 Liithuti tsa Bibele li ile tsa amohela lebitso “Lipaki tsa Jehova” kopanong ea tsona e neng e le Columbus, Ohio
[Litšoantšo tse leqepheng la 25]
Lefatšeng ka bophara Lipaki tsa Jehova li latela mohlala oa Jeremia