“U ba Bolelle Lentsoe Lena”

 1. (a) Jesu le Jeremia ba ne ba tšoana joang? (b) Ke hobane’ng ha re lokela ho etsisa Jeremia mosebetsing oa rōna oa boboleli?

JESU KRESTE ke mohlala o ka sehloohong oo re o latelang ha re bolela litaba tse molemo. Leha ho le joalo, taba ea bohlokoa ke hore ka linako tse ling batho ba lekholong la pele la lilemo ba neng ba bona Jesu ba ne ba nahana ka moprofeta Jeremia. (Mat. 16:13, 14) Joaloka Jesu, Jeremia o ile a fuoa taelo ke Molimo ea hore a bolele litaba tse molemo. Ka mohlala, ka lekhetlo le leng Molimo o ile a re ho eena: “U ba bolelle lentsoe lena, ‘Sena ke seo Jehova . . . a se boletseng.’” (Jer. 13:12, 13; Joh. 12:49) Ho feta moo, tšebeletsong ea hae Jeremia o ile a bonahatsa litšobotsi tse kang tsa Jesu.

 2. Seo batho ba kajeno ba se hlokang se tšoana joang le seo Bajuda ba mehleng ea Jeremia ba neng ba se hloka?

² Leha ho le joalo, Lipaki tse ling li ka ’na tsa re: ‘Mosebetsi oa rōna oa boboleli o fapane le oa Jeremia. Eena e ne e le ’muelli oa Molimo ho sechaba se neng se inehetse ho Eena, athe boholo ba batho bao re ba bolellang litaba tse molemo ha ba tsebe Jehova.’ Ke ’nete ho joalo. Empa mehleng ea Jeremia, Bajuda ba bangata ba ne ba fetohile ba “seng bohlale” ’me ba ne ba furaletse Molimo oa ’nete. (Bala Jeremia 5:20-22.) Ho ne ho hlokahala hore ba fetohe e le hore ba sebeletse Jehova ka tsela eo a e amohelang. Ka tsela e tšoanang, kajeno ho hlokahala hore batho ba ithute ho tšaba Jehova ’me ba hahamalle borapeli ba ’nete, ho sa tsotellehe hore na ba ipolela hore ke Bakreste kapa che. A re boneng hore na re ka sebeletsa Molimo oa ’nete joang re be re thuse batho ka ho etsisa mohlala oa Jeremia.

 3. Molimo o ile a etsa’ng ho Jeremia ha a ne a qala mosebetsi oa hae, hona Jeremia o ile a ikutloa joang ka seo?

³ Hopola hore ha Jeremia a ne a qala ho etsa mosebetsi oa hae oa boprofeta, o ile a utloa mantsoe a reng: “U lokela ho ea ho bohle bao ke tla u romela ho bona; ’me u lokela ho bua ntho e ’ngoe le e ’ngoe eo ke tla u laela eona. U se ke ua tšosoa ke lifahleho tsa bona, etsoe ‘ke na le uena ho u lopolla,’ ho bolela Jehova.” (Jer. 1:7, 8) Ka mor’a moo, Molimo o ile a etsa ntho eo Jeremia a neng a sa e lebella. Jeremia o re: “Eaba Jehova o otlolla letsoho ’me o etsa hore le ame molomo oa ka. Joale Jehova a re ho ’na: ‘Bona! ke kentse mantsoe a ka molomong oa hao. Bona, letsatsing lena ke u behile [“romile,” NW].’” (Jer. 1:9, 10) Ho tloha ka nako eo, Jeremia o ne a tseba hore o ne a buella Molimo ea Matla ’Ohle.a Kaha O ne a mo tšehelitse ka hohle-hohle, cheseho ea Jeremia bakeng sa tšebeletso e halalelang e ile ea eketseha.—Esa. 6:5-8.

