Ho Fetoha Mosebeletsi ea Khethiloeng—ka Tsela ea Molimo!
MOETI o ne a ka ’na a makala—mohlomong a ba a emisoa hlooho—ke seo a se utloang. Ketsahalo eo e ne e le kopano ea Lipaki tsa Jehova. Ho ne ho fanoa ka puo ho sehlopha sa batho ba neng ba il’o kolobetsoa. Ka ho makatsang, sebui sa bolella batho ba eang kolobetsong: “Boteng ba hao sehlopheng sena sa batho ba eang kolobetsong bo bontša takatso ea hao ea ho ba mosebeletsi ea khethiloeng oa ’Muso.”
Moeti o ne a ka ’na a botsa: ‘Ho ka ba joalo joang? Na kolobetso ha ea etsetsoa batho ba sa tsoa kopana le Bokreste—le masea? Na ha ho nke lilemo-lemo tsa koetliso e batsi le thuto e batsi hore motho a fetohe mosebeletsi ea khethiloeng’? Mohlomong u ne u tla nahana ka tsela e tšoanang. Empa seo Bibele e hlileng e se bolelang ka kolobetso le ho khethoa se ka ’na sa u makatsa.
Pele Motho a Kolobetsoa
Pele ho tsohle, kolobetso ha ea etsetsoa batho ba sa tsoa fumana molaetsa oa Bokreste. Ho Liketso 8:12, Bibele e bontša hare batho ba lekhōlong la pele la lilemo ba ne ba kolobetsoa kamor’a hore “ba lumele.” Mattheu 28:19 (NW) le eona e bontša hore motho o tlameha hore pele a fetohe ‘morutuoa’ pele a kolobetsoa. Empa motho o fetoha ‘molumeli,’ kapa ‘morutuoa,’ (‘ea rutiloeng’) joang? Ka thuto e seli ea Bibele! Ka tsela ena, motho o fumana tsebo e nepahetseng ea Jesu le Jehova Molimo. (Johanne 17:3) Ke feela kamor’a hore se fumane tsebo ena seithuti se ka bang boemong ba ho nahana ka ho kolobetsoa. Lekhōlong la pele la lilemo, Bakreste ba amohelehang ba ne ba fana ka thuto e joalo ho batho ba sa tsoa sokoloha.—Liketso 8:31, 35, 36.
Liphuthehong tsa Lipaki tsa Jehova kajeno, ka ho tšoanang ho etsoa litokisetso bakeng sa batho ba thahasellang hore ba fumane thuto ea lehae ea Bibele mahala. Butle-butle motho ea nang le pelo e amohelang o ananela seo a ithutang sona. O susumetseha hore a arolelane le ba bang lintho tse ncha tseo a seng a li lumela. (Ba-Roma 10:8-10) O qala ho kopanela libokeng tsa Bokreste kamehla, moo a fumanang thuto e eketsehileng ea Bibele. (Ba-Heberu 10:24, 25) ’Me kamor’a libeke kapa likhoeli a etsa sena, molumeli e mocha o ba le takatso ea ho latela keletso ea Bibele e ho Ba-Roma 12:1: “Ka baka leo, banab’eso, kea le rapela hle ka mehauhelo ea Molimo, hore le ke le o beele ’mele ea lona, e be sehlabelo se phelang, se halalelang, se khahlisang Molimo; ke eona tšebeletso e le tšoanetseng.”
Leha ho le joalo, tsebo feela ha e etse hole motho a tšoanelehele ho etsa boinehelo bona. Hape motho o tlameha hore a bake ’me a “sokolohe.” (Liketso 3:19) Ke hobane’ng ha hoo ho hlokahala? Ka ho toba, ba bang ba ’nile ba phela bophelo ba boitšoaro bo bobe pele ba ithuta litekanyetso tsa Molimo. Ba bang ba ne ba tšoasehile lipakaneng tsa boithati. Empa e le hore ba ka itlhahisa ho Molimo e le ‘ba halalelang, ba khahlisang,’ ba tlameha ho bontša ho ikoahlaela liketso tse joalo tsa nako e fetileng. Ba tlameha ho soabela hore e be ba sebelisitse bophelo ba bona, matla a bona, le tsebo ea bona ea ho etsa lintho lipakaneng tseo e seng tsa Mangolo. Ho soaba ho joalo ho tlameha ho tsamaea le bohato bo loketseng e le hore kannete motho a “sokolohe,” kapa a fetole tsela ea hae ea bophelo.
Ho thusa molumeli e mocha ka ho eketsehileng baholo ba Bakreste ba lokisetsa ho kopana le eena le ho qeta nako eitseng le eena ba hlahloba lithuto tsa motheo tsa Bibele. Ka ho totobetseng, sena se kholisa baholo hore Mokreste eo oa kamoso o fumane tsebo e nepahetseng ea merero ea Molimo. Hape, ha e le hantle, tlhahlobo eo e ipaka e le molemo ka ho fetisisa ho seithuti. Moo ho hlokahalang, litaba tse itseng tseo se neng se sa li utloisisa ka tsela e nepahetseng lia hlakisoa.
