Lefu la Jesu le Bolela Eng ho Uena?

“MABOTHO ’ohle a kileng a macha, likepe tsohle tsa sesole sa metsing tse kileng tsa ahoa, liparamente tsohle tse kileng tsa lula, le marena ’ohle a kileng a busa, ha li kopanngoa kaofela, ha lia ama bophelo ba motho holim’a lefatše lena ka matla joalokaha ho entse motho enoa a le mong feela.” Ke kamoo ho ileng ha ngola sengoli James A. Francis mabapi le Jesu Kreste.

Batho ba talima Jesu ka litsela tse sa tšoaneng, empa Bibele e mo tsebahatsa e le Mora oa Molimo le motho ea neng a e-na le lerato le itetseng. Jesu o ile a bolela tsela e ka sehloohong eo ka eona a ileng a bontša lerato leo ha a ipolela: “Mor’a motho, ea sa kang a tlela ho sebeletsoa, empa e le ho sebeletsa le ho neela bophelo ba hae ho ba topollo ea ba bangata.”—Mattheu 20:28.

Topollo ee ke ea bohlokoa ka eng? Ke hobane’ng ha e ne e hlokahala? Ke bo-mang ba lopolloang? Ha e le hantle, lefu la Jesu le bolela eng ho uena?

Ke Eng?

Topollo ke ntho e ’ngoe e lokollang. Ho lokolla e mong ho bolela ho mo tlamolla botlamuoeng kapa kotlong ka ho lefa tefello. Ka kutloisiso ea moea, “ho lopolla” ho bolela ho etsa hore ho tlamolloa sebeng le kotlong ea sona ho etsahale. Ke ka lebaka leo Jesu a ileng a shoa. Joalokaha moapostola oa Mokreste Pauluse a ile a ngola: “Moputso oa sebe ke lefu; empa neo ea mohau ea Molimo ke bophelo bo sa feleng, ka Jesu Kreste, Morena oa rōna.”—Ba-Roma 6:23.

Theko ea ho rekolla ka Mangolong e amahanngoa le ho lefa topollo. Pesaleme ea 49:6-9 (NW) e re: “Ba tšepileng mekhoa ea bona ea ho itlhokomela, le ba tsoelang pele ho ithorisa ka bongata ba maruo a bona, ha ho lea mong ho bona eo ka mokhoa leha e le ofe a ka lopollang leha e se e le ngoan’abo, kapa ho neha Molimo topollo bakeng sa hae; (’me theko ea ho rekolla meea ea bona e boima hoo e khaolitseng ho isa ka nako e sa tsejoeng) hore a ’ne a phele ka ho sa feleng ’me a se ke a bona lebitla.” Topollo ke thekollo e finyelloang ke Molimo, e seng ke motho leha e le ofe ea sa phethahalang.

Lebaka Leo e Hlokahalang ka Lona ke Lefe?

Topollo e hlokahala hobane ntat’a rōna oa pele oa motho, Adama, o ile a etsa sebe. Kahoo o ile a lahla bophelo bo phethahetseng bo sa feleng, ka toka a ahloleloa lefu, ’me qetellong a shoa. (Genese 2:15-17; 3:1-7, 17-19; 5:5) Joaloka bana ba tsoileng ho eena, re futsitse sebe le lefu. Pauluse o ile a ngola: “Joale ka ha sebe se kene lefatšeng ka motho a le mong, ’me lefu le kene ka sebe, ka mokhoa o joalo lefu le aparetse batho bohle, kahobane ba sitiloe bohle.” (Ba-Roma 5:12) E, ‘bohle ba shoa ka Adama.’ (1 Ba-Korinthe 15:22) Ka hona mopesaleme Davida ka nepo o itse: “Ke tsoaletsoe bokhopong, ’mè o nkemoletse sebeng.”—Pesaleme ea 51:5.