 4. U ka pheta mehlala efe ea batho ba chesehelang boboleli ka tsela e ikhethang?

⁴ Kajeno Jehova ha a ame bahlanka ba hae ka tsela ea sebele. Leha ho le joalo, o sebelisa moea oa hae ho etsa hore ba be le takatso e matla ea hore ba bolele litaba tse molemo. Bongata ba bona ba bontša cheseho e ikhethang. Ka mohlala, nahana ka Maruja oa Spain. Ho se ho fetile lilemo tse fetang 40 a holofetse maoto le matsoho. Ho thata hore a bolele litaba tse molemo ka ntlo le ntlo, kahoo o sebelisa litsela tse ling e le hore a lule a le mafolofolo mosebetsing oa boboleli. Tsela e ’ngoe eo a e sebelisang ke ho ngola mangolo. Maruja o bitsetsa morali oa hae mantsoe, ebe eena oa a ngola. Maruja le morali oa hae ba ile ba etsa boiteko bo khethehileng ka nako e etsang khoeli, ba romela mangolo a fetang 150, ’me ba kenya pampitšana ka enfelopong e ’ngoe le e ’ngoe. Ka lebaka la boiteko ba bona, litaba tse molemo li ile tsa fihla malapeng a mangata motsaneng o haufi. Maruja o ile a re ho morali oa hae, “Haeba le leng la mangolo a rōna le ka fihla ho motho ea nang le pelo e ntle, Jehova o tla re hlohonolofatsa e le hore re fumane thuto ea Bibele.” Moholo oa sebakeng seo o re, “Ke leboha Jehova hore ebe ho na le baralib’abo rōna ba tšoanang le Maruja, ba rutang ba bang hore lintho tseo ehlileng e leng tsa bohlokoa, ba li nke e le tsa bohlokoa.”

 5. (a) Jeremia o ile a lula a cheseha joang ho sa tsotellehe hore batho ba ne ba iphapanyetsa molaetsa? (b) U ka lula u chesehela ho bolela litaba tse molemo joang?

⁵ Mehleng ea Jeremia, bongata ba baahi ba Jerusalema ba ne ba sa ‘khahloe’ ke ’nete ea Molimo. Na Jeremia o ile a khaotsa ho bolela litaba tse molemo hobane batho ba bangata ba ne ba iphapanyetsa molaetsa oa hae? Che! Jeremia o ile a re: “Ke tletse khalefo ea Jehova. Ke khathetse ke ho e tiisetsa.” (Jer. 6:10, 11) U ka lula u e-na le cheseho e joalo joang? Tsela e ’ngoe eo u ka etsang joalo ka eona ke ka ho nahanisisa ka tlotla e babatsehang eo u nang le eona ea ho emela Molimo oa ’nete. Ua tseba hore batho ba hlaheletseng lefatšeng lena ba ’nile ba nyefola lebitso la Molimo oa ’nete. Hape, nahana kamoo baeta-pele ba bolumeli ba ’nileng ba thetsa batho kateng tšimong ea heno, joaloka baprista ba mehleng ea Jeremia. (Bala Jeremia 2:8, 26, 27.) Leha ho le joalo, litaba tse molemo tsa ’Muso oa Molimo tseo u li bolelang, ka sebele ke tsela eo Molimo a bontšang mohau oa hae ho batho ka eona. (Lillo 3:31, 32) Ka sebele, ho nahanisisa ka taba eo ho ka u thusa hore u lule u chesehela ho phatlalatsa litaba tse molemo le ho thusa batho ba kang linku.

 6. Jeremia o ile a tobana le liphephetso life tse matla?

⁶ Mohlomong u tla lumela hore ha ho bonolo hore kamehla re lule re cheseha tšebeletsong ea Bokreste. Ha Jeremia a ntse a sebeletsa Jehova, le eena o ile a tobana le liphephetso tse matla, tse neng li akarelletsa baprofeta ba bohata. U ka bala ka mohlala o mong ho Jeremia khaolo ea 28. Bongata ba batho ba ne ba sa mamele molaetsa oa hae, ’me ka linako tse ling o ne a ikutloa eka ke motoaitoai. (Jer. 6:16, 17; 15:17) Ho feta moo, ka linako tse ling o ne a lokela ho mamella lira tse neng li sokela bophelo ba hae.—Jer. 26:11.

7, 8. Molimo o ile a ‘thetsa’ Jeremia ka tsela efe e molemo?

⁷ Ka nako e ’ngoe ha Jeremia a ne a songoa a bile a rohakoa letsatsi le letsatsi, o ile a bolella Molimo kamoo a neng a ikutloa kateng. U nahana hore ke ka tsela efe u ka reng Jehova o ile a ‘thetsa’ moprofeta oa hae ea tšepahalang, joalokaha ho boletsoe ho Jeremia 20:7, 8?—E bale.