Ka kakaretso likolobetso li etsoa libokeng tse khōlō tsa Lipaki tsa Jehova kapa likopanong tsa tsona. Liketsahalong tse joalo, ho fanoa ka puo e tobileng ho ba eang kolobetsong. Ba hopotsoa hore kolobetso hase feela taba ea ho kena bolumeling bo bocha. Jesu o itse: “Ekare ha motho a rata ho ntatela, a ke a itele, a ipelese sefapano sa hae, ’me a ntšale morao.”—Mattheu 16:24.
Ba eang kolobetsong ba hopotsoa ka ho eketsehileng ka bohlokoa bo tebileng ba kolobetso. Ho atisa ho baloa lengolo la 1 Petrose 3:21: “Se tšoantšoang ke hoo ke kolobetso e re pholosang joale—e seng e ‘hlatsoang litšila tsa ’mele, empa eo e leng ho itlama ha letsoalo le letle pel’a Molimo—ka tsoho ea Jesu Kreste.” Mona, Petrose o bapisa kolobetso le phihlelo ea Noe ea ho feta har’a metsi a Moroallo. Le hoja metsi ao a ile a ipaka e le a bolaeang ho baahi ba lefatše ba khopo, a ile a ipaka e le a pholosang bophelo ho Noe ha a mo phaphamalitse a sireletsehile ka arekeng. Ka ho tšoanang, kolobetso e ‘pholosa’ Bakreste lefatšeng lena le khopo. Ha motho e mong a kolobetsoa motheong oa tumelo ea hae melemong ea lefu la Jesu Kreste le tsoho ea hae, motho eo o boemong bo ‘pholositsoeng’ pel’a Molimo. Ha a sa talingoa e le karolo ea moloko ana o khopo o ahloletsoeng timetso.—Bona Liketso 2:40.
Kahona, ho kolobetsoa hase khato e lokelang ho nkoa nakong eo motho a nkehileng maikutlo, joalokaha ho etsahala hangata hakana libokeng tsa bolumeli tsa tsosoloso. Ho totobatsang sena ke ’nete ea hore pele barutuoa ba bacha ba hlile ba kolobetsoa, mosebeletsi ea tsamaisang kolobetso o ba botsa lipotso tse peli tse phenyang maikutlo. Ho arabela ha bona ka e, ke “polelo ea phatlalatsa” ea tumelo ea bona topollong le ’neteng ea hore ba inehetse ho Jehova ba sa itšiele letho. (Ba-Roma 10:9, 10, NW) Joale ba loketse ho kolobetsoa metsing.
Ba Khethetsoe Ho Ba Basebeletsi ba ’Muso
Ho qoelisoa ho feletseng metsing ke letšoao le loketseng la boinehelo ba bona ho Molimo. Ha ba le ka tlas’a metsi, ho tšoana le ha ba shoetse tsela ea bophelo ba bona ba pele. Ha ba tsoa ka metsing, ho tšoana le ha joale ba se ba phelela tsela e ncha ea ho iketsa sehlabelo tšebeletsong ea Molimo.—Bapisa Ba-Roma 6:2-4.
Leha ho le joalo, ho khethoa ho kopana kae le bohato boo ba kolobetso? Hlokomela seo Cyclopædia of Biblical, Theological, and Ecclesiastical Literature (1877), ea M’Clintock le Strong, Moqolo VII, leqephe 411, e se buang: “Ho khethoa ho bontša ho hlomamisoa ha motho kapa ho beoa ha hae setulong sa ofisi ea bosebeletsi, e-bang ho na le mekete e tsamaeang le hoo kapa ha e eo.” (Mongolo o tšekaletseng ke oa rōna.) Sena se lumela hore ha ho hlokahale mokete o moholo kapa lengolo la ho khethoa hore motho e be mosebeletsi oa Mokreste.
Empa na Bibele e ruta see? Nahana ka Jesu Kreste. Ha ho pelaelo hore e ne e le mosebeletsi ea ka sehloohong oa Molimo. Leha ho le joalo, na o ne a etsetsoe mokete o mong o moholo oa ho khethoa pele a qala mosebetsi oa hae oa boboleli? Na o ne a e-na le lengolo le mo tsebahatsang e le mosebeletsi? Le hanyenyane. E bile feela kamor’a hore a kolobetsoe metsing Molimo o ileng oa senola kananelo ea oona bakeng sa Jesu joaloka Mora oa oona le ho mo khetha ho ba mosebeletsi oa Oona.—Mareka 1:9-11; Luka 4:18-21.
Ho thoe’ng ka Bakreste ba lekhōlong la pele la lilemo? Ha ho tlaleho leha e le efe ea ho khethoa ka mokhoa oa mponeng ha basebeletsi bana ba pele ba Bakreste. Ka makhetlo-khetlo tlaleho e ho Liketso e bua ka ho kolobetsoa ho tloaelehileng ha balumeli. Sena se ne se lateloa ke ho kopanela ha bona ka cheseho tšebeletsong ea pontšeng.—Bona Liketso 2:41-47; 8:36-39; 22:14-16.