Topollo thohakong ea sebe le lefu ea hlokahala haeba ngoana leha e le ofe oa moetsalibe ea tsoileng ho Adama a tla fumana bophelo bo sa feleng. Kaha batho ba sa phethahalang ba ke ke ba fana ka topollo ena, Jehova ka lerato o entse joalo ka Jesu Kreste. Leha ho le joalo, ke eng e rekoang ka topollo? Ha e le hantle, ha Adama a etsa sebe, o ile a lahleheloa ke bophelo ba botho bo phethahetseng bo sa feleng, ka litokelo le litebello tsohle tsa bona. Kahoo, ntho e tšoanang e ile ea rekolloa ka sehlabelo sa topollo sa Jesu.

Seo e Etsang Hore se Khonehe

Toka e ile ea finyelloa ka hore moloko oa motho o latsoe lefu, kotlo ea sebe. Ka hona topollo ke ketso ea mohau oa Molimo le mosa o lerato. Bophelo ba botho bo phethahetseng ba Jesu, ka litokelo le litebello tsohle tsa bona, bo ile ba teloa lefung ’me ha ho mohla bo ileng ba nkoa hape, hobane ha aa ka a tsosoa e le motho oa nama le mali empa e le sebopuoa se sa shoeng sa moea. (1 Ba-Korinthe 15:50; 1 Petrose 3:18) Bophelo ba botho bo entsoeng sehlabelo ba Jesu Kreste ka baka leo bo ile ba tsoela pele ho ba le matla a ho rekolla, kapa a ho lopolla.

E le motho ea se nang sebe, Jesu o ile a ema boemong bo tšoanang le boo Adama ea phethahetseng a neng a le ho bona tšimolohong. Kahobane Jesu a ile a utloa Molimo ho isa lefung, o ile a etsoa Moprista e Moholo ea phahameng, ’me o ile a hlahisa bohlokoa ba sehlabelo sa hae sa botho se phethahetseng leholimong. (Ba-Heberu 9:24-26) Kaha Molimo o ile oa amohela tefello ena e rekollang, Jesu o ne a ka rekolla bana ba lumelang ba tsoileng ho Adama sebeng le lefung ka ho sebelisa molemo oa sehlabelo sa hae molemong oa bona. (1 Ba-Korinthe 6:20; 7:23; 1 Johanne 2:1, 2) Jesu kahoo o “fetohile ea ikarabellang bakeng sa poloko ea ka ho sa feleng ho bohle ba mo utloang.” (Ba-Heberu 5:8, 9, NW) Hona ho etsa hore ho khonehe hore ba fumane boemo bo lokileng pel’a Molimo ka Mora oa oona.

Ho Lopolloa Mang?

Ke bo-mang, joale, ba fumanang molemo topollong ee? Batho ba lumelang tokisetsong ena le bao kahoo ba tlang tumellanong le Molimo. Ka ho o sebeletsa ka botšepehi ba ka lokolloa sebeng le kotlong ea sona ea lefu ’me ba fumana bophelo bo sa feleng.—Johanne 17:3.

Motho oa pele o ne a ka etsa qeto ea hore na o tla utloa Molimo kapa che. O ile a khetha ho se utloe. ‘Adama ha aa thetsoa,’ empa o shoele e le moetsalibe oa ka boomo. (1 Timothea 2:14, NW) Leha ho le joalo, ho thoe’ng ka bana ba tsoileng ho Adama? Ba ne ba ka khetha ho sebeletsa Molimo hamolemohali kamoo matla a bona a sa phethahalang a neng a ka ba neha ka teng kapa ba khetha ho se utloe ’Mōpi oa bona.—Joshua 24:15.

Jesu o tlile “ho neela bophelo ba hae ho ba topollo ea ba bangata.” (Mareka 10:45) Empa “ba bangata” baa ke bafe? Ka ho hlakileng Adama ha aa balelloa hobane e ne e le motho ea phethahetseng eo ka boomo a ileng a khetha ho se utloe Molimo ’me a shoa e le moetsalibe ea sa bakeng, le oa ka boomo. Empa ho thoe’ng ka lelapa la hae le leholo, le baloang ka likete tsa limillione? Ka tefello e lekanang, Jesu Kreste o koala sekheo sa thohako e futsitsoeng e holim’a lelapa la Adama. (Bapisa le 1 Timothea 2:5, 6.) Molemong oa balumeli “ba bangata,” Jesu o sebelisa molemo oa tefello ea hae e rekollang.