⁸ Ho hlakile hore Jehova o ne a sa qhekella Jeremia ka mano. Ho e-na le hoo, Molimo o ile a ‘thetsa’ moprofeta oa hae ka tsela e molemo. Jeremia o ne a nka hore khanyetso e ne e le matla hoo ka boeena, a neng a ke ke a hlola a phetha mosebetsi oo Molimo a neng a mo file oona. Empa o ile a fela a o phetha, ka tšehetso le thuso ea Ea Matla ’Ohle. Kahoo, u ka ’na ua bolela hore Jehova o ile a mo hlōla, a bontša hore o matla ho feta Jeremia le maikutlo a hae a botho. Ha monna enoa oa Molimo a ne a nahana hore o se a feletsoe ’me o ne a ke ke hlola a tsoela pele, Jehova o ile a sebelisa matla a susumetsang hoo ho ka boleloang hore Jeremia o ile a thetseha. Molimo o ile a bontša hore o ne a le matla ho feta mefokolo ea Jeremia. Jeremia o ile a khona ho tsoela pele a bolela litaba tse molemo, ho sa tsotellehe hore batho ba ne ba iphapanyetsa molaetsa oa hae, ba mo khesa ba bile ba le mabifi.

 9. Ke hobane’ng ha mantsoe a Jeremia 20:11 a ka u khothatsa?

⁹ Jehova o ile a ba joaloka “senatla se tšabehang” haufi le Jeremia, a mo tšehetsa. (Jer. 20:11) Le uena Molimo a ka u tšehetsa e le hore u lule u chesehela borapeli ba ’nete u be u tsoele pele ho sa tsotellehe mathata a boima. Mohlomong u ka nahana taba ena kamoo e hlalositsoeng kateng phetolelong e ’ngoe—Jehova e tla ba “lesole le matla” le emeng lehlakoreng la hao.—Contemporary English Version.

10. U ikemiselitse ho etsa’ng ha u hanyetsoa?

¹⁰ Moapostola Pauluse o ile a hatisa ntlha eo ha a ne a khothatsa Bakreste ba neng ba hanyetsoa. O ile a ngola a re: “Le itšoare ka mokhoa o tšoanelang litaba tse molemo tse mabapi le Kreste, e le hore . . . nka utloa . . . hore le eme le tiile boikutlong bo le bong, ka moea o le mong le loana le bapile ka mahlakore bakeng sa tumelo ea litaba tse molemo, ’me ho hang le sa tšosoe ke bahanyetsi ba lōna.” (Bafil. 1:27, 28) Joaloka Jeremia le Bakreste ba lekholong la pele la lilemo, u ka itšetleha ka Molimo ea Matla ’Ohle ebile u lokela ho itšetleha ka eena, ha u ntse u etsa mosebetsi oa hao oa boboleli. Haeba batho ba bang ba u soma kapa ba u hlasela, hopola hore Jehova o lehlakoreng la hao ’me a ka u matlafatsa. O ile a matlafatsa Jeremia ’me o matlafalitse barab’eno ba bangata; ka lebaka leo, le uena a ka u matlafatsa. Mo kōpe ka tieo hore a u thuse, ’me u tšepe hore o tla araba thapelo ea hao. Le uena u ka ’na ua fumana hore u ‘thetsehile’ ha Molimo a u fa matla a hore u atlehe ho tobana le litšitiso, ka sebete eseng ka tšabo. Ka sebele, u ka ’na ua etsa lintho tseo le ka mohla u neng u sa nahane hore u ka li etsa.—Bala Liketso 4:29-31.

11, 12. (a) U ka ’na ua etsa liphetoho life e le hore u ka bua le batho ba bangatanyana mosebetsing oa hao oa boboleli? (b) Setšoantšo se leqepheng la 39 se bontša maemo afe a ka ’nang a sebetsa sebakeng sa heno?

¹¹ Seo re se balang mabapi le tšebeletso ea Jeremia se ka re thusa ka litsela tse ngata hore re be baboleli ba litaba tse molemo ba atlehang. Ka mor’a hore e be moprofeta oa Jehova ka lilemo tse fetang 20, o ile a re: “Ke ’nile ka bua le lōna, ke tsoha hoseng ’me ke bua, empa ha lea ka la mamela.” (Jer. 25:3) Ka sebele, o ne a tsoha hoseng ho e-na le hore e be koekoe ea morao. Na ho na le seo re ka ithutang sona mohlaleng oa hae se ka re tsoelang molemo? Liphuthehong tse ngata, ho na le bahoeletsi ba tsohang hoseng haholo e le hore ba ka bua le batho boemelong ba libese le liteisheneng tsa literene. Libakeng tsa mahaeng, Lipaki tse ngata li sebelisa nako ea hoseng ho etela lihoai le batho ba bang bao ka nako eo ba seng ba ntse ba sebetsa. Na ho na le litsela tse ling tseo u nahanang hore uena ka bouena u ka sebelisa see seo u ithutang sona tšebeletsong ea Jeremia eo a e entseng ka botšepehi? Ho ka ba joang ha u ka tsoha esale ka nako e le hore u ka ba teng hang ha seboka sa tšebeletso ea tšimo se qala?