Basebeletsi ba joalo ba ne ba ena le bopaki bofe bakeng sa ho khethoa ha bona? Ho 2 Ba-Korinthe 3:1-3 Pauluse o re: “Hleka re boela re qala ho ikemela na? Kapa a re tšoanela ho batla, joale ka ba bang, mangolo a re emelang pel’a lōna, leha e le a ka tsoang ho lōna ho re emela pel’a ba bang? Ke lōna le leng lengolo la rōna, le ngoliloeng ka lipelong tsa rōna, le tsejoang, le baloang ke batho bohle. Lea bonahala hoba le lengolo la Kreste, le lokisitsoeng ke tšebetso ea rōna, le ngoliloeng, e seng ka enke, empa e le ka Moea oa Molimo o phelang; ha lea ngoloa matlapeng a lejoe, empa e le matlapeng a nama, a lipelo tsa lōna.” Tšusumetso ea moea oa Molimo lipelong tsa bana ba rutiloeng e ile a hlahisa botho bo bocha ba Bokreste, bo neng bo ka baloa ke bohle ba ba talimileng. Hona e ne e le bopaki bo lekaneng ba hore ka sebele Molimo o ne o khethile ba neng ba e-na le kabelo ho ruteng barutuoa bana ba bacha.
Ho Ikitlaetsa Tšebeletsong
Ka ho tšoanang kajeno, mosebeletsi o tsebjoa ka mesebetsi ea hae. O chesehela ‘ho etsa ka matla’ tšebeletsong ea hae. (Luka 13:24) O talima tšebeletso e le tokelo e khōlō e tsoang ho Molimo. Ha a e nke e le ntho ea lefeela.—1 Timothea 1:12-16.
Boboleli ba ’Muso ke tlameho e ka sehloohong ho basebeletsi ba joalo. Lipakane tse ling kaofela li tlameha ho fokotsoa e le hore ba ka ‘phethisisa tšebeletso ea bona.’ (2 Timothea 4:2, 5) Ke ’nete hore ba tlameha ho hlokomela litlhokahalo tsa bona tsa nama ’moho le tsa malapa a bona. Leha ho le joalo, ba ‘khotsofetse ha ba e-na le lijo le liaparo.’ Ha ba lumelle hore lipakane tsa botho kapa litakatso tsa botho li ba fapose tšebeletsong ea bona. (1 Timothea 5:8; 6:7, 8; Ba-Filippi 2:20-22) Ba nepisisa “litaba tse fetisang ka molemo.” (Ba-Filippi 1:10) Ba loanela ho boloka kapele ho bona mohlala o motle oa Jesu Kreste, eo bophelo ba hae bo neng bo theiloe boboleling ba ’Muso.—Luka 4:43; Johanne 8:36, 37.
Leha ho le joalo, ha motho a kolobetsoa ho ba mosebeletsi ea khethiloeng, ha e le hantle o mehatong e qalang ea tšebeletso ea hae ho Molimo. Ke ’nete hore o tsebile Kreste Jesu le Jehova Molimo. Hape o entse liphetoho tse ngata bophelong ba hae e le hore tšebeletso ea hae ea Bokreste e se ke ea nyatsuoa. (2 Ba-Korinthe 6:3) Leha ho le joalo, Mokreste ea sa tsoa kolobetsoa bocha o sa ntsane a lokela ho hōla haholo. Kolobetso ea hae, e bontšang ho khethoa ha hae, e mpa feela e le e ’ngoe ea liketsahalo tsa bohlokoahali khōlong ea hae joaloka Mokreste. (Ba-Filippi 3:16) Kahona, mosebeletsi ka mong ea khethiloeng o tlameha ho tsoela pele ho hlaolela kananelo e tlohang pelong bakeng sa lintho tsa moea. Ho hlokahala hore a etse kemiso bakeng sa nako ea boithuto ba botho. O lokela ho sebelisa menyetla ea litokisetso tsohle tsa phutheho tsa ho bokana ’moho. O lokela ho sebeletsa ho ntlafatsa boleng ba lithapelo tsa hae, e leng ho tlang ho fella ka kamano ea botho e haufi haholoanyane le Molimo.—Luka 6:45; 1 Ba-Thessalonika 5:11; 1 Petrose 4:7.
Re tšepa hore likhopolo tsena tsa Mangolo li u thusitse ho utloisisa hore na ke hobane’ng ha lengolo la univesithi le sa hlokahale bakeng sa ba batlang ho sebeletsa e le basebeletsi ba Molimo. Lipaki tsa Jehova tse kaholimo ho limillione tse tharo li sebeletsa Molimo ka botšepehi e le basebeletsi ba oona, li phatlalatsa linnete tse hlakisitsoeng Lentsoeng la oona. Ke hobane’ng ha u sa re e mong oa tsona a u thuse ho fumana tsebo ea Bibele?
[Setšoantšo se leqepheng la 29]
Ho latela Bibele, mosebeletsi oa Mokreste o khethoa nakong ea kolobetso