Balumeli ba lopolotsoeng ba akarelletsa Bajode le Balichaba, kapa batho ba lichaba. Pauluse o re: “Joale ka ha ho tlōla ha motho a le mong ho tlisitse tsuo holim’a batho bohle, ka mokhoa o joalo ho loka ha motho a le mong le hona ho tlisetsa batho bohle ho loka ho neang bophelo.” (Ba-Roma 5:18) Ka ho shoela sefateng, “Kreste o . . . lopolotse [Bajode] thohakong ea molao, ka ho etsoa thohako bakeng sa [bona]; hobane ho ngoliloe, ho thoe: Ho rohakoe mang le mang ea fehiloeng sefateng.” (Ba-Galata 3:13; Deuteronoma 21:23) Ba-Roma 4:11 e supa Balichaba ha e bolela hore ha Abrahama, ntat’a-moholo’a Bajode, a ne a e-so ho bolotsoe, e bile “ntat’a bohle ba lumelang, leha ba sa ka ba bolla.” Kahoo, he, sehlabelo sa topollo sa Jesu se tsoela Bajode ba lumelang le Balichaba molemo.

Tsela e nkoang ke motho e mong le e mong e rera hore na o tla rua molemo sehlabelong sa Jesu kapa che. Joaloka Adama, ba khopo ka boomo ha ba qobelloe hore ba fumane molemo oa topollo le bophelo bo sa feleng. Joalokaha Kreste a itse: “Ea lumelang ho Mora, o na le bophelo bo sa feleng; ’me ea sa lumeleng ho Mora, a ke ke a bona bophelo, empa bohale ba Molimo bo sala holim’a hae.” (Johanne 3:36) Topollo e boetse e etsa hore tsoho e khonehe bakeng sa bafu ba khopolong ea Molimo. (Johanne 5:28, 29) Haeba ba ipaka ba utloa le ho ananela, ho sebelisoa ha melemo ea topollo ho bona ho bolela hore ba tla phela ka ho sa feleng. Empa bakeng sa ba phelang ‘mehleng ena ea qetello,’ ho na le monyetla oa ho phela ka ho sa feleng ho sa hlokahale ho hang hore ba shoe.—2 Timothea 3:1-5; Mattheu 24:3-14, 21, 34; Johanne 11:25, 26.

Mabaka a Teboho

Mang le mang ea lakatsang ho rua molemo topollong o tlameha ho ba le kananelo e tebileng bakeng sa eona. ’Me teboho e joalo ke e loketseng hakaakang! Ha e le hantle, topollo e ile ea hloka lerato le lengata ka lehlakoreng la Molimo le Kreste.

Jehova Molimo o ile a bontša lerato le leholo ha a lokisetsa topollo ka lefu la Mora oa hae. Jesu o itse: “Molimo o ratile lefatše [la batho] hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng. Hobane Molimo o romile Mora oa oona lefatšeng, e seng hore a ahlole lefatše, empa e le hore lefatše le bolokoe ke eena.” (Johanne 3:16, 17) Na ha ua lokela ho ananela pontšo ee ea lerato la Molimo?

Nahana hape ka botebo ka lerato la Jehova ka ho etsa tokisetso bakeng sa topollo. Pele Mora oa Molimo a romeloa lefatšeng ho tla phela le ho shoa e le motho ea phethahetseng, o ne a ile a phela pele e e-ba motho. E ne e le “letsibolo la tsohle tse hloliloeng,” eo ka eena ‘ho hloliloeng tsohle tse maholimong le tse lefatšeng, tse bonoang le tse sa bonoeng.’ (Ba-Kolosse 1:13-16) Jehova o ne a rata Mora oa hae hakaakang! Leha ho le joalo, Molimo ha oa ka oa romela lefatšeng lengeloi leha e le lefe la a limillione a lokileng. Lerato la oona bakeng sa batho le ne le le leholo hoo o ileng oa romela Mora oa oona oa letsibolo.