¹² Ho feta moo, hangata ho bolela litaba tse molemo ka ntlo le ntlo thapama le mantsiboea ho hlahisa litholoana tse molemo ka ho fetisisa libakeng tse ngata. Bahoeletsi ba bang ba bile ba bolela litaba tse molemo bosiu, ba etela batho ba sebetsang likaracheng tsa peterole, lireschorenteng le libakeng tse ling tsa khoebo tse lulang li butsoe bosiu le motšehare. Na le uena u ka fetola kemiso ea hao e le hore u ka bolela litaba tse molemo ka nako eo ka eona ho ka etsahalang hore u fumane batho ba le teng malapeng kapa libakeng tse ling?

13, 14. (a) Mohlala oa Jeremia o amana joang le ho etsa maeto a ho boela? (b) Ke eng e bontšang hore ke habohlokoa hore u tšepahalle ho etsa maeto a ho boela?

¹³ Ka linako tse ling, Jehova o ile a laela Jeremia hore a phatlalatse melaetsa ea boprofeta a ntse a eme lihekeng tsa tempele kapa tsa Jerusalema. (Jer. 7:2; 17:19, 20) Ka ho phatlalatsa melaetsa eo lihekeng, Jeremia o ne a bolella batho ba bangata lentsoe la Jehova. Hape, kaha batho ba bangata, ba akarelletsang banna ba hlaheletseng ba motse, barekisi le bahoebi, ba ne ba tloaetse ho sebelisa heke e le ’ngoe, e ka ’na eaba o ne a bua le batho ba le bang hangata e le ha a leka ho ba thusa hore ba utloisise seo ba neng ba se utloile nakong e fetileng. Re ka ithuta’ng tabeng ee mabapi le ho etsa maeto a ho boela ho batho ba bontšitseng thahasello?

¹⁴ Jeremia o ne a tseba hore mosebetsi oa hae oa ho ba moprofeta oa Molimo o ne o tla pholosa bophelo ba batho. Ka nako e ’ngoe, ha a ne a sa khone ho phetha litaelo tseo Molimo a neng a mo file tsona tsa hore a bue le batho, o ile a romela motsoalle oa hae ea bitsoang Baruke hore a mo ele. (Bala Jeremia 36:5-8.) Re ka etsisa Jeremia joang tabeng ee? Ha re bolella mong’a ntlo hore re tla khutla, na re phelela seo re se buileng? Haeba re ke ke ra khona ho ea leetong la ho boela kapa thutong ea lehae ea Bibele joalokaha re ne re tšepisitse, na re lokisetsa hore motho e mong a ee? Jesu o ile a re: “Lentsoe la lōna E le mpe le bolele E.” (Mat. 5:37) Ke habohlokoa hore re phelele seo re se buileng, hobane re baemeli ba Molimo oa ’nete le ea nang le taolo.—1 Bakor. 14:33, 40.

15, 16. (a) Ba bangata ba latetse mohlala oa Jeremia joang ka hore ba eketse tšebeletso ea bona? (b) U ithuta’ng ho se etsahetseng Chile joalokaha ho bontšitsoe setšoantšong se leqepheng la 40?

¹⁵ Jeremia o ile a khothatsa Bajuda ba neng ba le Babylona ka ho ba ngolla lengolo mabapi le ‘lentsoe la Jehova le molemo’ la tsosoloso. (Jer. 29:1-4, 10) Kajeno, ‘lentsoe le molemo’ la seo Jehova a tla tloha a se etsa, le lona le ka phatlalatsoa ka katleho ka lengolo kapa ka thelefono. Na u ka sebelisa mekhoa eo e le hore u thuse beng ka uena kapa batho ba bang ba lulang libakeng tse hōle kapa bao ho leng thata ho kopana le bona?

