Jesu Bophelo le Tšebeletso Tsa Hae

Tšebeletso Tempeleng ea Phethoa

JESU o itlhahisa la ho qetela tempeleng. Ha e le hantle, o phetha tšebeletso ea hae ea pontšeng lefatšeng ntle le liketsahalo tsa ho lekoa le ho bolaoa ha hae matsatsi a mararo hamorao. Joale o tsoela pele ho nyatsa bangoli le Bafarisi ka ho ba tšoaea liphoso.

Ka makhetlo a mang hape a mararo a hooa: “Ho malimabe lōna, bangoli le bafarisi, baikaketsi!” Pele, o phatlalatsa bomalimabe ho bona hobane ba hloekisa “mohope le sejana kantle, athe kahare ho tletse bosholu le ho senya.” Kahoo oa khothalletsa: “Hlatsoa mohope le sejana ka hare ho tsona pele, bokantle ba tsona bo tle bo hloeke le bona.”

Hape o phatlalatsa bomalimabe ho bangoli le Bafarisi ka baka la bobolu bo ka hare le tšenyeho tseo ba lekang ho li pata ka bohloeki ba ka ntle. O re: “Le joalo ka mabitla a koetlisitsoeng, a nang le ponahalo e ntle kantle, kanthebo, kahare, a tletse masapo a bafu le ho bola hohle.”

Qetellong, boikaketsi ba bona bo bonahala ho rateng ha bona ho haha mabitla a baprofeta le ho a khabisa e le ho lebisa tlhokomelo liketsong tsa bona tsa ho etsa molemo. Leha ho le joalo, joalokaha Jesu a senola, ke “bana ba ba bolaileng baporofeta.” Ka sebele, motho leha e le ofe ea lekang ho pepesa boikaketsi ba bona o kotsing!

Ha a tsoela pele, Jesu o bolela mantsoe a hae a matla haholo a nyatsang. O re: “Linoha, malinyane a marabe! le ka phema kahlolo ea lihele [“Gehenna,” NW] joang?” Gehenna ke phula e sebelisoang e le thotobolo ea lithole ea Jerusalema. Ka hona Jesu o re ka ho hahamalla tsela ea bona e khopo, bangoli le Bafarisi ba tla timela ka ho sa feleng.

Mabapi le bao a ba romang e le baemeli ba hae, Jesu o re: “Ba bang ba bona le tla ba bolaea, le ba thakhise; ’me ba bang ba bona le tla ba shapela matlung a lōna a thapelo, le ba phalalise le metse eohle; hore mali ’ohle a ba lokileng a tšolotsoeng lefatšeng a botsoe ho lōna ho qala ka mali a Abele ea lokileng, ho ea fihla ho a Sakaria, mor’a Barakia [ea bitsoang Jehojada ho 2 Likronike], eo le neng le ’molaele pakeng tsa sehalalelo le aletare. Ruri kea le bolella hore tsena tsohle li tla botsoa ho molōko ona.”

Kahobane Zakaria ka sebete o ile a khalemela baeta-pele ba Iseraele, “ba mo rera, ’me ba mo tlepetsa ka majoe lebaleng la ntlo ea Jehova, ka taelo ea morena.” Empa, joalokaha Jesu a bolela esale pele, Iseraele e tla lefella mali ’ohle a joalo a lokileng a tšolotsoeng. Baa lefa lilemo tse 37 hamorao, ka 70 C.E., ha mabotho a Roma a timetsa Jerusalema ’me ho e-shoa Bajode ba ka holimo ho millione.

Ha Jesu a nahanisisa ka boemo bona bo tšosang, oa sisimoha. Hang hape oa phatlalatsa: “Jerusalema, Jerusalema, . . . ke ratile hangata hakakang ho bokella bana ba hao, joalo ka khoho ha e bokella litsuonyana tsa eona tlas’a mapheo a eona, empa le hanne. Bonang, ntlo ea lōna e tla sala e le lesupi.”

Joale Jesu oa phaella: “Ho qala joale, ha le ka ke la hlola le mpona, ho be ho fihle mohla le tla re: Ho bokoe ea tlang ka lebitso la Morena [“Jehova,” NW]!” Letsatsi leo e tla ba botenng ba Kreste ha a tla ’Musong oa hae oa leholimo ’me batho ba ’mona ka mahlo a tumelo.

Joale Jesu o tsamaela sebakeng seo ho sona a ka shebang polokelo ea letlotlo e ka tempeleng le matšoele a nokelang chelete ka ho eona. Barui ba nokela lichelete tse ngata. Empa joale mohlolohali e mong ea futsanehileng oa tla ’me o nokela licheletana tse peli tsa bohlokoa bo bonyenyane haholo.

Ha a bitsa barutuoa ba hae, Jesu o re: “Ka ’nete ke re ho lōna: Mohlolohali enoa ea fumanehileng o noketse ho fetisa bohle ba noketseng polokelong ea letlotlo.” Ba tlameha ba be ba maketse hore na sena se ka ba joalo joang. Ka hona Jesu oa hlalosa: “Bohle ba noketse ba nkile ho tlalloeng ha bona; empa enoa o noketse hohle hoo a neng a na le hona, hohle hoo a neng a phela ka hona.” Ka mor’a ho bolela lintho tsena, Jesu o tloha tempeleng lekhetlo la ho qetela.

Ba maketse ke boholo le botle ba tempele, barutuoa ba hae baa hooa: “Moruti, bona, ke majoe a makakang, le mehaho e mekakang!” Ka sebele, ho ea ka tlaleho majoe ao a bolelele bo ka batlang e le limithara tse 11, a bophara bo ka batlang e le limithara tse 5, ’me a bophahamo bo ka holimo ho limithara tse 3!

Jesu oa arabela: “Ua e bona mehaho e meholo eo? Ha ho ka ke ha lesoa mona lejoe holim’a lejoe le leng, le sa heletsoang.”

Ka mor’a ho bolela lintho tsena, Jesu le baapostola ba hae ba tšela Khohlo ea Kedrone ’me ba hloa Thaba ea Mehloaare. Ha ba le moo ba ka shebela tlaase tempele eo e hlollang. Mattheu 23:25–24:3, TLP; Mareka 12:41–13:3; Luka 21:1-6; 2 Likronike 24:20-22.

◆ Jesu o etsa’ng nakong ea leeto la hae la ho qetela tempeleng?

◆ Boikaketsi ba bangoli le Bafarisi bo bonahala joang?

◆ Ho boleloa’ng ka “kahlolo ea lihele [“Gehenna,” NW]”?

◆ Ke hobane’ng ha Jesu a re mohlolohali o entse monehelo o fetang oa barui?