Hape, nahana ka lerato le tebileng leo Jesu a le bontšitseng mabapi le topollo. E le sebopuoa sa moea leholimong, e ne e le “motlatsi” oa Molimo. Ke ’nete hore ‘Mor’a Molimo o ne a thabela bana ba batho.’ (Liproverbia 8:22-31) Leha ho le joalo, ho ne ho se bonolo bakeng sa hae ho tloha leholimong, ka maemo a lona a matle haholo kamanong le Ntat’ae le limiriade tsa mangeloi a lokileng. Sebakeng se phahameng se botleng seo a neng a le ho sona sa leholimo, Mor’a Molimo o ne a ka bona maemo a mabe a lefatšeng le kamoo sebe le lefu li sohlokang batho ka teng. Hape o ne a tseba hore ho fana ka topollo ho ne ho tla hloka hore a shoe. Leha ho le joalo, o ile a “nka sebopeho sa mohlanka, ka ho iketsa ea tšoanang le batho. ’Me . . . o ikokobelitse, a iketsa ea utloang ho isa lefung.” Bakeng sa botšepehi bo joalo, Jesu o ile a tsosetsoa bophelong bo khanyang ba leholimo. (Ba-Filippi 2:5-11) Ke lerato le lekaakang leo a le bontšitseng mabapi le topollo! Na u ananela seo Jesu a se entseng?

U Tla Etsa Eng?

Mosebeletsi ea phahameng oa kereke oa Lenyesemane Richard oa Chichester (oa hoo e ka bang ka 1198-1253) o kile a rapela ka lekhetlo le leng hore eka banna le basali ba ka “tseba Jesu Kreste ka ho hlakileng haholoanyane, ba mo rata ka matla haholoanyane, le ho mo latela haufi haholoanyane.” Sehlabelo sa topollo sa Jesu ka sebele se fana ka lebaka le le leng le utloahalang la ho batla ho mo tseba, ho mo rata, le ho mo latela.

Ha e ne e se ka lebaka la topollo, joaloka baetsalibe re ne re tla shoa ntle ho tšepo, hobane “tsenene ea lefu ke sebe.” (1 Ba-Korinthe 15:56) Ka baka leo, hore u pholosoe lefung le neng le tla hlahisoa ke hore u hlabiloe ke sebe, u tlameha ho etsa joang? Ho hlokahala hore u ithute ka tokisetso ea Molimo ea poloko ka Jesu Kreste. Joale u tlameha ho bontša hore u lumela topollo. Joang? Ka ho bontša kananelo e tlohang botebong ba pelo bakeng sa eona, u inehele ho Molimo, ’me u bolelle ba bang ka tokisetso ena e hlollang ea poloko.

Tsela ena e ka u beha har’a “bongata bo boholo ba batho” bo ‘tsoang mahlomoleng a maholo, ’me bo hlatsoitse liaparo tse telele tsa bona le ho li soeufatsa maling a Konyana,’ Jesu Kreste. (Tšenolo 7:9, 14) Tšepo ea bona ke ea bophelo bo sa feleng paradeiseng ea lefatšeng. (Luka 23:43) E, ’me u ka ba karolo ea letšoele leo le thabileng, haeba lefu la Jesu e hlile e le ntho e ’ngoe ea bohlokoa ho uena.

[Setšoantšo se leqepheng la 4]

Jesu ea se nang sebe o ile a ema boemong bo tšoanang le boo Adama ea phethahetseng a neng a le ho bona

[Setšoantšo se leqepheng la 6]

Na u ananela se hlileng se boleloang ke lefu la Jesu?