¹⁶ Ka ho latela mohlala oa Jeremia oa ho phethahatsa tšebeletso ea hae ka botlalo, kajeno bahoeletsi ba ’Muso ba atisa ho khola litholoana tse molemo. Paki e ’ngoe ea Chile e ile ea buisana le mosali ea neng a tsoa seteisheneng sa terene. O ile a thabela ho utloa molaetsa oa Bibele ’me a lumela hore a eteloe lapeng e le hore ho ka ea qoqoa le eena ka Bibele. Leha ho le joalo, Paki eo ha ea ka ea ngola aterese ea hae. Ka mor’a moo, ha morali’abo rōna a hlokomela bohlokoa ba ho thusa mosali eo hore a thahaselle ’nete haholoanyane, o ile a rapela Jehova hore a mo thuse. Letsatsing le hlahlamang, o ile a khutlela seteisheneng sa terene ka nako e tšoanang. O ile a kopana le mosali eo hape. Lekhetlong lena, o ile a etsa bonnete ba hore o ngola aterese ea hae ’me hamorao a ba a etela mosali eo ha hae e le hore a mo thuse ho utloisisa Mangolo. Haufinyane likahlolo tsa Molimo li tla tsometsa lefatše la Satane. Empa ho na le tšepo bakeng sa batho ba bakang ’me ba bontša hore ba lumela litaba tse molemo. (Bala Lillo Tsa Jeremia 3:31-33.) Ka hona, a re bontšeng hore re ela seo hloko ka hore re sebetse tšimo ea rōna ka ho phethahetseng.

17. Tšimong ea heno, u ka etsisa tsela eo Jeremia a neng a etsa lintho ka eona joang?

¹⁷ Jehova o ne a sa batle hore batho ba shoe. Lilemo tse ka bang leshome pele Jerusalema e timetsoa, o ile a sebelisa Jeremia hore a hlalosetse batho ba neng ba le kholehong Babylona tšepo eo ba neng ba ka ba le eona. Bibele e re: “Ke tla ba beha leihlo ka tsela e ntle, ’me ka sebele ke tla ba khutlisetsa naheng ena. Ke tla ba haha, ’me nke ke ka ba liha; ke tla ba hloma, ’me nke ke ka ba fothola.” Jeremia o ile a re ho batho bao: “Tšepo e teng bakeng sa bokamoso ba [lōna].” (Jer. 24:6; 26:3; 31:17) Jeremia o ne a talima batho kamoo Molimo a neng a ba talima kateng. O ne a bontša kameho ea ’nete ha a ne a phetha tšebeletso ea hae, a phatlalatsa litemoso tsa Jehova, a re: “Ka kōpo, furallang e mong le e mong tsela ea hae e mpe, ’me le etse hore mesebetsi ea lōna e be metle.” (Jer. 35:15) Na le uena u ka nahana ka litsela tse ling tseo u ka bontšang ka tsona hore u thahasella batho ba tšimong ea heno e le kannete?

18, 19. (a) Re lokela ho qoba maikutlo afe ha re ntse re bolela litaba tse molemo? (b) Ke maikutlo afe a Jeremia ao re lokelang ho ba le ’ona?

¹⁸ Lerato le tebileng leo Jeremia a neng a rata batho ka lona ha lea ka la tapa le ka mohla. Ha Jerusalema e ne e timetsoa, o ile a tsoela pele ho ba utloela bohloko. (Bala Lillo Tsa Jeremia 2:11.) E ne e le phoso ea Bajuda ka bobona hore ebe ba ile ba oeloa ke tlokotsi. Leha ho le joalo, Jeremia ha aa ka a re, ‘Ke le joetsitse.’ Ho e-na le hoo, o ile a ba utloela bohloko ka se neng se ba hlahetse. Ka tsela e tšoanang ha rea lokela ho etsa hlaahlaafethe feela mosebetsing oa rōna oa boboleli, re o etsa ho phetha molao. Boiteko ba rōna ba ho fana ka bopaki bo lokela ho bontša kamoo re ratang Molimo oa rōna ea hlollang kateng hammoho le batho ba bōpiloeng ka setšoantšo sa hae.

¹⁹ Lefatšeng lena, ha ho tlotla kapa boemo bo ka fetang ho pakela Molimo oa ’nete. Jeremia o ne a ikutloa joalo, a ba a ngola a re: “Mantsoe a hao a ile a fumanoa, eaba kea a ja; ’me lentsoe la hao ho ’na e ba thabo e khaphatsehang le ho nyakalla ha pelo ea ka; etsoe ke ’nile ka bitsoa ka lebitso la hao, Jehova.” (Jer. 15:16) Ha re ntse re bolela litaba tse molemo, batho ba bang ba bangata ba ka ’na ba qetella ba tseba Eo bophelo ba bona bo tsoang ho eena ba ba ba mo rata. Ha re sebetsa ka cheseho le lerato, joalokaha Jeremia a re behetse mohlala, re tla ba thusa hore ba etse joalo.